DANIEL AND MIRIAM marit long September 2000, and tufala stap long Barcelona, long Spain. Tufala garem gudfala laef long there. Daniel sei: “Mitufala kasem bigfala selen from waka wea mifala duim, so mitufala savve go kaikai long olketa expensive restaurant, go long olketa nara kantri, and werem olketa expensive kaleko. And tu, mifala evritaem joinim preaching waka.” Bat then samting hem happen.

Long convention long 2006, Daniel herem wanfala tok wea brata askem disfala kwestin: “Waswe, iumi duim best bilong iumi for helpem pipol wea ‘no stedy taem olketa wakabaot go for dae,’ for wakabaot long road wea lead go long laef olowe?” (Prov. 24:11) Datfala tok storyim hao iumi garem responsibility for preachim gud nius long pipol bikos datwan savve sevem laef bilong olketa. (Acts 20:26, 27) Daniel sei: “Mi tingim datwan olsem Jehovah story long mi.” Datfala tok storyim tu hao iumi savve hapi taem iumi duim moa samting long waka bilong Jehovah. Daniel luksavve diswan hem tru samting bikos hem lukim Miriam hem hapi from hem pioneer.

Datfala tok barava kasem heart bilong Daniel, so hem disaed for changem living bilong hem. Hem start for katdaon long waka bilong hem and hem start for pioneer. Hem ting abaotem hao hem and Miriam savve hapi sapos tufala go stap long ples wea needim samfala pablisa moa for preachim gud nius.

Long May 2007, Daniel and Miriam lusim waka bilong tufala and muv go long Panama, wea tufala bin visitim bifor. Tufala savve preach long staka island wea stap long Bocas del Toro Archipelago long Caribbean Sea. Staka long olketa long Ngabe nao stap long there. Daniel and Miriam tingse bae tufala stap long Panama for samting olsem eitfala month nomoa, bikos hem nomoa budget bilong tufala hem fitim.

Tufala savve iusim boat and baesikol taem tufala go preach long olketa island hia. Tufala still tingim firstaem wea tufala raedem baesikol for samting olsem 30 kilometer long hot sun and followim olketa steep hill. Daniel hem barava taed and short wind, so hem klosap hafded. Olketa famili long Ngabe wea stap long there barava kaen long tufala, from tufala savve long samfala toktok long languis bilong olketa. No longtaem bihaen, tufala garem 23-fala Bible study.

Wanem nao happen bihaen tufala spendem evri selen wea tufala garem? Daniel sei: “Mitufala start for tingting for go bak long Spain. Mitufala sorre tumas tu for lusim olketa Bible study bilong mitufala.” Bat bihaen wanfala month, mitufala kasem wanfala hapi nius. Miriam sei: “Mifala kamap spesol pioneer. Mitufala barava hapi for gohed long assignment bilong mitufala!”

From samfala change hem kamap insaed organization, Daniel and Miriam stop for spesol pioneer long 2015. Wanem nao tufala duim? Tufala barava trustim datfala promis bilong Jehovah wea stap long Psalm 37:5, wea sei: “Letem Jehovah leadim iu. Depend long hem and hem nao bae duim samting for iu.” Tufala garem waka for sapotim tufala for regular pioneer, and distaem tufala joinim wanfala kongregeson long Veraguas, long Panama.

Daniel sei: “Bifor mitufala lusim Spain, mitufala no tingim sapos mitufala bae garem simpol laef. Distaem mitufala garem simpol laef, and mitufala no short long eni samting wea mitufala needim.” Wanem nao mekem tufala barava hapi? Tufala sei: “Taem mitufala helpem olketa wea laek for lane abaotem Jehovah, datwan mekem mitufala barava hapi winim eni nara samting!”