1. Why nao iumi tinghae lo olketa young brata lo kongregeson?

FROM iufala young brata strong, iufala fit for duim staka samting lo kongregeson. (Provebs 20:29) Iufala duim staka samting finis for helpem kongregeson. And maet iu garem goal for kamap ministerial servant. Bat maet iu tingse olketa narawan ting iu young tumas or iu no garem experience wea mekem iu fit for duim datfala important assignment. Nomata iu young, iu savve waka hard lo kongregeson distaem mekem olketa lo kongregeson trustim and respectim iu.

2. Wanem nao bae iumi storyim lo disfala study?

² Lo disfala study, bae iumi storyim example blo King David, and bae iumi storyim samting wea happen lo tufala king blo Judah, Asa and Jehoshaphat. Bae iumi storyim tu olketa problem wea kasem thrifala hia, hao olketa deal witim olketa problem olsem, and wanem olketa young brata savve lanem from example blo thrifala.

3. Hao nao olketa young wan savve helpem olketa narawan lo kongregeson?

³ Taem David hem young, hem waka hard for kamap gud lo samfala samting, olsem hem savve tumas for pleim harp. Music wea David pleim barava helpem King Saul taem hem feel sorre. (1 Sam. 16:16, 23, NW) Iufala young brata tu maet garem savve abaotem samting for helpem olketa lo kongregeson. For example, maet iu savve hao for iusim technology. Samfala wea no minim gud hao for iusim tablet or mobile bae tinghae sapos iu showim olketa  hao for iusim for meeting and for duim study seleva. Savve wea iu garem mekem iu fit for barava helpem olketa narawan lo kongregeson.

4. Wanem nao samfala wei blo David wea olketa young brata lo kongregeson tu laek for garem? (Lukim piksa lo front page.)

⁴ Nomata David hem young man, hem garem olketa wei wea mekem narawan fit for trustim hem. For example, hem waka hard for lukaftarem olketa sheepsheep blo dadi blo hem, nomata samfala taem laef blo hem stap lo danger. Wanfala taem David storyim datwan lo King Saul. Hem sei: “King, mi bin lukaftarem olketa sipsip blong dadi blong mi. An taem laeon o bea hemi kam fo tekem wanfala smolfala sipsip, oltaem mi ran go bihaen an mi kilim hem fo sevem smolfala sipsip ya.” (Fas Samuel 17:34, 35) David savve hem responsibility blo hem for lukaftarem olketa sheepsheep, and hem faet witim olketa animal for protectim olketa sheepsheep. Olketa young brata savve followim example blo David for duim gud eni assignment wea olketa kasem lo kongregeson.

5. Olsem Sams 25:14 sei, wanem nao hem barava important for olketa young brata duim?

⁵ Taem David hem young, hem fren gud witim Jehovah. David laek for pleim harp and for lukaftarem olketa sheepsheep, bat hem barava laek for fren gud witim Jehovah, God blo hem. (Readim Sams 25:14.) Hem barava important for iufala young brata for fren gud witim Jehovah. Maet datwan mekem iufala fit for kasem samfala privilege moa lo kongregeson.

6. Hao nao samfala ting lo David?

⁶ Samfala tingse David young tumas and no trustim hem for duim samfala samting. For example, taem David volunteer for faetem Goliath, King Saul trae for stopem hem. Saul sei: “Yu wanfala boe nomoa.” (Fas Samuel 17:31-33) Narataem, big brata blo hem accusim hem for no duim gud waka blo hem for lukaftarem sheepsheep. (Fas Samuel 17:26-30) Bat Jehovah savve gud lo David. Hem trustim David and no tingse hem young tumas for faetem Goliath. David killim dae Goliath bikos hem depend lo fren blo hem Jehovah for strongim hem.​—Fas Samuel 17:45, 48-51.

7. Wanem nao iu savve lanem from samting wea happen lo David?

 ⁷ Wanem nao iufala young brata savve lanem from samting wea happen lo David? Iu savve lane for patient. Hem maet tek taem for samfala luksavve iu no smol pikinini distaem, iu big nao. Nomata maet iu luk young, Jehovah no tingim datwan bat hem savve gud lo iu and luksavve iu fit for duim samfala samting. (Fas Samuel 16:7) Iu savve lane tu for gohed fren gud witim God. Wanfala wei David duim datwan, hem lukluk lo creation blo Jehovah. Taem David ting raonem olketa samting hia, hem lanem staka samting abaotem Jehovah. (Sams 8:3, 4; 139:14; Rome 1:20) Nara samting iu savve lanem, hem for askem Jehovah for strongim iu for gohed faithful. For example, waswe, samfala wea iu skul witim mekfani lo iu bikos iu wanfala Jehovah’s Witness? Sapos olsem, prea lo Jehovah mekem hem helpem iu for deal witim datwan. And followim gudfala advaes from Bible, olketa Bible pablikeson, and olketa video blo iumi. Taem iu luksavve Jehovah evritaem helpem iu for deal witim hard samting, datwan bae mekem iu for barava trustim Jehovah. And tu, taem olketa narawan luksavve iu depend lo Jehovah, olketa tu bae trustim iu.

8-9. Wanem nao helpem David for patient kasem taem hem kamap king, and wanem nao olketa young brata savve lanem from example blo hem?

⁸ Tingim nara samting wea David mas deal witim. Bihaen Samuel anointim David for king, hem mas weit for staka year bifor hem kamap king lo Judah. (Fas Samuel 16:13; Mektu Samuel 2:3, 4) Wanem nao helpem David for patient for staka year olsem? Hem iusim datfala taem for duim samting and no stap nating nomoa. For example, taem David ranawe and stap lo ples blo olketa Philistine, hem faetem olketa enemy blo Israel. From hem duim datwan, olketa enemy no tekovarem land blo Judah.​—Fas Samuel 27:1-12.

⁹ Wanem nao iufala young brata savve lanem from example blo David? Iufala savve iusim taem blo iufala for duim samting for Jehovah and for help lo kongregeson. Tingim experience blo brata wea nem blo hem Ricardo. * Taem hem teenager, hem barava laek for regular pioneer. Bat olketa elder sei hem need for waka lo samfala samting firstaem. Ricardo no feel nogud lo datwan bat hem followim advaes blo olketa and start for spendem staka taem lo ministry. Hem sei: “Mi luksavve hem gud for mi duim samfala samting moa. Mi waka hard for go bak and lukim pipol wea interest and mi prepare gud for olketa return visit. Mi conductim tu first Bible study blo mi. From mi spendem staka taem lo ministry, mi start for kamap gud lo ministry.” Distaem Ricardo hem regular pioneer and ministerial servant.

10. Wanem nao David duim bifor hem disaed for duim wanfala samting?

¹⁰ Tingim nara samting wea happen lo David. Hem and olketa man blo hem witim famili blo olketa ranawe from Saul and stap lo ples blo olketa Philistine. Wantaem olketa lusim famili blo olketa lo there and go for faetem samfala enemy. Taem David and olketa man blo hem go faet, samfala enemy attakim taon wea  famili blo olketa stap and tekem olketa. Maet David tingse from hem savve hao for faet, hem fit for mekem plan for tekem bak famili blo olketa, bat hem no duim olsem. Hem laek for kasem help from Jehovah so hem go lukim Abiathar, wanfala priest, and askem Jehovah olsem: “Waswe, bae mi go bihaen long olketa wea i spoelem mifala?” Jehovah talem David for aftarem olketa enemy and hem sei bae David sevem famili blo olketa. (Fas Samuel 30:7-10) Wanem nao iufala young brata lanem from samting wea happen lo David?

11. Wanem nao iu savve duim bifor iu mekem olketa disison?

¹¹ Hem gud for iu askem advaes from narawan bifor iu mekem olketa disison. For example, story witim parents blo iu, or askem advaes from olketa elder wea garem experience. Jehovah trustim olketa elder, so iu fit for trustim olketa tu. Jehovah ting lo olketa olsem “present” for iumi lo kongregeson. (Eph. 4:8) Iu savve mekem olketa wise disison sapos iu followim gudfala advaes and example blo olketa. Distaem bae iumi storyim wanem olketa young brata savve lanem from King Asa.

12. Taem Asa start for rul, hem showimaot olketa wanem gudfala wei?

¹² Asa hem young taem hem kamap king bihaen dadi blo hem Abijah hem dae. Hem hambol and hem man for no fraet. For example, no longtaem bihaen hem kamap king hem distroem olketa idol wea pipol blo Judah worshipim. And tu, ‘hemi talem olketa fo falom Jehovah hu hemi God blong olketa grani blong olketa, an fo obeim lo an evri toktok blong hem.’ (Mektu Kronikols 14:1-7) Taem Zerah, man from Ethiopia kam witim 1,000,000 soldia for attakim Judah, Asa askem help from Jehovah. Hem sei: ‘Jehovah yu nomoa yu save helpem mifala hu i wik tumas fo agensim olketa wea i strong tumas. Jehovah, God blong mifala, mifala trastem yu nomoa.’ Toktok hia showimaot Asa barava sure Jehovah bae sevem hem and pipol blo hem. Asa trustim Jehovah, and “[Jehovah] hemi mekem olketa fo win.”​—Mektu Kronikols 14:8-12.

13. Wanem nao happen lo Asa, and why nao olsem?

 ¹³ Masbi Asa fraet taem army wea garem 1,000,000 soldia kam for faetem hem. Nomata olsem, from Asa trustim Jehovah hem winim datfala faet. Bat taem Asa deal witim nara hard samting, hem no trustim Jehovah. Diswan happen taem King Baasha blo Israel duim samting for againstim pipol blo Judah. Lo datfala taem Asa askem help from king blo Syria. Nogud samting nao kamaot from datwan! Jehovah iusim profet Hanani for talem Asa: ‘Bikos yu no trastem Jehovah, bat yu trastem nomoa king blong Siria.’ Bihaen datwan, King Baasha gohed for againstim King Asa. (Mektu Kronikols 16:7, 9; Fas Kings 15:32) Wanem nao iufala young brata savve lanem from Asa?

14. Wanem nao showimaot iu depend lo Jehovah, and wanem nao bae kamaot from datwan, olsem 1 Timothy 4:12 talem?

¹⁴ Hem gud for iufala gohed for hambol and depend lo Jehovah. Taem iu baptaes, iu showimaot iu garem faith and trustim Jehovah. And Jehovah hem hapi tumas for welkamim iu lo famili blo hem. Important samting hem for gohed depend lo Jehovah. Maet hem isi for depend lo Jehovah taem iu mekem olketa bigfala disison, bat waswe lo taem wea iu mas disaedem olketa nara samting? Iu need for depend lo Jehovah bifor iu mekem eni disison, nomata hem abaotem hapitaem, waka for selen, or olketa goal blo iu! No depend lo savve blo iuseleva, bat tingim eni Bible principle wea join witim wanem iu mas disaedem and followim principle hia. (Provebs 3:5, 6) Taem iu duim datwan Jehovah bae hapi witim iu and olketa lo kongregeson bae tinghae lo iu.​—Readim 1 Timothy 4:12.

15. Olsem Mektu Kronikols 18:1-3; 19:2 storyim, olketa wanem disison wea no stret nao King Jehoshaphat mekem?

¹⁵ From iufala young wan no perfect, samfala taem bae iufala duim mistek. Bat no letem datwan stopem iu for duim waka for Jehovah. Tingim example blo King Jehoshaphat. Hem garem olketa gudfala wei. Taem hem young man,  “hemi askem God blong dadi blong hem fo lidim hem, an hemi obeim olketa toktok blong hem.” And tu, hem sendem olketa prince for go lo evri taon for teachim pipol abaotem Jehovah. (Mektu Kronikols 17:4, 7) Nomata Jehoshaphat duim olketa gud samting, hem mekem olketa disison wea no stret tu. Wantaem Jehovah iusim profet Jehu for kaonselem Jehoshaphat from hem mekem wanfala nogud disison. (Readim Mektu Kronikols 18:1-3; 19:2.) Wanem nao iufala young brata savve lanem from diswan?

16. Wanem nao iu savve lanem from samting wea happen lo Rajeev?

¹⁶ Hem gud for lisin and followim kaonsel. Maet iu olsem samfala young wan wea no barava enjoyim preaching and olketa meeting. Sapos olsem, no feel wikdaon. Tingim experience blo Rajeev, wanfala young brata. Hem sei: “Taem mi teenager mi no garem olketa spiritual goal. Olsem samfala nara young wan, mi interest for plei sports and duim olketa nara samting winim for go lo olketa meeting or go preaching.” Hu nao helpem Rajeev? Wanfala elder givim hem kaonsel for helpem hem. Rajeev sei: “Datfala elder helpem mi for ting raonem Bible principle wea stap lo 1 Timothy 4:8.” Rajeev tinghae lo kaonsel hia and start for changem tingting blo hem. Hem sei: “Bihaen mi kasem kaonsel mi disaed for markem olketa spiritual goal. Tu-thri year bihaen datwan, mi kamap ministerial servant.”

17. Hao nao olketa lo kongregeson ting lo olketa young brata wea worshipim Jehovah?

¹⁷ Olketa brata and sista tinghae lo iufala olketa young brata wea worshipim Jehovah “tugeta” witim olketa! (Sefenaea 3:9) Olketa tinghae lo iu from iu strong and iu duim gud staka waka lo kongregeson.​—1 John 2:14.

18. Olsem Provebs 27:11 storyim, hao nao Jehovah ting lo olketa young brata wea worshipim hem?

¹⁸ Iufala olketa young brata, Jehovah hem lovem and trustim iufala. Hem talem finis lo olketa last day staka young man bae willing for duim waka for hem. (Sams 110:1-3) Jehovah savve iu lovem hem and iu laek for duim staka samting for helpem kongregeson, bat iu mas patient. And tu, taem samwan stretem iu from iu duim mistek, ting lo datwan olsem Jehovah hem trainim iu. (Heb. 12:6) Trae for duim gud eni waka wea iu kasem lo kongregeson. Barava important samting nao hem for duim olketa samting wea bae mekem Jehovah for hapi lo iu.​—Readim Provebs 27:11.