1. Hao nao tingting blo olketa fren and relative taem iu storyim message lo Bible witim olketa?

WASWE, iu tingim taem wea iu luksavve wanem iu lanem lo Bible hem tru? Iu laekem evri narawan for lanem olketa truth hia tu. Iu savve truth lo Bible bae helpem olketa for garem gudfala laef and hope for future. (Sams 119:105) So iu storyim truth lo olketa fren and relative blo iu. Bat iu sapraes bikos olketa no laek herem wanem iu storyim.

2-3. Hao nao tingting blo pipol abaotem Jesus?

² Iumi shud no sapraes sapos pipol no laek herem message wea iumi preachim. Staka pipol rejectim Jesus, nomata hem duim olketa mirakol wea pruvim Jehovah givim paoa lo hem. Olsem example, Jesus duim mirakol for resurrectim Lazarus, and olketa wea againstim hem savve Lazarus hem laef bak. Nomata olsem, olketa bigman blo Jew religion no bilivim Jesus hem Messiah, and olketa laek for killim dae Jesus and Lazarus!—John 11:47, 48, 53; 12:9-11.

³ Jesus savve staka pipol bae no bilivim hem Messiah. (John 5:39-44) Hem sei lo olketa follower blo John Baptaesa: “Man wea no garem eni reason for daotem mi bae hapi.” (Matt. 11:2, 3, 6) So why nao staka pipol rejectim Jesus?

4. Wanem nao bae iumi storyim lo disfala study?

⁴ Lo disfala study and next wan tu, bae iumi storyim samfala reason why staka pipol lo first century rejectim Jesus. Bae iumi storyim why staka no laek herem message wea iumi preachim distaem. And main samting iumi bae storyim, hem why olketa wea interest lo truth no garem eni reason for daotem truth.

5. Why nao samfala tingse Jesus no datfala Messiah?

⁵ Staka pipol no tinghae lo Jesus. Olketa luksavve Jesus hem gudfala teacher and hem duim olketa mirakol. Bat lo tingting blo olketa hem son blo carpenter nomoa, and hem growap lo Nazareth, wanfala taon wea pipol ting daonem. Bifor Nathanael hem kamap disaepol blo Jesus, hem sei: “Waswe, eni gud samting savve kam from Nazareth tu?” (John 1:46) Wanem Nathanael talem maet showimaot hem ting daonem taon wea Jesus growap lo hem. Or maet hem tingim profesi lo Micah 5:2 wea sei Messiah bae born lo Bethlehem, and no lo Nazareth.

6. Wanem nao pipol lo taem blo Jesus shud duim mekem olketa luksavve hem nao Messiah?

⁶ Wanem nao tru samting abaotem Jesus? Lo wanfala profesi, Isaiah sei olketa wea rejectim Jesus bae no interest for savve lo olketa tru samting abaotem hem. (Isa. 53:8, NW) Staka profesi abaotem Jesus stap lo olketa Scripture. Sapos olketa laek for savve lo tru samting abaotem Jesus, bae olketa faendemaot hao hem born lo Bethlehem and hem kam from laen blo King David. (Luke 2:4-7) Ples wea Jesus born hem stret witim wanem Micah 5:2 profesi abaotem. So why nao olketa ting daonem Jesus? Bikos olketa judgem hem followim ples wea hem growap and bikos dadi blo hem carpenter nomoa. Hem nao why olketa les lo hem.

7. Why nao samfala savve les lo pipol blo Jehovah?

⁷ Wanem nao tingting blo pipol abaotem Olketa Jehovah’s Witness? Samfala savve ting daonem olketa wea worshipim Jehovah bikos staka no rich, or olketa no duim important waka. (Acts 4:13) Samfala tingse Olketa Jehovah’s Witness shud no teachim narawan abaotem Bible bikos olketa no attendim eni spesol Bible skul. Samfala sei Olketa Jehovah Witness, hem lotu blo America. Bat luk olsem olketa no savve staka lo olketa Witness stap lo olketa nara kantri. Samfala narawan tingse olketa Witness no biliv lo Jesus. And samfala tu sei Olketa Jehovah’s Witness “communist,” “spae for America,” or “extremist.” Olketa hia savve les lo iumi maet bikos olketa no savve lo tru samting abaotem iumi or from olketa laek accusim iumi nomoa.

8. Olsem Acts 17:11 storyim, wanem nao olketa wea interest lo truth shud duim mekem olketa no daotem wanem olketa lanem?

⁸ Wanem nao olketa wea interest lo truth need for duim? Olketa need for savve lo tru story. Luke, wanfala wea raetem Bible, hem duim datwan. Hem “chekim gud evri story” abaotem Jesus bifor hem raetem, bikos hem laekem olketa wea readim datwan for sure olketa story hia “barava tru.” (Luke 1:1-4) Olketa Jew lo Beroea tu chekim wanem olketa herem. Bihaen olketa herem gud nius abaotem Jesus, olketa chekim olketa Hebrew Scripture for mek sure wanem olketa herem hem tru. (Readim Acts 17:11.) Olketa wea interest lo truth tu need for mek sure wanem Olketa Jehovah’s Witness teachim olketa hem kam from Bible. Hem gud for olketa studyim tu wanem pipol blo Jehovah duim kam kasem distaem. Sapos olketa duim datwan, bae olketa no daotem wanem olketa lanem.

9. Wanem nao pipol duim taem Jesus no showim saen from God?

⁹ Jesus teachim staka gud samting. Nomata olsem, samfala pipol tingse datwan no pruvim hem Messiah, and olketa laekem hem for mas showim “wanfala saen from God.” (Matt. 16:1) Maet olketa expectim Jesus for duim samting wea Daniel 7:13, 14 storyim lo datfala taem, bat hem no taem wea Jehovah markem for datfala profesi kamap tru. Jesus bae duim datwan lo future. Wanem Jesus teachim shud mekem olketa luksavve hem nao datfala Messiah. Bat olketa rejectim Jesus from hem no showim saen from God wea olketa laekem.—Matt. 16:4.

10. Hao nao Jesus mekem profesi blo Isaiah abaotem Messiah for kamap tru?

¹⁰ Wanem nao tru samting abaotem Jesus? Jesus no laekem pipol for mekhae lo hem taem hem duim ministry. Isaiah talem datwan lo wanfala profesi abaotem Messiah. Hem sei: “Bae hemi no singaot bikfala falom olketa rod long taon.” (Isa. 42:1, 2) Jesus no mekhae lo hemseleva. Hem no werem spesol kaleko olsem olketa bigman blo religion, hem no laekem pipol for iusim spesol title for hem, and hem no busy for wakem olketa bigfala temple. And taem King Herod kotem hem, Jesus no duim mirakol wea king laekem. (Luke 23:8-11) Nomata Jesus duim samfala mirakol, main waka blo hem nao for preachim gud nius. Hem sei lo olketa disaepol: “Hem nao wanem mi kam for duim.”—Mark 1:38.

11. Why nao samfala no interest lo Olketa Jehovah’s Witness?

¹¹ Wanem nao tingting blo pipol abaotem Olketa Jehovah’s Witness? Staka pipol tinghae lo olketa religion wea garem bigfala church, wea garem olketa naes piksa and image insaed, and from olketa bigman garem spesol title. And staka pipol laek for duim tu olketa celebration blo church, nomata olketa no  savve hem start kam from heathen religion. Bat waswe, olketa wea go lo olketa church hia lanem staka samting abaotem God and plan blo hem? Maet nomoa. Bat waswe lo olketa meeting blo Olketa Jehovah’s Witness? Iumi lanem staka samting abaotem Jehovah wea savve helpem iumi. Nomata iumi no garem olketa bigfala church, Kingdom Hall hem klin and fit for iumi worship insaed, and olketa wea lead lo kongregeson no werem spesol kaleko and no garem spesol title. And tu, pipol blo Jehovah teachim and bilivim wanem hem stap lo Bible. Bat samfala no interest lo Olketa Jehovah’s Witness from olketa no lukim iumi duim olketa spesol samting lo worship blo iumi, and from wanem iumi teachim no followim wanem olketa laekem.

12. Olsem Hebrew 11:1, 6 storyim, hao nao for garem strongfala faith?

¹² Wanem nao olketa wea interest lo truth need for duim? Aposol Paul sei lo olketa Christian lo Rome: “Bihaen man herem message nao hem savve garem faith, and datfala message wea hem herem hem abaotem Christ.” (Rome 10:17) So olketa wea interest lo truth need for studyim Bible for kasem stretfala savve mekem olketa garem strong faith. Nomata maet olketa laekem tumas olketa celebration blo religion datwan bae no helpem olketa for garem strong faith, and Bible sei, “man wea no garem faith no savve mekem God hapi.” (Readim Hebrew 11:1, 6.) Taem olketa studyim Bible bae olketa sure olketa faendem truth, and bae olketa no need for lukim eni spesol saen from God for mekem olketa bilivim wanem olketa lanem.

13. Wanem nao mekem samfala for rejectim Jesus?

¹³ Olketa follower blo John Baptaesa sapraes olketa disaepol blo Jesus no followim kastom for no kaikai. Jesus sei olketa no need for duim datwan taem hem  stap witim olketa. (Matt. 9:14-17) Nomata olsem, olketa Pharisee and olketa narawan accusim Jesus and sei hem no followim olketa kastom blo olketa, and olketa kros bikos hem healim pipol wea sik lo Sabbath. (Mark 3:1-6; John 9:16) Nomata olketa Pharisee talem Jesus hem mas keepim Sabbath, olketa letem narawan for duim bisnis insaed lo temple lo Sabbath, and olketa kros taem Jesus tok strong lo olketa. (Matt. 21:12, 13, 15) Nara samting tu, taem Jesus preach lo sinagog lo Nazareth, olketa Jew barava kros lo hem bikos hem no duim wanem olketa laekem and hem sei olketa tingim olketa seleva and no garem faith. (Luke 4:16, 25-30) From Jesus no followim olketa kastom and no duim wanem pipol laekem, olketa rejectim hem.—Matt. 11:16-19.

14. Why nao Jesus no hapi lo olketa wea keepim olketa kastom wea no followim wanem Jehovah laekem?

¹⁴ Wanem nao tru samting abaotem Jesus? Jehovah iusim profet Isaiah for sei: ‘Olketa pipol mekhae nomoa long mi long toktok, bat heart blong olketa barava stap farawe from mi. Wei blong olketa fo mekhae long mi hemi falom nomoa olketa rul blong man.’ (Aesaea 29:13) So hem stret for Jesus tok strong lo olketa Jew bikos olketa keepim olketa kastom wea no followim wanem Jehovah laekem. From olketa followim olketa kastom blo man and no wanem Bible talem, olketa rejectim Jehovah and Jesus, datfala Messiah wea Jehovah sendem kam.

15. Why nao samfala no laekem Olketa Jehovah’s Witness?

¹⁵ Wanem nao tingting blo pipol abaotem Olketa Jehovah’s Witness? Samfala no laekem Olketa Jehovah’s Witness bikos iumi no duim celebration olsem Christmas, birthday, and olketa celebration wea mekhae lo kantri. Olketa savve kros lo iumi tu from iumi no followim olketa kastom taem man dae. Olketa hia maet tingse olketa nao duim wanem God laekem. Bat God bae no hapi lo olketa sapos olketa duim olketa celebration and followim olketa kastom winim for followim wanem Bible talem.—Mark 7:7-9.

16. Olsem Sams 119:97, 113, 163-165 sei, wanem nao olketa wea interest lo truth need for duim?

¹⁶ Wanem nao olketa wea interest lo truth need for duim? Olketa need for lane abaotem olketa law and principle blo Jehovah. (Readim Sams 119:97, 113, 163-165.) Datwan bae helpem olketa for fren gud witim Jehovah, and olketa bae no laek followim olketa kastom blo man wea Jehovah no acceptim.

17. Why nao samfala rejectim Jesus?

¹⁷ Lo taem blo Jesus, staka pipol laekem gavman for change and tingse datfala Messiah bae kam for mekem olketa free from rul blo Rome. Bat taem olketa trae mekem Jesus kamap king, hem no acceptim datwan. (John 6:14, 15) From gavman blo Rome givim paoa lo olketa priest and olketa narawan and olketa no laek for lusim datwan, olketa wari nogud Jesus bae trae for changem gavman. From tufala grup hia wari nomoa abaotem politik, olketa rejectim Jesus.

18. Wanem nao olketa profesi abaotem Messiah wea samfala no laek for tingim?

¹⁸ Wanem nao tru samting abaotem Jesus? Samfala profesi lo Bible storyim hao gogo datfala Messiah bae faetem olketa king and win. Bat olketa nara profesi sei hem mas dae firstaem for olketa sin blo  man bifor hem duim datwan. (Aesaea 53:9, 12) So why nao pipol tingse Jesus bae kamap king lo datfala taem? Bikos olketa interest nomoa lo olketa profesi wea storyim hao Messiah bae finisim olketa problem and no laek tingim olketa nara profesi abaotem hem.—John 6:26, 27.

19. Wanem nao samfala tingse Olketa Jehovah’s Witness shud duim?

¹⁹ Wanem nao tingting blo pipol abaotem Olketa Jehovah’s Witness? Staka pipol no laekem iumi bikos iumi no teksaed lo politik. Olketa sei iumi shud vote lo olketa election. Bat sapos iumi votem wanfala man for rulim iumi, hem olsem iumi rejectim Jehovah for rulim iumi. (Fas Samuel 8:4-7) Samfala tingse iumi shud wakem olketa skul and olketa hospital, and duim olketa waka for helpem pipol lo community. Olketa tingse iumi shud duim olketa samting for stretem olketa problem lo world distaem, and no busy nomoa for duim preaching waka.

20. Olsem Jesus talem lo Matthew 7:21-23, wanem nao iumi shud busy lo hem distaem?

²⁰ Wanem nao iumi need for duim? (Readim Matthew 7:21-23.) Iumi need for busy lo preaching waka olsem Jesus hem talem. (Matt. 28:19, 20) Iumi no laekem politik or olketa problem lo world for mekem iumi go difren. Iumi tingim pipol and laek for helpem olketa, bat best wei for duim datwan hem for teachim olketa abaotem Kingdom blo God and helpem olketa for fren witim Jehovah.

21. Wanem nao iumi no laek for duim?

²¹ Lo disfala study iumi storyim fofala reason why pipol rejectim Jesus lo first century and why samfala distaem no laekem Olketa Jehovah’s Witness. Bat waswe, olketa nara reason stap? Yes. Lo next study, bae iumi storyim nara fofala reason. Bat nomata lo wanem reason pipol garem, iumi no laekem eni samting for mekem iumi rejectim Jesus or for spoelem faith blo iumi!