1, 2. (a) Hao nao olketa young wan winim olketa nogud enemy bilong olketa? (Lukim piksa long start bilong study.) (b) Wanem nao bae iumi storyim long disfala study?

APOSOL Paul sei olketa Christian olketa olsem soldia wea join long wanfala faet. Iumi no insaed wanfala really faet, bat iumi insaed spiritual faet. Nomata olsem, iumi faetem olketa really enemy. Satan and olketa demon bilong hem faet for staka thousand year so olketa savve tumas hao for faet. Maet hem luk olsem hem hard for man winim datfala faet, especially olketa young wan. Waswe, olketa fit for winim olketa strongfala enemy hia? Yes, olketa young wan savve win and olketa gohed for win distaem. Hao nao olsem? Bikos olketa “gohed kasem strong from Lord.” Bat olketa duim nara samting tu. Olketa mas “werem evri samting for faet wea God givim,” olsem olketa soldia wea savve tumas for faet.—Readim Ephesus 6:10-12.

² Taem Paul storyim disfala tokpiksa, maet hem tingim samting wea olketa soldia bilong Rome werem taem olketa faet. (Acts 28:16) Bae iumi storyim why nao datfala tokpiksa hem barava fitim distaem. And tu, bae iumi storyim wanem samfala young wan talem abaotem wei for werem evri spiritual samting for faet nomata  samfala taem hem no isi, and olketa gud samting wea iumi kasem from wei for werem evri samting for faet.

3, 4. Long wanem wei nao truth long Bible hem olsem belt bilong wanfala soldia?

³ Readim Ephesus 6:14. Belt bilong olketa soldia bilong Rome garem olketa smol pis metal wea stap long hem for protectim bele bilong man. And tu, datfala belt fit for holem ap hevi bilong datfala samting for kavarem chest. Samfala belt garem tu olketa strong clip wea olketa hangem sword and naef for faet long hem. Soldia wea werem gud belt bilong hem, bae no feel fraet taem hem go for faet.

⁴ Olsem datfala belt, truth wea iumi lanem from Bible protectim iumi from olketa false teaching wea savve spoelem iumi. (John 8:31, 32; 1 John 4:1) And taem iumi lane for lovem truth from Bible hem bae isi for iumi karem datfala “samting for kavarem chest,” wea datwan minim for followim olketa standard bilong God. (Sams 111:7, 8; 1 John 5:3) And tu, taem iumi minim gud olketa tru samting insaed Bible iumi bae no fraet and redi for ansarem eniwan wea tok againstim wanem Bible teachim.—1 Pet. 3:15.

5. Why nao iumi shud talem tru samting evritaem?

⁵ Taem iumi taetem truth olsem belt raonem iumi, datwan bae helpem iumi for followim truth and talem tru samting evritaem. Why nao iumi mas stap klia long wei for laea? Bikos wei for laea hem wanfala weapon wea Satan iusim for spoelem staka pipol. Taem man laea datwan savve spoelem hem and man wea hem laea long hem tu. (John 8:44) So iumi mas traem best for no laea, nomata iumi no perfect. (Eph. 4:25) Diswan hem no isi. Abigail, wea eitin year, hem sei: “Samfala taem maet iumi tingse hem gud for laea, especially sapos datfala laea bae mekem iumi misstim samfala problem.” Bat why nao hem evritaem traem best for talem tru samting? Hem sei: “Taem mi talem tru samting mi garem klin konsens front long Jehovah. And parents bilong mi and olketa fren bilong mi savve olketa fit for trustim mi.” Victoria, wea 23 year, hem sei: “Taem iu talem tru samting and defendim biliv bilong iu, maet olketa bae bullyim iu. Nomata olsem, iu bae kasem gud samting, olsem wei for no fraet, wei for fren gud witim Jehovah, and olketa wea lovem iu bae respectim iu.” Tru nao, hem gud for evritaem “werem truth olsem wanfala belt raonem bele” bilong iu.

6, 7. Why nao wei for raeteous hem olsem datfala samting for kavarem chest?

⁶ Wanfala type samting for kavarem chest wea soldia bilong Rome savve werem hem garem olketa longfala flat pis iron wea olketa bendim for raonem body for kavarem chest. Olketa iusim olketa huk and nara samting for pasim olketa iron hia long olketa pis leather. Antap shoulder bilong hem garem tu olketa pis iron wea olketa pasim long leather. Kaen type iron hia for kavarem chest savve mekem soldia no barava free for muvim body bilong hem and hem need for chekim evritaem for mek sure olketa pis iron hia stap long stret ples bilong hem. Nomata olsem, datfala kava protectim heart and olketa nara part long body bilong hem from sword or arrow.

⁷ Datfala tokpiksa barava fitim olketa raeteous standard bilong Jehovah wea savve protectim tokpiksa heart bilong iumi. (Provebs 4:23) Olsem wanfala soldia wea no laek for changem datfala iron for kavarem chest witim nara samting wea no strong, iumi tu no laek for changem olketa standard bilong Jehovah witim samting wea iumiseleva tingse hem stret. Savve wea iumiseleva garem no fit for protectim iumi. (Provebs 3:5, 6) Dastawe, iumi mas evritaem chekim sapos datfala  “samting for kavarem chest” hem stap for protectim heart bilong iumi.

8. Why nao hem gud for followim olketa standard bilong Jehovah?

⁸ Waswe, samfala taem iu feel olketa standard bilong Jehovah hem hevi tumas or mekem iu no free for duim wanem iu laekem? Daniel, wea 21 year, hem sei: “Olketa teacher and olketa skulfren mekfani long mi bikos mi followim olketa standard long Bible. For lelebet taem, mi start for feel fraet and feel sorre.” Hao nao gogo hem feel gud moa? Hem sei: “Gogo mi luksavve taem mi followim olketa standard bilong Jehovah mi kasem gud samting. Samfala fren bilong mi start for tekem drug and olketa narawan finis from skul. Mi sorre tumas for lukim samting wea kasem olketa. Jehovah barava protectim iumi.” Madison, wea 15 year, hem sei: “Mi stragol for followim olketa standard bilong Jehovah and no followim wanem olketa fren bilong mi tingse hem gud.” Hao nao hem deal witim datwan? Hem sei: “Mi remindim miseleva hao mi witness for nem bilong Jehovah, and hao olketa temptation hia hem olsem Satan hem sutim mi. Taem mi winim datwan, mi feel hapi.”

9-11. (a) Wanem nao datfala tokpiksa sandol wea olketa Christian werem? (b) Wanem nao bae helpem iumi for feel free and no fraet taem iumi preach?

⁹ Readim Ephesus 6:15. Sapos wanfala soldia bilong Rome no werem sandol, hem no redi for go long faet. Olketa wakem sandol hia long thrifala pis leather wea olketa pasim tugeta for mekem hem barava strong. Diswan mekem datfala sandol stap longtaem, hem feel gud for werem, and mekem man savve step gud.

¹⁰ Long sem wei wea sandol helpem olketa soldia bilong Rome for faet, sandol wea olketa Christian werem helpem olketa for talemaot message bilong peace. (Aesaea 52:7; Rome 10:15) Nomata olsem, man mas no fraet for story taem chance kamap. Roberto, * wea hem 20 year, hem sei: “Mi fraet for preach long olketa wea sem age witim mi. Ating from mi shame. Taem mi ting go bak, mi no savve why nomoa mi shame. Distaem mi hapi for preach long olketa skulfren bilong mi.”

¹¹ Staka young wan luksavve sapos olketa prepare gud olketa bae feel free and no fraet for preach. Wanem nao iu savve duim for prepare? Julia, wea 16 year, hem sei: “Mi keepim pablikeson insaed basket bilong mi, and mi herehere long olketa classmate bilong mi taem olketa storyim biliv and tingting bilong olketa. Taem olsem mi savve wanem for duim for helpem olketa. Sapos mi prepare, mi savve story long olketa abaotem samting wea savve helpem olketa.” Makenzie, wea 23 year, hem sei: “Sapos iu kaen and iu lisin gud iu bae savve wanem nao samfala samting wea olketa fren bilong iu deal witim. Mi mek sure mi readim evri information wea olketa pablisim for olketa young wan. From datwan, mi savve leadim story go long samting wea Bible talem or long jw.org wea bae helpem olketa.” Olsem olketa young wan hia storyim, sapos iu prepare gud for preach hem olsem iu taengem gud sandol bilong iu.

12, 13. Wanem nao samfala arrow bilong Satan wea garem fire?

¹² Readim Ephesus 6:16. Big shield wea soldia bilong Rome holem hem sheip olsem rectangle, wea long bilong hem fit for kavarem shoulder go kasem knee. Hem protectim man from olketa sword, spia, and olketa arrow wea flae kam.

¹³ Samfala arrow bilong Satan wea garem fire, wea maet hem sutim long iu, hem nao olketa laea toktok abaotem Jehovah, olsem wei  for tingse Jehovah no lovem iu and no eniwan tingim iu. Ida, wea 19 year, hem stragol witim feeling for tingse hem iusles. Hem sei: “Staka taem mi feel olsem Jehovah no klos witim mi and hem no laek for fren witim mi.” Hao nao hem deal witim datwan? Ida sei: “Olketa meeting barava strongim faith bilong mi. Mi savve go long meeting, bat no savve koment bikos mi tingse no eniwan laek for herem wanem mi bae talem. Bat distaem, mi savve prepare for olketa meeting and trae for ansa tu-thri taem. Hem no isi, bat mi feel gud taem mi duim datwan. And olketa brata and sista barava encouragem mi. Evritaem, bihaen mi kam bak from olketa meeting, mi luksavve Jehovah lovem mi.”

14. Wanem nao iumi lanem from experience bilong Ida?

¹⁴ Experience bilong Ida helpem iumi for minim wanfala important samting. Size bilong shield wea wanfala soldia garem hem no savve change. Bat, tokpiksa shield bilong iumi, wea hem nao faith, hem savve big or smol. Iumi nao bae chus sapos bae hem strong or bae hem wik. (Matt. 14:31; 2 Thess. 1:3) Dastawe, hem barava important for iumi gohed strongim faith bilong iumi.

15, 16. Long wanem wei nao hope bilong iumi hem olsem helmet?

¹⁵ Readim Ephesus 6:17. Helmet wea soldia bilong Rome werem hem for protectim hed, nek, and feis bilong hem. Samfala helmet garem handol wea mekem hem isi for olketa soldia holem.

¹⁶ Long sem wei wea helmet protectim  brain bilong soldia, “helmet, wea hem nao hope wea iumi garem for sev,” hem protectim mind and tingting bilong iumi. (1 Thess. 5:8; Provebs 3:21) Hope helpem iumi for tingim olketa promis bilong God and for garem stretfala tingting abaotem olketa problem. (Sams 27:1, 14; Acts 24:15) Bat sapos iumi laekem “helmet” bilong iumi for protectim iumi, iumi mas werem long hed, no karem long hand.

17, 18. (a) Hao nao Satan switim iumi for aotem helmet bilong iumi? (b) Hao nao iumi savve showimaot iumi no letem Satan for trikim iumi?

¹⁷ Hao nao Satan switim iumi for aotem helmet bilong iumi? Tingim wanem hem duim long Jesus. Satan savve Jesus garem hope for rulim olketa man long future. Bat Jesus mas weit go kasem taem wea Jehovah markem. Firstaem, hem mas safa and dae. So Satan givim chance long Jesus for rul stretawe. Satan sei sapos Jesus baodaon and worshipim hem, bae hem stretawe givim hem paoa for rul. (Luke 4:5-7) Long sem wei, Satan savve Jehovah bae givim iumi staka nambawan blessing long niu world. Bat iumi mas weit firstaem, and maet iumi need for deal witim samfala problem for lelebet taem. Dastawe Satan givim iumi chance for enjoyim laef distaem. Hem laekem iumi for aftarem olketa material samting and hem no laekem iumi for aftarem Kingdom firstaem.—Matt. 6:31-33.

¹⁸ Olsem staka young Christian, Kiana, wea 20 year old, hem no letem Satan for trikim hem. Hem sei: “Mi savve only hope for stretem evri problem bilong iumi hem Kingdom bilong God.” Hao nao disfala hope bilong hem affectim samting wea hem tingim and duim distaem? Hem sei tu: “Hope bilong mi for Paradaes helpem mi for luksavve olketa samting long world hem for lelebet taem nomoa. Mi no laek for trae iusim savve wea mi garem for aftarem staka selen and bignem long disfala world. Bat mi iusim taem and strong bilong mi for aftarem olketa spiritual goal bilong mi.”

19, 20. Hao nao iumi savve kamap gud long wei for iusim Bible?

¹⁹ Long bilong sword wea olketa soldia long Rome iusim long taem bilong Paul, hem samting olsem 50 centimeter and olketa iusim taem olketa faet feis tu feis. Wanfala samting wea mekem olketa savve tumas hao for iusim sword hem bikos olketa practice evriday.

²⁰ Paul sei Bible hem olsem sword wea Jehovah givim iumi. Bat iumi mas lane hao for iusim gud datwan for defendim wanem iumi bilivim or for changem tingting bilong iumi. (2 Cor. 10:4, 5; 2 Tim. 2:15) Hao nao iu savve kamap gud long datwan? Sebastian, wea 21 year, hem sei: “Mi raetem daon wanfala verse long evri chapter taem mi duim Bible reading. Mi mekem wanfala list long olketa favorite verse bilong mi. Taem mi duim olsem mi minim gud tingting bilong Jehovah.” Daniel, wea iumi storyim finis, hem sei: “Taem mi duim Bible reading mi chusim samfala verse wea mi tingse hem bae helpem olketa pipol wea mi meetim long ministry. Mi faendem pipol barava interest taem olketa lukim wei wea iu barava tinghae long Bible and iu laek for helpem olketa.”

21. Why nao iumi shud no fraetem Satan and olketa demon?

²¹ Olsem iumi lanem long disfala study, story bilong olketa young wan hia showimaot iumi no need for fraetem Satan and olketa demon. Olketa garem paoa, bat paoa bilong olketa no kasem bilong Jehovah. And olketa no savve stap for olowe. Insaed wan thousand year rul bilong Christ, olketa bae stap long prison and no savve duim eni samting for spoelem olketa man and then bihaen olketa bae finis evribit. (Rev. 20:1-3, 7-10) Iumi savve long enemy bilong iumi, olketa nogud trik bilong hem, and goal bilong hem. Jehovah savve helpem iumi for strong for againstim hem.