Why nao datfala klos relative blo Elimelech sei bae hem ‘spoelem wanem hem onam’ if hem maritim Ruth? (Ruth 4:1, 6, ftn.)

Lo taem blo Bible, if wanfala marit man dae bat no garem pikinini, samfala kwestin savve kamap: Wat nao bae happen lo land blo hem? Waswe, bae famili nem blo hem lus nao? Law blo Moses ansarem olketa kwestin hia.

Wat nao happen lo land blo man wea dae, or taem man kamap poor and mas salem land blo hem? Wanfala brata blo hem or klos relative blo hem savve baem bak datfala land. Taem olsem famili bae no lusim land hia.​—Lev. 25:23-28; Num. 27:8-11.

Hao nao bae olketa mek sure famili nem blo man wea dae hem no lus? Olketa duim diswan thru lo brata-in-law marit, wea hem nao happen lo situation blo Ruth. Wanfala man bae maritim widow blo brata blo hem and garem pikinini on behalf lo brata blo hem. Pikinini hia bae tekem famili nem and land blo datfala man wea dae. Disfala arrangement hem for helpem tu datfala widow woman.​—Deut. 25:5-7; Matt. 22:23-28.

Tingim situation blo Naomi. Hem maritim wanfala man wea nem blo hem Elimelech. Taem Elimelech and tufala son blo hem dae, Naomi no garem eniwan for lukaftarem hem. (Ruth 1:1-5) Bihaen Naomi kasem bak Judah, hem askem dota-in-law blo hem Ruth for askem Boaz for baem bak land blo Elimelech. Boaz hem klos relative blo Elimelech. (Ruth 2:1, 19, 20; 3:1-4) Bat Boaz luksavve nara relative wea Bible no talem nem blo hem, hem nao moa klos. So datfala man nao garem raet for baem bak datfala land.​—Ruth 3:9, 12, 13.

Firstaem datfala klos relative hem willing for help. (Ruth 4:1-4) Nomata hem bae need for spendem selen for baem datfala land, hem luksavve tu Naomi no fit for garem pikinini wea bae inheritim land blo Elimelech. So datfala man tingse datwan hem gud idea bikos land blo Elimelech bae kamap part lo land blo hem.

Bat datfala klos relative change mind taem hem faendaot hem mas maritim Ruth. Hem sei: “Mi no fit for baem bak datwan nogud hem spoelem wanem mi onam.” (Ruth 4:5, 6, ftn.) Why nao hem change mind?

If datfala klos relative or narawan maritim Ruth and hem bornem wanfala son, datfala son bae hem inheritim land blo Elimelech. So hao nao datwan bae “spoelem” wanem datfala man onam? Bible no talem, bat diswan maet hem samfala samting wea savve spoelem:

• First wan, hem tingse bae hem weistim selen for baem datfala land bikos land hia bae no blo hem. Son blo Ruth nao bae inheritim.

• Mek-tu, hem mas lukaftarem and provaedem need blo Naomi and Ruth.

• Mek-thri, if Ruth garem olketa nara pikinini, bae datfala man mas sharem land blo hem lo olketa pikinini hia and olketa nara pikinini blo hemseleva.

• Mek-foa, if hem no garem olketa nara pikinini, bae son blo Ruth garem raet for inheritim land blo hem and land blo Elimelech tu. Taem olsem, land blo hem bae go lo pikinini wea garem famili nem blo Elimelech, and no nem blo hem. Datfala man no laek for helpem Naomi bikos hem fraet for lusim inheritance blo hem. So hem givim datfala responsibility for Boaz bikos hem nao next wan wea garem raet for baem bak datfala land. Boaz willing for duim datwan bikos hem laekem “nem blo datfala man wea dae for no lus from evri samting wea hem onam.”—Ruth 4:10.

Datfala klos relative wari nomoa for keepim nem blo hemseleva and land blo hem. Hem garem selfish tingting. So datwan mekem nem blo hem lus kam kasem distaem. Hem misstim tu chance for kasem spesol privilege wea Boaz kasem for nem blo hem insaed lo laen blo Messiah, Jesus Christ. Datwan showimaot datfala relative no kasem gud samting bikos hem selfish and no helpem samwan wea needim help!​—Matt. 1:5; Luke 3:23, 32.