1-2. Wanem nao iumi need for duim mekem Jehovah acceptim worship blo iumi?

 TAEM iu herem datfala toktok “worship,” wanem nao iu tingim? Maet iu tingim wanfala hambol brata wea nildaon saed lo bed blo hem and prea lo Jehovah bifor hem sleep. Or maet iu tingim wanfala famili wea duim famili worship.

² Datfala brata and famili hia duim olketa samting for worshipim Jehovah. Waswe, bae Jehovah acceptim worship blo olketa? Ia, bikos olketa traem best for duim wanem Jehovah laekem, and olketa lovem and respectim hem. Iumi lovem Jehovah tumas and iumi savve iumi shud worshipim hem. Iumi laekem Jehovah for hapi lo worship blo iumi.

3. Wanem nao bae iumi storyim lo disfala article?

³ Lo disfala article bae iumi storyim hao pipol blo Jehovah bifor worshipim hem, and eitfala samting wea iumi savve duim lo worship blo iumi distaem for Jehovah. Taem iumi storyim olketa samting hia, tingim eni samting wea iu savve kamap gud lo hem. Bae iumi storyim tu olketa reason why iumi hapi from iumi worshipim Jehovah lo wei wea hem laekem.

4. Hao nao pipol blo Jehovah bifor showimaot olketa respectim and lovem Jehovah?

⁴ Olketa faithful man bifor, olsem Abel, Noah, Abraham, and Job showimaot olketa respectim and lovem Jehovah. Hao nao olketa duim datwan? Olketa obeyim hem, garem faith, and givim olketa sakrifaes lo hem. Bible no storyim evri samting wea olketa duim for worshipim Jehovah, bat iumi savve olketa duim best blo olketa for worshipim hem, and Jehovah acceptim datwan. Gogo, Jehovah iusim Moses for givim Law lo olketa Israelite. Olketa law hia garem olketa instruction abaotem hao for worshipim Jehovah lo wei wea hem laekem.

5. Hao nao Jehovah expectim olketa Christian for worshipim hem?

⁵ Bihaen Jesus dae and laef bak lo heven, Jehovah no expectim olketa Christian for worshipim hem followim Law blo Moses. (Rome 10:4) Bat olketa shud followim wanfala niu law, wea hem nao “law bilong Christ.” (Gal. 6:2) Diswan minim olketa Christian hia followim example blo Jesus and olketa teaching blo hem. And disfala “law” no garem tu staka rul for baeheartim and followim. Olketa Christian distaem tu followim example blo Jesus. Diswan mekem Jehovah hapi and datwan “strongim” olketa tu.​—Matt. 11:29.

6. Hao nao disfala article bae helpem iumi?

⁶ Taem iumi storyim eitfala samting iumi savve duim lo worship blo iumi for Jehovah, tingim diswan, ‘Waswe, mi kamap gud lo olketa samting hia?’ Maet iu savve tingim tu, ‘Waswe, eni samting mi need for waka lo hem?’ Iumi shud hapi witim wanem iumi duim finis lo worship blo iumi for Jehovah, bat hem gud for prea abaotem eni samting wea iumi luksavve iumi need for waka lo hem.

7. Hao nao tingting blo Jehovah abaotem olketa prea blo iumi wea kam from heart?

⁷ Prea lo Jehovah. Bible sei olketa prea blo iumi hem olsem incense wea olketa priest bonem insaed lo tabernacle, and then lo temple tu. (Sams 141:2) Naesfala smel blo datfala incense hem mekem God hapi tumas. God hem “hapi” tu lo olketa prea blo iumi wea kam from heart, nomata iumi iusim simpol toktok. (Provebs 15:8; Diutronomi 33:10) Iumi sure Jehovah hapi taem iumi sei iumi lovem hem, and taem iumi talem thankiu lo hem. Hem laekem iumi for storyim tu olketa samting wea iumi wari abaotem and olketa goal blo iumi. Bifor iumi prea lo Jehovah, hem gud sapos iumi tingting gud firstaem abaotem wanem bae iumi talem. Sapos iumi duim olsem, olketa prea blo iumi bae olsem “incense” wea smel naes tumas lo Jehovah.

8. Hao nao iumi savve praisem God?

⁸ Praisem Jehovah. (Sams 34:1) From iumi tinghae lo Jehovah hem isi for iumi praisem hem. Taem iumi ting raonem olketa gud samting wea Jehovah duim for iumi finis, bae iumi garem staka gud reason for praisem hem. Iumi praisem Jehovah taem iumi storyim hao iumi lovem hem and tinghae lo olketa samting wea hem duim for iumi. Preaching waka tu hem spesol chance for iumi “praisem God.” (Heb. 13:15) Olsem iumi tingting gud firstaem abaotem wanem iumi bae prea abaotem, hem important for tingting gud tu abaotem wanem bae iumi storyim lo ministry. Diswan bae helpem  iumi for storyim hao iumi feel abaotem Jehovah and for praisem hem taem iumi sharem truth witim olketa narawan.

9. Hao nao olketa meeting helpem iumi olsem olketa Israelite? Storyim gud samting iuseleva kasem from olketa meeting.

⁹ Attendim olketa meeting. Olketa Israelite kasem disfala instruction: “Evri yia, yufala olketa man, yufala mas kam trifala taem long datfala tambuples wea [Jehovah] hemi siusim.” (Diutronomi 16:16) Datwan minim olketa mas lusim haos and garden blo olketa and no eniwan stap for security. Bat Jehovah sei lo olketa: ‘Taem yufala kam fo wosipim mi, bae no eniwan hemi trae fo stilim lan ya from yufala.’ (Eksodas 34:24) From olketa Israelite trustim Jehovah, olketa hapi for go worshipim Jehovah lo olketa festival hia. Lo there, olketa lanem moa samting abaotem Law blo God, ting raonem gud samting wea Jehovah duim, and spendem taem witim olketa narawan wea lovem Jehovah. (Diutronomi 16:15) Iumi tu kasem olketa gud samting olsem taem iumi attendim olketa meeting. And masbi Jehovah hapi lo iumi taem iumi givim olketa short koment wea iumi ting raonem firstaem.

10. Why nao singsing hem important samting lo worship blo iumi?

¹⁰ Singsing lo kongregeson. (Sams 28:7) Singsing hem important samting lo worship blo olketa Israelite. King David markem 288 Levite for singsing lo temple. (Fas Kronikols 25:1, 6-8) Distaem tu iumi savve singim olketa song for praisem God. Diswan no minim iumi mas savve gud lo hao for singsing. Tingim diswan: Taem iumi story iumi savve mistek, bat datwan no stopem iumi for story lo kongregeson and lo ministry. (Jas. 3:2) Olsem tu, nomata maet iumi tingse iumi no savve singsing gud, no letem datwan for stopem iumi for singsing for praisem Jehovah.

11. Olsem Sams 48:13 storyim, why nao iumi shud markem taem for duim famili worship?

¹¹ Duim study seleva and famili worship. Lo Sabbath olketa Israelite no duim waka, and olketa iusim datfala day for duim olketa spiritual samting. (Eksodas 31:16, 17) Olketa Israelite wea faithful teachim olketa pikinini blo olketa abaotem Jehovah and gud samting wea hem duim for olketa. Distaem tu iumi need for markem taem for readim and studyim Bible. Diswan hem samting wea iumi duim for worshipim Jehovah and hem helpem iumi for fren gud witim hem. (Sams 73:28) And taem iumi duim famili worship, iumi savve helpem olketa pikinini blo iumi tu for fren gud witim Jehovah.​—Readim Sams 48:13.

12. Hao nao tingting blo Jehovah abaotem olketa wea wakem tabernacle bifor, and wanem nao iumi lanem from datwan?

¹² Wakem and lukaftarem olketa ples for worship. Bible sei olketa wea wakem tabernacle and olketa samting insaed, olketa duim “holy waka.” (Ex. 36:1, 4, NWT) Distaem tu construction waka hem samting wea olketa brata and sista duim for worshipim Jehovah. Samfala brata and sista iusim staka taem for wakem olketa Kingdom Hall and olketa nara building wea organization iusim for Kingdom waka. Iumi tinghae lo bigfala waka wea olketa duim. Olketa hia duim preaching waka tu and samfala maet laek for kamap regular pioneer. Sapos olketa fit for kasem hour blo pioneer, olketa elder shud no hol bak for appointim olketa taem olketa apply for pioneer. Diswan  bae showimaot olketa elder sapotim construction waka wea olketa duim. Nomata iumi duim construction waka or nomoa, iumi evriwan fit for klinim and lukaftarem olketa building hia.

13. Why nao iumi laek for givim donation?

¹³ Givim donation for sapotim Kingdom waka. Taem olketa Israelite go lo olketa festival, olketa mas tekem samting for givim lo Jehovah. (Diutronomi 16:16) Olketa savve givim eni samting wea olketa fit for givim. Datwan bae showimaot olketa tinghae lo olketa samting wea Jehovah duim for olketa. Hao nao iumi savve showimaot iumi lovem Jehovah and tinghae lo olketa spiritual samting wea iumi kasem? Wanfala wei hem for givim donation for sapotim kongregeson and Kingdom waka wea gohed raonem world. Aposol Paul sei: “God . . . laekem man for givim samting wea hem garem, and hem no askem man for givim samting wea hem no garem.” (2 Cor. 8:4, 12) Nomata donation wea iumi givim hem big or smol, Jehovah tinghae lo donation wea kam from heart blo iumi.​—Mark 12:42-44; 2 Cor. 9:7.

14. Olsem Provebs 19:17 storyim, hao nao tingting blo Jehovah taem iumi helpem olketa brata and sista wea garem need?

¹⁴ Helpem olketa brata and sista wea garem need. Jehovah promis for blessim olketa Israelite wea kaen lo olketa wea poor. (Diutronomi 15:7, 10) Sapos iumi helpem wanfala brata or sista wea garem need, hem olsem iumi duim samting for Jehovah. (Readim Provebs 19:17.) Olsem example, taem Paul hem insaed prison and olketa Christian lo Philippi sendem present lo hem, Paul sei God hapi lo datwan. (Phil. 4:18) Waswe, iu tingim eniwan lo kongregeson wea iu savve helpem? Jehovah hem hapi for lukim iumi iusim taem, strong, savve, and olketa material samting blo iumi for helpem olketa wea garem need, bikos datwan hem wanfala wei for worshipim God.​—Jas. 1:27.

15. Nomata iumi need for iusim team and strong blo iumi for worshipim Jehovah, why nao hem no hard tumas for duim datwan?

¹⁵ Iumi need for iusim taem and strong blo iumi for worshipim Jehovah, bat hem no hard tumas for duim datwan. (1 John 5:3) Why nao olsem? Bikos iumi worshipim Jehovah from iumi lovem hem. Tingim diswan. Wanfala pikinini laek for givim samting lo dadi blo hem, so hem spendem staka hour for drawim wanfala piksa for hem. Hem hapi tumas for iusim taem blo hem for duim datwan bikos hem lovem dadi blo hem, and laek givim present for hem. Olsem tu, from iumi lovem Jehovah iumi hapi for iusim taem and strong blo iumi for worshipim hem.

16. Olsem Hebrew 6:10 storyim, hao nao tingting Jehovah blo abaotem worship blo iumi for hem?

¹⁶ Dadi and mami no expectim each pikinini for duim sem samting for olketa bikos olketa luksavve each pikinini hem difren. Jehovah tu hem luksavve iumi evriwan difren. Maet iu fit for duim moa samting winim olketa narawan wea iu savve lo olketa. Or maet iu no fit for duim sem samting olsem olketa narawan, bikos lo age blo iu, from iu sik, or from iu garem olketa responsibility lo famili. Iu no discourage. (Gal. 6:4) Jehovah bae no forgetim waka wea iu duim. Hem bae hapi lo iu from iu duim best blo iu and from iu garem stretfala reason for duim datwan.  (Readim Hebrew 6:10.) Jehovah luksavve tu lo wanem iumi laek for duim, and hem laekem iumi for hapi and satisfae witim wanem iumi fit for duim lo worship blo iumi for hem.

17. (a) Wanem nao bae helpem iumi sapos iumi faendem hard for duim samfala samting lo worship blo iumi? (b) Storyim wanfala samting wea iu duim wea mekem iu hapi from datfala box, “ Hem Mekem Iumi Hapi.”

¹⁷ Hao sapos iumi faendem hem hard for duim samfala samting lo worship blo iumi, olsem for studyim Bible or for duim preaching waka? Sapos iumi traem best for duim olketa samting hia, bae iumi start for enjoyim and kasem gud samting from datwan. Iumi savve comparem worship blo iumi for Jehovah witim samfala nara samting wea iumi laek for duim, olsem for exercise or for lanem hao for pleim wanfala music instrument. Iumi bae no kamap gud sapos samfala taem nomoa iumi duim. Bat bae iumi kamap gud sapos iumi exercise or pleim datfala instrument evriday. Olsem example, maet firstaem iumi duim for 10 minute evriday, bat then gogo iumi duim for wan hour evriday. Taem iumi lukim datwan helpem iumi, bae iumi luk forward and enjoyim taem wea iumi markem for duim datwan. Hao nao disfala example join witim worship blo iumi?

18. Wanem nao iumi barava laek for duim, and wanem gud samting bae iumi kasem from datwan?

¹⁸ Iumi barava laek for worshipim Jehovah lo full heart blo iumi. Datwan bae mekem iumi hapi and enjoyim laef, and bae iumi garem hope for worshipim Jehovah for olowe. (Provebs 10:22) Distaem iumi hapi from iumi savve Jehovah bae helpem iumi taem iumi kasem hard taem. (Aesaea 41:9, 10) Iumi garem staka reason for hapi taem iumi worshipim Jehovah, wea hem nao fit for “kasem glory and for evriwan mekhae” lo hem!​—Rev. 4:11.