Waswe, Iu Savve Finis?
Waswe, eni pruv wea no kam from Bible showimaot olketa Israelite slave lo Egypt?
Bible storyim dat bihaen olketa Midianite tekem Joseph go lo Egypt, Jacob and famili blo hem muv from Canaan go lo Egypt. Olketa stap lo wanfala part lo Egypt wea olketa kolem Goshen, lo Nile Delta. (Jenesis 47:1, 6) Olketa Israelite kamap staka and strong fogud. So olketa lo Egypt start for fraetem olketa and forcem olketa for kamap slave.—Eksodas 1:7-14.
Samfala man wea no bilivim Bible tok spoelem datfala story, and sei hem kastom story nomoa. Nomata olsem, pruv stap wea showimaot olketa Semite * stap olsem slave lo Egypt bifor.
Olsem example, olketa archaeologist faendem samfala old settlement lo northern Egypt. Dr. John Bimson storyim dat pruv stap wea showimaot winim samting olsem 20-fala settlement blo olketa semite stap lo datfala area lo northern Egypt. And tu, James Hoffmeier, wanfala man wea studyim history blo Egypt sei: “Lo olketa year midolwan 1800 and 1540 B.C., staka pipol wea iusim Semitic-languis lo western Asia laek for muv go lo Egypt.” Hem sei tu: “Abraham, Isaac, and Jacob laef tu lo olketa taem hia, and datwan fitim taem and samting wea Genesis storyim.”
Nara pruv hem kam from southern Egypt. Wanfala papyrus wea olketa raetem lo taem wea olketa kolem Middle Kingdom, (Samting olsem 2000 B.C.E go kasem samting olsem 1600 B.C.E.) hem garem nem blo olketa slave wea waka lo wanfala haos lo southern Egypt. Winim 40-fala lo olketa nem hia hem blo olketa Semite. Olketa slave or servant hia, duim waka for kuki, weavim olketa samting, and waka olsem labor. Hoffmeier sei tu: “From winim 40-fala sermite waka for wanfala haos lo Thebaid [southern Egypt], luk olsem namba blo olketa semite wea waka evriwea lo Egypt, especially lo Delta, hem staka tumas.”
Wanfala Archaeologist, David Rohl storyim hao samfala nem blo olketa slave wea stap lo list hia hem olketa nem wea kam from Bible. Olsem example, list hia garem olketa nem olsem Issachar, Asher, and Shiphrah. (Eksodas 1:3, 4, 15) Rohl sei moa, “Diswan hem pruv wea showimaot hao olketa Israelite slave lo Egypt lo datfala taem.”
Dr. Bimson sei tu: “Datfala story lo Bible abaotem samting wea happen lo Egypt and lo taem blo Exodus, hem history wea garem strongfala pruv.”
^ par. 4 Datfala nem Semite kam from nem blo Shem, wea hem wanfala lo thrifala son blo Noah. Luk olsem, olketa laen wea kam from Shem hem nao, olketa Elamite, olketa Assyrian, olketa Chaldean bifor, olketa Hebrew, olketa Syrian, and samfala lo olketa Arabian tribe.
