1. Olketa wanem hard samting nao olketa Christian long first century feisim?

MIDOLWAN 62 and 64 C.E., wanfala taem aposol Peter raet for olketa “wea stap olsem olketa stranger long Pontus, Galatia, Cappadocia, Asia, and Bithynia.” (1 Pet. 1:1) Olketa brata and sista hia long Asia Minor, wea garem didifren culture, needim encouragement and direction. Olketa kasem persecution and pipol tok spoelem olketa. Olketa feisim tu olketa “bigfala test” wea olsem fire. And olketa stap long taem wea hem danger tumas. Peter sei: “Taem wea evri samting bae finis hem klosap nao.” Tru tumas, no kasem tenfala year nomoa, olketa barava distroem Jerusalem. Wanem nao helpem olketa Christian long datfala taem for deal witim olketa barava hard taem hia?—1 Pet. 4:4, 7, 12.

2, 3. Why nao Peter encouragem olketa brata for kaen and welkamim narawan? (Lukim piksa long start bilong study.)

² Wanfala samting Peter encouragem olketa brata for duim hem for olketa “hapi for welkamim narawan.” (1 Pet. 4:9) Long Greek languis, datfala toktok “welkamim” hem minim for “tingim and kaen long olketa stranger.” Bat tingim, Peter laekem olketa brata  and sista for welkamim each other nomata olketa associate and savve long each other finis. Wanem gud samting nao olketa kasem taem olketa showimaot wei for welkam?

³ Diswan mekem olketa fren gud tugeta. Waswe, iu tingim enitaem samwan invaetem iu long haos bilong hem? Waswe, iu rememberim olketa gud samting wea iufala enjoyim tugeta? Taem iu invaetem samfala long kongregeson, diswan helpem iufala for fren gud tugeta and bae iu savve gud long olketa. Olsem wei wea olketa Christian long taem bilong Peter mas fren gud bikos olketa hard taem wea olketa feisim hem kamap worse, iumi tu need for duim sem samting from iumi stap long “olketa last day.”—2 Tim. 3:1.

4. Olketa wanem kwestin nao bae iumi storyim long disfala study?

⁴ Hao nao iumi savve kaen and “welkamim narawan”? Hao nao iumi savve winim olketa samting wea mekem iumi hol bak for welkamim narawan? Wanem nao savve helpem iumi for showimaot gudfala wei taem narawan invaetem iumi?

5. Hao nao iumi savve showimaot wei for welkam long olketa meeting?

⁵ Long olketa meeting: Jehovah and organization bilong hem invaetem iumi for kam kaikaim spiritual kaikai long olketa meeting. Taem olsem, iumi laek welkamim evriwan wea attend. (Rome 15:7) Jehovah invaetem olketa niu wan wea kam long meeting, so iumi tu laek for mekem olketa feel welkam nomata wanem kaen kaleko olketa werem and lukluk bilong olketa. (Jas. 2:1-4) Sapos niu wan kam seleva long meeting, askem hem for sidaon witim iu. Maet hem hapi for iu helpem hem minim wanem hem gohed long meeting or for faendem olketa scripture. Diswan nambawan wei for showimaot iumi “evritaem kaen long pipol and welkamim olketa.”—Rome 12:13.

6. Olketa hu nao iumi laekem tumas for invaetem?

⁶ Kap tea or kaikai: Long taem bilong Bible, olketa savve welkamim man taem olketa invaetem hem for go kaikai long haos. (Jenesis 18:1-8; Jajis 13:15; Luke 24:28-30) Wei for duim olsem showimaot olketa laek for fren gud and stap gud witim narawan. Olketa hu nao iumi laekem tumas for invaetem? Olketa brata and sista long kongregeson bilong iumi. From disfala world gogo for worse, iumi need for depend long each other, and faithful and fren gud witim each other. Wanfala interesting samting, long 2011, long Bethel long United States, Governing Body changem taem for duim Wastaoa Study from 6:45 p.m. go long 6:15 p.m. Why nao olsem? Taem olketa mekem datfala announcement, olketa sei datwan hem for helpem olketa Bethelite garem taem for invaetem or acceptim invitation from nara Bethelite bikos meeting hem finis early. Olketa nara branch office tu duim diswan. Disfala arrangement mekem olketa Bethelite for savve gud long each other.

7, 8. Hao nao iumi savve kaen and welkamim olketa visiting speaker?

⁷ Taem olketa brata kam for givim tok long kongregeson, olsem circuit overseer, visiting speaker from nara kongregeson, and samfala taem brata from branch office, diswan givim iumi chance for showimaot welkam. (Readim 3 John 5-8.) Wanfala naes wei hem for invaetem olketa for kap tea or kaikai witim iumi. Waswe, iu savve duim olsem?

⁸ Wanfala sista long United States hem sei: “Long olketa year wea go pas, mi and hasband bilong mi garem chance for invaetem staka visiting speaker and waef bilong olketa long haos bilong mifala. Evritaem mifala duim olsem hem strongim spiritual saed bilong mifala and mifala barava enjoyim. Mifala nating regret from mifala duim olsem.”

9, 10. (a) Hu nao iumi savve invaetem for kam stap long haos? (b) Waswe, man wea garem smol haos savve provaedem ples for stap? Storyim example.

 ⁹ Kam stap long haos: Long taem bilong Bible, wei for welkam savve minim for invaetem visitor for kam stap long haos. (Job 31:32; Philem. 22) Distaem tu, iumi need for duim sem samting. Staka taem circuit overseer wea visitim olketa kongregeson needim ples for stap. Olketa wea attendim olketa theocratic skul and olketa construction volunteer maet needim tu ples for stap. Natural disaster savve spoelem haos bilong samfala famili, so olketa needim ples for stap go kasem taem wea olketa buildim bak haos bilong olketa. Iumi shud no tingse olketa wea garem big or gud haos nomoa fit for helpem narawan. Maet olketa bin help staka taem finis. Waswe, iu savve invaetem olketa for stap long haos bilong iu nomata hem smol nomoa?

¹⁰ Wanfala brata long South Korea tingim bak taem wea hem savve invaetem olketa wea kam for attendim theocratic skul for stap long haos bilong hem. Hem sei: “Mi hol bak firstaem bikos mitufala just marit and haos hem smol tu. Nomata olsem, mifala barava hapi taem olketa student kam stap witim mifala. Diswan mekem mitufala lukim wei wea hasband and waef savve hapi taem tufala worshipim Jehovah, and aftarem olketa spiritual goal tugeta.”

11. Why nao iumi need for welkamim olketa wea niu long kongregeson?

¹¹ Niu long kongregeson: Maet eni brata, sista, or samfala famili muv kam long ples bilong iu. Samfala maet kam for help long ples wea needim pablisa for preach. Olketa pioneer tu maet kasem assignment for kam help long kongregeson. Diswan hem bigfala change for evriwan hia. Olketa bae trae for getius long niu ples, kongregeson, and maet languis or culture tu. Taem iumi invaetem olketa for kap tea, kaikai, or go tugeta long eni ples, diswan bae helpem olketa for garem olketa niu fren and for getius long evri change hia.

12. Wanem experience nao showimaot iumi no needim staka samting for showimaot welkam?

¹² Iumi no needim staka samting taem iumi welkamim visitor. (Readim Luke 10:41, 42.) Wanfala brata storyim taem hem and waef start for duim missionary waka. Hem sei: “Mitufala young, no savve long staka samting, and mifala misstim tumas olketa long hom. Wanfala evening, waef bilong mi barava tingim olketa long hom, mi trae for helpem hem, bat hem still feel sorre. Then long samting olsem 7:30 p.m., wanfala sista noknok long door and hem tekem kam thrifala orange for mitufala. Hem kam for welkamim mitufala. So mitufala invaetem hem long haos and givim hem wata for drink. Then mifala drink tea and hot chocolate. Mitufala no savve yet long Swahili languis and hem no savve tu long English. Bihaen datfala taem mifala hapi and start for fren gud witim olketa brata and sista.”

13. Wanem gud samting nao bae iu kasem taem iu welkamim narawan?

¹³ Enitaem iu hol bak for invaetem narawan? Sapos olsem, maet iu missim chance for enjoyim wei for associate tugeta and garem olketa gudfala fren for olowe. Wei for garem visitor bae helpem iu for no lonely tumas. Bat maet iu ting olsem, why nao samfala hol bak for welkamim narawan? Samfala reason hem stap why olketa duim olsem.

14. Wanem nao iumi savve duim sapos iumi taed or no garem inaf taem for invaetem or acceptim invitation from narawan?

¹⁴ Taem and strong: Pipol bilong Jehovah barava busy and garem staka nara waka for duim. Maet samfala tingse from olketa no garem taem or olketa taed tumas, olketa no fit for invaetem narawan. Sapos iu feel olsem, maet iu need for changem schedule bilong iu mekem iu garem chance for showimaot wei for  welkam and acceptim invitation from narawan. Diswan important bikos Bible talem iumi for kaen and welkamim narawan. (Heb. 13:2) So hem gud for iumi markem taem for duim diswan. Bat maet iu need for katem daon taem wea iu spendem for duim olketa nara samting wea no important.

15. Why nao maet samfala tingse olketa no fit for invaetem narawan?

¹⁵ Feeling bilong iuseleva: Waswe, enitaem iu laek invaetem narawan bat iu tingse iu no fit for duim datwan? Samfala shame and wari nogud olketa wea kam bae boring nomoa or no feel free for story. Olketa narawan no garem staka selen and maet tingse olketa no savve givim wanem olketa narawan long kongregeson savve givim. Tingim diswan, for garem naes and big haos hem no important, bat sapos haos hem stret, klin, and iu welkamim pipol, datwan nao important.

16, 17. Wanem nao iu savve duim sapos iu wari abaotem wei for invaetem samwan?

¹⁶ Staka savve wari abaotem wei for invaetem narawan. Wanfala elder long Britain sei: “For redyim samting for olketa visitor savve mekem man wari lelebet. Bat gud samting wea man kasem from datwan and wei wea man hapi hem barava winim datfala feeling for wari. Diswan semsem tu witim evri samting iumi duim for worshipim Jehovah. Mi savve enjoyim wei for story tugeta witim olketa visitor nomata mifala drink coffee nomoa.” Hem gud for evritaem showimaot iu interest long olketa visitor bilong iu. (Phil. 2:4) Klosap evriwan laek for storyim experience bilong olketa. So taem iumi associate tugeta hem nomoa chance for herem experience bilong narawan. Nara elder sei: “Taem mi invaetem olketa long kongregeson, datwan helpem mi for savve gud long olketa and for faendaot hao olketa kasem truth.” Evriwan savve hapi taem iu showimaot iu interest long olketa.

¹⁷ Wanfala pioneer sista wea provaedem accommodation for olketa student wea attendim olketa theocratic skul, hem sei: “Firstaem mi wari from mi garem simpol haos nomoa and mi garem olketa old furniture. Bat waef bilong wanfala instructor long skul hia talem toktok wea mekem mi feel gud. Hem sei taem hem and hasband duim traveling waka, tufala hapi for stap witim olketa wea garem spiritual tingting nomata olketa no garem staka material samting, and tu, olketa hia garem sem goal for duim wanem Jehovah laekem and garem simpol laef. Diswan mekem mi tingim wanem mami talem mifala taem mifala smol. Hem sei: ‘Hem gud for man kaikai drae nomoa witim pipol wea garem love.’” (Provebs 15:17) So taem love muvim iu for invaetem narawan, iu no need for wari.

18, 19. Hao nao wei for invaetem narawan savve helpem iumi for winim eni nogud feeling iumi garem long narawan?

¹⁸ Tingting bilong iu abaotem olketa narawan: Waswe, iu no laekem wei bilong samwan long kongregeson bilong iu? Datfala feeling maet mekem iu no really laekem hem and sapos iu no trae hard for changem datwan, bae feeling hia stap olowe. From wei bilong iutufala hem difren, datwan maet mekem iu no interest for invaetem hem. Or maet iu no laek for invaetem samwan from iu no forgetim nogud samting wea hem duim long iu bifor.

¹⁹ Bible sei iumi mas showimaot welkam, nomata samwan hem enemy bilong iu. Datwan savve mekem iumi fren gud witim olketa narawan. (Readim Rome 12:20.) For duim olsem savve katem daon wei for feel nogud and bae hem mekem kros bilong iumi cold daon. Maet diswan savve helpem iu lukim olketa gudfala wei bilong hem wea Jehovah lukim dastawe Hem leadim hem kam long truth. (John 6:44) Sapos love nao muvim iu for invaetem samwan wea no expectim eni invitation, diswan savve startim wei for fren gud tugeta. Hao nao iumi savve sure love nao muvim iumi for invaetem samwan? Wanfala wei hem for followim Philippi 2:3 wea sei: “Iufala mas hambol and  ting long narawan olsem hem winim iufala.” Iumi shud trae tingim olketa samting wea olketa brata and sista duim wea winim wanem iumi duim. Olsem faith bilong olketa, wei wea olketa gohed strong nomata olketa kasem test, no fraetem man, or garem olketa nara gudfala wei. Datwan bae mekem love bilong iumi for olketa kamap moa strong and mekem hem isi for iumi invaetem olketa long haos.

20. Hao nao iumi savve showimaot iumi tinghae long wanfala invitation and why nao olsem?

²⁰ Taem David raetem psalm, hem sei: “Lod [Jehovah], hu nao hemi fitim fo go insaet long Tambuhaos blong yu?” (Sams 15:1) Bihaen datwan, hem storyim olketa spiritual wei wea God laekem for pipol wea hem invaetem for garem. Wanfala wei hia, hem for duim wanem iu promisim. Bible sei: “Hemi gohed olowe fo duim olketa samting wea hemi promisim, nomata hemi had tumas long hem.” (Sams 15:4) So taem iumi acceptim invitation, iumi mas no change mind sapos no eni gudfala reason for duim datwan. Maet man wea invaetem iumi redyim finis evri samting, and sapos iumi no go iumi mekem hem hard waka nating. (Matt. 5:37) Samfala taem pipol acceptim invitation finis, bat olketa no go, bikos olketa acceptim nara invitation wea olketa tingse hem gud winim datwan. Waswe, wei for duim olsem showimaot love and respect? Iumi shud hapi nomoa and tinghae long eni samting wea olketa fit for provaedem. (Luke 10:7) Bat sapos samting kamap wea iumi no savve changem wea mekem hard for iumi go, iumi showimaot love taem iumi talem man wea invaetem iumi.

21. Taem iumi respectim culture bilong pipol, hao nao datwan showimaot iumi gudfala visitor?

²¹ Hem important tu for respectim culture bilong pipol. Long samfala ples, hem olraet for man kam long haos enitaem, bat long nara ples man mas talem firstaem bifor hem go. Long samfala ples, olketa savve givim best kaikai for visitor and famili bae kaikaim eniting nomoa, bat long nara ples evriwan savve kaikai tugeta. Long olketa nara ples, visitor savve holem kam eniting, bat long nara ples olketa wea invaetem man no laekem hem for tekem kam eni samting. And long samfala ples, hem wei bilong olketa wea kasem invitation for sei no firstaem, bat bihaen tu-thri invitation bae olketa just acceptim. Bat long nara ples, sapos iu no acceptim invitation olketa bae tingse iu no tinghae long olketa. Iumi shud traem best for mekem olketa wea invaetem iumi for hapi.

22. Why nao hem important tumas for “mas hapi for welkamim narawan”?

²² Peter sei: “Taem wea evri samting bae finis hem klosap nao.” (1 Pet. 4:7) Distaem iumi klosap for feisim datfala bigfala trabol wea winim eni samting wea happen enitaem bifor. Taem disfala world hem gogo for worse, iumi need for garem barava strongfala love for olketa brata and sista bilong iumi. Winim enitaem bifor, kaonsel wea Peter talem for “mas hapi for welkamim narawan” hem barava fitim olketa Christian distaem. Tru nao, iumi laek for gohed showimaot disfala naes wei for kaen and welkamim pipol for olowe.—1 Pet. 4:9.