1-2. Wanem nao samfala hard samting wea olketa Witness mas deal witim?

APOSOL Paul encouragem Timothy for barava duim gud ministry blo hem, and datfala encouragement fitim iumi tu. (2 Tim. 4:5) Iumi evriwan laek for duim gud ministry blo iumi, bat samfala brata and sista feisim hard samting saed lo ministry. (2 Tim. 4:2) Olsem example, samfala Witness stap lo kantri wea gavman stopem preaching waka so olketa mas no fraet for preach, bikos maet olketa putim olketa Witness lo prison!

² Iumi olketa Witness maet deal witim olketa difren kaen hard samting saed lo ministry. Olsem example, staka mas barava waka hard for kasem wanem famili needim. Nomata olketa laek for duim staka samting lo ministry lo weekend, olketa taed tumas bihaen olketa waka for full week. Olketa narawan maet no fit for spendem staka taem lo preaching waka bikos olketa barava sik or olo. Samfala hia mas stap nomoa lo haos. Olketa nara brata and sista maet ting daonem olketa seleva. Mary, * wanfala sista sei: “From mi savve ting daonem miseleva, diswan mekem mi for taed tumas. Then mi feel guilty bikos mi no garem strong for duim preaching waka.”

3. Wanem nao bae iumi storyim lo disfala article?

³ Nomata iumi kasem olketa hard samting, Jehovah savve strongim iumi for deal witim olketa samting hia and for gohed duim wanem iumi fit for duim. Firstaem, bae iumi storyim hao Jehovah strongim Paul and Timothy for duim ministry nomata tufala deal witim olketa hard samting, then bae iumi storyim hao Jehovah helpem iumi.

4. Olketa wanem hard samting nao Paul kasem?

⁴ Paul kasem staka hard samting and hem barava needim help blo Jehovah taem olketa enemy whipim hem nogud, sutim hem lo ston, and putim hem lo prison. (2 Cor. 11:23-25) Samfala taem Paul savve ting daonem hemseleva. (Rome 7:18, 19, 24) Paul deal witim sik tu wea olsem ‘nila long body bilong hem’ and hem laekem tumas for God finisim sik blo hem.—2 Cor. 12:7, 8.

5. Wanem nao Paul duim nomata hem kasem olketa hard samting?

⁵ Nomata Paul kasem olketa hard samting hia, Jehovah strongim hem for gohed duim ministry. Tingim olketa samting wea Paul duim. Olsem example, taem hem mas stap lo wanfala haos lo Rome from hem prisoner, hem preach lo olketa bigman blo Jew and maet olketa bigman blo gavman tu. (Acts 28:17; Phil. 4:21, 22) Hem preach lo olketa soldia wea security lo hem and pipol wea visitim hem. (Acts 28:30, 31; Phil. 1:13) Taem Paul stap lo datfala haos, hem raetem olketa Bible buk wea helpem olketa Christian lo bifor and lo distaem. Nara samting, gudfala example blo Paul strongim olketa lo kongregeson lo Rome for ‘no fraet for talemaot toktok bilong God.’ (Phil. 1:14) Nomata lo datfala taem Paul mas stap lo haos, hem duim best blo hem “mekem datfala waka for talemaot gud nius hem gohed gud.”—Phil. 1:12.

6. Olsem 2 Corinth 12:9, 10 storyim, wanem nao helpem Paul for duim gud ministry blo hem?

⁶ Paul luksavve Jehovah nao strongim hem for duim evri waka lo ministry. Hem sei paoa blo God “strong taem [mi] wik.” (Readim 2 Corinth 12:9, 10.) Jehovah iusim holy spirit for strongim Paul for duim gud ministry blo hem, nomata taem hem kasem persecution, hem lo prison, or hem kasem olketa nara hard samting.

7. Wanem nao olketa hard samting wea Timothy mas deal witim?

⁷ Timothy, wea young winim Paul, mas depend lo holy spirit blo God tu for duim ministry blo hem. Timothy savve go witim Paul lo olketa missionary gogo,  and tu, Paul sendem hem for visitim and encouragem olketa kongregeson. (1 Cor. 4:17) Maet Timothy tingse hem no fit for duim datfala waka. Dastawe Paul talem Timothy “nomata iu wanfala young man no letem eniwan lukdaonem iu.” (1 Tim. 4:12) Nara samting, Timothy mas deal witim sik samfala taem. (1 Tim. 5:23) Bat Timothy savve holy spirit blo Jehovah bae strongim hem for preachim gud nius and duim waka for helpem olketa kongregeson.—2 Tim. 1:7.

8. Wanem nao Jehovah iusim for strongim iumi distaem?

⁸ Distaem, Jehovah givim pipol blo hem “strong wea winim strong bilong man” mekem olketa gohed for worshipim hem. (2 Cor. 4:7) Bae iumi storyim fofala samting wea Jehovah iusim for strongim iumi olsem prea, Bible, olketa brata and sista, and preaching waka.

9. Hao nao prea savve helpem iumi?

⁹ Prea savve strongim iumi. Lo Ephesus 6:18, Paul encouragem iumi for “evritaem” prea lo God. Taem iumi duim olsem God bae strongim iumi. Olsem example, Jonnie, wanfala brata lo Bolivia luksavve Jehovah strongim hem nomata hem kasem staka hard samting. Parents blo hem and waef blo hem kasem olketa big sik lo semtaem. Hem barava no isi lo Jonnie for lukaftarem thrifala evriwan. Gogo mami blo hem dae, and then bihaen datwan hem tek longtaem for waef and dadi kamap gud. Jonnie sei, “Taem evri samting hem hard tumas, mi storyim olketa samting hia lo Jehovah and datwan barava helpem mi.” Jehovah helpem Jonnie for no givap. Nara example hem Ronald, wanfala elder lo Bolivia. Hem faendemaot mami blo hem garem cancer, then mami dae bihaen wan month nomoa. Wanem nao helpem hem for deal witim sorre feeling? Hem sei: “Taem mi prea, mi storyim lo Jehovah hao mi barava sorre from mami hem dae. Mi savve Jehovah hem minim gud feeling blo mi.” Maet nogud samting wea kasem iumi mekem iumi for no sure wanem for prea abaotem. Nomata olsem, Jehovah laekem iumi for prea.—Rome 8:26, 27.

10. Olsem Hebrew 4:12 sei, why nao hem important for readim Bible and ting raonem?

¹⁰ Bible savve strongim iumi. Paul readim olketa scripture and datwan strongim and comfortim hem, and iumi need for duim sem samting tu. (Rome 15:4) Taem iumi readim Bible and ting raonem, Jehovah savve iusim holy spirit for helpem iumi for minim wanem iumi readim and for followim. (Readim Hebrew 4:12.) Ronald wea iumi storyim finis sei: “Mi hapi from mi markem taem for readim Bible evri naet. Mi savve ting raonem olketa naesfala wei blo Jehovah and hao hem lukaftarem pipol blo hem, and datwan barava strongim mi.”

11. Hao nao Bible helpem sista wea hasband blo hem dae?

¹¹ Taem iumi ting raonem wanem iumi readim lo Bible, datwan savve helpem iumi for deal witim olketa hard samting wea kasem iumi. Tingim example blo sista wea sorre tumas from hasband blo hem dae. Wanfala elder sei hem bae kasem gud samting sapos hem readim Bible buk blo Job. Hem duim datwan and hem lukim hao samfala toktok blo Job  showimaot Job tingim nomoa samting wea happen lo hem. Hem laek talem Job: “Job! Iu tingim nomoa olketa problem blo iu!” Bat then sista hia luksavve hem tu lelebet olsem Job. Bible buk blo Job helpem and strongim hem for deal witim sorre feeling bihaen hasband blo hem dae.

12. Hao nao Jehovah iusim olketa brata and sista for strongim iumi?

¹² Olketa brata and sista savve strongim iumi. Jehovah iusim tu olketa brata and sista for strongim iumi. Paul raet lo olketa brata and sista and sei “mi laekem iumi evriwan strongim [each other].” (Rome 1:11, 12) Mary wea iumi storyim finis, kasem encouragement from olketa brata and sista. Hem sei: “Jehovah iusim olketa brata and sista for encouragem mi, nomata olketa nating savve lo hard samting wea mi kasem. Toktok blo olketa, or note wea olketa raetem for mi barava encouragem mi. Taem mi story witim samfala sista wea deal witim sem samting olsem mi, datwan tu helpem mi. And olketa elder tu showimaot olketa hapi mi stap insaed lo kongregeson.”

13. Hao nao iumi savve strongim each other lo olketa meeting?

¹³ Iumi savve encouragem each other lo olketa meeting. Iumi bae strongim olketa brata and sista taem iumi talem olketa iumi tinghae lo olketa and lovem olketa. Olsem example, bifor lo wanfala meeting, wanfala elder wea nem blo hem Peter, sei lo sista wea hasband no insaed lo truth: “Iu barava encouragem mi from iu faithful for evritaem kam lo olketa meeting witim olketa pikinini blo iu. Mi tinghae hao iu evritaem redyim sixfala pikinini blo iu for olketa meeting, and olketa savve givim koment tu.” Sista hia hapi tumas and hem sei: “Thankiu brata, mi barava needim datfala encouragement tuday.”

14. Hao nao preaching waka savve helpem iumi?

¹⁴ Preaching waka savve strongim iumi. Taem iumi duim preaching waka datwan savve strongim iumi, nomata pipol interest or nomoa. (Provebs 11:25) Wanfala sista wea nem blo hem Stacy experiencem datwan. Taem famili member disfellowship, Stacy sorre tumas and warim hao hem no duim inaf samting for helpem datfala famili member. Stacy gohed for tingim nomoa datwan wea disfellowship. Wanem nao helpem hem for deal witim feeling blo hem? Preaching waka! Taem hem busy lo preaching waka hem tingim pipol lo territory and hao for helpem olketa. Hem sei: “Lo datfala taem, Jehovah givim mi wanfala Bible study wea laekem tumas samting wea hem lanem, and datwan barava encouragem mi. Main samting wea strongim mi lo datfala taem hem preaching waka.”

15. Wanem nao iu lanem from experience blo Mary?

¹⁵ Samfala maet tingse olketa no fit for duim staka samting lo preaching waka. Bat tingim, Jehovah tinghae lo iumi taem iumi duim best blo iumi. Tingim moa example blo Mary. Hem go stap lo ples wea pipol story lo difren languis, and hem no savve gud lo datfala languis. Hem sei, “For longtaem lelebet, mi savve givim short koment or readim verse from Bible lo meeting, or for givim tract lo haosholder taem mi preach.” Hem comparem hemseleva witim olketa  wea savve gud lo datfala languis. Gogo hem luksavve Jehovah iusim hem nomata hem no savve gud lo languis hia. Hem sei, “Mi luksavve mi fit for iusim toktok wea simpol for explainim truth lo Bible, and truth nao bae changem laef blo pipol.”

16. Wanem nao savve strongim olketa wea mas stap lo haos?

¹⁶ Sapos iumi sik or olo and mas stap lo haos, iumi sure Jehovah luksavve iumi laek for duim preaching waka. Jehovah bae helpem iumi for iusim chance for preach lo eniwan wea kam lo haos. Sapos iumi comparem preaching waka wea iumi duim bifor witim distaem, datwan savve mekem iumi wikdaon. So hem gud for tingim hao Jehovah helpem iumi distaem, and datwan bae strongim iumi and bae iumi hapi lo wanem iumi duim.

17. Olsem Eklesiastes 11:6 storyim, wanem nao savve happen sapos iumi no givap for preach?

¹⁷ Taem iumi preach iumi no savve hu nao bae acceptim truth. (Readim Eklesiastes 11:6.) Olsem example, Barbara wanfala sista wea winim 80 years, hem duim telephone witnessing and raetem leta. Lo wanfala leta hem putim insaed lo envelope The Watchtower blo March 1, 2014, wea garem title “Wanem God Hem Duim for Iu.” Hem no savve bat hem sendem datfala leta lo hasband and waef wea disfellowship. Tufala readim magasin hia staka taem. Datfala hasband feel olsem Jehovah story kam for hem. Bihaen 27 year wea tufala disfellowship, tufala start for attendim olketa meeting, and gogo tufala reinstate. Masbi datfala experience barava encouragem and strongim Barbara!

18. Wanem nao iumi mas duim mekem iumi kasem strong from Jehovah?

¹⁸ Jehovah iusim staka samting for strongim iumi, olsem prea, Bible, olketa brata and sista, and preaching waka. Taem iumi mekius lo olketa samting hia iumi showimaot iumi trustim Jehovah for helpem iumi. Iumi laek for evritaem depend lo Jehovah wea “strongim olketa pipol hu i tinghevi fo obeim hem.”—Mektu Kronikols 16:9.