1. Hao nao laef blo iumi bifor iumi studyim Bible?

 HAO nao laef blo iumi bifor iumi studyim Bible witim Olketa Jehovah’s Witness? Maet iumi no laek for tingim datwan distaem. Lo datfala taem maet iumi followim tingting blo pipol lo world abaotem wanem hem stret and no stret. From datwan, maet iumi “no garem hope” and iumi “no savve long God.” (Eph. 2:12) Bat taem iumi studyim Bible datwan helpem iumi for changem laef blo iumi.

2. Wanem nao iumi luksavve lo hem bihaen iumi start for studyim Bible?

² Bihaen iumi start for studyim Bible iumi luksavve Dadi blo iumi lo heven hem lovem iumi tumas. Iumi luksavve tu, for mekem Jehovah hapi and for iumi fit for insaed famili blo hem, iumi bae need for mekem samfala big change lo laef blo iumi. Iumi need for lanem tu hao for followim olketa hae standard blo Jehovah.​—Eph. 5:3-5.

3. Olsem Colossae 3:9, 10 storyim, wanem nao Jehovah laekem iumi for duim, and wanem nao bae iumi storyim lo disfala article?

³ From Jehovah nao Creator and Dadi blo iumi, hem garem raet for disaedem wanem kaen wei nao olketa wea worshipim hem shud garem. Bifor iumi baptaes Jehovah laekem iumi for mas waka hard for “lusim old wei” blo iumi. * (Readim Colossae 3:9, 10.) Disfala article bae helpem olketa wea laek for baptaes for ansarem thrifala kwestin hia: (1) Wanem nao disfala toktok “old wei” hem minim? (2) Why nao Jehovah laekem iumi for lusim olketa old wei hia? (3) Hao nao iumi savve duim datwan?  Disfala study bae helpem olketa wea baptaes finis tu for no garem moa olketa old wei blo olketa.

4. Hao nao wei blo samwan wea garem yet “old wei”?

⁴ Samwan wea garem yet “old wei” bae tingim and duim olketa samting wea followim tingting and feeling blo hemseleva. Olsem example, maet hem man for kros, no tinghae lo olketa samting, selfish, or praod. Or maet hem laek for lukluk lo olketa dirty piksa or olketa movie abaotem pipol wea raf or durong. Nomata hem garem samfala gudfala wei and maet hem feel guilty taem hem talem or duim nogud samting, problem nao, hem no laek for changem olketa nogud wei blo hem.​—Gal. 5:19-21; 2 Tim. 3:2-5.

5. Taem samwan trae for lusim old wei blo hem, wanem nao hem shud luksavve lo hem? (Acts 3:19)

⁵ Iumi evriwan no perfect, so hard for iumi aotem evri nogud tingting and feeling from heart and mind blo iumi. Samfala taem iumi bae duim or talem samting wea mekem iumi regret. (Jeremaea 17:9; Jas. 3:2) Bat taem samwan laek for lusim old wei blo hem, hem bae traem best for kontrolem hemseleva and start for changem wei blo hem.​—Aesaea 55:7; readim Acts 3:19.

6. Why nao Jehovah laekem olketa wea studyim Bible for lusim eni nogud tingting or nogud wei blo olketa?

⁶ Jehovah laekem olketa wea studyim Bible for lusim eni nogud tingting or nogud wei wea olketa garem, from hem lovem olketa and laekem olketa for hapi. (Aesaea 48:17, 18) Hem savve sapos iumi no lusim olketa nogud wei blo iumi, bae iumi spoelem iumiseleva and olketa narawan, and datwan savve mekem Jehovah sorre.

7. Olsem Rome 12:1, 2 storyim, wanem nao iumi mas disaedem?

⁷ Maet samfala fren or famili member tok spoelem iumi from iumi trae changem samfala wei blo iumi. (1 Pet. 4:3, 4) Olketa maet sei iumi garem raet for duim wanem iumi laekem and shud no followim tingting blo narawan. Bat for tok  stret, olketa wea no laek followim standard blo Jehovah, olketa followim wei and tingting blo pipol lo world blo Satan. (Readim Rome 12:1, 2.) Iumi evriwan mas disaed sapos iumi bae keepim old wei blo iumi wea followim tingting blo Satan, or bae iumi change and followim olketa standard blo Jehovah.​—Aesaea 64:8.

8. Wanem nao bae helpem Bible study for lusim samfala nogud tingting or wei blo hem?

⁸ Jehovah savve samwan wea studyim Bible mas waka hard and bae hem tek taem for lusim samfala nogud tingting or wei blo hem. (Sams 103:13, 14) Bat Jehovah iusim Bible, holy spirit, and organization blo hem for helpem iumi for garem wisdom, strong, and sapot wea iumi needim for changem wei blo iumi. Masbi hem helpem iumi finis. Distaem bae iumi storyim samfala samting wea Bible study savve duim wea bae helpem hem for lusim old wei blo hem, and gogo bae hem fit for baptaes.

9. Hao nao Bible savve helpem iumi?

⁹ Iusim Bible for lukluk gud lo iumiseleva. Bible hem olsem mirror bikos hem savve helpem iumi for luksavve sapos tingting, toktok, and wanem iumi duim hem stret. (Jas. 1:22-25) Brata or sista wea studyim Bible witim iumi or eni nara mature Christian savve iusim Bible for helpem iumi for luksavve lo olketa gudfala wei and olketa wik point blo iumi. Olketa savve showim iumi hao for duim research lo olketa pablikeson for faendem advaes lo Bible wea bae helpem iumi for lusim samfala nogud wei blo iumi. Jehovah tu hem redi for helpem iumi. Hem nao best wan for helpem iumi bikos hem savve gud lo iumi. (Provebs 14:10; 15:11) So traem best for prea lo hem and studyim Bible evriday.

10. Wanem nao iumi lanem from samting wea happen lo Elie?

¹⁰ Luksavve olketa standard blo Jehovah nao hem best. Iumi bae kasem gud samting sapos iumi duim wanem Jehovah laekem. Olketa wea followim olketa standard blo Jehovah garem gud and hapi laef. (Sams 19:7-11) Bat olketa wea no followim olketa standard blo Jehovah savve kasem nogud samting. Tingim wanem hem happen lo Elie wea firstaem hem no followim olketa standard blo God. Mami and dadi blo Elie worshipim Jehovah, bat taem hem teenager hem start for fren witim pipol wea wei blo olketa nogud. Gogo datwan mekem hem for iusim drug, durong, and steal, and hem savve kros tumas and raf tu. Hem sei: “Mi duim nao evri samting wea mi savve wanfala Christian shud no duim.” Bat Elie no forgetim olketa samting wea hem lanem taem hem smol, gogo hem studyim Bible moa. Hem barava waka hard for lusim olketa nogud wei blo hem and hem baptaes lo 2000. Wanem gud samting nao Elie kasem from hem followim olketa standard blo Jehovah? Elie sei: “Distaem mi hapi and mi garem gudfala konsens.” * Example blo Elie showimaot olketa wea no followim olketa standard blo Jehovah bae kasem nogud samting. Nomata olsem, Jehovah willing for helpem olketa for change.

11. Wanem nao samfala samting wea Jehovah heitim?

¹¹ Heitim samting wea Jehovah heitim. (Sams 97:10) Bible sei Jehovah heitim  “wei fo praod, wei fo laea, [and for] kilim man dae.” (Provebs 6:16-19) And tu, hem ‘nating laekem man wea save [raf], an wea save trikim pipol.’ (Sams 5:6) Dastawe lo taem blo Noah Jehovah finisim nogud pipol wea duim olketa rabis samting hia. (Jenesis 6:13) Jehovah iusim profet Malachi for storyim nara samting wea Hem heitim. Hem sei Jehovah heitim man wea laek divorcem waef blo hem nomata waef hem no duim eni rong samting. Jehovah no acceptim worship blo olketa and hem bae judgem olketa.​—Malakae 2:13-16; Heb. 13:4.

12. Wanem nao hem minim for “barava heitim olketa rabis samting”?

¹² Jehovah laekem iumi for “barava heitim olketa rabis samting.” (Rome 12:9) Sapos iumi “barava heitim” samting, hem minim bae iumi les lo datwan. Olsem example, sapos samwan givim iumi kaikai wea rotten for kaikaim, hao nao bae iumi feel? Bae iumi les tumas for kaikaim. Olsem tu, iumi shud garem sem tingting abaotem olketa samting wea Jehovah heitim. Iumi shud barava heitim tu.

13. Why nao iumi mas aotem eni nogud tingting wea iumi garem?

¹³ Aotem nogud tingting. Samting wea man tingim maet bae hem duim. Dastawe Jesus talem iumi for lusim olketa nogud tingting wea gogo bae mekem iumi for duim bigfala sin. (Matt. 5:21, 22, 28, 29) Iumi laek for mekem Jehovah hapi, iaman? So hem barava important for stretawe aotem eni nogud tingting wea maet iumi garem!

14. Toktok blo iumi savve showimaot wanem, and wanem nao samfala kwestin for tingim?

¹⁴ Kontrolem toktok. Jesus sei: “Olketa samting wea kamaot from mouth hem samting wea stap long tingting bilong man.” (Matt. 15:18) Hem tru, wanem iumi storyim showimaot wanem iumi tingting abaotem. So hem gud for tingim olketa kwestin hia: Waswe, iumi disaed for talem tru samting, nomata iumi savve bae iumi kasem trabol from datwan? Nomata iumi marit, waswe, iumi laek for switim narawan wea no marit partner blo iumi? Waswe, iumi savve storyim olketa dirty samting? Waswe, iumi savve showimaot iumi kros taem samwan mekem iumi feel  nogud? Hem important for luksavve sapos iumi laek for lusim old wei blo iumi, iumi mas lusim olketa nogud toktok, dirty toktok, and iumi mas no laea.

15. From Christ hem willing for dae lo post, wanem nao iumi mas willing for duim?

¹⁵ Willing for change. Aposol Paul talem samting wea showimaot hao iumi mas willing for lusim old wei blo iumi for mekem Jehovah hapi. Hem sei: “Wei bilong iumi bifor hem finis taem olketa nilam Christ long post.” (Rome 6:6) So iumi mas followim example blo Jesus. Hem willing for dae lo post for mekem Jehovah hapi. Iumi tu mas willing for lusim olketa old wei blo iumi wea Jehovah heitim. Iumi mas duim datwan mekem iumi garem gudfala konsens and hope for garem laef olowe. (John 17:3; 1 Pet. 3:21) Hard for Jehovah changem olketa standard blo hem for fitim iumi. Iumi nao mas changem olketa nogud wei blo iumi and willing for followim olketa standard blo hem.​—Aesaea 1:16-18; 55:9.

16. Why nao iumi mas gohed faet againstim feeling for laek duim rong samting?

¹⁶ Faet againstim feeling for laek duim rong samting. Nomata bihaen iumi baptaes, iumi no laek for garem moa old wei blo iumi. Tingim experience blo Maurício. Taem hem young, hem wanfala gay. Gogo, Olketa Jehovah’s Witness studyim Bible witim hem. Hem changem staka samting lo laef blo hem, then hem baptaes lo 2002. Nomata Maurício worshipim Jehovah for staka year, hem sei samfala taem hem mas faet againstim feeling for laek duim rong samting. Nomata olsem, diswan no mekem hem discourage. Hem sei: “Mi luksavve taem mi faet againstim feeling blo mi, mi mekem Jehovah hapi.” *

17. Hao nao experience blo Nabiha encouragem iu?

¹⁷ Prea for Jehovah iusim holy spirit for helpem iumi, and no depend lo iumiseleva. (Gal. 5:22; Phil. 4:6) Iumi mas waka hard for lusim old wei blo iumi. Tingim experience blo wanfala woman wea nem blo hem Nabiha. Dadi lusim famili taem hem six years nomoa. Hem sei: “Datwan spoelem feeling blo mi.” Taem Nabiha  teenager, hem start for raf and savve kros kwiktaem tumas. Hem salem drug, police arrestim hem, and hem go lo prison for tu-thri year. Olketa Jehovah Witness studyim Bible witim hem taem hem lo prison, and hem start for changem samfala samting lo laef blo hem. Hem sei: “Mi faendem hao samfala samting hem isi for changem, bat hem hard tumas for mi stop for smoke.” Nabiha waka hard for lusim diswan for wanfala year, gogo hem stop for smoke nao. Wanem nao helpem hem? Hem sei: “Main samting mi duim nao, hem for evritaem prea lo Jehovah.” Nabiha savve talem olketa narawan: “From mi changem samting for mekem Jehovah hapi, mi sure eniwan savve duim tu!” *

18. Olsem 1 Corinth 6:9-11 storyim, wanem nao samfala change wea pipol blo Jehovah mekem?

¹⁸ Lo first century, samfala man and woman wea Jehovah chusim for rul witim Christ, olketa duim olketa nogud samting firstaem. Olsem example, samfala duim adultery, samfala man sleep witim nara man, and samfala steal. Bat God iusim holy spirit blo hem for helpem olketa for changem olketa nogud wei hia. (Readim 1 Corinth 6:9-11.) Distaem tu, Bible helpem staka million pipol for changem laef blo olketa. * Olketa lusim olketa nogud wei blo olketa nomata hem no isi for duim datwan. Diswan showimaot iu tu savve changem olketa nogud wei blo iu and fit for baptaes.

19. Wanem nao next article bae storyim?

¹⁹ Hem tru, olketa wea laek for baptaes mas lusim old wei blo olketa, bat olketa mas waka hard tu for garem niufala wei. Next article bae storyim hao iumi savve duim datwan, and hao olketa narawan savve helpem iumi.