1. Wanem nao Bible teachim iumi?

IUMI savve winim eni hard taem bikos Jehovah nao Nambawan Teacher bilong iumi. (Aesaea 30:20, 21) Hem givim kam Bible for teachim iumi for kamap “barava fit and redi for duim evri gudfala waka.” (2 Tim. 3:17) Taem iumi followim wanem Bible teachim, iumi bae kamap wise winim olketa wea followim “wisdom bilong world.”—1 Cor. 3:19; Sams 119:97-100.

2. Wanem nao bae iumi storyim long disfala study?

² Olsem iumi lukim distaem, wisdom bilong world mekhae long wei for duim samting wea man seleva laekem. So staka taem hem no isi for iumi stap klia long wei for garem tingting and wei bilong disfala world. Dastawe, Bible sei: “No letem olketa iusles toktok and tingting bilong man for trapim iufala. Olketa samting hia join witim kastom bilong olketa man.” (Col. 2:8) Long disfala study, bae iumi storyim hao pipol start for acceptim tufala laea teaching bilong Satan and hao gogo datkaen tingting hem kamap big distaem. Taem iumi storyim tufala point hia, bae iumi lukim why nao wisdom bilong world hem krangge samting and why nao wisdom bilong God long Bible hem winim eni samting wea world bilong Satan mekhae long hem.

3-4. Olketa wanem change nao kamap long United States long olketa year wea start long 1900?

³ Long United States, long olketa year wea start long 1900 and kamap, tingting bilong staka pipol abaotem sex hem start for change. Firstaem, pipol no savve story abaotem sex and olketa ting diswan hem for pipol wea marit nomoa. Bat datkaen tingting hem change and pipol start for ting hem olraet nomoa for eniwan duim sex and for story abaotem datwan.

 ⁴ Olketa year midolwan 1920 and 1930, olketa kolem long Roaring Twenties. Long datfala taem, wei bilong pipol and tingting bilong olketa abaotem sex hem barava change. Wanfala woman wea duim research sei: “Olketa movie, show, song, buk, and advertisement start for mekhae long sex.” Hao pipol dance hem start for mekem pipol ting abaotem sex, and kaleko wea olketa werem hem start for no showimaot respect. Olsem Bible storyim, long olketa last day pipol bae barava “interest nomoa for enjoyim seleva.”—2 Tim. 3:4.

5. Wanem nao happen long tingting bilong pipol long olketa year bilong 1960?

⁵ Long olketa year bilong 1960, staka pipol start for stap tugeta bat no marit, staka divorce, and staka kamap homosexual. Olketa TV program, movie and olketa nara entertainment start for showim wei for duim sex. Olketa samting hia affectim pipol long staka difren wei, and distaem iumi lukim nogud samting wea kamaot from datwan. Wanfala man for raet sei, staka sorre samting kamap bikos pipol ting nating long wei for duim sex. Olsem example, staka parents separate or divorce, dadi or mami lusim famili, pipol feel nogud, samfala addict long pornography, and staka nara nogud samting. Iumi lukim distaem hao olketa nogud sik wea kamaot from wei for duim sex, olsem disfala sik AIDS, hem wanfala nomoa long staka samting wea showimaot wisdom bilong world hem krangge samting.—2 Pet. 2:19.

6. Hao nao tingting bilong world abaotem sex hem barava followim wanem Satan laekem?

⁶ Tingting bilong pipol long world abaotem sex hem barava followim wanem Satan laekem. Goal bilong Satan hem for pipol no respectim sex and marit wea hem present from Jehovah. (Eph. 2:2) Wei wea pipol durong hem no just showimaot olketa no tinghae long disfala spesol present from Jehovah for garem pikinini, bat hem mekem olketa wea duim datwan for no fit for kasem laef olowe.—1 Cor. 6:9, 10.

7-8. Why nao teaching bilong Bible abaotem sex hem winim tingting bilong disfala world?

⁷ Pipol wea laek for followim wisdom bilong world tingse olketa standard long Bible saed long sex hem no fitim. Olketa kaen pipol olsem savve sei, ‘Why nao God wakem olketa man witim feeling for laekem sex and then long semtaem hem talem olketa for kontrolem datfala feeling?’ Datfala kwestin kamap bikos olketa tingse man mas duim samting followim wanem body laekem. Bat Bible no tok olsem. Bible respectim wei wea iumi man fit for chus  for kontrolem iumiseleva for no duim samting wea no stret. (Col. 3:5) And tu, Jehovah provaedem marit olsem stretfala wei for satisfaem disfala feeling for duim sex. (1 Cor. 7:8, 9) Hasband and waef savve enjoyim sex and tufala bae no kasem hevi and wari wea savve kamap sapos samwan hem duim sex aotsaed long datfala marit arrangement.

⁸ Bible teachim iumi stretfala wei for ting long sex, and diswan barava difren from wisdom bilong disfala world. Bible sei sex hem wanfala hapi samting insaed marit. (Provebs 5:18, 19) Nomata olsem, Bible sei: “Iufala wanwan mas savve hao for kontrolem body bilong iufala mekem iufala holy and God hem hapi long iufala. Iufala mas no letem feeling for laekem tumas sex for kontrolem iufala, wea diswan nao wei bilong pipol wea no savve long God.”—1 Thess. 4:4, 5.

9. (a) Hao nao pipol bilong Jehovah long olketa year start long 1900, followim wisdom bilong God long Bible? (b) Wanem wisefala toktok nao insaed 1 John 2:15, 16? (c) Olsem Rome 1:24-27 storyim, olketa wanem nogud samting nao iumi mas againstim?

⁹ Long olketa year start long 1900, pipol bilong Jehovah no letem olketa laea tingting bilong pipol wea “olketa no savve long wanem hem stret and wanem hem no stret” for affectim tingting bilong olketa. (Eph. 4:19) Olketa traem best for followim olketa standard bilong Jehovah. Long Watch Tower bilong May 15, 1926, hem storyim hao “wei bilong wanfala man or wanfala woman mas klin and tingting bilong olketa and hao olketa duim samting hem mas klin tu especially taem olketa deal witim each other.” Nomata wanem nao happen long datfala taem, pipol bilong Jehovah followim wisdom long Bible. (Readim 1 John 2:15, 16.) Iumi barava hapi bikos Jehovah givim iumi Bible! Iumi tinghae tu long hao Jehovah evritaem givim kam olketa spiritual kaikai long barava taem wea helpem iumi for againstim teaching bilong world abaotem sex. *—Readim Rome 1:24-27.

10-11. Wanem nao Bible talem bae happen long olketa last day?

¹⁰ Bible talem finis hao long olketa last day “pipol bae tingim olketa seleva nomoa.” (2 Tim. 3:1, 2) So iumi no sapraes long wei wea disfala world hem encouragem man for tinghae long seleva. Wanfala buk storyim hao long olketa year bilong 1970, olketa start for garem staka buk wea givim advaes for pipol. Samfala long olketa buk hia sei, “Man mas luksavve long hemseleva and acceptim hu nao hem, and for hapi long wanem olketa seleva duim.” Olsem example wanfala long olketa buk hia hem sei, ‘Lovem iuseleva bikos iu barava luk naes, spesol, and iu winim eni narawan moa.’ Datfala buk mekhae long disfala tingting for sei man seleva shud disaedem samting followim wanem hem tingim and duim eni samting wea hem tingse hem stret and fitim hem.

¹¹ Maet diswan mekem iu tingim samting wea Satan talem bifor. Satan encouragem Eve for duim sem samting. Hem sei tufala bae kamap olsem God, and savve disaedem wanem hem gud and wanem hem nogud. (Jenesis 3:5) Distaem, staka tinghae tumas long olketa seleva, and olketa tingse no eniwan, nomata God tu, fit for talem olketa abaotem wanem nao hem stret and no stret. Diswan barava showaot klia long tingting bilong pipol abaotem marit.

12. Wanem tingting nao disfala world hem mekhae long hem?

¹² Bible givim advaes long olketa hasband and waef for mas showimaot respect and keepim marit promis wea tufala mekem. Hem encouragem hasband and waef for mas stap tugeta  for olowe taem hem sei: “Man hemi mas lusim mami an dadi blong hem, an hemi mas joen wetem waef blong hem, an tufala bae i kamap wanfala nomoa.” (Jenesis 2:24) Bat wisdom bilong world mekhae long difren tingting, olketa sei hasband and waef shud tingim wanem olketa seleva laekem. Wanfala buk wea story abaotem divorce sei long samfala wedding ceremony, disfala toktok insaed marit promis wea sei “for full laef bilong iumi tufala,” olketa changem witim disfala toktok, “sapos iumi tufala gohed lovem each other.” Kaen tingting olsem abaotem marit savve lead go long wei for famili separate and hem mekem famili for safa. So hem barava tru, iumi lukim hao wei for no respectim marit hem barava krangge tingting.

13. Wanem nao wanfala reason why Jehovah heitim pipol wea praod?

¹³ Bible sei: “[Jehovah] hemi les long olketa hu i praod tumas.” (Provebs 16:5) Why nao Jehovah heitim pipol wea praod? Wanfala reason hem bikos pipol wea praod and lovem olketa seleva followim wei bilong Satan for mekhae long hemseleva. Tingim hao nomata Jesus nao helpem Jehovah for creatim evri samting, Satan hem tingse Jesus shud baodaon and worshipim hem! (Matt. 4:8, 9; Col. 1:15, 16) Pipol wea garem kaen wei olsem for tinghae tumas long seleva, barava showimaot hao wisdom bilong disfala world hem krangge samting.

14. Hao nao Rome 12:3 helpem iumi for garem balance tingting abaotem iumiseleva?

¹⁴ Bible helpem iumi for garem balance tingting abaotem iumiseleva. Bible showimaot hao hem no rong for lovem iumiseleva bat man mas no ova tumas long datwan. Jesus sei: “Iu mas lovem narawan long sem wei wea iu lovem iuseleva.” Diswan hem minim iumi duim samting for lukaftarem iumiseleva. (Matt. 19:19) Nomata olsem, Bible sei iumi mas no tingse iumi important winim olketa narawan. Bat hem sei: “Iufala mas no laek raoa olowe and mas no praod, bat iufala mas hambol and ting long narawan olsem hem winim iufala.”—Phil. 2:3; readim Rome 12:3.

15. Wanem nao mekem iu bilivim hao olketa advaes long Bible abaotem wei for tingim seleva hem savve barava helpem iumi?

 ¹⁵ Distaem, staka pipol wea tingse olketa skul gud and garem big savve, olketa ting long advaes long Bible olsem krangge samting. Olketa sei, taem iu ting long narawan olsem hem winim iu, datwan bae mekem hem isi for pipol ting daonem iu and mekius long iu. Bat wanem nao kamaot from disfala tingting wea world bilong Satan mekhae long hem? Wanem nao iu lukim? Waswe, pipol wea tingim seleva and selfish olketa hapi? Waswe, famili bilong olketa hapi? Waswe olketa garem olketa gudfala fren? Waswe, olketa fren gud witim God? From samting wea iuseleva lukim, wanem nao bae helpem iumi for kasem gud samting, waswe hem wisdom bilong world or wisdom bilong God?

16-17. Iumi laek thankiu for olketa wanem samting, and why nao olsem?

¹⁶ Wei for followim advaes bilong pipol wea world tingse olketa wise, hem olsem taem wanfala tourist wea laek for go kasem wanfala ples, hem askem direction long nara tourist wea tufala evriwan no savve long datfala ples, so gogo tufala lus nao. Long taem bilong Jesus, hem sei kaen pipol olsem “olketa blind, bat olketa trae for leadim olketa narawan. Sapos man wea blind leadim nara man wea blind, tufala evriwan bae foldaon insaed hol.” (Matt. 15:14) Tru nao, wisdom bilong disfala world hem barava krangge samting long God.

¹⁷ Olketa wise kaonsel insaed Bible hem gud evritaem for “teachim pipol, showim iumi samting wea no stret, stretem evri samting, and stretem tu tingting bilong pipol followim olketa raeteous mark bilong God.” (2 Tim. 3:16) Iumi thankiu long Jehovah bikos thru long organization bilong hem, hem provaedem olketa samting wea protectim iumi from wisdom bilong world! (Eph. 4:14) Olketa spiritual kaikai wea iumi kasem hem strongim iumi for followim olketa standard wea stap insaed Bible. Iumi barava hapi bikos iumi garem disfala privilege for garem Bible wea givim best wisdom wea iumi fit for trustim!