1, 2. (a) Olketa toktok wea stap long Matthew 24:12, Jesus talem firstaem for hu? (b) Wanem nao Bible buk Acts talem wea showimaot staka Christian long first century garem strongfala love for God? (Lukim piksa long start bilong study.)

WANFALA part bilong datfala saen wea Jesus storyim for showimaot “world hem gogo for finis,” hem nao wei wea “love bilong staka bae no strong nao olsem bifor.” (Matt. 24:3, 12) Olketa Jew long first century sei olketa pipol bilong God, bat olketa letem love wea olketa garem for God no strong olsem bifor.

² Nomata olsem, staka Christian long datfala taem garem strongfala love for God. Olketa strong for preachim “gud nius abaotem Jesus,” and olketa showimaot love for God, for olketa nara Christian, and tu, for pipol wea no worshipim Jehovah. Olketa Christian hia no letem eni samting for spoelem love wea olketa garem for God. (Acts 2:44-47; 5:42) Nomata olsem, love wea samfala Christian long first century garem hem no strong nao olsem firstaem. Hao nao iumi savve long datwan?

3. Olketa wanem samting nao maet mekem love bilong samfala Christian for no strong?

³ Jesus sei olsem long olketa Christian wea stap long Ephesus  long first century: ‘Love wea iufala garem long firstaem hem nomoa nao.’ (Rev. 2:4) Maet datwan happen long olketa bikos olketa letem wei bilong pipol long Ephesus wea laekem nomoa for duim samting wea olketa seleva laekem for affectim olketa. (Eph. 2:2, 3) Ephesus hem wanfala rich taon wea pipol laekem tumas richfala living and for enjoyim laef winim eni nara samting. And tu, staka pipol long Ephesus duim olketa barava rabis samting and olketa nating tinghae long olketa law bilong God. Olketa tingim olketa seleva nomoa and olketa no lovem God and olketa narawan.

4. (a) Wanem nao mekem love wea pipol garem for God no strong distaem? (b) Wanem thrifala samting nao iumi shud strongim love bilong iumi long hem?

⁴ Samting wea Jesus talem for olketa Christian long first century savve happen long iumi tu. Distaem staka pipol no lovem God. Staka million pipol luk long organization bilong olketa man for stretem olketa problem long world, and olketa no depend long God. Datwan mekem love wea pipol garem for God no strong nao. So sapos iumi no careful, love wea iumi garem for Jehovah tu savve gogo daon, olsem olketa Christian wea stap long Ephesus bifor. For helpem iumi gohed garem strongfala love, bae iumi storyim thrifala samting hia: (1) Love bilong iumi for Jehovah, (2) lovem toktok bilong God, and (3) lovem olketa brata and sista.

5. Why nao iumi mas lovem God?

⁵ Hu nao iumi shud lovem winim eni narawan? Jesus hem sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem.” (Matt. 22:37, 38) Love wea iumi garem for God savve helpem iumi for obeyim olketa law bilong hem, helpem iumi for no givap, and for heitim olketa nogud samting. (Readim Psalm 97:10.) Bat Satan and world bilong hem trae for spoelem love wea iumi garem for God.

6. Wanem nao savve happen long pipol wea no lovem God?

⁶ Pipol long world no garem stretfala tingting abaotem love. Staka pipol “tingim olketa seleva nomoa” winim wei for lovem God. (2 Tim. 3:2) Olketa tingim nomoa ‘nogud samting wea body and eye bilong olketa laekem, witim tu wei for show-off witim samting wea olketa garem.’ (1 John 2:16) Aposol Paul warnim iumi abaotem nogud samting wea savve happen sapos iumi tingim iumiseleva nomoa. Hem sei: “Man wea tingim samting wea body laekem bae dae.” Why nao olsem? Bikos olketa wea duim olsem bae kamap enemy bilong God. (Rome 8:6, 7) Pipol wea spendem staka taem for aftarem material samting or olketa wea durong bae kasem nogud samting.—1 Cor. 6:18; 1 Tim. 6:9, 10.

7. Wanem kaen tingting nao olketa Christian distaem mas careful long hem?

⁷ Long samfala kantri, pipol wea no biliv long God, olketa wea sei God no stap, and olketa wea biliv long evolution trae for mekem pipol for bilivim God no stap and for no lovem God. Olketa mekem pipol for ting olsem man wea krangge or wea no skul nomoa bilivim wanfala Creator hem stap. And tu, staka pipol mekhae tumas long olketa scientist winim wei for mekhae long Creator. (Rome 1:25) Sapos wanfala Christian no careful, olketa samting hia savve affectim hem gogo hem no fren gud witim Jehovah, and love bilong hem for Jehovah bae no strong nao.—Heb. 3:12.

8. (a) Olketa wanem samting nao savve happen wea mekem iumi feel wikdaon? (b) Hao nao Psalm 136 savve comfortim iumi?

⁸ From iumi stap long world bilong Satan, staka samting savve happen wea mekem iumi  feel wikdaon. (1 John 5:19) Bat sapos iumi letem olketa samting hia for mekem iumi barava wikdaon, faith and love bilong iumi long Jehovah bae no strong nao. Olsem example, maet iumi kasem problem from iumi olo, health hem no mas gud, or hard taem saed long selen. Or maet iumi feel nogud bikos iumi no fit for duim samfala samting wea iumi laek for duim. Maet iumi feel nogud bikos samting wea iumi laekem hem no happen olsem hao iumi tingim. Nomata wanem hem happen, iumi shud no tingse Jehovah hem lusim iumi. Tingim wanem Psalm 136:23 talem wea barava comfortim iumi. Hem sei: ‘God tingim iumi taem iumi feel sorre bikos hem showimaot love long iumi for olowe.’ Iumi sure Jehovah savve lisin long iumi taem iumi “askem hem for helpem iumi” and hem ansarem iumi.—Ps. 116:1; 136:24-26.

9. Wanem nao Paul duim for strongim love wea hem garem for God?

⁹ Olsem man wea raetem datfala psalm, aposol Paul tu hem evritaem tingim wei wea Jehovah helpem hem and datwan barava strongim hem. Hem sei: “Jehovah nao hem helpem mi. Bae mi no fraet. No eniwan savve spoelem mi.” (Heb. 13:6) From Paul hem trustim Jehovah, datwan helpem hem for deal witim hard taem wea hem kasem. Hem no letem olketa samting hia for spoelem wei wea hem trustim Jehovah. Nomata taem hem long prison, hem raetem olketa leta long kongregeson for encouragem olketa Christian. (Eph. 4:1; Phil. 1:17; Philem. 1) Nomata wanem problem nao Paul hem kasem, hem no letem datwan for spoelem love wea hem garem for God. Hem depend long “God wea givim iumi comfort wea iumi needim. Nomata long eni hard taem wea iumi kasem.” (2 Cor. 1:3, 4) Hao nao iumi savve followim example bilong Paul?

10. Wanem nao iumi savve duim for gohed strongim love bilong iumi long Jehovah?

¹⁰ Paul storyim wanfala wei for iumi strongim love wea iumi garem for God. Hem sei: “Prea evritaem.” Hem sei tu: “Gohed for prea and no givap.” (1 Thess. 5:17; Rome 12:12) Hao nao wei for prea savve helpem iumi for fren gud witim God? Iumi story long Jehovah taem iumi prea and datwan helpem iumi for fren gud witim hem. (Ps. 86:3) Taem iumi talem evri tingting and feeling bilong iumi long Dadi bilong iumi long heven, datwan bae mekem iumi fren gud witim hem. (Ps. 65:2) And tu, taem iumi lukim hao Jehovah ansarem olketa prea bilong iumi, datwan savve barava strongim love wea iumi garem for hem. Iumi sure “Jehovah hem fren witim olketa wea prea long hem from heart bilong olketa.” (Ps. 145:18) From iumi savve Jehovah lovem iumi and hem redi for sapotim iumi, datwan strongim iumi for deal witim eni problem wea iumi kasem distaem and long future.

11, 12. Wanem nao iumi savve duim for barava tinghae long olketa tru samting wea Bible teachim?

¹¹ Iumi olketa tru Christian tinghae long truth. Iumi lanem olketa tru samting hia insaed long Bible. Jesus sei long Dadi bilong hem: ‘Toktok bilong iu hem tru.’ (John 17:17) For iumi lovem truth, iumi mas savve long olketa samting wea Bible storyim. (Col. 1:10) Bat iumi mas duim olketa nara samting tu. Man wea raetem Psalm 119 helpem iumi for savve long wanem iumi mas duim. (Readim Psalm 119:97-100.) Iumi need for ting raonem wanem iumi readim long Bible evriday. Taem iumi ting raonem hao iumi savve followim wanem iumi readim long Bible, datwan mekem iumi barava tinghae long Bible.

¹² Man wea raetem psalm hem sei tu: “Olketa toktok bilong iu hem naes tumas long mi, and hem swit winim honey!” (Ps. 119:103) Olketa Bible pablikeson wea kam from  organization bilong Jehovah hem olsem kaikai wea teist naes tumas. Taem iumi kaikaim kaikai wea iumi laekem tumas, bae iumi no hariap taem iumi kaikaim bikos iumi laek for enjoyim datfala kaikai. Long sem wei tu, bae iumi no laek for hariap taem iumi studyim Bible. Taem iumi duim olsem, bae iumi barava enjoyim “olketa naesfala toktok” insaed long Bible, and iumi bae no forgetim wanem iumi readim, and iumi savve iusim datwan for helpem olketa narawan.—Eccl. 12:10.

13. Wanem nao helpem Jeremiah for barava lovem toktok bilong God, and datwan mekem hem for duim wanem?

¹³ Profet Jeremiah hem tinghae long toktok bilong God. Hem sei: “Taem mi herem toktok bilong iu, mi barava ting strong long hem. Toktok bilong iu hem mekem mi barava hapi bikos mi garem nem bilong iu, Jehovah God, wea komanda bilong olketa angel long heven.” (Jer. 15:16) Jeremiah barava ting raonem gud toktok bilong God and hem barava lovem datwan. Hem tinghae tumas long waka wea Jehovah givim hem for talemaot message bilong hem. Sapos iumi lovem toktok bilong God, iumi bae luksavve hem wanfala spesol privilege for kamap olketa Witness bilong Jehovah and for talemaot message abaotem Kingdom long olketa last day distaem.

14. Wanem nao nara samting wea savve helpem iumi for lovem toktok bilong God?

¹⁴ Wanem nao nara samting wea savve helpem iumi for lovem toktok bilong God? Iumi mas evritaem attendim olketa meeting for Jehovah teachim iumi. Evri week iumi iusim Wastaoa magasin for studyim Bible, wea datwan hem main wei wea Jehovah teachim iumi. Sapos iumi laek kasem gud samting from datfala meeting, iumi mas prepare firstaem. Olsem example, taem iumi prepare, iumi savve readim evri scripture wea stap long paragraf. Distaem staka savve readim or daonlodim Wastaoa magasin. Disfala magasin hem stap long staka languis long jw.org website and long JW Library app. Wastaoa magasin hem stap long samfala format wea hem isi for kwiktaem faendem olketa scripture. Nomata iumi iusim electronic copy or magasin for preparem wanfala study article, wei for readim olketa scripture and ting raonem gud bae helpem iumi for  tinghae long olketa tru teaching long Bible.—Readim Psalm 1:2.

15, 16. (a) Wanem nao Jesus talem long John 13:34, 35 for iumi duim? (b) Long wanem wei nao love wea iumi garem for God and toktok bilong hem join witim love wea iumi garem for olketa brata and sista?

¹⁵ Long naet bifor Jesus hem dae, hem sei long olketa disaepol bilong hem: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.”—John 13:34, 35.

¹⁶ Wei for lovem olketa brata and sista hem join witim wei for lovem Jehovah. Sapos iumi no lovem God, hard for iumi lovem olketa brata and sista bilong iumi. And sapos iumi no lovem olketa brata and sista bilong iumi, hem hard tu for iumi lovem God. Aposol John sei: “Sapos man no lovem brata bilong hem wea hem savve lukim, hard tumas for hem lovem God wea hem no savve lukim.” (1 John 4:20) Love wea iumi garem for Jehovah and olketa brata and sista bilong iumi hem join tu witim wei wea iumi tinghae long Bible. Why nao olsem? Bikos sapos iumi tinghae long wanem iumi lanem long Bible, bae iumi laek for obeyim wanem Bible talem for lovem God and olketa brata and sista bilong iumi.—1 Pet. 1:22; 1 John 4:21.

17. Wanem nao samfala samting wea iumi savve duim for showimaot iumi lovem olketa brata and sista?

¹⁷ Readim 1 Thessalonica 4:9, 10. Wanem nao samfala samting wea iumi savve duim wea showimaot iumi lovem olketa long kongregeson? Maet iumi savve helpem wanfala olo brata or sista for go long olketa meeting. Maet wanfala widow sista needim help for fixim wanfala samting long haos bilong hem. (Jas. 1:27) Olketa brata and sista wea wikdaon, feel sorre, or kasem samfala hard taem needim iumi for helpem, encouragem, and comfortim olketa. (Prov. 12:25; Col. 4:11) Wanem iumi talem and samting wea iumi duim savve showimaot iumi lovem ‘olketa wea iumi garem sem biliv.’—Gal. 6:10.

18. Wanem nao savve helpem iumi for stretem eni problem wea iumi garem witim nara brata or sista?

¹⁸ Bible sei long “olketa last day,” staka pipol bae greedy and tingim olketa seleva nomoa. (2 Tim. 3:1, 2) Iumi olketa Christian mas waka hard for strongim love wea iumi garem for Jehovah, for Bible, and for each other. From iumi no perfect, samfala taem iumi savve feel nogud long nara brata or sista bilong iumi. Bat from iumi lovem olketa brata and sista, iumi bae kwiktaem stretem eni problem wea kamap and iumi mas kaen taem iumi duim datwan. (Eph. 4:32; Col. 3:14) Iumi mas no letem eni samting spoelem love wea iumi garem firstaem! So iumi laek for gohed strongim love wea iumi garem for Jehovah, toktok bilong hem, and for olketa brata and sista bilong iumi.