For tok stret, no eniwan distaem savve sure Paul hem luk hao. Olketa drawing and painting long pablikeson bilong Olketa Jehovah’s Witness hem tingting bilong olketa artist nomoa, and hem no from olketa lukim eni piksa bilong bifor wea pruvim datwan nao really lukluk bilong Paul.

Bat, samfala information stap wea helpem iumi for savve lelebet long lukluk bilong Paul. Olsem example, long Zion’s Watch Tower long March 1, 1902, hem sei olsem “abaotem lukluk bilong Paul: . . . Long datfala buk ‘Acts of Paul and Thecla,’ . . . wea olketa raetem long samting olsem A. D. 150, hem storyim lukluk bilong Paul wea luk olsem maet hem stret and tru. Long datfala buk hem sei Paul hem short nomoa, bolhed, garem strong body, bracket leg, eyebrow bilong hem join tugeta long midol, and hem sharp nose.’”

The Oxford Dictionary of the Christian Church (1997 edition) sei olsem abaotem datfala old buk: “Luk olsem samfala samting wea ‘Acts of Paul and Thecla’ hem storyim maet tru saed long history.” Long olketa first century, staka pipol tinghae tumas long datfala buk Acts of Paul and Thecla. Datwan showaot from olketa raetem 80 manuscript bilong diswan long Greek languis and olketa transleitim long samfala nara languis tu. So drawing and painting bilong iumi abaotem Paul hem stret witim wanem samfala oldfala buk talem abaotem lukluk bilong Paul.

Bat iumi mas remember hao olketa nara samting stap wea barava important winim lukluk bilong Paul. Nomata taem Paul gohed duim ministry bilong hem, samfala pipol wea no garem spiritual tingting sei Paul “hem luk olsem man nating nomoa, and toktok bilong hem iusles.” (2 Cor. 10:10) Iumi mas no forgetim tu hao Paul kamap Christian from Jesus showaot long hem thru long wanfala mirakol. And iumi savve tingim tu hao Paul duim bigfala waka from Jesus ‘chusim hem for talemaot nem bilong hem long pipol long olketa difren kantri.’ (Acts 9:3-5, 15; 22:6-8) And tingim hao iumi kasem staka gud samting from olketa buk long Bible wea Jehovah iusim spirit bilong hem for muvim Paul for raetem.

Paul nating mekhae long samting wea hem duim bifor hem kamap Christian, and hem no story abaotem lukluk bilong hemseleva. (Acts 26:4, 5; Phil. 3:4-6) Hem sei: “Olketa nara aposol winim mi, and hem no fitim for olketa kolem mi wanfala aposol.” (1 Cor. 15:9) Bihaen hem raet olsem: “Nomata olketa nara holy wan barava winim mi, bat from God hem kaen tumas long mi, hem givim mi disfala waka for talemaot gud nius. Disfala gud nius hem abaotem olketa nambawan samting wea Christ givim wea hard for man barava minim gud evri samting hia.” (Eph. 3:8) Message wea Paul storyim hem moa important winim wei for wari abaotem lukluk bilong hem.