1-2. (a) Hao nao Jehovah story witim iumi olketa man? (b) Wanem nao bae iumi storyim long disfala study?

JEHOVAH laekem tumas for story witim iumi olketa man. Long bifor, hem iusim olketa profet, angel, and Son bilong hem Christ Jesus, for story witim pipol. (Emos 3:7; Gal. 3:19; Rev. 1:1) Distaem, hem story long iumi thru long Bible. Hem givim kam Bible for helpem iumi savve long olketa wei and tingting bilong hem.

² Taem Jesus long earth, thrifala taem nao Jehovah story kam from heven. Distaem bae iumi storyim wanem Jehovah talem long thrifala taem hia, wanem iumi savve lanem from toktok bilong hem, and hao datwan savve helpem iumi.

3. Olsem Mark 1:9-11 storyim, wanem nao Jehovah talem taem Jesus baptaes, and wanem nao thrifala important samting iumi lanem from toktok bilong hem?

³ Mark 1:9-11 story abaotem firstaem wea Jehovah story kam from heven. (Readim.) Jehovah sei: “Iu nao Son bilong mi wea mi barava lovem. Mi hapi tumas long iu.” Taem Jesus herem Dadi bilong hem sei hem lovem and hapi long hem, masbi datwan barava kasem heart bilong Jesus! Toktok bilong Jehovah showimaot thrifala important samting abaotem Jesus. First wan, Jesus hem Son bilong Jehovah. Mek-tu, Jehovah lovem Son bilong hem. And mek-thri, Jehovah hapi long Son bilong hem. Distaem bae iumi storyim each wan long thrifala samting hia.

4. Long wanem spesol wei nao Jesus kamap Son bilong God taem hem baptaes?

⁴ “Iu nao Son bilong mi.” Taem Jehovah talem toktok hia, diswan showimaot hem ting long Son bilong hem long wanfala spesol wei. Bifor Jesus kam long earth, hem wanfala son  bilong God wea hem wanfala spirit. Bat, taem hem baptaes hem kasem anointing from holy spirit and hem kamap anointed Son bilong Jehovah. Long datfala taem nao hem garem hope for go bak long heven for kamap King and Hae Priest, wea God markem. (Luke 1:31-33; Heb. 1:8, 9; 2:17) Dastawe taem Jesus baptaes, Dadi bilong hem fit for sei long hem: “Iu nao Son bilong mi.”—Luke 3:22.

5. Hao nao iumi savve followim example bilong Jehovah for talem narawan iumi lovem and tinghae long olketa?

⁵ “Son bilong mi wea mi barava lovem.” Example bilong Jehovah helpem iumi luksavve hem important for lukaotem chance for talemaot iumi lovem and tinghae long narawan. (John 5:20) Iumi hapi tumas taem samwan wea iumi lovem hem praisem iumi and sei hem lovem iumi. Olketa brata and sista long kongregeson and famili tu needim iumi for encouragem and lovem olketa. Datwan bae strongim faith bilong olketa and helpem olketa for gohed faithful. Hem important tumas for parents encouragem olketa pikinini. Olsem wei wea wanfala flaoa savve grow gud sapos man lukaftarem, wei wea parents praisem pikinini bilong olketa and showimaot olketa lovem olketa, datwan bae helpem pikinini for gohed gud.

6. Why nao hem fitim for iumi trustim Jesus Christ?

⁶ “Mi hapi tumas long iu.” Toktok hia showimaot Jehovah barava sure Jesus bae faithful for duim will bilong Dadi bilong hem. From Jehovah trustim Son bilong hem, hem fitim for iumi tu trustim wei wea Jesus bae duim evri samting wea Jehovah promisim. (2 Cor. 1:20) Taem iumi ting raonem example wea Jesus showimaot, datwan strongim iumi for gohed lane from hem and followim example bilong hem. And tu, Jehovah barava sure pipol bilong hem bae willing for gohed lane from Son bilong hem.—1 Pet. 2:21.

7. Olsem Matthew 17:1-5 storyim, wanem taem moa Jehovah story kam from heven, and wanem nao hem talem?

⁷ Readim Matthew 17:1-5. Mek-tu taem wea Jehovah story kam from heven, hem long taem wea “lukluk bilong Jesus hem change.” Datfala spesol vision happen taem Jesus invaetem Peter, James, and John for go witim hem long wanfala hae maunten. Feis and kaleko bilong Jesus barava shaen braet. And olketa lukim tufala man wea luk olsem Moses and Elijah story long Jesus abaotem taem wea hem bae dae and laef bak. Nomata Peter, James, and John laek sleep fogud, olketa barava wekap nao taem olketa lukim vision hia. (Luke 9:29-32) Then, wanfala braet cloud kavarem olketa, and olketa herem voice bilong God tok kam from cloud hia! Olsem taem Jesus baptaes, Jehovah sei: “Disfala man hem Son bilong mi wea mi lovem and wea mi hapi long hem.” And then hem sei tu: “Iufala mas herem samting wea hem talem.”

8. Hao nao datfala vision affectim Jesus and olketa disaepol?

⁸ Datfala vision piksarem glory and paoa wea Jesus bae garem taem hem king long Kingdom bilong God long heven. Iumi sure vision hia encouragem and strongim Christ for feisim wei wea hem bae safa and dae. Diswan strongim tu faith bilong olketa disaepol and helpem olketa for redi for hard taem wea bae kamap and bigfala waka wea bae olketa duim. Samting olsem 30 year bihaen Peter lukim datfala vision, hem storyim datfala vision. Datwan showimaot vision hia klia yet insaed mind bilong hem.—2 Pet. 1:16-18.

9. Wanem nambawan kaonsel nao Jesus givim long olketa disaepol bilong hem?

⁹ “Herem samting wea hem talem.” Jehovah showimaot klia hem laekem iumi for herem and followim samting wea son bilong hem talem. Wanem nao Jesus talem taem hem stap long earth? Hem story abaotem staka important samting! Olsem example, hem patient for teachim olketa disaepol for preachim gud nius, and hem encouragem olketa for gohed lukaot. (Matt. 24:42; 28:19, 20) Hem encouragem olketa tu for waka hard and for no givap. (Luke 13:24) Jesus talem olketa disaepol hao hem important tumas for olketa lovem each other, gohed garem wan mind, and obeyim olketa komandment bilong hem. (John 15:10, 12, 13) Jesus givim olketa nambawan kaonsel hia long olketa disaepol bilong hem. Kaonsel hia hem barava fitim iumi distaem tu.

10-11. Hao nao iumi savve showimaot iumi herem wanem Jesus talem?

¹⁰ Jesus sei: “Man wea followim tru samting hem savve herem wanem mi talem.” (John 18:37) Iumi showimaot iumi herem wanem Jesus talem taem iumi “no kros bat . . . evritaem forgivim” narawan. (Col. 3:13; Luke 17:3, 4) Iumi showimaot iumi herem wanem Jesus talem tu taem iumi strong for preachim gud nius “nomata taem datwan hem isi or taem hem hard.”—2 Tim. 4:2.

¹¹ Jesus sei: “Olketa sheepsheep bilong mi herem toktok bilong mi.” (John 10:27) Taem olketa disaepol duim samting wea Jesus talem, datwan showimaot olketa herem toktok bilong hem. Olketa no letem olketa wari long laef for stopem olketa for duim datwan. (Luke 21:34) Nomata olketa feisim olketa hard taem, wei for obeyim komand bilong Jesus hem main samting long laef bilong olketa. Staka brata and sista bilong iumi feisim olketa barava hard taem, olsem wei wea pipol attakim olketa, olketa barava poor, and natural disaster kasem olketa. Nomata olketa  samting olsem kasem olketa, olketa gohed faithful long Jehovah. Jesus promisim olketa olsem: “Man wea acceptim and obeyim olketa law bilong mi, hem nao man wea lovem mi. Dadi bilong mi bae lovem man wea lovem mi.”—John 14:21.

12. Wanem nao narafala wei wea iumi savve showimaot iumi herem wanem Jesus talem?

¹² Narafala wei wea iumi savve showimaot iumi herem wanem Jesus talem, hem nao for obeyim olketa wea garem responsibility for leadim iumi. (Heb. 13:7, 17) Staka change kamap insaed organization bilong God distaem, olsem olketa niufala tul for ministry, olketa niufala wei for duim ministry, olketa change wea kamap long midol week meeting, and tu hao iumi buildim, renovatim, and lukaftarem olketa Kingdom Hall. Iumi barava tinghae long olketa nambawan instruction hia wea showimaot organization lovem and tingim iumi! Iumi sure Jehovah bae blessim iumi taem iumi followim eni instruction wea iumi kasem from organization.

13. Olketa wanem gud samting nao iumi savve kasem sapos iumi herem wanem Jesus talem?

¹³ Iumi kasem gud samting taem iumi herem evri samting wea Jesus teachim. Jesus talem hao olketa teaching bilong hem bae strongim olketa disaepol bilong hem. Hem sei: “Mi savve strongim iufala. . . . Bae hem no hard for iufala waka witim mi.” (Matt. 11:28-30) Evri toktok long Bible, and tu fofala Gospel wea story abaotem laef and ministry bilong Jesus, hem strongim iumi and mekem iumi wise. (Sams 19:7; 23:3) Jesus sei: “Olketa wea herem toktok bilong God and obeyim datwan nao olketa hapi!”—Luke 11:28.

14-15. Olsem John 12:27, 28 talem, wanem nao mek-thri taem wea Jehovah story kam from heven? (b) Why nao toktok bilong Jehovah comfortim and strongim Jesus?

¹⁴ Readim John 12:27, 28. Gospel bilong John storyim mek-thri taem Jehovah tok kam from heven. Tu thri day bifor Jesus dae, hem go long Jerusalem for celebratem Pasova. Hem sei: “Mi barava wari tumas nao.” Then hem prea olsem: “Dadi, mekhae long nem bilong iu.” Then Dadi bilong hem ansarem hem and sei: “Mi mekhae long nem bilong mi finis, and bae mi mekhae long hem moa.”

¹⁵ Jesus wari bikos hem garem bigfala responsibility for mas gohed faithful long  Jehovah. Jesus luksavve bae hem safa from olketa bae whipim hem nogud and killim hem dae. (Matt. 26:38) Winim eni nara samting, Jesus laek for mekhae long nem bilong Dadi bilong hem. Pipol sei Jesus tok spoelem God, and hem wari nogud dae bilong hem mek shame long Dadi bilong hem. Samting wea Jehovah talem mas barava strongim Jesus! Hem mekem hem feel sure Jehovah bae mekhae long nem bilong Hem. Toktok bilong Dadi bilong hem mas barava comfortim Jesus and strongim hem for olketa samting wea bae kamap. Luk olsem, Jesus nomoa heresavve long wanem Dadi bilong hem talem long datfala taem, bat Jehovah mek sure olketa raetem datfala toktok insaed Bible for iumi distaem.—John 12:29, 30.

16. Why nao samfala taem iumi wari abaotem wei wea pipol ting daonem nem bilong God?

¹⁶ Olsem Jesus, iumi tu maet wari abaotem wei wea pipol ting daonem nem bilong Jehovah. And pipol maet treatim iumi nogud tu. Or maet iumi feel nogud long olketa laea story abaotem iumi wea olketa wea againstim iumi talem. Maet iumi ting olketa laea story olsem bae mek shame long nem bilong Jehovah and organization bilong hem. Long taem olsem, datfala toktok bilong Jehovah bae barava comfortim iumi. Iumi no need for wari tumas abaotem datwan. Iumi sure “peace bilong God wea winim nao  wanem man savve minim bae gaedem heart and tingting bilong [iumi] bikos long Christ Jesus.” (Phil. 4:6, 7) Jehovah bae evritaem mekhae long nem bilong hem. Hem bae iusim Kingdom for stretem evri nogud samting wea Satan and disfala world duim long olketa faithful pipol bilong hem.—Sams 94:22, 23; Aesaea 65:17.

17. Olsem Aesaea 30:21 talem, hao nao Jehovah story long iumi distaem?

¹⁷ Jehovah hem still story for iumi distaem. (Readim Aesaea 30:21.) Hem tru, iumi no savve herem Jehovah toktok kam from heven, bat hem story long iumi thru long Bible. Insaed Bible iumi savve kasem olketa instruction bilong hem. And tu, spirit bilong Jehovah muvim “datfala wakaman wea faithful and wise” for gohed provaedem spiritual kaikai for pipol bilong hem distaem. (Luke 12:42) Iumi kasem staka spiritual kaikai long olketa website bilong iumi and olketa pablikeson wea olketa printim. And tu, olketa video and audio recording.

18. Hao nao toktok wea Jehovah talem strongim faith bilong iu and mekem iu for no fraet?

¹⁸ Hem gud for iumi no forgetim toktok wea Jehovah talem taem son bilong hem long earth! Toktok hia wea Jehovah talem, wea stap insaed Bible, mekem iumi sure Jehovah garem full kontrol and bae hem stretem evri nogud samting wea kamap bikos long Satan and nogud world bilong hem. Iumi disaed strong for evritaem herem wanem Jehovah talem. Sapos iumi duim datwan, bae iumi winim eni problem wea iumi feisim distaem and eni hard taem wea bae kamap long future. Bible sei olsem: “Iufala mas no givap, mekem bihaen iufala duim wanem God hem laekem, bae iufala kasem samting wea hem promisim.”—Heb. 10:36.