1. Wat nao olketa parents laekem pikinini blo olketa for duim?

 PARENTS, mifala savve iufala laek for helpem pikinini blo iufala for savve lo Jehovah and for lovem hem. Bat iumi no savve lukim God. So hao nao iufala savve helpem olketa for savve Jehovah hem wanfala real Person and for fren gud witim hem?—Jas. 4:8.

2. Hao nao parents savve teachim pikinini abaotem olketa wei blo Jehovah?

² Wanfala important samting for helpem pikinini fren gud witim Jehovah, hem for studyim Bible witim olketa. (2 Tim. 3:14-17) Bible storyim tu nara wei for olketa young wan savve lane abaotem Jehovah. Lo buk blo Proverbs, wanfala dadi talem son blo hem for no forgetim olketa wei blo Jehovah wea showaot lo creation. (Provebs 3:19-21, SIPB) Iumi bae storyim samfala wei wea parents savve iusim creation for helpem pikinini blo olketa for lane abaotem olketa wei blo Jehovah.

3. Wat nao parents savve duim for helpem pikinini blo olketa?

³ Bible sei “olketa wei bilong [God] hem showaot klia start long taem wea hem wakem world kam kasem distaem.” (Rome 1:20) Parents, masbi iu hapi tumas for spendem taem for go wakabaot witim pikinini blo iu. Iusim olketa taem olsem for helpem pikinini for luksavve hao olketa nambawan wei blo Jehovah hem showaot klia lo creation blo hem. Distaem bae iumi lukim wanem olketa parents lanem from example blo Jesus.

4. Hao nao Jesus iusim creation for teachim olketa disaepol? (Luke 12:24, 27-30)

 ⁴ Jesus iusim creation for teach. Wantaem hem askem olketa disaepol for lukluk lo olketa raven bird and olketa lily flaoa. (Readim Luke 12:24, 27-30.) Jesus fit for storyim eni animal or plant, bat hem chus for storyim bird and flaoa wea olketa disaepol savve gud lo hem. Maet olketa disaepol savve lukim olketa raven flae lo skae and lily flaoa lo field. Tingim hao maet Jesus point go lo olketa samting hia taem hem story. Bihaen hem storyim olketa example hia, wat nao hem duim? Hem iusim datwan for teachim olketa disaepol for luksavve hao Dadi blo olketa lo heven hem kaen tumas. Jehovah bae provaedem kaikai and kaleko for olketa faithful servant blo hem lo sem wei wea hem lukaftarem olketa bird and flaoa.

5. Wat nao samfala samting lo creation wea parents savve iusim for teachim pikinini abaotem Jehovah?

⁵ Parents, waswe, bae iu followim hao Jesus hem teach? Iu savve storyim lo pikinini eni samting lo creation wea iu laekem, olsem fevaret flaoa or animal. Taem iu duim datwan, mek sure iu explainim wat iumi savve lanem abaotem Jehovah from datfala samting. Then maet iu askem pikinini blo iu abaotem wat nao fevaret flaoa or animal blo hem. If iu storyim creation wea pikinini interest lo hem, bae hem lisin gud taem iu teachim hem abaotem olketa wei blo Jehovah.

6. Wat nao iumi savve lanem from example blo mami blo Christopher?

⁶ Waswe, parents mas duim bigfala research abaotem eni animal or flaoa bifor olketa savve iusim for teachim pikinini abaotem Jehovah? Nomoa. Jesus no storyim staka samting abaotem hao raven bird hem kaikai and hao lily flaoa hem grow. Samfala taem maet pikinini laek for savve lo staka samting abaotem creation, bat samfala taem wanfala simpol toktok or kwestin savve helpem pikinini for kasem point. Wanfala brata wea nem blo hem Christopher sei olsem abaotem mami blo hem: “Mami blo mi savve talem simpol toktok for helpem mifala tinghae lo creation wea mifala lukim. For example, taem mifala klosap lo olketa maunten, hem savve sei: ‘Lukim olketa maunten hia big and luk naes tumas! Jehovah savve tumas, iaman?’ Or taem mifala lo saed sea, hem savve sei: ‘Lukim hao strong nao olketa wave ia! God hem garem bigfala paoa, iaman?’” Christopher sei: “Olketa simpol toktok wea hem talem hem barava helpem mifala.”

7. Hao nao iu savve trainim pikinini for ting raonem creation?

⁷ Taem olketa pikinini start for big, iu savve trainim olketa for ting raonem creation and for lane abaotem olketa wei blo Jehovah. Iu savve storyim wanfala samting lo creation and askem pikinini, “Wat nao iu lanem abaotem Jehovah from diswan?” Iu maet sapraes for herem tingting blo pikinini abaotem datwan.​—Matt. 21:16.

8. Wanem chance nao olketa Israelite parents garem taem olketa “wakabaot lo road”?

⁸ Jehovah encouragem olketa Israelite parents for teachim pikinini blo olketa abaotem law blo hem taem olketa “wakabaot lo road.” (Deut. 11:19) Evriwea lo Israel staka road stap. Taem olketa famili wakabaot followim road, olketa savve lukim staka difren type animal, bird, and  olketa flaoa. So parents garem chance for helpem pikinini for interest lo creation blo Jehovah. Distaem iufala parents garem chance olsem tu for iusim creation for teachim pikinini. Bae iumi lukim hao samfala parents duim datwan.

9. Wat nao iu savve lanem from Punitha and Katya?

⁹ Punitha, wanfala mami wea stap lo wanfala big city lo India, sei: “Taem mifala go for visitim famili blo mifala wea stap farawe from taon, mi and hasband blo mi iusim datfala chance for helpem olketa pikinini blo mitufala for lane abaotem nambawan creation blo Jehovah. Taem mifala go aot from taon wea fulap lo staka pipol and traffic, mi lukim olketa pikinini lane gud abaotem creation.” Parents, pikinini bae no forgetim taem wea iufala spendem tugeta lo olketa ples wea luk naes. Katya, wanfala sista lo Moldova, sei: “Olketa best memory from taem mi smol, hem taem wea mi spendem witim parents blo mi lo olketa ples aotsaed lo taon. Mi hapi tumas from tufala teachim mi from taem mi pikinini yet for ting raonem creation and lane abaotem Jehovah from datwan.”

10. Wat nao olketa parents savve duim sapos olketa no fit for travel aotsaed from taon? (Lukim box “ Olketa Samting for Helpem Parents”)

¹⁰ Hao sapos iu no fit for travel aotsaed from taon? Amol, wea stap tu lo India sei: “Ples mi stap, parents mas waka staka hour, and for travel aotsaed from taon hem expensive. Nomata olsem, for go lo park or sidaon lo varanda lo ruf blo haos hem chance for lukluk long creation and story abaotem olketa wei blo Jehovah.” Taem iu lukluk raon, maet bae iu faendem staka samting lo creation wea iu savve showim lo pikinini. (Sams 104:24, SIPB) Maet bae iu lukim olketa bird, insect, plant, and staka samting moa. Karina,  from Germany sei: “From mami lovem olketa flaoa, taem mi young gele, mitufala savve wakabaot tugeta and hem bae showim mi olketa naes flaoa.” Parents, iufala savve iusim tu staka video and pablikeson abaotem creation wea organization provaedem for teachim pikinini. Nomata wea nao iu stap, iu savve helpem pikinini blo iu for ting raonem creation blo God. Distaem bae iumi storyim samfala wei blo Jehovah wea iu savve helpem pikinini for luksavve lo hem.

11. Hao nao parents savve helpem pikinini for luksavve lo love blo Jehovah?

¹¹ For helpem pikinini luksavve lo love blo Jehovah, iu savve storyim hao olketa animal lukaftarem gud baby blo olketa. (Matt. 23:37) Iu savve storyim tu hao Jehovah wakem staka didifren type creation for iumi enjoyim. Karina wea iumi storyim finis, sei: “Taem mitufala mami wakabaot, hem savve encouragem mi for stop and lukim hao each flaoa hem difren and hao olketa luk naes showimaot love blo Jehovah. Distaem mi still interest for lukluk lo olketa flaoa for lukim design, kala, and hao olketa difren. Olketa samting hia remindim mi hao Jehovah barava lovem iumi.”

12. Hao nao parents savve helpem pikinini for luksavve lo wisdom blo Jehovah? (Sams 139:14, SIPB) (Lukim tu piksa.)

¹² Helpem pikinini blo iu for luksavve lo wisdom blo Jehovah. Jehovah barava wise winim iumi. (Rome 11:33) For example, iu savve storyim lo pikinini hao wata hem savve formimap olketa cloud and isi for muv go lo nara ples. (Job 38:36, 37, SIPB) Iu savve storyim tu hao Jehovah designim body blo iumi lo spesol wei. (Readim Sams 139:14, SIPB.) Wanfala dadi wea nem blo hem Vladimir hem duim datwan. Hem sei: “Wantaem son blo mi foldaon lo baesikol and garekil. Bihaen tu-thri day datfala garekil hem heal. Mi and waef explainim lo hem hao Jehovah wakem olketa cell for repairim olketa seleva. Mitufala storyim hao olketa samting wea man wakem hard for olsem. For example, car wea accident hard for repairim hemseleva. Diswan helpem son  blo mifala for luksavve lo wisdom blo Jehovah.”

13. Hao nao parents savve helpem pikinini for luksavve lo paoa blo Jehovah? (Isaiah 40:26)

¹³ Jehovah encouragem iumi for luk ap lo skae and ting abaotem hao hem iusim bigfala paoa blo hem for keepim evri star lo ples blo olketa. (Readim Isaiah 40:26.) Iu savve encouragem pikinini blo iu for luk ap lo skae and ting raonem wat hem lukim. Wanfala sista from Taiwan, wea nem blo hem Tingting sei: “Wantaem mitufala mami go camp and mitufala luk ap lo skae lo naet wea no eni laet lo taon disturbim. Lo datfala taem, mi warim tingting blo olketa nara young wan and if bae mi gohed faithful lo Jehovah or nomoa. Mami encouragem mi for tingim hao sem paoa wea Jehovah iusim for wakem evri star, hem savve iusim tu for helpem mi for deal witim eni test wea mi feisim. Bihaen mi ting raonem creation lo datfala trip, datwan helpem for savve gud lo Jehovah and disaed strong for gohed worshipim hem.”

14. Hao nao parents savve iusim creation for helpem pikinini luksavve Jehovah hem hapi God?

¹⁴ Creation showimaot hao Jehovah hem hapi God and hem laekem iumi tu for hapi. Olketa scientist faendemaot hao evri animal savve plei, nomata olketa bird and fish tu. (Job 40:20, SIPB) Hao, olketa pikinini blo iu savve laflaf lo olketa animal wea plei? Maet olketa lukim wanfala puskat hem plei or olketa puppy plei tugeta. So next taem iu lukim olketa pikinini laflaf lo olketa fani samting wea olketa animal duim, iusim datfala chance for remindim olketa hao iumi worshipim wanfala hapi God!​—1 Tim. 1:11.

15. Wat nao savve helpem parents for faendaot lo tingting blo pikinini? (Provebs 20:5, SIPB) (Lukim tu piksa.)

¹⁵ Samfala taem, maet parents faendem hard for mekem pikinini feel free for storyim problem blo olketa. If datwan nao situation blo iu, iu need for faendem wei for helpem pikinini for talem tingting  blo hem. (Readim Provebs 20:5, SIPB.) Samfala parents faendem isi for duim datwan taem olketa enjoyim creation witim pikinini. Why nao olsem? Wanfala reason hem bikos no staka samting stap for disturbim pikinini and parents. Masahiko, wanfala dadi lo Taiwan storyim nara reason: “Taem mi and waef tekem olketa pikinini for go wakabaot lo olketa maunten or saed sea, olketa savve relax. So hem isi for mitufala story witim olketa and herem tingting blo olketa.” Katya wea iumi storyim finis sei: “Bihaen skul mami savve tekem mi go lo wanfala naes park. Lo kwaet ples olsem, mi faendem isi for storyim lo mami wanem happen lo skul and samting wea mi wari abaotem.”

16. Wat nao olketa famili savve duim for enjoyim creation blo Jehovah?

¹⁶ Taem famili enjoyim creation tugeta, olketa savve relax and hapi, and datwan savve mekem famili barava lovem each other. Bible sei “taem hemi stap fo hapi” and “taem hemi stap fo dans.” (Eklesiastes 3:1, 4, SIPB) Jehovah creatim olketa naes ples lo earth for iumi duim olketa samting wea iumi enjoyim. Staka famili savve enjoy for go wakabaot lo bush and lo olketa maunten, or lo olketa island or saed sea. Samfala pikinini savve hapi for ran and plei lo park, lukluk lo olketa animal, or swim lo river, lake, or lo sea. Iumi garem staka chance for enjoyim olketa creation blo Jehovah!

17. Why nao olketa parents shud helpem pikinini blo olketa for enjoyim creation blo God?

¹⁷ Lo niu world, parents and olketa pikinini bae enjoyim creation blo Jehovah winim enitaem bifor. Lo datfala taem, bae iumi no fraetem olketa animal, and olketa tu bae no fraetem iumi. (Isa. 11:6-9) Iumi bae enjoyim creation blo Jehovah for olowe. (Sams 22:26, SIPB) Bat parents, iufala no weit go kasem datfala taem for helpem pikinini for enjoyim creation. Taem iufala iusim creation for teachim pikinini blo iufala abaotem Jehovah, maet olketa bae agree witim King David wea sei: “[Jehovah], no eni narafala god . . . save duim olketa gudfala waka olsem yu.”​—Sams 86:8, SIPB.