1. Wanem nao Adam and Eve lusim, and wanem nao kamaot from datwan?

LONG tingting bilong iu, hu nao garem raet for markem olketa standard bilong wanem nao stret and wanem nao no stret? Taem Adam and Eve kaikaim frut bilong tree wea piksarem wei for savve long gud and nogud samting, datwan showimaot klia tufala no trustim Jehovah and olketa standard bilong hem. Tufala laek for chusim seleva wanem nao stret and wanem nao no stret. (Jenesis 3:22) Bat tingim nogud samting wea kamaot from diswan. Tufala lusim wei for fren witim Jehovah, lusim chance for laef olowe, and tu, tufala mekem olketa pikinini bilong tufala sin and dae. (Rome 5:12) Disison bilong Adam and Eve mekem evriwan safa.

2-3. (a) Wanem nao bigman bilong Ethiopia duim taem Philip preach long hem? (b) Taem iumi baptaes, wanem blessing nao iumi bae kasem, and olketa wanem kwestin nao bae iumi story raonem?

² Samting wea Adam and Eve duim hem barava difren from bigman bilong Ethiopia wea Philip preach long hem. Datfala bigman tinghae tumas long wanem Jehovah and Jesus duim for hem, so hem stretawe baptaes. (Acts 8:34-38) Taem iumi dedicate and baptaes, iumi olsem datfala bigman bilong Ethiopia, iumi showimaot klia iumi tinghae long evri samting wea Jehovah and Jesus duim for iumi. And tu, iumi showimaot iumi trustim Jehovah and luksavve hem nao garem raet for markem olketa standard bilong wanem hem stret and wanem hem no stret.

³ Tingim olketa blessing wea iumi kasem taem iumi servem Jehovah! Wanfala nao hem hope for kasem evri samting wea Adam and Eve lusim, olsem chance for laef olowe. From iumi garem faith long Jesus Christ, Jehovah forgivim sin bilong iumi and helpem iumi for garem klin konsens. (Matt. 20:28; Acts 10:43) And tu, Jehovah acceptim iumi for kamap part  long famili bilong hem wea garem nambawan hope for future. (John 10:14-16; Rome 8:20, 21) Nomata man savve kasem staka blessing olsem, samfala wea savve finis long Jehovah hol bak for followim example bilong bigman long Ethiopia. Why nao olketa hol bak for baptaes? And hao nao olketa savve winim olketa challenge hia?

4-5. Wanem challenge nao Avery and Hannah feisim?

⁴ Daotem seleva. Parents bilong Avery tufala Jehovah’s Witness. Dadi bilong hem showimaot gud example olsem elder and hed long famili. Nomata olsem, Avery hol bak for baptaes. Why nao olsem? Avery sei: “Long tingting bilong mi, mi hard for gud olsem dadi bilong mi.” And tu, Avery tingse hem bae no fit for duim olketa responsibility wea hem maet kasem long future. Hem sei: “Mi wari nogud olketa askem mi for prea front long evriwan, givim olketa tok, or leadim grup long taem bilong preaching.”

⁵ Hannah, wea 18 year, hem ting long hemseleva olsem hem barava no fit. Parents bilong hem Jehovah’s Witness. Nomata olsem, hem daotem wei wea hem fit for followim olketa standard bilong Jehovah. Why nao olsem? Hannah savve barava ting daonem hemseleva. Samfala taem hem feel nogud tumas gogo hem duim samting for mekem hemseleva garekil and feel pain. Bat taem hem duim datwan hem just feel nogud go moa. Hannah sei: “Mi nating talem eniwan abaotem wanem mi savve duim, nomata parents bilong mi tu. And mi tingse, Jehovah bae nating acceptim mi bikos long datfala samting wea mi savve duim long miseleva.”

6. Why nao Vanessa hol bak for baptaes?

⁶ Olketa fren. Vanessa, wea 22 year sei: “Mi garem wanfala best fren, and mitufala fren for longtaem.” Bat datfala fren bilong Vanessa no sapotim hem long goal bilong hem for baptaes. Datwan mekem Vanessa feel sorre. Hem sei: “Mi faendem hem no isi for garem olketa fren, and sapos mi stop for fren witim hem, mi wari nogud mi no garem eni gud fren olsem hem moa.”

7. Why nao wanfala young gele wea nem bilong hem Makayla hol bak for baptaes?

⁷ Fraet nogud man duim mistek. Makayla hem faev year nomoa taem brata bilong hem disfellowship. Taem hem growap, hem lukim wei wea datwan mekem parents bilong hem sorre tumas. Makayla sei: “Mi fraet for baptaes nogud bihaen bae mi duim eni sin and disfellowship, then parents bilong mi bae sorre go moa.”

8. Why nao wanfala young man wea nem bilong hem Miles hol bak for baptaes?

 ⁸ Fraet nogud samwan againstim iumi. Dadi and stepmami bilong Miles, tufala Jehovah’s Witness, bat really mami bilong hem no Witness. Miles sei: “Mi stap witim mami bilong mi for 18 year, and mi fraet for talem hem mi laek for baptaes. Mi lukim hao hem againstim dadi taem hem kamap Witness. Mi fraet nogud hem duim sem samting long mi.”

9. Wanem nao savve happen taem iu gohed lane abaotem bigfala love and patient fasin bilong Jehovah?

⁹ From Adam and Eve no strongim love bilong tufala for Jehovah, tufala chus for no obeyim hem. Nomata olsem, Jehovah letem tufala bornem pikinini, and disaedem seleva hao for trainim olketa. Samting wea kamaot from Adam and Eve laek for independent showimaot disison bilong tufala hem no stret. Firstborn son bilong tufala killim dae brata bilong hem, and gogo wei for raf and selfish affectim iumi evriwan. (Jenesis 4:8; 6:11-13) Nomata olsem, Jehovah garem plan for sevem olketa pikinini bilong Adam and Eve wea laek for obeyim hem. (John 6:38-40, 57, 58) Taem iu gohed lane abaotem wei wea Jehovah barava patient and garem bigfala love, love bilong iu for hem bae kamap strong. From datwan, bae iu no laek for olsem Adam and Eve, bat bae iu dedicatem iuseleva long Jehovah.

10. Hao nao wei for ting raonem Sams 19:7 savve helpem iu for obeyim Jehovah?

¹⁰ Gohed lane abaotem Jehovah. Taem iu gohed lane abaotem Jehovah, bae iu luksavve iu fit for faithful long hem. Avery, wea iumi storyim finis, sei: “Samting wea helpem mi for no daot hem wei for read abaotem and ting raonem promis long Sams 19:7.” (Readim.) Taem Avery luksavve wanem Jehovah talem hem tru, datwan strongim love bilong hem for God. Love helpem man for no fraet, and strongim man tu for obeyim Jehovah and duim wanem hem laekem. Hannah, wea iumi storyim finis, sei: “Taem mi duim Bible reading and study seleva, mi  luksavve taem mi mekem miseleva garekil and feel pain, Jehovah tu bae feel pain.” (1 Pet. 5:7) Hannah lane for followim toktok bilong God. (Jas. 1:22) Wanem nao kamaot from datwan? Hem sei: “Taem mi lukim gud samting kamaot from wei wea mi obeyim Jehovah, datwan strongim love bilong mi for hem. Distaem mi sure Jehovah bae evritaem helpem mi taem mi needim.” Hannah winim feeling for laek mekem hemseleva feel pain, hem dedicatem hemseleva long Jehovah, and baptaes.

11. Wanem nao Vanessa duim for faendem olketa niu fren, and wanem nao iumi savve lanem from diswan?

¹¹ Chusim olketa gudfala fren. Gogo, Vanessa wea iumi storyim finis, hem luksavve best fren bilong hem nao mekem hem hol bak for baptaes. So hem disaed for no fren witim datfala gele. And tu, Vanessa traem best for faendem olketa niu fren insaed kongregeson. Hem storyim hao example bilong Noah and famili bilong hem nao encouragem hem. Hem sei: “From pipol long datfala taem no lovem Jehovah, famili bilong Noah fren gud witim each other.” Bihaen Vanessa baptaes hem start for pioneer. Hem sei: “Pioneer waka helpem mi for garem olketa gudfala fren insaed kongregeson bilong mi and olketa nara kongregeson tu.” Iu tu savve faendem olketa gudfala fren sapos iu busy long olketa waka wea Jehovah laekem iumi for duim.—Matt. 24:14.

12. Wanem kaen wei for fraet nao Adam and Eve no garem, and wanem nao kamaot from datwan?

¹² Stretfala and rongfala wei for fraet. Samfala kaen wei for fraet savve helpem iumi. Olsem example, iumi mas fraet for duim eni samting wea bae mekem Jehovah no hapi. (Ps. 111:10, NW) Sapos Adam and Eve garem kaen wei for fraet olsem, bae tufala no disobeyim Jehovah. Bat tufala chus for disobey. Taem tufala duim datwan, ‘eye bilong tufala open’ wea minim tufala luksavve tufala sin nao. Tufala givim sin and dae long olketa pikinini bilong tufala. Bikos tufala luksavve tufala sin, tufala feel shame from tufala naked so tufala soengim leaf for kavarem body bilong tufala.—Jenesis 3:7, 21.

13-14. (a) Olsem 1 Peter 3:21 storyim, why nao iumi no need for fraetem dae? (b) Wanem nao samfala reason why iumi lovem Jehovah?

 ¹³ Nomata iumi mas fraet for duim eni samting wea bae mekem Jehovah no hapi, iumi shud no fraetem dae. Jehovah openem wei for iumi kasem laef olowe. Sapos iumi duim sin and barava repent, Jehovah bae forgivim iumi. Hem bae forgivim iumi bikos long faith wea iumi showimaot long ransom sakrifaes bilong Son bilong hem. Wanfala important wei wea iumi showimaot iumi garem faith hem for dedicate long God and baptaes.—Readim 1 Peter 3:21.

¹⁴ Staka reason stap for lovem Jehovah. Hem givim iumi evri gud samting wea iumi needim for laef each day, and tu, hem teachim iumi tru samting abaotem hemseleva and olketa plan bilong hem. (John 8:31, 32) Christian kongregeson bilong hem stap for helpem and leadim iumi. Jehovah helpem iumi for winim olketa problem bilong iumi distaem, and hem givim iumi hope for laef olowe long future. (Sams 68:19; Rev. 21:3, 4) Taem iumi ting raonem evri samting wea Jehovah duim for iumi finis, wea showimaot hem lovem iumi, datwan mekem iumi lovem hem. And taem iumi lovem Jehovah, iumi bae luksavve long stretfala wei for fraet. Iumi bae fraet for duim eni samting wea bae mekem Jehovah no hapi bikos iumi barava lovem hem.

15. Wanem nao helpem Makayla for winim wei wea hem fraet nogud hem duim mistek?

¹⁵ Taem Makayla, wea iumi storyim finis, luksavve Jehovah willing for forgivim man wea duim sin, datwan helpem hem for winim wei wea hem fraet nogud hem duim mistek. Hem sei: “Mi luksavve iumi evriwan no perfect and iumi savve duim mistek. Bat mi luksavve tu Jehovah lovem iumi and bae forgivim iumi bikos long datfala ransom.” From Makayla lovem Jehovah, datwan muvim hem for dedicate long Jehovah and baptaes.

16. Wanem nao helpem Miles for winim wei wea hem fraetem mami bilong hem wea againstim hem?

¹⁶ Miles, wea fraet nogud mami bilong hem againstim disison bilong hem for baptaes, story witim wanfala circuit overseer abaotem datwan. Miles sei: “Circuit overseer hia tu growap insaed famili wea wanfala long parents bilong hem nomoa Witness. Hem helpem mi for tingim wanem mi savve talem long mami mekem hem luksavve miseleva nao disaed for baptaes, and no dadi nao forcem mi.” Mami bilong Miles nating hapi taem Miles story witim hem. Gogo Miles mas muv aot from haos bilong mami. Nomata olsem, hem no fraet for duim wanem hem disaedem. Miles sei: “Taem mi lane abaotem evri gudfala samting wea Jehovah duim for mi, datwan barava muvim mi. Taem mi gohed ting raonem ransom sakrifaes bilong Jesus, mi luksavve Jehovah barava lovem mi. Datwan muvim mi for dedicatem miseleva long Jehovah and baptaes.”

17. Iumi evriwan garem chance for duim wanem samting?

¹⁷ Taem Eve kaikaim datfala frut bilong tree long Eden, hem rejectim Dadi bilong hem. Taem Adam followim Eve, hem showimaot hem nating tinghae long evri gud samting wea Jehovah duim for hem. Iumi evriwan garem chance for showimaot iumi no olsem Adam and Eve, bat iumi tinghae long evri samting wea Jehovah duim for iumi. Taem iumi baptaes, iumi showim long Jehovah iumi acceptim wei wea hem nao garem raet for markem olketa standard long wanem hem stret and wanem hem no stret. Datwan pruvim iumi lovem and trustim Dadi bilong iumi.

18. Sapos iu laek for gohed faithful for worshipim Jehovah wanem nao iu mas duim?

¹⁸ Bihaen iumi baptaes, wanfala challenge wea each wan long iumi feisim hem for evriday followim olketa standard bilong Jehovah, and no bilong iumiseleva. Staka million pipol gohed for duim datwan. Iu tu savve olsem olketa sapos iu gohed studyim gud Bible, associate witim olketa brata and sista, and no hol bak for storyim long narawan wanem iu lanem abaotem nambawan Dadi bilong iu. (Heb. 10:24, 25) Taem iu need for mekem eni disison, followim advaes wea Jehovah givim iu thru long Bible and organization bilong hem. (Aesaea 30:21) Sapos iu duim olsem bae iu kasem gud samting.—Provebs 16:3, 20.

19. Wanem nao hem gud for evritaem tingim, and why nao olsem?

¹⁹ Taem iu evritaem tingim gud samting wea iu kasem bikos iu followim wanem Jehovah talem, datwan bae strongim love bilong iu for hem and olketa standard bilong hem. Taem olsem, no eni samting wea Satan iusim for switim iu bae mekem iu lusim Jehovah. Tingim sapos wan thousand year from distaem iu long paradaes and iu tingim bak disison bilong iu for baptaes. Iu bae luksavve hem best disison wea iu mekem long laef bilong iu!