1. Olsem Matthew 24:9 talem, why nao iumi shud expectim pipol bae againstim iumi?

HEM wei blo pipol for showimaot love lo narawan and for laekem narawan for showimaot love lo olketa. So taem samwan heitim iumi, iumi savve feel sorre or fraet. For example, Georgina, wanfala sista lo Europe sei: “Taem mi 14 years, mami againstim mi bikos mi worshipim Jehovah. Datwan mekem mi for barava sorre, and mi start for tingse mi nogud gele.” * Wanfala brata wea nem blo hem Danylo sei: “Taem olketa soldia hitim mi, tok spoelem mi, and sei olketa bae killim mi nogud bikos mi wanfala Jehovah’s Witness, datwan mekem mi fraet fogud.” Iumi no laekem pipol for heitim iumi, bat iumi shud expectim diswan bikos Jesus talem finis datwan bae happen.​—Readim Matthew 24:9.

2-3. Why nao pipol les lo olketa wea followim Jesus?

² Samfala les lo iumi wea followim Jesus bikos olsem Jesus, iumi “no olsem pipol long world.” (John 15:17-19) Nomata iumi respectim olketa gavman, bae iumi no saedem politik, no salutim flag, and no singim national anthem. Iumi worshipim Jehovah nomoa and iumi luksavve God nao garem raet for rul, nomata Satan and olketa wea saedem hem no acceptim datwan. (Jenesis 3:1-5, 15) Taem iumi preach, iumi storyim Kingdom blo God nao hope blo olketa man and datfala Kingdom bae finisim evri nara gavman. (Daniel 2:44; Rev. 19:19-21) Diswan hem gud nius for olketa wea hambol, bat nogud pipol no laek for herem datwan.​—Sams 37:10, 11.

 ³ Nara reason samfala les lo iumi hem bikos iumi followim olketa raeteous standard blo God. Olketa standard blo God barava difren from olketa standard blo world. For example, staka pipol sei hem olraet for man durong witim man, bat hem nao why God distroem pipol lo Sodom and Gomorrah! (Jude 7) From iumi followim olketa standard lo Bible and no acceptim diswan, pipol tok spoelem iumi and sei iumi ting daonem olketa man hia!​—1 Pet. 4:3, 4.

4. Taem pipol les lo iumi, wanem nao savve helpem iumi for no givap?

⁴ Taem pipol les lo iumi and tok spoelem iumi, wanem nao savve helpem iumi for no givap? Iumi mas garem faith and sure Jehovah bae helpem iumi. Faith blo iumi hem olsem shield wea “blokem olketa arrow bilong Satan.” (Eph. 6:16) Nomata iumi garem faith, iumi mas garem love tu. Why nao olsem? Bikos man wea garem love “no kwiktaem for kros,” and no givap taem pipol againstim hem. (1 Cor. 13:4-7, 13) Distaem bae iumi storyim hao taem pipol againstim iumi, love wea iumi garem for Jehovah, olketa brata and sista, and olketa enemy tu, savve helpem iumi for no givap.

5. Wanem nao Jesus willing for duim from hem lovem Dadi blo hem?

⁵ Lo naet bifor olketa enemy blo Jesus killim hem dae, hem talem olketa disaepol why hem willing for dae. Hem sei: “Mi lovem Dadi long heven, [so] mi duim samting wea Dadi talem long mi.” (John 14:31) From Jesus lovem Jehovah, datwan helpem hem for deal witim datfala hard samting. Love blo iumi for Jehovah savve helpem iumi for deal witim olketa hard samting tu.

6. Olsem Rome 5:3-5 talem, hao nao pipol blo Jehovah feel taem pipol againstim olketa?

⁶ Taem pipol blo Jehovah kasem persecution, love for God helpem olketa for deal witim datwan. For example, taem Hae Kot blo olketa Jew talem olketa aposol for no preach olketa sei, “God nao hem ruler wea mifala mas obeyim, no olketa man.” From olketa aposol lovem God, olketa gohed for preach. (Acts 5:29; 1 John 5:3) Distaem tu, samfala gavman persecutim samfala brata, bat from olketa lovem Jehovah olketa gohed faithful. So taem pipol lo world againstim iumi, iumi no wikdaon bat iumi gohed for hapi.​—Acts 5:41; readim Rome 5:3-5.

7. Taem olketa famili member againstim iumi, wanem nao iumi shud duim?

⁷ Taem iumi studyim Bible and olketa famili member againstim iumi, datwan hem barava hard samting for deal witim. Maet olketa tingse wanem iumi lanem hem no tru, or tingse iumi karangge from iumi laek studyim Bible. (Comparem Mark 3:21.) Samfala famili member maet barava treatim iumi nogud. Iumi expectim kaen samting olsem for happen bikos Jesus sei: “Bae enemy bilong man nao olketa wea stap long sem haos witim hem.” (Matt. 10:36) Nomata olketa famili member againstim iumi, iumi no treatim olketa olsem enemy. Taem iumi lane for lovem Jehovah, datwan helpem iumi for gohed lovem olketa. (Matt. 22:37-39) Bat bae iumi no laek duim samting wea againstim olketa law and principle lo Bible for mekem olketa famili member hapi nomoa.

8-9. Wanem nao helpem Georgina for no givap nomata mami blo hem barava againstim hem?

⁸ Georgina wea iumi storyim finis no givap nomata mami blo hem barava againstim hem. Georgina sei: “Firstaem, wanfala  Witness studyim Bible witim mi and mami. Bihaen sixfala month, mi laek go lo olketa meeting bat mami stop for study and start for againstim mi. Mi faendemaot mami bin story witim olketa apostate and iusim toktok blo olketa for trae stopem mi for study. Mami savve tok spoelem mi, pullim hair blo mi, holem taet nek blo mi, and torowem olketa Bible buk blo mi lo rabis. Nomata olsem, mi baptaes taem mi 15 years. Mami gohed for againstim mi and forcem mi for go stap lo ples wea pipol savve lukaftarem olketa teenager wea tekem drug or duim olketa nogud samting. Taem mami treatim mi nogud, datwan hem barava hard samting bikos hem nao shud lovem and lukaftarem mi.”

⁹ Wanem nao helpem Georgina for no givap? Hem sei: “Mi just finis for readim full Bible taem mami start for barava againstim mi. Mi barava sure wanem mi lanem hem tru, and mi ting lo Jehovah hem fren blo mi. Mi prea lo hem staka taem and mi sure hem herem olketa prea hia. Taem mi stap witim olketa nara teenager, wanfala sista talem mi for go lo haos blo hem for mifala readim Bible and for duim research. Mi kasem encouragement tu from olketa brata and sista and olketa lukaftarem mi gud. Mi barava luksavve Jehovah savve strongim iumi for deal witim eniwan wea againstim iumi.”

10. Iumi sure Jehovah bae evritaem duim wanem?

¹⁰ Aposol Paul sei no eni samting savve ‘stopem iumi for no kasem love bilong God and Lord bilong iumi Christ Jesus.’ (Rome 8:38, 39) Nomata maet iumi safa for lelebet taem, Jehovah bae helpem, comfortim, and strongim iumi. Experience blo Georgina showimaot Jehovah savve iusim tu olketa brata and sista for helpem iumi.

11. Hao nao love wea Jesus storyim lo John 15:12, 13 helpem olketa disaepol? Storyim example.

¹¹ Lo naet bifor Jesus dae, hem remindim olketa disaepol for lovem each other mekem olketa tingim each other firstaem. (Readim John 15:12, 13.) Jesus savve kaen love olsem bae helpem olketa for wan mind and for no givap taem pipol againstim olketa. Tingim example blo kongregeson lo Thessalonica. Taem datfala kongregeson hem start, pipol persecutim  olketa brata and sista. Nomata olsem, olketa gohed faithful and showimaot love. (1 Thess. 1:3, 6, 7) Paul encouragem olketa for gohed showimaot love “long bigfala wei moa.” (1 Thess. 4:9, 10) Paul savve datwan bae helpem olketa for comfortim olketa wea sorre and for helpem olketa wea wik lo spiritual wei. (1 Thess. 5:14) Luk olsem olketa followim wanem Paul talem, bikos lo mek-tu leta wea Paul raetem wan year bihaen, hem sei: “Love bilong iufala for narawan hem kamap strong.” (2 Thess. 1:3-5) From olketa lovem each other datwan helpem olketa for deal witim hard taem and persecution.

12. Taem war gohed lo wanfala kantri, hao nao olketa brata and sista showimaot love lo each other?

¹² Tingim wanem hem happen lo Danylo wea iumi storyim finis. War hem gohed and gogo olketa soldia kam lo taon wea Danylo and waef stap. Bat tufala gohed attendim olketa meeting, duim preaching waka, and sharem kaikai blo tufala witim olketa brata and sista. Wantaem Danylo kasem hard taem from olketa soldia. Danylo sei: “Olketa talem mi, mi mas no wanfala Witness nao. Mi sei bae mi hard for duim olsem, so olketa hitim mi and wanfala soldia pointim gun lo mi, bat hem sut lo air. Olketa sei next taem bae olketa reipim waef blo mi. So olketa brata and sista kwiktaem organizem transport lo train for mitufala go stap lo nara taon. Mi hard for forgetim love wea olketa hia showimaot. Then, olketa brata and sista lo datfala taon givim mitufala kaikai, helpem mifala for faendem ples for stap, and for faendem waka. Datwan mekem mitufala fit for helpem olketa nara brata and sista wea ranawe bikos lo datfala war.” Kaen story olsem showimaot love blo olketa brata and sista helpem iumi for deal witim olketa hard taem.

13. Hao nao holy spirit savve helpem iumi for no givap taem pipol againstim iumi?

¹³ Jesus talem olketa follower blo hem for lovem olketa enemy. (Matt. 5:44, 45) Diswan hem no isi for duim. Bat holy spirit savve helpem iumi for garem love, for patient, kaen lo narawan, hambol, and kontrolem seleva. (Gal. 5:22, 23) Olketa wei hia savve helpem iumi for no givap taem  pipol againstim iumi. Samfala stop for againstim iumi bikos hasband, waef, pikinini, or neiba blo olketa showimaot olketa gudfala wei hia. Gogo samfala hia kamap olketa brata and sista blo iumi tu. So sapos iumi faendem hem hard for garem love for samwan wea againstim iumi from iumi worshipim Jehovah, prea for holy spirit for helpem iumi. (Luke 11:13) And evritaem trustim Jehovah.​—Provebs 3:5-7.

14-15. Hao nao Rome 12:17-21 helpem Yasmeen for showimaot love lo hasband blo hem nomata hem barava againstim Yasmeen?

¹⁴ Tingim samting wea happen lo Yasmeen. Bihaen Yasmeen kamap Jehovah’s Witness, hasband blo hem no laekem hem for gohed attendim olketa meeting bikos hem sei datfala religion no teachim tru samting. Hasband tok spoelem Yasmeen and talem olketa relative, bigman lo church, and kastom man for trae mekem Yasmeen fraet and for sei hem spoelem famili blo tufala. Wantaem hasband go lo Kingdom Hall and shoutim olketa brata! Staka taem Yasmeen savve krae from hasband no kaen lo hem.

¹⁵ Bihaen lo olketa meeting, olketa brata and sista savve comfortim and strongim Yasmeen. Olketa elder encouragem hem for followim toktok lo Rome 12:17-21. (Readim.) Yasmeen sei: “Hem no isi for stap gud witim hasband blo mi, bat mi traem best for followim wanem Bible talem and askem Jehovah for helpem mi. Nomata hasband blo mi min for torowem rabis lo floor, mi pikimap. Taem hem tok spoelem mi, mi no tok kros. And taem hem sik, mi lukaftarem hem.”

16-17. Wanem nao iumi lanem from example blo Yasmeen?

¹⁶ Gud samting kamaot from Yasmeen showimaot love lo hasband blo hem. Yasmeen sei: “From mi no laea lo hem, hem start for trustim mi. Gogo hem sei hem no laek raoa witim mi, so taem mi storyim spiritual samting hem savve lisin lo mi. Distaem hasband no stopem mi for go lo olketa meeting and mitufala stap gud tugeta. Mi hope enitaem hasband blo mi bae acceptim truth and mitufala savve worshipim Jehovah tugeta.”

¹⁷ Example blo Yasmeen showimaot man wea garem love “hem gohed for biliv, hem evritaem garem hope, and no eni samting savve mekem hem givap.” (1 Cor. 13:4, 7) Hem no isi samting taem pipol againstim  iumi, bat taem iumi showimaot love datwan savve changem tingting blo olketa. And taem iumi showimaot love, datwan mekem Jehovah hapi. So nomata samfala gohed for againstim iumi, iumi savve hapi. Hao nao olsem?

18. Why nao iumi savve hapi taem pipol heitim iumi?

¹⁸ Jesus sei: “Iufala bae hapi nomata pipol heitim iufala.” (Luke 6:22) Iumi no laekem pipol for heitim iumi and iumi no laek kasem persecution. So why nao Jesus sei iumi bae hapi taem pipol heitim iumi? First reason, taem iumi no givap God bae hapi lo iumi. (1 Pet. 4:13, 14) Mek-tu reason, olketa hard taem savve strongim faith blo iumi. (1 Pet. 1:7) And mek-thri reason, bae iumi kasem nambawan reward wea hem laef olowe.​—Rome 2:6, 7.

19. Why nao olketa aposol hapi nomata samfala whipim olketa?

¹⁹ No longtaem bihaen Jesus resurrect, pipol againstim olketa aposol bat olsem Jesus talem olketa gohed hapi. Nomata samfala whipim olketa aposol and stopem olketa for preach, olketa hapi nomoa. Why nao olsem? Bible sei: “From olketa savve God nao letem datwan for kasem olketa bikos olketa faithful for followim Jesus.” (Acts 5:40-42) From olketa lovem Jesus, olketa no fraet lo olketa enemy hia and “olketa gohed” for preachim gud nius. Distaem, staka brata and sista gohed faithful nomata pipol againstim olketa. Olketa savve bae hard for Jehovah forgetim waka wea olketa duim and love wea olketa showimaot for nem blo hem.​—Heb. 6:10.

20. Wanem nao bae iumi storyim lo next article?

²⁰ Pipol bae againstim iumi go kasem end blo disfala nogud world. (John 15:19) Bat iumi no need for fraet. Lo next article bae iumi storyim hao Jehovah ‘bae strongim and protectim’ olketa wea faithful lo hem. (2 Thess. 3:3) So iumi mas gohed lovem Jehovah, lovem olketa brata and sista, and lovem tu olketa enemy. Datwan bae helpem iumi for wan mind witim olketa brata and sista, bae iumi garem strong faith, bae iumi mekem Jehovah hapi, and taem pipol againstim iumi bae iumi gohed faithful and no givap.