1-2. Olsem Sams 40:5 storyim, olketa wanem present nao Jehovah givim iumi, and why nao iumi bae storyim datwan?

JEHOVAH hem God wea kaen tumas. Tingim samfala lo olketa present wea hem givim iumi, olsem spesol hom blo iumi earth wea luk naes, brain blo iumi wea hem designim lo nambawan wei, and word blo hem Bible wea barava spesol. From Jehovah givim iumi thrifala present hia, iumi garem ples for stap, iumi savve tingting and story witim olketa narawan, and iumi kasem ansa for olketa important kwestin wea iumi garem.—Readim Sams 40:5.

² Lo disfala study, iumi bae storyim samfala samting abaotem thrifala present hia. Sapos iumi givim moa taem for ting raonem olketa samting hia, bae iumi tinghae go moa lo datwan and bae hem strongim go moa wei wea iumi laek for mekem Creator blo iumi Jehovah for hapi. (Rev. 4:11) And tu, iumi bae redi for helpem olketa wea followim datfala false teaching blo evolution.

3. Why nao earth hem spesol?

³ Wisdom blo God hem showaot klia lo hao hem wakem earth. (Rome 1:20; Heb. 3:4) Earth hem no only planet wea muv raonem sun, bat earth hem spesol bikos hem garem evri samting wea man needim for stap laef.

4. Why nao iumi savve sei earth hem winim olketa ship wea man wakem?

⁴ Iumi savve comparem disfala earth wea stap lo space witim wanfala ship wea float lo open sea. Bat lo samfala important wei, earth hem difren from ship wea fulap witim  pipol. Olsem example, hao long nao olketa pipol wea stap lo wanfala ship savve laef sapos olketa seleva mas producem oxygen, kaikai, and wata, and sapos olketa no torowem eni waste from ship? No longtaem nomoa pipol lo datfala ship bae dae. Bat disfala earth hem difren, hem fit for keepim staka billion pipol and animal for gohed laef. Hem savve producem oxygen, kaikai, and wata wea iumi needim and no enitaem iumi short lo olketa samting hia. Olketa waste lo earth no go lo space, nomata olsem disfala earth hem still luk naes and pipol fit for stap lo hem. Hao nao olsem? Jehovah designim olketa samting lo earth for recycle. Bae iumi storyim tufala lo olketa samting hia wea Jehovah designim, oxygen cycle and wata cycle.

5. Wat nao datfala oxygen cycle, and wanem nao datwan pruvim?

⁵ Oxygen hem wanfala gas wea olketa man and animal needim for gohed laef. Olketa sei dat evri samting wea laef and brith, savve brithim in handred billion ton blo oxygen insaed wan year. Olketa sem samting hia, brithim aot wanfala gas wea olketa kolem, carbon dioxide. Nomata olsem, evri samting hia no savve finisim evri oxygen, and atmosphere no savve fulap lo datfala “waste” gas, carbon dioxide. Why nao olsem? Bikos Jehovah creatim tu olketa didifren tree and plant wea tekem in carbon dioxide and givimaot oxygen. Datfala oxygen cycle hem pruvim hao toktok lo Acts 17:24, 25 hem tru, wea sei God givim laef and brith lo evri pipol.

6. Wanem nao datfala wata cycle, and wat nao datwan pruvim? (Lukim tu box “ Wata Cycle Hem Present From Jehovah.”)

⁶ Wata stap lo earth bikos planet blo iumi hem stap lo barava raet distance from sun. Sapos earth hem klosap tumas lo sun, evri wata bae drae and evri ston nating nomoa bae stap. Sapos hem lelebet farawe from sun, bae wata hem kamap ice and disfala earth bae kamap olsem wanfala big blok ice. Bikos Jehovah putim earth lo stret ples, disfala wata cycle lo earth savve mekem pipol gohed laef. Heat blo sun mekem wata wea stap lo earth and lo sea for go ap and formimap olketa cloud. Each year, sun mekem samting olsem 500,000 cubic kilometer blo wata for hem evaporate. Disfala wata stap lo atmosphere for samting olsem tenfala day, then hem foldaon olsem rain or snow. Gogo datfala wata go bak moa lo sea or eni nara ples wea wata stap, then datfala cycle hem start moa. Wei wea datfala wata cycle hem waka hem pruvim hao Jehovah hem barava wise and garem bigfala paoa.—Job 36:27, 28; Eklesiastes 1:7.

7. Wanem nao samfala wei wea iumi savve showimaot iumi tinghae lo present wea Sams 115:16 storyim?

⁷ Hao nao iumi savve showimaot iumi tinghae lo nambawan planet blo iumi and evri samting wea stap lo hem? (Readim Sams 115:16.) Wanfala wei hem for ting raonem olketa samting wea Jehovah wakem. Datwan bae muvim iumi for thankiu lo Jehovah each day for olketa gud samting wea hem givim iumi. And iumi showimaot iumi tinghae lo disfala earth taem iumi traem best for keepim klin area wea iumi stap.

8. Why nao iumi sei Jehovah designim brain blo iumi lo barava nambawan wei?

⁸ Jehovah designim brain blo iumi lo barava nambawan wei. Taem iu insaed bele blo mami, brain blo iu gohed grow followim wanfala plan wea set finis, and evri minute staka thousand niu brain cell hem form! Olketa wea duim research estimatem hao brain blo wanfala adult hem garem klosap  100 billion spesol cell wea olketa kolem lo neuron. Olketa cell hia join tugeta and hem formimap brain blo iumi wea weight blo hem samting olsem 1.5 kilogram. Bae iumi storyim samfala samting wea brain savve duim wea spesol tumas.

9. Wanem nao showimaot dat wei wea iumi savve toktok hem wanfala present from God?

⁹ Wei wea iumi savve toktok hem wanfala mirakol. Tingim wanem happen taem iumi toktok. Taem iu talem wanfala word, brain blo iu kontrolem samting olsem 100 masol lo tongue, throat, lips, jaw, and chest. For talem klia olketa word, evri masol hia mas muv tugeta followim stret taeming. Wanfala research lo 2019 storyim wei wea iumi savve toktok lo languis, and hem sei hao olketa baby wea just bon savve kwiktaem for heresavve lo olketa word. Datwan sapotim wanem staka nara research talem, olketa sei iumi bon kam witim disfala wei for heresavve and lanem languis. Tru nao, wei wea iumi savve toktok hem present from God.—Eksodas 4:11.

10. Hao nao iumi savve showimaot iumi tinghae lo wei for toktok wea hem present from God?

¹⁰ Wanfala wei wea iumi savve showimaot iumi tinghae lo wei for toktok wea hem present from God, hem taem iumi explainim biliv blo iumi lo olketa wea no savve why iumi no acceptim teaching blo evolution. (Sams 9:1; 1 Pet. 3:15) Olketa wea mekhae lo datfala teaching, laekem iumi for bilivim hao earth and evri samting wea laef hem kamap seleva nomoa. Sapos iumi iusim Bible and samfala point wea iumi storyim lo disfala study, iumi savve defendim Dadi blo iumi lo heven, and explainim lo olketa wea willing for lisin why iumi barava bilivim dat Jehovah nao hem Creator blo heven and earth.—Sams 102:25; Aesaea 40:25, 26.

11. Wanem nao wanfala reason why brain blo iumi hem spesol?

¹¹ Hao brain blo iumi savve rememberim staka samting hem barava spesol. Lo bifor, wanfala man for raet hem sei brain blo iumi olketa man savve rememberim information wea fit for stap insaed samting olsem 20 million buk. Bat, distaem, olketa faendemaot haomas information wea memory blo iumi savve rememberim hem barava winim datwan. From diswan, wanem spesol wei nao iumi garem?

12. Hao nao savve blo iumi olketa man hem difren from olketa animal?

¹² Iumi olketa man difren from olketa animal, iumi nomoa savve lane abaotem wanem kaen laef nao iumi shud garem lo wei for iumi rememberim and ting raonem samting wea kamap lo laef blo iumi. From datwan, iumi savve lanem olketa gudfala wei and changem hao iumi ting lo samting and living blo iumi. (1 Cor. 6:9-11; Col. 3:9, 10) Iumi savve trainim konsens blo iumi for luksavve lo wanem hem stret and no stret. (Heb. 5:14) Iumi savve lane for showimaot love, kaen, and showimaot  mercy. And iumi savve lane for followim wei blo Jehovah for showimaot justice.

13. For fitim Sams 77:11,12, hao nao iumi shud iusim memory blo iumi wea hem present from God?

¹³ Wanfala wei wea showimaot iumi tinghae lo disfala present wea hem nao memory blo iumi, hem taem iumi chus for rememberim olketa taem wea Jehovah helpem and comfortim iumi. Datwan bae mekem iumi for barava sure dat hem bae helpem iumi tu lo future. (Readim Sams 77:11, 12; 78:4, 7) Narafala wei, hem for rememberim olketa gud samting wea nara pipol duim for iumi, and for iumi tinghae lo wanem olketa duim. Olketa wea duim research faendaot hao pipol wea garem wei for tinghae, olketa hapi winim olketa wea no savve tinghae. And tu, iumi savve followim Jehovah lo wei for chus for forgetim samfala samting. Olsem example, Jehovah garem perfect memory, bat hem chus for forgivim and forgetim olketa mistek blo iumi sapos iumi repent. (Sams 25:7; 130:1-4) And hem laekem iumi for duim sem samting for olketa narawan taem olketa sei sorre for mistek wea olketa duim wea mekem iumi feel nogud.—Matt. 6:14; Luke 17:3, 4.

14. Hao nao iumi savve showimaot iumi tinghae lo datfala nambawan present wea hem nao brain blo iumi?

¹⁴ Wei for iusim brain wea iumi garem for mekhae lo Man wea givim datwan, hem showimaot iumi tinghae lo datfala nambawan present. Samfala disaed for iusim brain blo olketa for selfish reason, olsem for disaedem seleva wanem hem stret and no stret. Bat Jehovah nao creatim iumi, so hem fitim for standard blo hem nomoa gud winim eni standard wea iumiseleva markem. (Rome 12:1, 2) Taem iumi followim standard blo hem, laef blo iumi bae garem peace. (Aesaea 48:17, 18) And iumi lanem wanem Jehovah laekem iumi for duim, wea hem nao for mekhae lo Creator and Dadi blo iumi and for mekem hem hapi.—Provebs 27:11.

15. Hao nao Bible showimaot love blo God for iumi?

¹⁵ Bible hem wanfala loving present from God. Dadi blo iumi lo heven iusim olketa man  for raetem Bible bikos hem lovem tumas olketa pikinini blo hem lo earth. Thru lo Bible, Jehovah ansarem olketa barava important kwestin olsem: Wea nao iumi kam from? Why nao iumi laef? And wat nao bae happen lo future? Jehovah laekem evri pikinini blo hem for kasem ansa for olketa kwestin hia, so for staka handred year hem iusim olketa man for transleitim Bible lo staka languis. Distaem, full Bible or samfala part blo hem stap lo winim 3,000 languis! Kam kasem distaem, Bible nomoa hem buk wea olketa transleitim and givimaot lo staka ples. Nomata wea nao pipol stap or wat languis nao olketa iusim, staka garem chance for lane abaotem message lo Bible lo languis blo olketa.—Lukim box “ Helpem Pipol for Kasem Bible lo Olketa Languis lo Africa.”

16. For fitim Matthew 28:19, 20, hao nao iumi savve showimaot iumi tinghae lo Bible?

¹⁶ Iumi savve showimaot iumi tinghae lo Bible taem iumi readim each day, ting raonem wanem hem teachim, and duim best blo iumi for followim wanem iumi lanem. And tu, iumi showimaot iumi tinghae lo God taem iumi duim best for talemaot disfala message blo Bible lo staka pipol.—Sams 1:1-3; Matt. 24:14; readim Matthew 28:19, 20.

17. Olketa wanem kaen present nao iumi storyim lo disfala study, and wat nao bae iumi storyim lo next study?

¹⁷ So lo disfala study iumi bin storyim olketa present wea God givim, olsem earth wea hem hom blo iumi; brain blo iumi wea Jehovah designim lo spesol wei; and toktok blo God, Bible. Bat Jehovah givim iumi olketa nara present wea iumi no savve lukim. Lo next study, bae iumi storyim olketa spesol present hia wea iumi no savve lukim.