1-2. Olketa hu nao savve helpem Bible study for kamap Witness?

AMY wea stap lo Fiji sei: “Mi barava hapi taem mi studyim Bible. Mi savve wanem mi lanem hem tru. Bat mi start for changem samfala samting lo laef blo mi taem mi go lo olketa meeting witim olketa brata and sista, and gogo mi baptaes.” Experience blo Amy helpem iumi for luksavve olketa Bible study needim help from evriwan lo kongregeson for hem kamap wanfala Witness.

² Evri pablisa savve helpem olketa Bible study for laek kamap Witness. (Eph. 4:16) Leilani, wanfala pioneer sista lo Vanuatu sei: “Mifala savve sei, wanfala pikinini savve lanem staka samting from evriwan lo vilij. Hem olsem tu taem iumi helpem samwan for kamap wanfala disaepol. Evriwan lo kongregeson savve helpem hem.” Parents, olketa relative, olketa fren, and olketa teacher lo skul savve helpem pikinini for garem gudfala laef. Olsem tu, olketa brata and sista lo kongregeson savve givim gudfala advaes, encouragem, and showimaot gudfala example wea bae helpem Bible study for laek kamap Witness.​—Provebs 15:22.

3. Wanem nao iumi savve lanem from samting wea Ana, Daniel, and Leilani talem?

³ Why nao iumi laekem olketa narawan lo kongregeson for helpem Bible study blo iumi? Thrifala pioneer storyim tingting blo olketa abaotem datwan. Ana wea spesol pioneer lo Moldova sei, “Iumi needim help blo olketa narawan lo kongregeson taem Bible study blo iumi start for gohed gud lo spiritual wei.” Daniel * wea hem spesol pioneer lo  Moldova tu sei, “Staka taem, olketa nara pablisa savve storyim samting lo Bible study wea kasem heart blo hem. Olketa savve storyim samting wea mi no tingim.” Leilani sei tu, “Taem Bible study kam lo meeting, and olketa brata and sista kaen and showimaot love lo hem, datwan helpem hem for luksavve iumi olketa pipol blo Jehovah.”​—John 13:35.

4. Wanem nao bae iumi storyim lo disfala article?

⁴ Bat iumi maet ting olsem, ‘Hao nao iumi savve helpem Bible study blo narawan for laek kamap wanfala Witness?’ Disfala article bae storyim wanem iumi savve duim taem wanfala pablisa askem iumi for go witim hem lo Bible study, and wanem iumi savve duim for helpem Bible study wea start for kam lo olketa meeting. Iumi bae storyim tu wanem olketa elder savve duim for helpem olketa Bible study for kamap Witness.

5. Taem iu go witim narawan lo Bible study, wanem nao bae iu laek for duim?

⁵ Conductor nao main wan for teachim Bible study. Nomata olsem, taem samwan askem iu for go witim hem lo Bible study blo hem, hem laekem iu for helpem hem. (Eklesiastes 4:9, 10) Bat hao nao iu savve duim datwan?

6. Taem iu go witim pablisa lo Bible study, hao nao iu savve followim principle lo Provebs 20:18?

⁶ Prepare for Bible study. Firstaem, askem pablisa for talem iu samfala samting abaotem Bible study blo hem. (Readim Provebs 20:18.) Bae hem gud for savve olketa samting abaotem hem olsem age blo hem, famili blo hem, and religion blo hem. Askem pablisa subject wea hem bae storyim lo study, and eni point wea hem laek strongim. Hem gud for savve wanem iu shud no storyim or no duim lo Bible study, and wanem samting for storyim wea maet encouragem hem. Pablisa bae talem nomoa olketa samting wea bae helpem iu for minim datfala Bible study and no eni nara samting wea iu shud no savve. Hem nao samting Joy, wanfala missionary, savve duim taem samwan kam witim hem lo Bible study. Hem sei: “Diswan helpem sista wea kam witim mi for minim datfala Bible study and hao sista hia savve helpem hem.”

7. Taem samwan askem iu for go witim hem lo Bible study, why nao iu need for prepare?

⁷ Taem pablisa askem iu for go witim hem lo Bible study, hem gud for iu preparem wanem iufala bae studyim. (Ezra 7:10, NW) Daniel sei: “Mi hapi taem pablisa wea kam witim mi lo Bible study hem prepare firstaem. Datwan mekem hem isi for hem  join insaed story.” Nara samting, taem iu and conductor prepare hem gudfala example for Bible study. Sapos samting happen wea mekem iu no garem taem for prepare gud, hem gud for mek sure iu savve lo olketa main point for datfala study.

8. Taem iu prea lo wanfala Bible study, hao nao iu savve mek sure datfala prea bae fitim?

⁸ Lo Bible study prea hem important samting, so sapos conductor talem iu bifor iufala go lo study bae iu prea, hem gud for ting raonem firstaem wanem for prea abaotem. Datwan bae helpem iu for prea abaotem samting wea fitim datfala Bible study. (Sams 141:2) Hanae, wea distaem hem wanfala sista lo Japan, sei hem still tingim olketa prea blo sista wea kam witim conductor blo hem. Hanae sei: “Olketa prea blo datfala sista mekem mi luksavve hem fren gud witim Jehovah and mi tu laek for duim datwan. Nara samting, taem sista hia prea abaotem mi, datwan mekem mi for hapi.”

9. Olsem James 1:19 storyim, hao nao iu savve helpem conductor taem iu go lo wanfala Bible study?

⁹ Redi for helpem Bible study conductor. Omamu wanfala spesol pioneer sista lo Nigeria sei: “Mi hapi taem samwan wea kam witim mi lo study hem lisin gud. And mi laekem taem hem storyim olketa gudfala point bat hem gud sapos hem no story tumas from conductor nao main wan for story.” So hao nao bae iu savve lo wanem hem fitim for storyim and for hao long? (Provebs 25:11) Lisin gud taem conductor and Bible study story tugeta. (Readim James 1:19.) Datwan bae mekem iu luksavve lo stret taem for iu story. Hem gud for no story tumas, no katem story blo conductor, and no storyim difren subject. Taem iu iusim tokpiksa, kwestin, or talem short koment datwan savve mekem wanfala point klia. Maet samfala taem iu no garem eni samting for storyim. Bat taem iu showimaot iu tinghae lo datfala Bible study and praisem hem, datwan savve encouragem hem for gohed study.

10. Hao nao experience blo iu savve helpem wanfala Bible study?

¹⁰ Storyim experience blo iu. Sapos fitim, iu savve story for lelebet taem abaotem hao iu kam insaed lo truth, or hao iu winim wanfala hard samting, or hao Jehovah helpem iu for deal witim samting. (Sams 78:4, 7) Experience blo iu savve encouragem Bible study. Maet hem strongim faith blo hem and encouragem hem for gohed studyim Bible. Or maet hem helpem hem for deal witim hard taem wea hem kasem. (1 Pet. 5:9) Gabriel, wea stap lo Brazil and hem pioneer distaem storyim samting wea helpem hem taem hem  studyim Bible. Hem sei: “Taem olketa brata storyim experience blo olketa, datwan helpem mi for luksavve Jehovah savve lo olketa hard taem wea iumi kasem. And sapos olketa winim olketa hard taem hia, mi tu savve duim sem samting.”

11-12. Why nao iumi laek welkamim Bible study wea kam lo olketa meeting?

¹¹ Taem Bible study evritaem attendim olketa meeting, datwan bae helpem hem for kamap Witness. (Heb. 10:24, 25) Maet study conductor nao first wan for invaetem hem for kam lo meeting. Bat taem hem kam lo meeting, iumi evriwan savve encouragem hem for gohed kam lo Kingdom Hall. Hao nao iumi savve duim datwan?

¹² Welkamim olketa Bible study. (Rome 15:7) Taem Bible study luksavve iumi hapi for lukim hem kam lo olketa meeting, datwan savve helpem hem for laek gohed for kam lo Kingdom Hall. Hem gud for iumi go hello lo Bible study and for hem meetim olketa narawan. Maet study conductor no kam yet or hem busy, so hem gud for iu story witim Bible study. Lisin gud and showimaot iu interest lo story blo hem. Taem iumi duim olketa samting olsem, hao nao datwan savve helpem Bible study? Tingim experience blo Demitri wea baptaes tu-thri year go finis and distaem hem ministerial servant. Hem storyim first meeting wea hem attendim and hem sei: “Mi standap aotsaed lo Kingdom Hall from mi fraet, then wanfala brata kam welkamim mi and leadim mi go insaed. Mi barava sapraes taem staka kam for sei hello lo mi. Mi laekem datwan and tingse bae hem naes for garem meeting evriday. Hem firstaem for mi experiencem kaen samting olsem.”

13. Hao nao gudfala example blo iumi savve helpem olketa Bible study?

¹³ Showimaot gudfala example. Gudfala wei blo iumi savve helpem Bible study for acceptim truth. (Matt. 5:16) Vitalii blo Moldovia, wea distaem hem pioneer sei: “Samting wea helpem mi for sure Olketa Jehovah’s Witness nao tru religion, hem gudfala wei blo olketa brata and sista lo kongregeson.”

14. Hao nao gudfala example blo iumi savve helpem olketa Bible study?

¹⁴ Bible study need for followim wanem hem lanem mekem hem fit for baptaes, bat maet datwan no isi. Taem hem lukim iumi kasem gud samting from iumi followim olketa Bible principle, datwan savve helpem hem for laek followim example blo iumi. (1 Cor. 11:1) Hanae wea iumi storyim bifor sei: “Mi lukim olketa brata and sista followim olketa samting wea mi  studyim lo Bible. Datwan helpem mi for lanem hao mi tu savve showimaot love, encouragem, and forgivim olketa narawan. Mi lukim olketa evritaem talem gud samting abaotem narawan, and mi tu laek for duim sem samting.”

15. Hao nao iumi savve followim principle lo Provebs 27:17 for kamap fren blo wanfala Bible study?

¹⁵ Kamap fren blo olketa Bible study. Taem wanfala Bible study gohed for kam lo olketa meeting, each taem hem kam trae for story witim hem. (Phil. 2:4) Maet iumi praisem hem for eni change hem mekem, or askem hem sapos hem enjoyim study blo hem, or askem hem abaotem famili or waka blo hem. Kaen story olsem savve mekem iutufala for kamap fren, and taem hem garem olketa fren datwan savve helpem hem for laek kamap Witness. (Readim Provebs 27:17.) Hanae hem wanfala pioneer distaem, bat hem tingim yet taem hem start for kam lo olketa meeting. Hem sei: “From mi garem olketa fren lo kongregeson mi luk forward for go lo olketa meeting, and nomata mi taed mi savve go. From mi garem olketa niu fren, datwan helpem mi for no spendem taem witim olketa fren wea no worshipim Jehovah. From mi laek fren gud witim Jehovah and for stap insaed organization blo hem, mi disaed for baptaes.”

16. Wanem nao nara samting iumi savve duim for helpem Bible study for laek stap insaed lo kongregeson?

¹⁶ Taem Bible study gohed for mekem olketa change, iumi savve helpem hem for laek stap insaed kongregeson lo wei for spendem taem witim hem. (Heb. 13:2) Denis, wea stap lo Moldova, tingim taem hem studyim Bible. Hem sei: “Tu-thri taem olketa brata and sista invaetem mi and waef for duim hapitaem witim olketa and storyim experience blo olketa. Datwan encouragem mitufala and helpem mifala for laek worshipim Jehovah and for stap lo paradaes.” Taem wanfala Bible study kamap anbaptaes pablisa, iumi savve invaetem hem for go preaching witim iumi. Diego, wanfala brata lo Brazil, sei: “Taem mi anbaptaes pablisa olketa brata invaetem mi for go preaching witim olketa. Taem mi duim ministry witim olketa brata hia mi fren gud witim olketa, mi lanem staka samting, and mi start for fren gud witim Jehovah.”

17. Hao nao olketa elder savve helpem Bible study?

¹⁷ Savve gud lo olketa Bible study. Taem olketa elder showimaot olketa tingim olketa Bible study datwan savve helpem  olketa. Lo olketa meeting hem gud for elder story lo olketa, and hem gud for iusim nem blo olketa taem olketa start for ansa. Maet elder savve joinim pablisa lo wanfala Bible study. Datwan savve barava helpem Bible study. Wanfala pioneer lo Nigeria sei: “Taem olketa Bible study blo mi savve brata wea kam lo study hem wanfala elder, olketa barava sapraes lo datwan. Wanfala Bible study blo mi sei: ‘Bigman lo church blo mi bae hard for kam lukim mi. Hem go lukim nomoa olketa wea rich and olketa wea savve givim selen lo hem!’” Datfala student kam lo olketa meeting distaem.

18. Olsem Acts 20:28 storyim, hao nao olketa elder savve helpem olketa pablisa?

¹⁸ Trainim and encouragem olketa Bible study conductor. Hem responsibility blo olketa elder for helpem olketa pablisa for duim gud ministry, especially for conductim Bible study. (Readim Acts 20:28.) Sapos elder joinim wanfala Bible study and pablisa hem fraet lelebet for conductim datfala study, elder savve ask for duim datwan. Pioneer wea iumi storyim bifor sei: “Olketa elder savve askem mi hao nao olketa Bible study blo mi gohed. Sapos mi needim advaes, olketa elder hapi for helpem mi.” Olketa elder savve barava encouragem olketa study conductor. (1 Thess. 5:11) Datfala pioneer sei tu: “Taem olketa elder encouragem mi and sei olketa tinghae lo hard waka blo mi hem mekem mi feel gud, olsem man drinkim kol wata lo hot day. Toktok blo olketa mekem mi feel olsem mi fit for conductim Bible study and mekem mi laek for gohed duim datwan.”​—Provebs 25:25.

19. Wanem nao iumi evriwan fit for duim?

¹⁹ Maet iumi no garem Bible study distaem bat iumi savve duim samting for helpem olketa Bible study for laek kamap Witness. Taem iumi go lo wanfala study hem gud for prepare and talem olketa koment wea join witim story blo conductor. Taem olketa Bible study kam lo Kingdom Hall iumi laek for kamap fren blo olketa and showim gudfala example lo olketa. Elder bae helpem olketa Bible study taem hem savve gud lo olketa. And tu, olketa elder savve trainim and praisem study conductor. Bae iumi barava hapi sapos iumi duim samting wea helpem olketa Bible study for lovem and worshipim dadi blo iumi, Jehovah.