1. Wanem nao parents laek mek sure long hem bifor pikinini bilong olketa baptaes?

BLOSSOM Brandt story abaotem samting wea happen taem hem disaed for baptaes. Hem sei: “For staka month mi gohed talem dadi and mami mi laek baptaes, and tufala evritaem story witim mi abaotem datwan. Tufala laek mek sure mi luksavve diswan hem serious disison. Disfala important day long laef bilong mi kamap long December 31, 1934.” Distaem tu, parents laek helpem pikinini bilong olketa for mekem olketa wise disison. Sapos no eni need stap, pikinini shud no need for delay or weit firstaem, bikos datwan savve spoelem spiritual saed bilong hem. (Jas. 4:17) Bat bifor pikinini baptaes, wise parents laek mek sure datfala pikinini luksavve long responsibility wea hem garem taem hem kamap disaepol bilong Christ.

2. (a) Wanem nao mekem samfala circuit overseer wari? (b) Wanem nao bae iumi storyim long disfala study?

² Samfala circuit overseer wari taem olketa meetim samfala young wan wea age bilong olketa samting olsem 17 go kasem  23 year, wea growap long truth bat no baptaes yet. Staka taem olketa young wan hia attendim olketa meeting and go preaching. Olketa tingse olketa Jehovah’s Witness nao. Bat nomata olsem olketa hol bak for dedicate long Jehovah and baptaes. Why nao olsem? Samfala taem parents bilong olketa encouragem olketa for no kwiktaem baptaes. Long disfala study, bae iumi storyim fofala samting wea samfala parents wari abaotem wea mekem olketa hol bak for encouragem pikinini bilong olketa for baptaes.

3. Wanem nao parents bilong Blossom wari abaotem?

³ Parents bilong Blossom, wea iumi storyim long first paragraf, wari sapos gele bilong tufala kasem age wea hem fit for minim why hem important for baptaes and why datwan hem serious samting. Hao nao parents bae savve sapos pikinini bilong olketa fit for mekem stretfala dedication long Jehovah?

4. Hao nao komand bilong Jesus long Matthew 28:19, 20 helpem parents for teachim pikinini?

⁴ Readim Matthew 28:19, 20. Olsem iumi storyim long first study, Bible no markem wanem age nao man bae kasem bifor hem savve baptaes. Nomata olsem, hem gud for parents ting raonem wanem man mas duim taem hem teachim narawan for kamap disaepol. Greek word wea olketa transleitim ‘teachim pipol for kamap disaepol’ long Matthew 28:19 hem minim for teachim samwan witim goal for hem followim wanem hem lanem, or for hem kamap disaepol. Wanfala disaepol hem samwan wea lanem and minim olketa teaching bilong Jesus, and willing for obeyim. Dastawe evri parents shud garem goal for teachim pikinini, start from taem hem baby yet, for dedicate and kamap disaepol bilong Christ. Bat iumi savve hem no fitim for olketa baby baptaes. Nomata olsem, Bible showimaot hao olketa smol pikinini savve minim and lovem truth insaed Bible.

5, 6. (a) Wanem nao iumi lanem abaotem baptism bilong Timothy from samting wea Bible storyim? (b) Wanem nao best samting wea parents savve duim for helpem pikinini?

⁵ Timothy hem wanfala disaepol wea disaed for worshipim Jehovah taem hem young yet. Aposol Paul talem hao Timothy lanem truth from Bible taem hem baby yet. Nomata Timothy growap insaed famili wea dadi no worshipim Jehovah, mami and granmami helpem Timothy for lovem toktok bilong God. From diswan, hem garem strong faith. (2 Tim. 1:5; 3:14, 15) Taem hem samting olsem 20 year, hem kamap wanfala disaepol bilong Christ finis, and tu, hem kasem olketa spesol privilege insaed kongregeson.—Acts 16:1-3.

⁶ Tru nao, evri pikinini difren, so olketa no kamap mature long spiritual wei long sem age. Samfala pikinini mature saed long tingting and feeling nomata olketa young yet, and olketa laek for baptaes. Samfala narawan maet no redi yet for baptaes, so olketa bae weit go kasem taem olketa big lelebet. Dastawe, wise parents bae no forcem pikinini for baptaes. Bat, olketa bae helpem pikinini for grow long spiritual wei long wei wea fitim each pikinini. Parents savve hapi taem pikinini followim toktok long Provebs 27:11. (Readim.) Olketa mas evritaem tingim goal bilong olketa hem for helpem pikinini for kamap disaepol bilong Christ. Taem olsem parents bae laek for ting raonem kwestin hia, ‘Waswe, pikinini bilong mi garem inaf savve abaotem truth for helpem hem dedicate long God and baptaes?’

7. Sapos samwan laek baptaes, waswe, hem mas savve long evri samting wea Bible teachim? Explainim datwan.

⁷ From parents nao teachim pikinini bilong olketa, olketa laekem pikinini for kasem inaf savve abaotem truth mekem olketa fit for dedicate. Diswan no minim pikinini mas savve long evriting wea Bible teachim bifor hem savve dedicate long God and baptaes. Iumi olketa disaepol bilong Christ shud gohed for kasem stretfala savve bihaen iumi baptaes. (Readim Colossae 1:9, 10.) So olketa wanem samting nao hem important for man mas savve firstaem bifor hem baptaes?

8, 9. Wanem nao iumi savve lanem from datfala story abaotem Paul and man wea lukaftarem prison?

⁸ Olketa parents savve lane from story bilong wanfala famili long first century. (Acts 16:25-33) Long 50 C.E., long mek-tu taem Paul visitim Philippi taem hem missionary, olketa pipol laea and accusim hem and Silas, so olketa arrestim and putim tufala insaed prison. Long naet, wanfala big earthquake hem barava sekem faondeson bilong datfala prison and evri door hem open. Man wea lukaftarem prison tingse olketa prisoner ranawe finis so hem klosap suisaed bat Paul stopem hem. Bihaen, Paul and Silas preachim truth abaotem Jesus long datfala man and famili bilong hem. From olketa tinghae long truth wea olketa lanem abaotem Jesus, wanem nao olketa duim? Olketa no delay and stretawe baptaes. Wanem nao iumi lanem from disfala story?

⁹ Luk olsem datfala man wea lukaftarem prison hem wanfala soldia bilong Rome bifor. Datfala man no savve gud long olketa Holy Raeting. So for hem kasem inaf savve hem mas lanem olketa main truth long Bible, hem need for minim wanem Jehovah laekem hem for duim, and willing for obeyim olketa teaching bilong Jesus. Insaed short taem nomoa, hem lanem olketa main teaching long Bible and tinghae long olketa. Datwan mekem hem laek for baptaes. Iumi sure hem gohed for lanem staka samting moa bihaen hem baptaes. So sapos pikinini bilong iu talem iu hem tinghae long olketa main truth insaed Bible, and hem laek for dedicate and baptaes, wanem nao bae iu duim? Hem gud for talem pikinini for story witim olketa elder for savve sapos hem fit for baptaes. * Olsem olketa narawan wea baptaes finis, pikinini hia bae gohed lanem staka samting abaotem plan bilong Jehovah. Hem bae duim diswan for full laef bilong hem and for olowe.—Rome 11:33, 34.

10, 11. (a) Wanem nao tingting bilong samfala parents? (b) Wanem nao best wei for protectim pikinini?

¹⁰ Samfala parents tingse hem bae gud sapos pikinini delay for baptaes mekem hem savve kasem hae education and garem gud waka firstaem. Maet olketa dadi and mami hia tingse olketa garem gud reason for diswan, bat waswe, datwan bae really helpem pikinini for garem gudfala laef? Waswe, diskaen tingting hem stret witim wanem Bible talem? Wanem nao Bible encouragem iumi for duim long laef bilong iumi?—Readim Eklesiastes 12:1.

¹¹ Hem important for tingim hao disfala world and evri samting insaed, barava againstim wanem Jehovah laekem and tingim. (Jas. 4:7, 8; 1 John 2:15-17; 5:19) Sapos  pikinini fren gud witim Jehovah, datwan nao best samting for protectim hem from Satan, world bilong hem, and nogud tingting bilong pipol. Taem parents mekhae long wei for aftarem hae education and gudfala waka, datwan savve mekem pikinini konfius and hem danger, bikos maet hem tingse world hem important winim Jehovah. Waswe, parents wea lovem pikinini bilong olketa bae letem disfala world affectim tingting bilong pikinini abaotem wanem nao important? Tru nao, only wei for garem trufala hapi and gudfala laef hem for putim Jehovah first long laef bilong iumi.—Readim Sams 1:2, 3.

12. Why nao samfala parents tingse hem gud for pikinini weit firstaem bifor hem baptaes?

¹² Wanfala mami explainim why hem no laekem dota bilong hem for baptaes. Hem sei: “Mi sorre for sei main reason nao hem bikos long datfala arrangement for disfellowship.” Olsem datfala sista, samfala parents tingse bae hem gud for pikinini no kwiktaem for baptaes go kasem taem hem big lelebet, mekem hem no savve duim eni krangge samting. (Jenesis 8:21; Provebs 22:15) Olketa maet sei, ‘Sapos pikinini bilong mi hem no baptaes, bae hem no savve disfellowship.’ Why nao diskaen tingting hem no stret?—Jas. 1:22.

13. Sapos pikinini no baptaes, waswe, diswan minim hem bae no givim ansa long Jehovah? Explainim kam.

¹³ Parents bae no laekem pikinini for baptaes taem hem no redi yet for mekem stretfala dedication long Jehovah. Bat hem rong for tingse from pikinini no baptaes, hem bae no givim ansa long Jehovah. Why nao olsem? For givim ansa long Jehovah hem no minim pikinini mas baptaes firstaem. Sapos hem savve finis long wanem hem stret and no stret, hem bae givim ansa long Jehovah. (Readim James 4:17.) So winim wei for stopem pikinini for baptaes, wise parents bae waka hard for showimaot gudfala example long pikinini. Bae olketa laek for teachim pikinini taem hem baby yet for tinghae long olketa standard bilong Jehovah. (Luke 6:40) Wei for tinghae olsem hem best protection for pikinini bikos datwan bae mekem hem laek for gohed followim wanem Jehovah sei hem stret.—Aesaea 35:8.

14. Hao nao olketa elder savve sapotim olketa parents for helpem pikinini for kamap fit for baptaes?

¹⁴ Olketa elder savve helpem parents taem olketa storyim long olketa pikinini gudfala samting abaotem olketa spiritual goal. Wanfala sista wea pioneer for winim 70 year tingim taem wea Brata Charles Russell encouragem hem taem hem six year. Hem sei: “For 15 minute hem story witim mi abaotem olketa spiritual goal bilong mi.” Tru nao, olketa gudfala toktok and wei for givim encouragement savve affectim man for full laef bilong hem. (Provebs 25:11) And tu, olketa elder savve invaetem parents and pikinini for help long eni Kingdom Hall project and askem olketa young wan for duim waka wea fitim age and strong bilong olketa.

15. Wanem nao olketa long kongregeson savve duim for encouragem olketa young wan?

¹⁵ Hao nao olketa long kongregeson savve helpem olketa young wan? Olketa savve showimaot olketa tingim olketa young wan. Taem olketa luksavve olketa young gohed for grow long spiritual wei olketa savve encouragem olketa. Waswe, hem givim naesfala koment from heart bilong hem or duim wanfala part insaed midol week meeting?  Waswe, hem gohed faithful taem hem kasem test or hem iusim chance wea hem garem for preach long skul? Sapos olsem, praisem hem for datwan. Iumi savve markem goal for story gud witim wanfala young wan bifor and bihaen long meeting. Taem iumi duim olsem, olketa young wan bae feel olsem olketa part long kongregeson bilong Jehovah.—Sams 35:18.

16, 17. (a) Why nao hem important for pikinini mas baptaes? (b) Wanem nao savve mekem parents for hapi? (Lukim piksa long start bilong study.)

¹⁶ Wanfala long olketa nambawan privilege wea olketa parents garem hem for ‘stretem and trainim olketa pikinini followim samting wea Jehovah talem.’ (Eph. 6:4; Sams 127:3) Olketa pikinini long Israel olketa born insaed nation wea dedicate finis long Jehovah, bat olketa pikinini distaem no olsem. And tu, man no born witim wei for lovem God and truth. Dastawe start long day wea pikinini born, parents shud garem goal for helpem hem kamap disaepol, and for dedicate long Jehovah and baptaes. Diswan hem barava important samting for parents duim. Wei wea samwan dedicate and baptaes and faithful for worshipim God bae helpem hem for sev long taem bilong bigfala trabol.—Matt. 24:13.

¹⁷ Taem Blossom Brandt disaed for baptaes, dadi and mami bilong hem laek mek sure hem redi for duim disfala barava important samting. Taem olketa sure hem redi for duim diswan, olketa sapotim datfala disison bilong hem. Long naet bifor hem baptaes, dadi bilong hem duim wanfala naes samting. Blossom sei: “Hem talem for mifala evriwan nildaon, then hem prea. Hem sei long Jehovah hem barava hapi hao smol gele bilong hem disaed for dedicatem laef bilong hem long Hem.” Winim 60 year bihaen, Blossom sei: “Tru nao, mi hard for forgetim datfala naet long full laef bilong mi!” Iufala parents tu savve hapi and satisfae taem pikinini bilong iufala dedicate long Jehovah and baptaes.