LONG Friday morning, long September 1922, sun hem start for hot. Long datfala taem, 8,000 pipol hipap insaed wanfala building. Chairman hem sei long disfala spesol taem sapos eniwan hem laek for go, hem savve go, bat hem mas no kam bak moa insaed disfala building.

Olketa singim samfala song for startim “Praise Service” bifor Joseph Rutherford go long stage for givim tok. Staka long audience barava laek for savve wanem nao bae happen. Samfala gohed for muv raon. So speaker hem talem olketa for sidaon kwaet and for lisin gud. Taem brata start for givim datfala tok, waswe, eniwan lukim wanfala big kaleko wea olketa rolim and taengem antap long stage?

Title long tok bilong Brata Rutherford hem “Kingdom bilong God hem klosap for kam.” For samting olsem wan and haf hour, hem storyim olketa profet long bifor no fraet for talemaot Kingdom bilong God hem klosap for kam. Taem hem mekhae long main point bilong datfala tok, hem askem disfala kwestin: “Waswe, iu bilivim datfala King wea kasem glory hem rul finis distaem?” Evriwan long audience singaot big and sei: “Yes!”

Then Brata Rutherford sei: “Iufala olketa pikinini bilong haefala God, gohed strong for duim preaching waka!” Hem sei tu: “Lukim, King hem rul finis! Iufala nao mas talem pipol abaotem hem. So talemaot, talemaot, talemaot.”

Semtaem nomoa, olketa isisi letem kam daon datfala kaleko wea olketa bin taengem wea garem disfala toktok: “Talemaot Nius Abaotem King and Kingdom Bilong Hem.”

Ray Bopp sei long datfala taem, “Evriwan long audience hapi tumas.” Anna Gardner storyim “taem evriwan klap big and shout olketa rafter bat seksek tu.” Fred Twarosh sei: “Mifala evriwan standap wantaem.” Evangelos Scouffas sei: “Hem olsem wanfala strongfala paoa hem pullim mifala from olketa ples mifala sidaon long hem, mifala standap, and eye bilong mifala barava fulap long tias.”

Staka wea attendim datfala convention olketa bin preachim gud nius abaotem Kingdom. Nomata olsem, datwan strongim olketa moa for duim preaching waka. Ethel Bennecoff sei datfala tok hem strongim olketa Bible Student and hem barava strongim love bilong olketa for Jehovah. Odessa Tuck, wea hem 18 year long datfala taem, disaed for duim wanem Brata Rutherford askem evriwan for duim. Odessa sei: “Mi no savve wea nao for go preach, or hao nao for duim, or wanem nao for talem. Nomata olsem, mi laek for followim example bilong Isaiah, wea sei: “Mi long hia! Sendem mi.” (Isa. 6:8) Ralph Leffler sei: “Long datfala taem nao hem start bilong disfala preaching campaign wea gohed raonem full world kam kasem distaem.”

Disfala convention long Cedar Point, Ohio long 1922 hem big samting wea happen long history  bilong organization! George Gangas sei: “Disfala convention hem strongim mi and hem mekem mi no laek for missim eni convention.” So no enitaem hem missim eni convention. Julia Wilcox sei: “Evritaem mi read abaotem convention long Cedar Point, long 1922 long eni pablikeson bilong iumi, datwan mekem mi tingim datfala taem. Mi no savve explainim nao hapi wea mifala kasem. Mi evritaem laek for talem ‘thankiu long Jehovah, bikos mi garem chance for attendim datfala convention.’”

Distaem tu staka long iumi no savve forgetim convention wea barava strongim iumi and strongim love bilong iumi for God and datfala King. Taem iumi tingim datfala taem, iumi tu savve sei, ‘thankiu Jehovah, bikos mi garem chance for attendim datfala convention.’