Worshipim Jehovah Long Full Heart Bilong Iu!
“Jehovah, plis, iu tingim wei wea mi faithful for duim wanem iu laekem long full heart bilong mi.”—2 KI. 20:3.
SONG: 52, 65
1-3. Wanem nao hem minim for worshipim Jehovah long “full heart” bilong iumi? Storyim example.
IUMI evriwan no perfect and iumi savve duim olketa mistek. Iumi thankiu long Jehovah from hem provaedem datfala ransom and hem redi for forgivim iumi. So sapos iumi hambol and iumi repent, iumi savve askem hem for forgivim iumi. Iumi savve sure Jehovah bae no panisim iumi fitim olketa sin wea iumi duim. (Ps. 103:10) Nomata olsem, for Jehovah acceptim worship bilong iumi, iumi mas “worshipim hem long full heart bilong iumi.” (1 Chron. 28:9) Hao nao iumi savve duim olsem nomata iumi no perfect?
2 For savve long ansa bilong datfala kwestin, bae iumi storyim wanem hem happen long laef bilong King Asa and King Amaziah. Tufala king hia duim olketa gudfala samting, bat tufala duim olketa mistek tu bikos tufala no perfect. Nomata olsem, Bible sei: “Asa hem faithful long Jehovah for full laef bilong hem.” (2 Chron. 15:16, 17; 25:1, 2; Prov. 17:3) Hem evritaem traem best for duim olketa samting wea mekem Jehovah hapi and hem worshipim Jehovah long full heart bilong hem. (1 Chron. 28:9, footnote) Bat Amaziah hem no worshipim Jehovah long “full heart bilong hem.” Bihaen Amaziah faetem and winim olketa enemy bilong God, hem tekem olketa idol bilong olketa hia and start for worshipim olketa.—2 Chron. 25:11-16.
3 Man wea worshipim God long full heart, hem lovem Jehovah and laek for worshipim hem for olowe. Long Bible, datfala word “heart” savve piksarem wanem kaen man nao iumi. And tu, hem savve minim tingting bilong iumi, wanem iumi lovem tumas, wanem iumi laek for duim long laef, and why iumi duim wanfala samting. Nomata iumi no perfect, iumi savve worshipim Jehovah long full heart bilong iumi. Iumi worshipim hem bikos iumi barava laek for duim datwan, and no bikos hem samting wea iumi mas duim nomoa, or hem just wei bilong iumi nomoa for duim datwan.—2 Chron. 19:9.
4. Wanem nao bae iumi storyim long disfala study?
4 Iumi savve lanem moa samting abaotem wei for worshipim Jehovah long full heart taem iumi storyim wanem hem happen long laef bilong King Asa, and nara thrifala king bilong Judah wea faithful. Olketa hia hem Jehoshaphat, Hezekiah, and Josiah. Nomata olketa king hia duim samfala mistek, olketa gohed for duim wanem Jehovah laekem. Jehovah savve olketa faithful for worshipim hem. Why nao God ting olsem abaotem olketa, and hao nao iumi savve followim example bilong olketa?
ASA “WORSHIPIM JEHOVAH LONG FULL HEART” BILONG HEM
5. Wanem nao Asa duim taem hem kamap king?
5 Asa hem mek-thri king bilong Judah bihaen nation bilong Israel divaed long kingdom bilong Israel and kingdom bilong Judah. Taem Asa hem kamap king bilong Judah, hem distroem olketa idol wea pipol worshipim and raosem olketa man wea durong long temple. Asa aotem tu granmami bilong hem from position bilong hem bikos hem wakem wanfala idol. (1 Ki. 15:11-13) Asa encouragem tu pipol long Judah for “worshipim Jehovah” and for obeyim ‘datfala Law and wanem God talem.’—2 Chron. 14:4.
6. Wanem nao Asa duim taem olketa bilong Ethiopia kam for faetem olketa long Judah?
6 Long first tenfala year wea Asa hem rul, evriwan long Judah stap long peace. Then Zerah, king bilong Ethiopia kam witim 1,000,000 soldia and 300 chariot for faetem olketa long Judah. (2 Chron. 14:1, 6, 9, 10) Long datfala taem, wanem nao Asa hem duim? Hem barava sure Jehovah bae helpem pipol bilong hem. So hem prea long Jehovah for helpem olketa winim datfala faet. (Readim 2 Chronicles 14:11.) Samfala taem Jehovah letem pipol bilong hem for winim faet nomata olketa king bilong Israel no faithful long hem. Hem duim olsem mekem pipol savve hem nao trufala God. (1 Ki. 20:13, 26-30) Bat long datfala faet, Jehovah helpem pipol bilong hem bikos Asa hem barava trustim Jehovah for helpem olketa. Jehovah ansarem prea bilong Asa and olketa winim datfala faet. (2 Chron. 14:12, 13) Bihaen, King Asa duim wanfala mistek taem hem askem king bilong Syria for helpem olketa and hem no askem Jehovah. (1 Ki. 15:16-22) Nomata olsem, Jehovah luksavve Asa hem lovem Hem. Asa barava “faithful long Jehovah long full laef bilong hem.” Wanem nao iumi savve duim for followim gudfala example bilong Asa?—1 Ki. 15:14.
7, 8. Hao nao iumi savve followim example bilong Asa?
7 Hao nao bae iumi savve sapos iumi worshipim Jehovah long full heart bilong iumi or nomoa? Hem gud for tingim olketa kwestin hia: ‘Waswe, bae mi obeyim Jehovah nomata long taem wea hem no isi? Waswe, mi disaed strong for no duim eni samting wea bae affectim kongregeson?’ Tingim wei wea Asa mas no fraet for aotem granmami bilong hem from position bilong hem! Samfala taem
iumi mas no fraet olsem Asa. Olsem example, waswe sapos samwan long famili or wanfala fren hem duim sin and hem no repent gogo hem disfellowship? Waswe, bae iu disaed strong for no associate witim hem? Wanem nao bae iu duim?8 Olsem Asa, samfala taem maet pipol againstim iumi and hem no isi for deal witim datwan. Maet olketa skulfren or olketa teacher tok spoelem iumi bikos iumi wanfala Jehovah’s Witness. Maet pipol wea iumi waka witim mekfani long iumi bikos iumi no waka ovataem, or bikos iumi savve askem day off for duim olketa spiritual samting. Taem kaen samting olsem happen long iumi, hem gud for iumi trustim God olsem Asa hem duim. Prea long Jehovah, no fraet, and gohed for duim stret samting. Hem gud for tingim diswan, God hem strongim Asa and hem bae strongim iu tu.
9. Hao nao wei for duim preaching waka savve mekem Jehovah hapi?
9 Asa no tingim hemseleva nomoa bat hem encouragem olketa narawan for worshipim Jehovah. Iumi tu laek helpem pipol for worshipim Jehovah. Hem savve taem iumi story abaotem hem long olketa narawan. Masbi Jehovah hapi tumas taem hem lukim iumi duim datwan bikos iumi lovem hem and from iumi tingim pipol and future bilong olketa!
JEHOSHAPHAT WORSHIPIM JEHOVAH
10, 11. Hao nao iumi savve followim example bilong Jehoshaphat?
10 Jehoshaphat hem faithful for duim wanem God laekem olsem dadi bilong hem, Asa. (2 Chron. 20:31, 32) Wanem nao hem duim? Hem encouragem pipol for gohed worshipim Jehovah, olsem dadi bilong hem duim. Hem sendem olketa man for go long olketa taon bilong Judah for teachim “Law bilong Jehovah” long pipol. (2 Chron. 17:7-10) Hem go tu long olketa territory bilong kingdom bilong Israel long north, long pipol wea stap long olketa maunten long Ephraim, for olketa kam bak long Jehovah. (2 Chron. 19:4) King Jehoshaphat hem “worshipim Jehovah long full heart bilong hem.”—2 Chron. 22:9.
11 Distaem, Jehovah laekem pipol evriwea long world for lane abaotem hem, and iumi savve share long disfala waka for teachim pipol. Waswe, iu markem goal for share insaed disfala waka evri month? Waswe, iu laek for teachim Bible long olketa narawan mekem olketa tu savve worshipim Jehovah? Waswe, iu prea long Jehovah abaotem datwan? Sapos iu waka hard, Jehovah bae helpem iu for garem wanfala Bible study. Waswe, iu willing for study witim samwan nomata long taem wea iu markem finis for duim samting for iuseleva? And olsem Jehoshaphat wea trae for helpem olketa narawan for worshipim Jehovah moa, iumi tu savve trae for helpem olketa wea inactive for kam bak long Jehovah. Olketa elder tu mekem arrangement for go visitim olketa wea disfellowship wea stap long territory bilong kongregeson wea maet lusim finis olketa nogud samting wea olketa bin duim bifor.
12, 13. (a) Wanem nao Jehoshaphat duim taem hem fraet? (b) Why nao hem gud for iumi followim example bilong Jehoshaphat?
12 Jehoshaphat hem trustim Jehovah olsem dadi bilong hem Asa taem wanfala big army kam for faetem olketa long Judah. (Readim 2 Chronicles 20:2-4.) Jehoshaphat fraet and hem askem Jehovah for helpem hem. Insaed prea bilong hem, hem talem long Jehovah olketa no fit for winim datfala enemy. Hem talem tu, hem and olketa pipol bilong hem no savve wanem for duim. Jehoshaphat sure Jehovah bae helpem olketa. Hem sei: “Mifala luk long iu nao for helpem mifala.”—2 Chron. 20:12.
13 Olsem Jehoshaphat, samfala taem maet iumi no savve wanem for duim taem iumi kasem 2 Cor. 4:8, 9) Bat tingim samting wea Jehoshaphat duim. Hem prea long Jehovah front long evriwan and talem hao hem and pipol bilong hem needim help. (2 Chron. 20:5) Olketa hed long famili savve followim example bilong Jehoshaphat. Prea long Jehovah for helpem iu and famili for savve wanem for duim taem iufala kasem problem. No feel shame for prea long Jehovah abaotem datwan front long famili bilong iu. Taem iu duim olsem, olketa bae luksavve iu trustim Jehovah. Jehovah helpem Jehoshaphat, and hem bae helpem iu tu.
wanfala problem, and maet iumi fraet tu. (HEZEKIAH GOHED FOR DUIM STRET SAMTING
14, 15. Wanem nao Hezekiah duim wea showimaot hem barava trustim God?
14 King Hezekiah tu hem “gohed faithful long Jehovah.” Hem duim olsem nomata dadi bilong hem worshipim olketa idol. Hezekiah “aotem olketa hae ples, pisisim olketa ston post, and katem daon olketa timba post wea pipol worshipim. And tu, hem pisisim datfala copper snek wea Moses wakem” bikos olketa Israelite worshipim datwan. Hezekiah faithful for worshipim Jehovah. Hem “evritaem followim olketa law wea Jehovah givim long Moses.”—2 Ki. 18:1-6.
15 Taem King Hezekiah hem rul, army bilong Assyria kam for attakim Judah and olketa sei bae olketa distroem Jerusalem. King bilong Assyria, Sennacherib, tok spoelem Jehovah and hem trae for mekem Hezekiah for sarenda. Long datfala taem, Hezekiah barava trustim Jehovah and prea long hem for helpem hem. Hezekiah savve Jehovah garem bigfala paoa winim olketa bilong Assyria and savve sevem pipol bilong hem. (Readim Isaiah 37:15-20.) God ansarem prea bilong hem taem hem sendem wanfala angel for killim dae 185,000 soldia bilong Assyria.—Isa. 37:36, 37.
16, 17. Wanem nao iumi savve duim for followim example bilong Hezekiah?
16 Bihaen, Hezekiah hem sik and klosap for dae. Long datfala hard taem, hem askem Jehovah for no forgetim wei wea hem faithful long hem and for Jehovah helpem hem. (Readim 2 Kings 20:1-3.) Jehovah herem prea bilong Hezekiah and hem healim hem. Iumi lanem insaed long Bible, iumi no expectim Jehovah for duim mirakol for healim iumi taem iumi sik or for mekem iumi laef longtaem. Bat olsem Hezekiah, iumi savve depend long Jehovah for helpem iumi. Iumi savve sei long Jehovah: “Jehovah, plis no forgetim wei wea mi evritaem faithful for duim wanem iu laekem and worshipim iu long full heart bilong mi.” Waswe, iu trustim Jehovah bae evritaem lukaftarem iu, nomata long taem wea iu sik tu?—Ps. 41:3.
17 Wanem moa iumi savve duim for followim example bilong Hezekiah? Maet eni samting hem start for affectim wei wea iu fren witim Jehovah, or worship bilong iu. Olsem example, distaem staka pipol mekhae tumas long olketa man. Olketa mekhae long pipol wea famous nomata olketa no savve long olketa hia. Staka pipol spendem tumas taem for read abaotem olketa and lukluk long piksa bilong olketa. Or maet olketa iusim social network for story witim olketa pipol olsem long Internet. Hem tru, iumi maet iusim social network for story witim olketa famili and olketa fren bilong iumi. Bat maet iumi savve weistim tumas taem long olketa social network hia. Maet iumi savve kamap praod sapos staka pipol sei olketa laekem olketa piksa bilong iumi, or olketa koment wea iumi putim long Internet. Or sapos iumi savve olketa narawan no lukluk long olketa piksa hia, maet iumi start for feel nogud. Iumi savve lane from example bilong aposol Paul, Aquila, and Priscilla. Waswe, iu tingse olketa laek for savve long evri sismol samting wea pipol duim, especially olketa wea no worshipim Acts 18:4, 5, 26) Hem gud for tingim olketa kwestin hia: ‘Waswe, mi mek sure mi no mekhae tumas long olketa man? Waswe, mi traem best for no weistim taem long olketa samting wea no important?’—Readim Ephesus 5:15, 16.
Jehovah? Bible sei Paul hem ‘barava busy for preachim message bilong God.’ And Priscilla and Aquila iusim taem bilong olketa for preach and for “minim gud moa teaching bilong God” long nara pipol. (JOSIAH OBEYIM OLKETA LAW BILONG JEHOVAH
18, 19. Wanem nao iumi savve duim for followim example bilong Josiah?
18 King Josiah tu obeyim olketa law bilong Jehovah “long full heart bilong hem.” (2 Chron. 34:31) Great grani bilong Josiah hem Hezekiah. Taem hem young, “hem start for worshipim God bilong grani bilong hem, David.” And taem hem 20 year, hem start for aotem olketa idol wea pipol worshipim long Judah. (Readim 2 Chronicles 34:1-3.) Josiah waka hard and duim staka samting winim olketa nara king wea rul long Judah, for mekem Jehovah hapi. Then wanday, hae priest hem faendem insaed long temple wanfala buk wea garem olketa Law bilong God. Maet diswan hem buk wea Moses nao raetem! Taem secretary readim datfala buk long Josiah, hem luksavve hem mas duim samfala samting moa for worshipim Jehovah long full heart bilong hem. Hem encouragem olketa narawan for duim sem samting tu. From datwan, pipol long Israel “gohed faithful for worshipim Jehovah” long taem wea Josiah hem laef.—2 Chron. 34:27, 33.
19 Sapos iu wanfala young wan, iu savve followim example bilong Josiah mekem iu savve barava fren gud witim Jehovah. Maet Josiah luksavve Jehovah hem willing for forgivim man bikos God forgivim grandadi bilong hem King Manasseh taem hem repent. Iu tu savve lane from olketa mature brata and sista insaed long kongregeson and from olketa long famili bilong iu. Olketa savve storyim staka gud samting wea Jehovah bin duim for olketa. And tu, tingim feeling bilong Josiah bihaen olketa readim Law bilong God long hem. Hem barava laek for mekem Jehovah hapi and hem kwiktaem duim samting. Taem iu readim Bible, datwan savve helpem iu for gohed obeyim Jehovah. Datwan bae strongim wei wea iu fren witim Jehovah and bae iu barava hapi. Then bae iu laek for story abaotem Jehovah long nara pipol. (Readim 2 Chronicles 34:18, 19.) Taem iu studyim Bible, maet iu luksavve iu savve duim samfala samting moa long worship bilong iu. Sapos datwan happen, traem best bilong iu for duim datwan, olsem Josiah hem duim.
WORSHIPIM JEHOVAH LONG FULL HEART BILONG IUMI!
20, 21. (a) Wanem nao iumi lanem from example bilong fofala king bilong Judah? (b) Wanem nao bae iumi storyim long nextfala study?
20 Wanem nao iumi lanem from example bilong fofala king hia bilong Judah wea worshipim Jehovah long full heart bilong olketa? Olketa man hia laek tumas for mekem Jehovah hapi and for faithful long Jehovah long full laef bilong olketa. Olketa depend long God taem olketa strongfala enemy kam faet againstim olketa. Samting wea barava important nao olketa faithful long Jehovah bikos olketa lovem hem.
21 Nomata fofala king hia no perfect and duim samfala mistek, Jehovah hem hapi long olketa. Hem savve wanem nao insaed heart bilong olketa, and hem luksavve olketa barava lovem hem. Iumi tu no perfect and iumi savve duim olketa mistek. Bat Jehovah bae hapi long iumi taem hem lukim iumi worshipim hem long full heart bilong iumi. Long nextfala study, bae iumi storyim wanem iumi savve lanem from mistek wea olketa king hia duim.