1. Wat nao staka pipol lukim lo firstaem wea olketa attendim meeting? (Lukim tu piksa.)

 IMAGINIM wanfala couple wea hem firstaem blo tufala for attendim meeting lo Kingdom Hall. Tufala barava tinghae lo hao olketa brata and sista lo kongregeson kaen and lovem each other. Bihaen meeting, taem tufala gogo bak lo haos, datfala waef sei lo hasband, ‘Olketa Jehovah’s Witness wei blo olketa gud tumas and olketa difren from olketa nara pipol.’

2. Why nao samfala stambol?

² Love wea pipol blo Jehovah showimaot lo each other hem barava spesol. Nomata olsem, olketa no perfect. (1 John 1:8) Dastawe taem iumi savve gud lo olketa brata and sista, bae hem isi for lukim wik point blo olketa. (Rome 3:23) Sorre samting nao, samfala stambol lo wik point blo olketa nara brata and sista and stop for servem Jehovah.

3. Hao nao bae pipol luksavve lo olketa tru follower blo hem? (John 13:34, 35)

³ Tingim moa theme scripture for disfala article. (Readim John 13:34, 35.) Hao nao bae pipol luksavve lo olketa tru follower blo Christ? Bible sei hem from olketa lovem each other, and hem no sei olketa bae perfect. Tingim tu,  Jesus no sei: ‘Sapos iufala lovem iufala evriwan, iufala bae savve iufala olketa disaepol bilong mi.’ Bat Jesus sei: “Sapos iufala lovem iufala evriwan, pipol bae savve iufala olketa disaepol bilong mi.” So Jesus showimaot, ino olketa follower blo hem nomoa bae luksavve lo olketa tru follower blo hem, bat nara pipol tu bae luksavve lo olketa from olketa lovem each other.

4. Wat nao maet samfala laek for savve abaotem olketa tru Christian?

⁴ Samfala wea no Jehovah’s Witness maet laek for savve: ‘Hao nao love helpem iumi for luksavve lo olketa tru Christian? Hao nao Jesus showimaot love lo olketa aposol blo hem? And waswe, bae iumi fit for followim example blo Jesus distaem?’ Iumi olketa Witness wea baptaes finis tu need for ting raonem olketa kwestin hia. Diswan bae helpem iumi for showimaot love, especially taem iumi deal witim wik point blo each other.​—Eph. 5:2.

5. Wat nao toktok blo Jesus lo John 15:12, 13 hem minim?

⁵ Jesus showimaot klia hao love wea olketa tru follower blo hem garem for each other hem spesol. (Readim John 15:12, 13.) Tingim, Jesus sei lo olketa follower blo hem: “Iufala lovem iufala evriwan olsem hao mi lovem iufala tu.” Wat nao datwan minim? Jesus gohed explainim hao kaen love olsem bae mekem wanfala Christian for willing for dae for nara Christian. b

6. Hao nao Bible showimaot love hem barava important?

⁶ Bible teachim iumi hao love hem barava important. For example, diswan hem samfala fevaret scripture blo staka pipol. “God hem love.” (1 John 4:8) “Iu mas lovem narawan long sem wei wea iu lovem iuseleva.” (Matt. 22:39) “Man  wea garem love hem evritaem willing for forgivim narawan.” (1 Pet. 4:8) “Love no savve finis.” (1 Cor. 13:8) Olketa scripture hia and olketa nara scripture mekem iumi luksavve hao hem important for garem and showimaot love.

7. Why nao Satan no savve teachim pipol for wan mind and lovem each other?

⁷ Staka pipol laek savve: ‘Hao nao bae mi luksavve lo tru religion? Evri religion sei olketa teachim truth, bat evriwan teachim difren samting abaotem God.’ Satan mekem staka false religion for stap and datwan konfiusim pipol. Bat Satan no savve mekem pipol evriwea lo world for wan mind and lovem each other. Jehovah nomoa savve duim olsem. Datwan mek sense bikos love hem kam from Jehovah, and olketa wea kasem blessing and spirit blo hem nomoa savve showimaot trufala love lo each other. (1 John 4:7) Dastawe Jesus sei olketa follower blo hem nomoa bae garem trufala love for each other.

8-9. Hao nao love wea pipol blo Jehovah showimaot lo each other affectim olketa narawan?

⁸ Olsem Jesus talem, staka pipol luksavve lo olketa tru follower blo hem bikos olketa lovem each other. For example, Ian, wanfala brata, tingim first convention wea hem attendim lo wanfala stadium klosap lo haos blo hem. Tu-thri month bifor hem go lo datfala stadium for watch game. Hem sei: “Wei blo pipol wea kam lo convention hia barava difren from pipol wea mifala watch game tugeta. Olketa Witness kaen and dressap gud, and olketa pikinini sidaon kwaet.” Hem sei tu: “Mi lukim pipol hia satisfae and garem peace. Datwan hem samting wea mi laekem tumas. Mi no tingim eni samting lo olketa tok wea kamap lo datfala day, bat mi no savve forgetim gudfala wei blo olketa Witness hia.” c Olketa Witness garem gudfala wei bikos olketa love each other. So from iumi lovem olketa brata and sista, iumi kaen and respectim olketa.

⁹ John, wanfala brata, hem garem sem experience taem hem start for attendim olketa meeting. Hem sei: “Mi tinghae tumas lo hao evriwan kaen lo mi . . . and mi tingse olketa pipol hia perfect. Trufala love wea olketa showimaot mekem mi sure diswan nao tru religion.” d Olketa experience olsem showimaot pipol blo Jehovah nao olketa tru Christian.

10. Wanem chance nao iumi garem for showimaot love lo olketa brata and sista? (Lukim tu footnote.)

¹⁰ Olsem iumi storyim lo start blo disfala article, evri brata and sista no perfect. Samfala taem bae olketa talem or duim samting wea mekem iumi feel nogud. e (Jas. 3:2) Lo taem olsem, iusim datfala chance for talem and duim samting wea showimaot iumi lovem olketa. Taem eni brata or sista mekem iumi feel nogud, hao nao iumi savve followim example blo Jesus?​—John 13:15.

11. Wanem wik point nao James and John garem? (Lukim tu piksa.)

¹¹ Jesus no expectim olketa follower blo hem for perfect. Bat from hem lovem  olketa, hem helpem olketa for waka lo eni wik point wea olketa garem for mekem Jehovah hapi. Wantaem, tufala aposol blo hem, James and John, talem mami blo tufala for askem Jesus for givim tufala hae position lo Kingdom. (Matt. 20:20, 21) Wanem James and John duim showimaot tufala praod and laek for kasem bignem.​—Provebs 16:18, SIPB.

12. Waswe, James and John nomoa showimaot tufala garem wik point? Explainim.

¹² Lo datfala taem, wanem olketa nara aposol duim tu showimaot olketa garem wik point. Tingim wanem olketa duim: “Taem nara tenfala disaepol herem diswan, olketa kros long tufala brata hia.” (Matt. 20:24) Iumi savve imaginim hao James, John, and olketa nara aposol gohed argue witim each other. Maet olketa narawan sei: ‘Iutufala tingse iutufala hu ia for askem hae position insaed lo Kingdom? Ino iutufala nomoa waka hard witim Jesus. Mifala tu qualify olsem iutufala for kasem olketa spesol position insaed Kingdom!’ Nomata wat nao happen, for lelebet taem olketa aposol letem datfala situation for spoelem love wea olketa garem for each other.

13. Hao nao Jesus deal witim wik point blo olketa aposol blo hem? (Matthew 20:25-28)

¹³ Hao nao Jesus deal witim wik point blo olketa aposol? Hem no kros and talem hao hem bae lusim olketa aposol and lukaotem olketa nara man wea hambol  and wea bae evritaem lovem each other. Bat, Jesus patient for story witim olketa bikos hem savve olketa laek for duim stret samting. (Readim Matthew 20:25-28.) Jesus evritaem kaen lo olketa nomata olketa argue staka taem abaotem hu lo olketa nao important winim olketa narawan.​—Mark 9:34; Luke 22:24.

14. Wat nao wei blo pipol lo ples wea olketa aposol growap lo hem?

¹⁴ Jesus mas tingim hao baekgraon blo olketa aposol nao affectim olketa. (John 2:24, 25) Olketa growap lo ples wea olketa bigman lo religion mekhae lo wei for garem bignem and hae position. (Matt. 23:6; comparem witim video The Front Seats in the Synagogue lo study note blo Matthew 23:6.) Olketa bigman blo Jew religion tingse olketa raeteous winim olketa narawan. f (Luke 18:9-12) Jesus savve kaen tingting olsem savve affectim tingting blo olketa aposol abaotem olketa seleva and nara pipol. (Provebs 19:11, SIPB) Hem savve olketa bae mekem mistek and hem patient witim olketa bikos hem savve olketa garem gud heart. So hem patient for teachim olketa for hambol and for showimaot love.

15. Wat nao iumi savve lanem from wanem hem happen lo James and John?

¹⁵ Iumi savve lanem staka samting from wanem hem happen lo James and John. Hem no stret for tufala ask for kasem hae position insaed Kingdom. Olketa nara aposol tu rong bikos olketa no trae for keepim wan mind wea olketa garem. Nomata olsem, Jesus kaen and lovem 12-fala aposol evriwan. Wat nao iumi lanem? Wanem hem important hem no only wanem olketa narawan duim bat hao iumi deal witim datwan tu hem important. Hao nao iumi savve deal witim datwan? Taem nara brata or sista mekem iumi feel nogud, tingim olketa kwestin hia: ‘Why nao mi feel nogud tumas lo wanem hem duim? Waswe, datwan mekem mi luksavve lo wanfala wik point wea mi need for waka lo hem? Waswe, hem deal witim eni problem? Nomata mi garem gud reason for feel nogud, hao, mi savve showimaot love and forgivim hem?’ If iumi lovem olketa narawan, datwan pruvim iumi olketa tru follower blo Jesus.

16. Wat moa iumi savve lanem from example blo Jesus?

¹⁶ Example blo Jesus helpem iumi tu for trae for minim gud olketa brata and sista. (Provebs 20:5, SIPB) Jesus savve wanem hem stap lo heart, bat iumi nomoa. Nomata olsem, iumi savve patient witim olketa brata and sista taem olketa mekem iumi feel nogud. (Eph. 4:1, 2; 1 Pet. 3:8) Hem bae isi for duim datwan if iumi savve lo baekgraon blo olketa. Bae iumi storyim wanfala example.

17. From wanfala circuit overseer trae for savve gud lo wanfala brata, wanem gud samting nao kamaot from datwan?

¹⁷ Wanfala circuit overseer lo East Africa tingim wanfala brata wea hem tingse hem no kaen. Wat nao circuit overseer hia duim? Hem sei: “Mi no avoidim  datfala brata, bat mi trae for savve gud lo hem.” Taem datfala circuit overseer duim datwan, hem savve lo baekgraon blo hem wea affectim wei blo hem. Circuit overseer hia sei tu: “Taem mi faendaot hao hem stragol for changem wei blo hem and hao hem mekem samfala big change, mi barava tinghae lo hem. Mitufala gud frens distaem.” So taem iumi trae for savve gud lo olketa brata and sista, bae hem isi for iumi lovem olketa.

18. Taem samwan mekem iumi feel nogud, wat nao samfala kwestin wea hem gud for ting raonem? (Provebs 26:20, SIPB)

¹⁸ Samfala taem maet iumi need for story witim wanfala brata or sista wea mekem iumi feel nogud. Bat firstaem, hem gud for ting raonem olketa kwestin olsem: ‘Waswe, mi savve gud lo wat hem happen?’ (Provebs 18:13, SIPB) ‘Waswe, mi tu duim sem mistek bifor?’ (Eklesiastes 7:21, 22, SIPB) ‘If mi go story witim hem, waswe, bae mi stretem or mekem problem worse go moa?’ (Readim Provebs 26:20, SIPB.) Taem iumi ting raonem olketa kwestin hia, maet iumi luksavve love savve helpem iumi for forgetim go nomoa wanem hem happen.

19. Wat nao iu disaed strong for duim?

¹⁹ Olketa Jehovah’s Witness pruvim hao olketa nao olketa tru Christian. Each wan lo iumi showimaot hao iumi tru follower blo Jesus taem iumi showimaot trufala love lo olketa brata and sista nomata olketa garem wik point. Taem iumi duim datwan, maet iumi helpem olketa narawan for luksavve lo tru religion and joinim iumi for worshipim Jehovah, God wea showimaot love. So iumi laek disaed strong for gohed showimaot love wea helpem pipol for luksavve lo olketa tru Christian.