1. Olketa wanem kaen hard samting nao pipol blo Jehovah savve kasem?

WASWE, iu feisim hard samting distaem? Maet samwan lo kongregeson duim samting wea mekem iu feel nogud. (Jas. 3:2) Or maet olketa wea iu skul witim or waka witim tok spoelem iu from iu worshipim Jehovah. (1 Pet. 4:3, 4) Or maet samwan lo famili trae for stopem iu for go lo olketa meeting or duim preaching waka. (Matt. 10:35, 36) Sapos eni samting olsem kasem iu, maet iu laek for givap. Bat nomata wanem hard samting iu feisim, iu savve sure Jehovah bae givim iu wisdom for deal witim datwan, and hem bae givim iu strong for helpem iu no givap.

2. Olsem Rome 15:4 talem, hao nao olketa story lo Bible savve helpem iumi?

² Jehovah mek sure Bible storyim example blo pipol wea no givap taem olketa deal witim hard samting. Olsem Paul talem lo Bible, Jehovah duim datwan mekem iumi lane from olketa. (Readim Rome 15:4.) Taem iumi readim olketa story lo Bible datwan savve encouragem and givim iumi hope, bat iumi laekem olketa story hia for changem hao iumi ting lo samting tu. So hao nao olketa example lo Bible savve helpem iumi sapos iumi needim advaes for deal witim wanfala problem? Iumi savve duim fofala samting taem iumi readim Bible, olsem: (1) Prea, (2) Piksarem story lo mind, (3) Ting raonem, and (4) Followim wanem iumi lanem. Distaem bae iumi storyim hao for duim olketa samting hia. * Then bae iumi storyim samting wea happen lo  laef blo King David and lo aposol Paul for traem disfala wei for study.

3. Bifor iu start for readim Bible wanem nao iu shud duim, and why nao olsem?

³ (1) Prea. Bifor iu start for readim Bible, talem Jehovah iu laekem wanem iu bae readim for helpem iu. For example, sapos iu needim advaes lo hao for deal witim wanfala problem, askem Jehovah for mekem iu luksavve lo eni Bible principle wea savve helpem iu.​—Phil. 4:6, 7; Jas. 1:5.

4. Wanem samting nao iu savve duim taem iu readim wanfala story lo Bible?

⁴ (2) Piksarem story lo mind. Wei for piksarem samting lo mind hem nambawan present from Jehovah. Taem iu readim wanfala story lo Bible, tingim olsem iu lo there and iu nao datfala man wea iu read abaotem. Tingim samting wea happen lo hem and feeling blo hem abaotem datwan.

5. Bihaen iu readim samting lo Bible, wanem nao hem gud for ting raonem?

⁵ (3) Ting raonem. Diswan minim bihaen iu readim wanfala story lo Bible, hem gud for tingim wanem iu lanem from datwan. Sapos iumi no duim datwan, hem olsem iu lanem staka word lo wanfala niu languis bat iu no savve hao for joinim tugeta for mekem wanfala sentence. Taem iu ting raonem wanfala story iu readim lo Bible and lane from datwan, hem olsem iu joinim gud olketa word lo languis wea iu lanem for mekem wanfala sentence. For helpem iu ting raonem wanfala story lo Bible, iu savve tingim olketa kwestin olsem: ‘Wanem nao helpem man lo disfala story for deal witim problem wea hem kasem? Hao nao Jehovah helpem hem? Hao nao wanem mi lanem from disfala story helpem mi for deal witim problem wea mi kasem?’

6. Why nao hem important for followim wanem iumi lanem?

⁶ (4) Followim wanem iumi lanem. Jesus sei sapos iumi no followim wanem iumi lanem, iumi olsem man wea wakem haos blo hem lo sandbis. Hem hard waka nating nomoa. Why nao iumi sei olsem? Bikos taem big wind or flood kam, bae haos blo hem foldaon. (Matt. 7:24-27) Lo sem wei tu, nomata iumi prea, piksarem story lo mind, and ting raonem wanem iumi readim, sapos iumi no followim wanem iumi lanem iumi hard waka nating. Taem iumi kasem test or persecution bae iumi no garem strongfala faith. Bat sapos iumi study and followim wanem iumi lanem, datwan bae helpem iumi for mekem olketa gudfala disison, for garem peace, and for garem strongfala faith. (Aesaea 48:17, 18) Distaem bae iumi iusim fofala point hia for lukim wanem iumi savve lanem from samting wea happen lo King David.

7. Wanem story lo Bible nao bae iumi storyim distaem?

⁷ Waswe, wanfala fren or famili member mekem iu feel nogud? Sapos olsem, bae hem gud for readim story lo Bible abaotem Absalom, son blo King David, wea plan for killim dae David mekem hem kamap king.​—Mektu Samuel 15:5-14, 31; 18:6-14.

8. Wanem nao iu savve askem lo Jehovah?

⁸ (1) Prea. Sapos samwan mekem iu feel nogud talem Jehovah why iu feel olsem. (Sams 6:6-9) Then askem Jehovah for mekem iu luksavve lo eni Bible principle insaed datfala story wea bae helpem iu for savve hao for deal witim datfala hard samting.

9. Storyim kam samting wea happen lo Absalom and David.

 ⁹ (2) Piksarem story lo mind. Ting abaotem samting wea happen lo David and hao datwan affectim hem. Absalom waka hard for samfala year for mekem pipol tinghae lo hem. (Mektu Samuel 15:7) Bihaen datwan, Absalom sendem olketa spae lo evri ples lo Israel for encouragem pipol for laek mekem hem kamap king. And tu, Absalom switim Ahithophel, wanfala gud fren blo David, for joinim hem for againstim David. Gogo, Absalom talem evriwan hem nao king, and then taem David barava sik Absalom ting for kasholem and killim hem dae. (Sams 41:1-9) David faendemaot datfala plan and ranawe from Jerusalem. Gogo, army blo Absalom faet witim army blo David, and army blo David winim olketa and killim dae Absalom.

10. Hao nao David maet feel taem olketa nogud samting happen lo hem?

¹⁰ Tingim feeling blo David taem olketa samting hia happen lo hem. Hem lovem son blo hem Absalom and hem trustim fren blo hem Ahithophel. Bat taem tufala evriwan againstim hem and laek for killim hem dae, hem mas feel nogud. Maet datwan mekem David no trustim olketa nara fren blo hem tu, and tingse olketa joinim Absalom for againstim hem. Or maet hem ting for ranawe seleva lo nara kantri for sevem laef blo hem. Olketa hard samting wea happen fit for mekem David wikdaon, bat hem no givap. Wanem nao helpem David?

11. Wanem nao helpem David taem hem kasem hard samting?

¹¹ (3) Ting raonem. Samting wea bae helpem iu for luksavve lo olketa Bible principle insaed lo disfala story hem for tingim disfala kwestin, “Wanem nao helpem David taem hem kasem hard samting?” Nomata hem fraet datwan no stopem hem for mekem olketa important disison, bat hem ting raonem firstaem. Hem prea lo Jehovah for helpem hem, and askem tu help from olketa fren blo hem. Bihaen hem mekem olketa disison, hem kwiktaem duim samting followim datwan. Nomata samfala mekem hem barava feel nogud, hem no heitim pipol or stop for trustim olketa narawan. Hem gohed for trustim Jehovah and olketa nara fren blo hem.

12. Hao nao Jehovah helpem David?

¹² Hao nao Jehovah helpem David? Sapos iu duim research, bae iu lanem hao Jehovah strongim David for no givap. (Sams chapter 3 and smol toktok lo start) Jehovah blessim olketa disison blo David, and Jehovah helpem olketa fren blo David taem olketa faet for protectim king blo olketa.

13. Hao nao iu savve followim example blo David sapos samwan mekem iu feel nogud? (Matthew 18:15-17)

¹³ (4) Followim wanem iumi lanem. Tingim disfala kwestin, ‘Wanem nao mi savve duim for followim example blo David?’ Sapos samwan mekem iu feel nogud, maet iu need for kwiktaem deal witim datwan. Sapos fitim, iu savve duim samting followim wanem Jesus talem lo Matthew chapter 18. (Readim Matthew 18:15-17.) Bat iu shud no mekem olketa disison taem iu kros yet. Iu shud prea lo Jehovah for helpem iu for no kros and for savve wanem for duim. Gohed for trustim olketa brata and sista, and acceptim help from olketa. (Provebs 17:17) Hem barava important tu for followim advaes blo Jehovah wea stap lo Bible.​—Provebs 3:5, 6.

14. Wanem hard samting nao maet kasem iu wea mekem hem gud for iu readim olketa verse lo 2 Timothy 1:12-16; 4:6-11, 17-22?

¹⁴ Waswe, samfala famili member againstim iu bikos iu worshipim Jehovah? Or waswe, iu stap lo kantri wea gavman tambuim waka blo Olketa Jehovah’s Witness? Sapos olsem, bae iu kasem encouragement taem iu readim 2 Timothy 1:12-16 and 2 Timothy 4:6-11, and 17-22. * Paul raetem olketa toktok hia taem hem stap lo prison.

15. Wanem nao iu savve askem lo Jehovah?

¹⁵ (1) Prea. Bifor iu readim olketa verse hia, talem Jehovah abaotem hard samting wea iu deal witim and feeling blo iu abaotem datwan. Then askem Jehovah for mekem iu luksavve lo eni Bible principle from story blo aposol Paul wea savve helpem iu for deal witim samting wea iu feisim.

16. Storyim kam samting wea happen lo Paul.

¹⁶ (2) Piksarem story lo mind. Tingim sapos iu nao Paul. Olketa putim Paul lo prison lo Rome and chainim hand blo hem. Paul stap lo prison bifor, bat distaem hem savve gogo bae olketa killim hem dae. Paul sorre tu bikos samfala Christian brata lo province blo Asia stop for associate witim hem. Evri samting hia affectim Paul and datwan mekem hem feel taed tumas.​—2 Tim. 1:15.

17. Hao nao Paul maet feel taem olketa nogud samting happen lo hem?

¹⁷ Paul savve ting olsem, sapos hem no kamap wanfala Christian olketa bae hard for arrestim hem. And tu, Paul fit for kros lo olketa brata wea stop for associate witim hem, and maet datwan mekem hem no trustim olketa nara fren blo hem. Bat Paul no garem kaen tingting olsem. Why nao Paul gohed for trustim Jehovah and olketa fren blo hem?

18. Wanem nao helpem Paul taem hem kasem hard samting?

¹⁸ (3) Ting raonem. Tingim disfala kwestin, “Wanem nao helpem Paul taem hem kasem hard samting?” Nomata Paul savve bae hem dae, hem luksavve hem important for gohed duim samting wea mekhae lo Jehovah. Hem gohed for tingim olketa narawan tu. Hem showimaot hem depend lo Jehovah from hem prea evritaem. (2 Tim. 1:3) Paul no laek tingim olketa brata wea no associate witim hem, bat hem sei hem tinghae lo olketa fren wea gohed for sapotim and helpem hem. And tu, hem gohed for studyim olketa Scripture. (2 Tim. 3:16, 17; 4:13) Paul barava sure Jehovah and Jesus lovem hem and bae hard for lusim hem. Hem savve Jehovah bae blessim hem bikos hem faithful.

19. Hao nao Jehovah helpem Paul?

¹⁹ Jehovah warnim Paul finis bae hem kasem persecution from hem wanfala Christian. (Acts 21:11-13) So hao nao Jehovah helpem Paul? Hem ansarem olketa prea blo Paul, and helpem and strongim hem. (2 Tim. 4:17) Jehovah talem Paul from hem waka hard tumas bae hem kasem reward for datwan. And tu, Jehovah iusim olketa fren blo Paul for helpem hem.

20. Olsem Rome 8:38, 39 storyim, hao nao iumi savve followim example blo Paul wea showimaot faith?

²⁰ (4) Followim wanem iumi lanem. Tingim disfala kwestin, ‘Hao nao iumi savve followim example blo Paul?’ Olsem Paul, iumi savve bae iumi kasem persecution from iumi worshipim Jehovah. (Mark 10:29, 30) For gohed faithful nomata iumi  kasem hard taem, iumi need for prea lo Jehovah and studyim Bible. And iumi mas luksavve hem important for evritaem duim samting wea mekhae lo Jehovah. Iumi barava sure Jehovah bae no lusim iumi and no eniwan savve duim samting for stopem iumi for kasem love blo hem.​—Readim Rome 8:38, 39; Heb. 13:5, 6.

21. Wanem nao helpem Aya and Hector for winim hard samting wea olketa deal witim?

²¹ Olketa example lo Bible savve helpem iumi for deal witim eni hard samting wea kasem iumi. For example, Aya, wanfala pioneer lo Japan, sei story blo Jonah helpem hem for no fraet for duim pablik witnessing. Hector, wanfala young brata lo Indonesia, sei example blo Ruth helpem hem for laek lane abaotem Jehovah and worshipim hem.

22. Wanem nao bae helpem iu kasem gud samting from olketa Bible Reading Drama and nara samting lo website?

²² Iu savve faendem olketa gudfala example lo samfala faithful man and woman lo Bible lo olketa video and lo olketa Bible Reading Drama. And tu, website garem sekson “Followim Faith blo Olketa Faithful Man and Woman.” * Bifor iu lisin, lukim, or readim eni story hia, askem Jehovah for helpem iu for luksavve lo samfala point wea iu savve followim. Tingim iu nao datfala man wea iu read abaotem. Ting raonem wanem datfala faithful man hem duim and hao Jehovah helpem hem for deal witim hard taem wea hem kasem. Then duim samting followim wanem iu lanem. Talem thankiu lo Jehovah from hem evritaem helpem iu. And tu, iu savve showimaot iu tinghae lo datfala help taem iu encouragem and sapotim olketa narawan.

23. Olsem Aesaea 41:10, 13 talem, wanem nao Jehovah promis for duim for iumi?

²³ From Satan kontrolem disfala world, datwan savve mekem staka hard samting for kamap lo laef blo iumi. (2 Tim. 3:1) Bat iumi no need for wari or fraet. Jehovah hem savve lo olketa hard samting wea iumi deal witim. Taem iumi needim help, hem promis for strongim iumi. (Readim Aesaea 41:10, 13.) Iumi sure Jehovah bae iusim Bible for strongim iumi for winim eni hard taem.