STUDY ARTICLE 10
Love and Wei for Tinghae lo Jehovah Bae Muvim Iu for Baptaes
“Hao, [eni samting stopem] mi for baptaes distaem?”—ACTS 8:36.
SONG 37 Strong for Worshipim Jehovah
WANEM IUMI BAE STORYIM *
1-2. Olsem Acts 8:27-31, 35-38 storyim, wanem nao muvim datfala bigman blo Ethiopia for baptaes?
WASWE, iu laek for baptaes and kamap wanfala disaepol blo Christ? Love and wei for tinghae muvim staka pipol for mekem datfala disison. Tingim example blo wanfala bigman wea waka for queen blo Ethiopia.
2 Datfala man lo Ethiopia stretawe duim samting followim wanem hem lanem from olketa Scripture. (Readim Acts 8:27-31, 35-38.) Wanem nao muvim hem? Hem barava tinghae lo Bible. Iumi luksavve lo diswan bikos hem gohed for readim samfala verse from buk blo Isaiah taem hem gogo lo chariot. And taem Philip story witim hem, datfala man start for tinghae lo wanem Jesus duim for hem. Bat why nao datfala bigman go lo Jerusalem? Bikos hem lovem Jehovah. Hao nao iumi savve? Bikos gogo blo hem lo Jerusalem hem for worshipim Jehovah. Luk olsem, disfala man lusim finis religion wea hem born insaed, and hem joinim datfala nation wea dedicate lo trufala God. So, datfala sem love for Jehovah nao muvim hem for duim nara important samting, hem nao for baptaes and kamap wanfala disaepol blo Christ.—Matt. 28:19.
3. Wanem nao maet stopem samwan for baptaes? (Lukim box “ Heart blo Iu Olsem Wanem Kaen Graon?”)
3 Love for Jehovah savve muvim iu for baptaes. Bat love tu maet savve stopem iu for baptaes. Lo wanem wei? Tingim samfala example. Maet iu lovem tumas famili and olketa fren blo iu wea no Witness, and iu maet wari sapos iu baptaes olketa bae heitim iu. (Matt. 10:37) Or maet iu lovem olketa wei wea God heitim, and iu maet faendem hem hard for let go lo olketa wei hia. (Sams 97:10) Or maet iu growap witim wei for celebratem olketa samting wea join witim false religion. Iu maet garem olketa naesfala memory wea join witim olketa celebration hia. From datwan, iu maet faendem hem hard for stop for duim olketa samting hia wea Jehovah no laekem. (1 Cor. 10:20, 21) So kwestin wea iu need for ting raonem hem, “Wat nao mi lovem tumas, or hu nao mi lovem tumas?”
LOVE WEA BARAVA IMPORTANT
4. Wanem nao main samting wea bae muvim iu for baptaes?
4 Iu savve lovem and tinghae lo staka gud samting. Olsem example, maet bifor iu study witim olketa Jehovah’s Witness, iu garem finis wei for tinghae lo Bible. And maet iu lovem Jesus finis. And distaem, from iu savve lo olketa Jehovah’s Witness maet iu laekem tumas for associate witim olketa. Wei for lovem olketa gud samting hia, maet no muvim iu for laek dedicatem iuseleva lo Jehovah and baptaes. Bat main samting wea bae muvim iu for baptaes hem love for Jehovah God. Taem iu lovem Jehovah winim eni nara samting, iu bae no letem eni samting or eniwan for stopem iu for servem Jehovah. Olsem example, love for Jehovah hem olsem wanfala door wea iu go thru lo hem for baptaes, and hem olsem tu wanfala rail wea stap followim wanfala road, wea helpem iu for no go difren taem iu gohed for servem God.
5. Olketa wanem kwestin nao bae iumi storyim?
5 Jesus sei iumi mas lovem Jehovah witim full heart, soul, mind, and strong blo iumi. (Mark 12:30) Hao nao iu savve lane for barava lovem and respectim Jehovah olsem? Taem iumi ting raonem hao Jehovah barava lovem iumi, datwan muvim iumi for lovem hem tu. (1 John 4:19) Taem iu mekem grow datfala love wea barava important, wanem nao samfala nara samting wea datfala love bae muvim iu for duim? *
6. Olsem Rome 1:20 storyim, wanem nao wanfala wei wea iumi savve lane abaotem Jehovah?
6 Lane abaotem Jehovah thru lo creation blo hem. (Readim Rome 1:20; Rev. 4:11) Ting raonem wisdom blo Jehovah wea iumi savve lukim lo hao hem designim olketa plant and animal. Lanem samfala samting abaotem hao Jehovah wakem body blo iumi lo nambawan wei. (Sams 139:14) And ting abaotem bigfala paoa wea Jehovah putim lo sun, wea datwan hem wanfala nomoa lo staka billion star. * (Aesaea 40:26) Taem iu duim datwan, bae iu barava respectim Jehovah go moa. Bat, for savve Jehovah hem wise and garem bigfala paoa, hem just wanfala part nomoa lo faondeson blo wei wea iu fren witim hem. For garem strongfala love for Jehovah, iu need for savve lo moa samting abaotem hem.
7. For barava lovem Jehovah, wanem nao iu need for sure lo hem?
7 Iu need for barava sure dat Jehovah hem kea for iu. Waswe, hem hard for iu bilivim dat Creator blo heven and earth hem savve iu stap and hem kea for iu? Sapos olsem, tingim hao Jehovah hem no farawe from each wan lo iumi. (Acts 17:26-28) Hem “save long olketa tingting blong yumi” and hem promis dat “sapos yu lukaotem hem, bae yu save faendem hem.” (Fas Kronikols 28:9) For tok stret, why iu studyim Bible distaem hem bikos Jehovah nao pullim iu kam lo hem. (Jer. 31:3, NW) Taem iu mekem grow wei for tinghae lo evri samting wea Jehovah duim for iu, datwan bae strongim go moa love blo iu for hem.
8. Hao nao iu savve showimaot iu tinghae lo love blo Jehovah?
8 Wanfala wei for showimaot iu tinghae lo love blo Jehovah hem for story witim hem lo prea. Love blo iu for God bae grow taem iu talem hem olketa samting wea iu wari abaotem, and thankiu lo hem for evri samting wea hem duim for iu. And taem iu lukim hao Jehovah ansarem olketa prea blo iu, datwan bae strongim wei wea iu fren witim hem. (Sams 116:1) Iu bae barava sure dat hem savve gud lo iu. Bat for kam klos lo Jehovah, iu need for minim gud tingting blo hem. And iu need for savve wanem hem laekem iu for duim. Only wei for iu kasem datfala savve hem nao for iu studyim Bible.
Best wei for kam klos lo God and for savve wanem hem laekem iumi for duim hem nao for studyim Bible (Paragraf 9 storyim diswan) *
9. Hao nao iu savve showimaot iu tinghae lo Bible?
9 Lane for tinghae lo Bible. Bible nomoa storyim truth abaotem Jehovah and plan blo hem for iu. Iu showimaot iu tinghae lo Bible taem iu readim evriday, taem iu prepare for study, and taem iu followim wanem iu lanem. (Sams 119:97, 99; John 17:17) Waswe, iu garem wanfala Bible reading schedule? Waswe, iu mek sure iu followim datfala schedule for readim Bible evriday?
10. Wat nao wanfala lo olketa spesol samting abaotem Bible?
10 Wanfala lo olketa spesol samting abaotem Bible, hem nao wei wea hem garem olketa story blo pipol wea lukim Jesus. Hem nomoa only buk wea barava stret wea explainim wanem Jesus duim for iu. Taem iu lane abaotem olketa samting wea Jesus talem and duim, datwan bae muvim iu for laek fren witim hem.
11. Hao nao iu savve lane for lovem Jehovah?
11 Lane for lovem Jesus, and love blo iu for Jehovah bae grow. Why nao olsem? Bikos Jesus showimaot lo perfect wei olketa wei blo Dadi blo hem. (John 14:9) So taem iumi gohed lane abaotem Jesus, datwan bae helpem iumi for savve gud and tinghae lo Jehovah. Tingim wei wea Jesus kaen lo olketa wea pipol ting daonem, olsem olketa wea poor, sik, and wea wik. Tingim tu olketa gud advaes wea hem givim iu, and hao laef blo iu kamap gud taem iu followim olketa advaes blo hem.—Matt. 5:1-11; 7:24-27.
12. Taem iu lane abaotem Jesus, datwan maet muvim iu for duim wanem samting?
12 Love blo iu for Jesus savve kamap moa strong taem iu ting abaotem sakrifaes blo hem wea mekem iumi fit for kasem forgiveness for olketa sin blo iumi. (Matt. 20:28) Taem iu luksavve dat Jesus willing for dae for iu, datwan bae muvim iu for repent and duim samting for kasem forgiveness from Jehovah. (Acts 3:19, 20; 1 John 1:9) And taem iu start for lovem Jesus and Jehovah, datwan bae mekem iu for laek stap witim pipol wea lovem hem tu.
13. Wanem nao Jehovah provaedem for iu?
13 Lane for lovem famili blo Jehovah. Famili blo iu and olketa frens wea no Witness, maet no minim why iu laek for dedicatem iuseleva lo Jehovah. Maet olketa againstim iu tu. Jehovah bae helpem iu taem hem provaedem wanfala spiritual famili. Sapos iu klos lo datfala spiritual famili, iu bae kasem love and sapot wea iu needim. (Mark 10:29, 30; Heb. 10:24, 25) Gogo, maet famili blo iu bae servem Jehovah and obeyim olketa standard blo hem.—1 Pet. 2:12.
14. Olsem 1 John 5:3 storyim, wanem nao iu faendem taem iu followim olketa standard blo Jehovah?
14 Lane for tinghae and followim olketa standard blo Jehovah. Bifor iu start for savve lo Jehovah, maet iu disaedem standard blo iuseleva, bat distaem iu luksavve dat standard blo Jehovah nao hem gud. (Sams 1:1-3; readim 1 John 5:3.) Tingim olketa kaonsel wea stap lo Bible for olketa hasband, waef, parents, and pikinini. (Eph. 5:22–6:4) Taem iu followim olketa kaonsel hia, waswe, iu lukim laef blo famili blo iu hem kamap gud? From iu obeyim direction blo Jehovah for chusim olketa gudfala fren, waswe, olketa wei blo iu hem kamap gud? Waswe, datwan mekem iu hapi? (Provebs 13:20; 1 Cor. 15:33) Maet ansa for olketa kwestin hia hem yes.
15. Wanem nao iu savve duim sapos iu needim help for followim olketa Bible principle?
15 Samfala taem, iu maet faendem hem hard for savve lo hao for followim olketa Bible principle wea iu lanem. Dastawe, Jehovah iusim organization blo hem for provaedem olketa Bible pablikeson wea savve helpem iu for luksavve lo wanem hem stret and no stret. (Heb. 5:13, 14) Taem iu readim and studyim olketa pablikeson hia, iu bae lukim hao datwan savve barava helpem iu, and iu bae laek for kamap part lo organization blo Jehovah.
16. Hao nao Jehovah organizem pipol blo hem?
16 Lane for lovem and sapotim organization blo Jehovah. Jehovah organizem pipol blo hem lo olketa kongregeson, and Son blo hem Jesus nao hem hed blo evri kongregeson. (Eph. 1:22; 5:23) Jesus appointim wanfala smol grup blo olketa anointed man for lead saed lo wei for organizem waka wea hem laekem iumi for duim distaem. Jesus kolem disfala grup “wakaman wea faithful and wise,” and disfala grup ting hevi lo responsibility wea olketa garem for feedim and protectim iu lo spiritual wei. (Matt. 24:45-47) Wanfala wei wea datfala faithful wakaman lukaftarem iu, hem taem olketa mek sure olketa appointim olketa brata wea qualify for kamap elder for lukaftarem iu. (Aesaea 32:1, 2; Heb. 13:17; 1 Pet. 5:2, 3) Olketa elder willing for duim best blo olketa for comfortim iu, and for helpem iu kam moa klos lo Jehovah. Bat wanfala barava important samting wea olketa savve duim for iu, hem nao for helpem iu for teachim olketa narawan abaotem Jehovah.—Eph. 4:11-13.
17. Olsem Rome 10:10, 13, 14 storyim, why nao iumi story lo olketa narawan abaotem Jehovah?
17 Helpem olketa narawan for lane for lovem Jehovah. Jesus talem olketa follower blo hem for teachim olketa narawan abaotem Jehovah. (Matt. 28:19, 20) Maet iumi obeyim datfala komand bikos iumi savve hem responsibility blo iumi. Bat taem love blo iu for Jehovah hem grow, bae iu garem sem feeling olsem aposol Peter and John, wea sei: “Hard tumas for mifala no storyim olketa samting wea mifala lukim and herem.” (Acts 4:20) Iumi savve hapi tumas taem iumi helpem samwan for lovem Jehovah. Tingim hapi wea Philip kasem taem hem helpem datfala man blo Ethiopia for lanem truth lo Bible and baptaes! Taem iu followim example blo Philip and obeyim komand blo Jesus for preach, diswan pruvim dat iu laek for kamap wanfala Jehovah’s Witness. (Readim Rome 10:10, 13, 14.) Taem olsem, iu bae askem sem kwestin wea datfala man lo Ethiopia askem: “Hao, [eni samting stopem] mi for baptaes distaem?”—Acts 8:36.
18. Wat nao bae iumi storyim lo next study?
18 Iu bae mekem wanfala barava important disison lo laef blo iu taem iu disaed for baptaes. From hem barava important, iu need for ting raonem gud wanem nao insaed diswan. Wat nao iu need for savve abaotem wei for baptaes? Wanem nao iu need for duim bifor and bihaen iu baptaes? Bae iumi ansarem olketa kwestin hia lo next study.
SONG 2 Nem Bilong Iu Hem Jehovah
^ par. 5 Samfala wea lovem Jehovah no barava sure sapos olketa redi for baptaes and kamap wanfala Jehovah’s Witness. Sapos iu tu feel olsem, disfala study bae helpem iu for tingim samfala samting wea iu savve duim wea bae helpem iu for baptaes.
^ par. 5 From iumi evriwan no semsem, samfala maet followim olketa idea hia, bat lo difren order from wanem olketa raetem lo disfala study.
^ par. 6 For samfala example moa, lukim brochure Was Life Created? and The Origin of Life—Five Questions Worth Asking.
^ par. 61 PIKSA: Wanfala sista givim tract lo wanfala young woman wea hem meetim taem hem shopping.
