1. Why nao Jesus askem Jehovah for lukaftarem olketa disaepol?

LO NAET bifor Jesus dae, hem tingim olketa hard samting wea olketa disaepol blo hem bae kasem. From Jesus lovem olketa disaepol, hem askem Dadi blo hem for “lukaftarem olketa mekem Satan no spoelem olketa.” (John 17:14, 15) Jesus savve bihaen hem go bak lo heven, Satan bae gohed for againstim olketa wea worshipim Jehovah, so Jehovah bae need for protectim olketa.

2. Why nao iumi sure Jehovah bae ansarem olketa prea blo iumi?

² Jehovah ansarem prea blo Jesus for lukaftarem olketa disaepol bikos Hem lovem Jesus. Sapos iumi duim samting wea mekem Jehovah hapi, bae hem lovem iumi tu and bae hem ansarem prea blo iumi for protectim and helpem iumi. From Jehovah hem Dadi blo iumi, hem bae evritaem lukaftarem iumi olketa pikinini blo hem.

3. Why nao iumi barava needim Jehovah for protectim iumi?

³ Iumi barava needim Jehovah for protectim iumi bikos start lo taem wea Jesus torowem kam Satan lo earth, Satan “kros fogud.” (Rev. 12:12) Satan mekem samfala wea againstim iumi for tingse olketa “duim waka bilong God.” (John 16:2) Olketa narawan, wea no biliv lo God, againstim iumi bikos iumi difren from pipol lo world. Nomata wanem reason olketa againstim iumi, iumi no fraet bikos Jehovah bae strongim and protectim iumi from Satan. (2 Thess. 3:3) Hao nao Jehovah protectim iumi? Bae iumi storyim tufala samting wea Jehovah provaedem.

4. Olsem Ephesus 6:13-17 talem, wanem nao Jehovah givim for protectim iumi?

⁴ Jehovah provaedem olketa samting for werem lo faet for protectim iumi from Satan. (Readim Ephesus 6:13-17.) For barava kasem protection iumi mas werem olketa samting hia, and no enitaem aotem. Distaem bae iumi storyim mining blo each samting iumi werem lo faet.

5. Wanem nao belt piksarem, and why nao iumi mas werem?

⁵ Belt piksarem olketa tru samting wea stap lo Bible. Why nao hem important for werem disfala belt? Bikos Satan hem “dadi bilong wei for laea.” (John 8:44) For staka thousand year finis hem laea lo “evriwan long earth”! (Rev. 12:9) Bat from iumi savve lo olketa tru samting wea Bible talem, datwan helpem iumi for no bilivim olketa laea blo Satan. Wanem nao hem minim for werem belt? Hem nao for lanem olketa tru samting abaotem Jehovah, worshipim Jehovah followim wanem hem laekem, and honest lo evri samting wea iumi duim.​—John 4:24; Eph. 4:25; Heb. 13:18.

6. Datfala samting for kavarem chest hem piksarem wanem, and why nao hem important for iumi werem?

⁶ Datfala samting for kavarem chest piksarem olketa raeteous standard blo Jehovah. Why nao hem important for werem datwan? Soldia werem samting for kavarem chest for protectim heart blo hem. So for protectim tokpiksa heart blo iumi, iumi mas followim olketa raeteous standard blo Jehovah mekem iumi no duim olketa nogud samting wea pipol lo world duim. (Provebs 4:23) Bible sei iumi shud lovem and worshipim Jehovah lo full heart blo iumi. (Matt. 22:36, 37) Satan no laekem iumi for followim olketa raeteous standard blo Jehovah, so maet hem trae switim iumi for duim wanem Jehovah heitim. (Jas. 4:4; 1 John 2:15, 16) And sapos hem no savve switim iumi, maet hem trae forcem iumi for duim samting wea Jehovah no laekem.

7. Wanem nao showimaot iumi werem datfala samting for kavarem chest?

⁷ Taem iumi acceptim and followim wanem Jehovah sei hem stret and no stret datwan showimaot iumi werem datfala samting for kavarem chest. (Sams 97:10) Samfala tingse for followim olketa standard blo Jehovah hem mekem olketa no garem freedom. Bat sapos iumi no laek for followim olketa Bible principle, bae iumi olsem wanfala soldia wea aotem samting for kavarem chest taem hem insaed lo bigfala faet bikos hem tingse hem hevi tumas. Datwan karangge samting for duim! From iumi lovem Jehovah, hem “no hard tumas” for obeyim olketa law blo hem and datwan bae protectim iumi.​—1 John 5:3.

8. Why nao hem important for werem tokpiksa sandol?

⁸ Sandol tu Paul encouragem iumi for werem. Datwan minim iumi mas evritaem redi for talemaot gud nius abaotem Kingdom. Taem iumi sharem message wea stap lo Bible witim pipol datwan strongim faith blo iumi. Pipol blo Jehovah iusim evri chance for preachim gud nius. Olketa preach lo olketa wea olketa waka or skul witim, taem olketa go lo stoa, and taem olketa visitim relative. Olketa duim bisnis territory, haos tu haos, story lo olketa fren and taem olketa no savve go aot olketa faendem wei for preach tu. Sapos iumi stop for preach from iumi fraet, bae iumi  olsem wanfala soldia wea aotem sandol taem hem insaed bigfala faet. Leg blo hem bae isi for garekil. Datwan bae mekem hem hard for defendim hemseleva, and for go duim eni samting wea komanda talem.

9. Why nao hem important for holem datfala big shield?

⁹ Shield piksarem faith wea iumi garem lo Jehovah and olketa promis blo hem. So why nao iumi mas holem datfala big shield? Bikos faith bae helpem iumi for “blokem olketa arrow bilong Satan wea laet long fire.” Olsem example, from iumi garem faith bae iumi no bilivim olketa laea teaching blo olketa apostate and bae no wikdaon taem pipol tok spoelem iumi. Faith bae helpem iumi for obeyim Jehovah taem samwan lo skul or waka ples trae switim iumi for duim samting wea no followim olketa standard blo Jehovah. (1 Pet. 3:15) And iumi showimaot iumi holem shield tu, taem iumi no acceptim waka wea bae mekem iumi misstim olketa meeting and no duim preaching waka. (Heb. 13:5, 6) And tu, iumi showimaot faith taem iumi gohed worshipim Jehovah nomata pipol againstim iumi.​—1 Thess. 2:2.

10. Wanem nao helmet piksarem, and why nao hem important for werem datwan?

 ¹⁰ Helmet hem hope wea iumi garem for laef olowe. From iumi duim wanem Jehovah laekem, iumi sure nomata iumi dae bae hem resurrectim iumi. (1 Thess. 5:8; 1 Tim. 4:10; Titus 1:1, 2) Olsem helmet blo soldia protectim hed blo hem, hope wea iumi garem protectim tingting blo iumi. Hao nao olsem? Taem iumi garem olketa problem bae iumi no wari tumas and bae iumi gohed for tingim olketa promis blo God for future. Wanem nao showimaot iumi werem helmet? Bae iumi garem sem tingting olsem Jehovah abaotem olketa samting, for example, bae iumi no trustim olketa material samting for mekem iumi hapi bat bae iumi hope lo God for givim iumi evri samting.​—Sams 26:2; 104:34; 1 Tim. 6:17.

11. Wanem nao datfala tokpiksa sword, and why nao hem important for iusim sword hia?

¹¹ Sword hem toktok blo God lo Bible. Bible hem olsem sword bikos hem garem paoa for “aotem tingting bilong pipol wea hem no stret.” So Bible helpem pipol for luksavve lo olketa laea teaching and for lusim olketa nogud wei. (2 Cor. 10:4, 5; 2 Tim. 3:16, 17; Heb. 4:12) Iumi lane for iusim gud sword taem iumi duim study seleva and followim training wea iumi kasem from organization blo God. (2 Tim. 2:15) So taem iumi werem evri samting for faet hem wanfala wei Jehovah protectim iumi. Bat wanem nao mek-tu wei Jehovah protectim iumi?

12. Why nao iumi needim olketa brata and sista?

¹² Wanfala soldia savve hem no fit for faetem wanfala big army seleva. Hem needim olketa nara soldia for helpem hem. Olsem tu, wanfala Christian needim olketa brata and sista for sapotim hem for againstim Satan and olketa wea saedem hem, and shud no trae againstim Satan seleva. Jehovah iusim olketa brata and sista evriwea lo world for sapotim iumi.​—1 Pet. 2:17.

13. Olsem Hebrew 10:24, 25 talem, hao nao olketa meeting savve helpem iumi?

¹³ Wanfala wei iumi kasem help from Jehovah hem olketa meeting. (Readim Hebrew 10:24, 25.) Taem iumi feel sorre, hao nao olketa meeting savve encouragem iumi? Iumi kasem encouragement from olketa naesfala koment blo olketa brata and sista. Olketa tok and demonstration tu savve helpem iumi for gohed worshipim Jehovah. And taem iumi story witim olketa brata and sista bifor and bihaen lo olketa meeting, datwan savve strongim iumi. (1 Thess. 5:14) Nara samting, lo olketa meeting iumi hapi from iumi garem chance for helpem olketa narawan. (Acts 20:35; Rome 1:11, 12) Lo olketa meeting tu, wanem iumi lanem savve helpem iumi for duim gud preaching waka and for teachim narawan, for example, iumi lane hao for iusim gud olketa tul lo Teaching Toolbox. Dastawe hem important for prepare gud for olketa meeting, lisin gud taem meeting gohed, and followim wanem iumi lanem. Taem iumi duim olketa samting hia, bae iumi kamap “gudfala soldia bilong Christ Jesus.”​—2 Tim. 2:3.

14. Hu moa savve helpem iumi?

¹⁴ Iumi kasem help tu from staka million angel. Tingim bigfala paoa blo wanfala angel nomoa! (Aesaea 37:36) Bat hao sapos staka million angel? No eni man or demon savve winim strongfala army blo Jehovah. Taem pipol againstim  iumi, iumi savve gohed for faithful bikos Jehovah garem paoa for helpem iumi. (Jajis 6:16) Iumi sure hem bae helpem iumi! Hem gud for tingim datwan taem samwan wea iumi waka witim, skul witim, or olketa relative mekem iumi feel wikdaon from olketa againstim iumi. Tingim, from iumi duim wanem Jehovah laekem, iumi savve bae hem sapotim iumi.

15. Olsem Aesaea 54:15, 17 talem, why nao no eniwan savve stopem preaching waka?

¹⁵ Why nao staka pipol lo world wea Satan kontrolem againstim iumi? Hem bikos iumi no joinim politik and no faet lo war, iumi talem pipol abaotem nem blo God and hao Kingdom nomoa savve mekem world garem peace, and iumi followim olketa raeteous standard blo God. Iumi helpem pipol tu for luksavve Satan hem rulim world and hem man for laea and killim dae pipol. (John 8:44) Nara samting, iumi talem pipol hao klosap nao God bae finisim Satan and disfala nogud world. Satan and olketa wea saedem hem laek for stopem preaching waka, bat iumi bae gohed for duim datwan! Nomata Satan garem paoa, hard for hem stopem pipol for herem message abaotem Kingdom. Datwan hem bikos Jehovah protectim pipol blo hem.​—Readim Aesaea 54:15, 17.

16. Wanem nao Jehovah bae duim for protectim pipol blo hem lo bigfala trabol?

¹⁶ Wanem moa bae happen? Lo bigfala trabol, Jehovah bae protectim iumi. Firstaem hem bae protectim iumi taem hem iusim olketa gavman for finisim evri false religion, wea hem nao Bigfala Babylon. (Rev. 17:16-18; 18:2, 4) Then lo Armageddon, Jehovah bae protectim iumi taem hem finisim evri nara nogud pipol lo world blo Satan.​—Rev. 7:9, 10; 16:14, 16.

17. Wanem gud samting nao iumi savve kasem from iumi fren gud witim Jehovah?

¹⁷ Nomata wanem Satan duim lo iumi, sapos iumi gohed fren gud witim Jehovah iumi garem hope. Satan nao no garem hope bikos gogo Jehovah bae finisim hem. (Rome 16:20) So iumi mas werem evri samting for faet and no enitaem aotem! And tu, iumi mas luksavve iumi needim help for faetem Satan and olketa wea saedem hem and no trae for faet seleva, sapotim olketa brata and sista, and followim direction wea kam from Jehovah. Sapos iumi duim evri samting hia, iumi savve sure Jehovah wea hem dadi blo iumi bae strongim and protectim iumi.​—Aesaea 41:10.