1-2. Wanem nao Jon Huer talem abaotem Jesus, and wanem nao bae iumi storyim lo disfala study?

STAKA million pipol distaem sei olketa biliv lo Jesus, bat olketa no followim olketa teaching blo hem. (2 Tim. 4:3, 4) Dastawe Jon Huer, man for raet, sei: ‘Sapos Jesus stap lo earth distaem and hem teachim sem samting olsem hem teachim bifor, waswe, bae pipol rejectim hem tu? Luk olsem olketa bae rejectim Jesus moa.’

² Staka pipol lo first century herem olketa teaching blo Jesus and lukim olketa mirakol wea hem duim, bat olketa rejectim hem. Why nao olsem? Lo article bifor diswan, iumi storyim fofala reason why pipol rejectim Jesus. Distaem bae iumi storyim nara fofala reason wea bae helpem olketa wea interest lo truth for minim why samfala savve les lo Olketa Jehovah’s Witness, and hao for no letem datwan spoelem faith blo olketa.

3. Why nao samfala les lo Jesus?

³ Jesus spendem taem witim staka difren kaen pipol. Hem kaikai witim olketa wea rich and wea garem hae position. Bat hem tingim tu olketa wea poor and “pipol wea sin.” Samfala Jew les lo Jesus bikos hem spendem taem witim olketa hia. Olketa askem olketa disaepol blo Jesus: “Hao nao iufala laek kaikai witim olketa wea tekem tax and pipol wea sin?” Jesus ansarem olketa: “Pipol wea sik  nao need for go lukim doctor, no olketa wea strong. Mi no kam for talem gudfala pipol for repent, bat for talem pipol wea sin nao for repent.”—Luke 5:29-32.

4. Olsem profesi blo Isaiah talem, olketa Jew shud savve lo wanem abaotem Messiah?

⁴ Wanem nao Bible talem abaotem Jesus? Isaiah talem profesi abaotem Messiah wea sei pipol lo world bae rejectim Jesus. Datfala profesi sei: ‘Evriwan les long hem and tok spoelem hem. No eniwan laek luk long hem. Hem olsem samting nating nomoa.’ (Aesaea 53:3) So olketa Jew wea les lo Jesus shud savve profesi hia talem finis hao datwan nao samting wea bae happen lo Messiah.

5. Hao nao samfala bigman blo religion ting lo pipol blo Jehovah?

⁵ Wanem nao tingting blo pipol abaotem Olketa Jehovah’s Witness? Olketa bigman blo religion savve les lo Olketa Jehovah’s Witness from iumi followim olketa standard blo Jehovah and from iumi no laek garem bignem. Bat olketa bigman hia laekem pipol wea rich, garem bignem, or olketa savveman for kamap member lo church blo olketa. Olketa bigman acceptim olketa hia nomata staka lo olketa duim olketa samting wea barava againstim standard blo God. Nomata olsem, Paul sei God chusim pipol wea olketa narawan “lukdaonem.” (1 Cor. 1:26-29) Nomata pipol luk daonem iumi, Jehovah barava lovem iumi bikos iumi followim olketa standard blo hem.

6. Olsem Matthew 11:25, 26 talem, wanem nao olketa wea interest lo truth need for duim?

⁶ Wanem nao olketa wea interest lo truth need for duim? (Readim Matthew 11:25, 26.) Olketa shud no letem tingting blo pipol lo world abaotem Olketa Jehovah’s Witness for affectim olketa. Olketa shud luksavve Jehovah iusim pipol wea hambol for duim wanem hem laekem. (Sams 138:6) And olketa shud ting raonem olketa samting wea pipol blo Jehovah duim kam kasem distaem, nomata pipol lo world ting daonem olketa.

7. Why nao Jesus sei olketa Pharisee olketa hypocrite, and hao nao olketa feel taem Jesus talem datwan?

⁷ Jesus no fraet for sei olketa bigman blo religion hypocrite from olketa followim olketa kastom. For example, hem tok lo olketa Pharisee wea mekhae lo kastom for wasim hand winim for lukaftarem parents blo olketa. (Matt. 15:1-11) Maet olketa disaepol blo Jesus sapraes from hem tok olsem. Olketa sei lo Jesus: “Olketa Pharisee feel nogud long samting wea iu talem.” Then Jesus sei: “Evri tree wea Dadi bilong mi long heven no plantim, bae hem aotem. No warim olketa. Nomata olketa blind, bat olketa trae for leadim olketa narawan. Sapos man wea blind leadim nara man wea blind, tufala evriwan bae foldaon insaed hol.” (Matt. 15:12-14) Nomata olketa Pharisee kros lo wanem Jesus talem, hem no fraet for talem tru samting.

8. Wanem nao Jesus talem wea showimaot God no acceptim evri teaching blo religion?

⁸ Jesus showimaot tu samfala teaching blo religion no tru and God no acceptim evri teaching blo religion. Hem sei staka bae followim road wea waed and lead go lo dae, and samfala nomoa bae wakabaot  lo road wea lead go lo laef olowe. (Matt. 7:13, 14) Jesus sei samfala bae luk olsem olketa worshipim God, bat nating nomoa. Hem talem disfala warning: “Keakea long olketa laea profet wea olsem olketa wild dog, bat wea talem and duim olketa samting for mekem pipol tingse olketa hambol and kaen olsem wanfala sheepsheep. Iufala bae luksavve long olketa hia from samting wea olketa duim.”—Matt. 7:15-20.

9. Wanem nao samfala teaching wea Jesus sei hem no tru?

⁹ Wanem nao Bible talem abaotem Jesus? Wanfala Bible profesi sei Messiah bae laekem tumas tru worship for gohed lo temple. (Sams 69:9; John 2:14-17) Dastawe Jesus againstim olketa kastom and laea teaching. Olsem example, olketa Pharisee bilivim soul no savve dae, bat Jesus sei man wea dae hem olsem man wea sleep nomoa. (John 11:11) Olketa Sadducee no biliv lo resurrection, bat Jesus resurrectim fren blo hem Lazarus. (John 11:43, 44; Acts 23:8) Olketa Pharisee sei God disaedem evri samting wea bae happen lo man wanwan, bat Jesus sei each wan savve chus for worshipim God.—Matt. 11:28.

10. Wanem nao savve mekem samfala for no laekem Olketa Jehovah’s Witness?

¹⁰ Hao nao tingting blo pipol distaem? Samfala no laekem hao Olketa Jehovah’s Witness againstim olketa laea teaching. Olketa bigman blo religion teachim pipol God panisim olketa nogud man lo hellfire. Datwan mekem pipol fraet. Bat iumi teachim pipol God wea iumi worshipim showimaot love and hard for hem duim datwan. Olketa bigman teachim tu hao soul no savve dae. Bat iumi showimaot teaching hia no kam from Bible bikos sapos olsem, bae no eniwan need for resurrect. And staka religion sei God disaedem wanem bae happen lo iumi. Bat iumi teachim hao man seleva disaedem samting and savve chus for worshipim God. Wanem nao tingting  blo olketa bigman taem iumi showimaot olketa teaching hia no tru? Olketa kros fogud!

11. Olsem Jesus talem lo John 8:45-47, wanem nao iumi mas duim?

¹¹ Wanem nao iumi need for duim? Olketa wea tinghae lo truth bae followim toktok blo God. (Readim John 8:45-47.) Iumi no olsem Satan wea followim samting wea no tru, bat iumi followim olketa tru teaching. (John 8:44) Jehovah laekem iumi for olsem Jesus wea “barava heitim olketa rabis samting and hol strong long samting wea hem stret.”—Rome 12:9; Heb. 1:9.

12. Why nao olketa Jew rejectim Jesus from hem dae lo post?

¹² Wanem nao nara reason why olketa Jew rejectim Jesus? Paul sei: “Iumi preach abaotem Christ wea olketa nilam hem long post. Datwan mekem olketa Jew feel nogud.” (1 Cor. 1:23) Olketa Jew tingse from Jesus dae lo post hem wanfala criminal and man wea sin, and hem no datfala Messiah.—Diutronomi 21:22, 23.

13. Wanem samting nao olketa Jew wea rejectim Jesus no luksavve lo hem?

¹³ Olketa Jew wea rejectim Jesus nating luksavve hem no duim eni rong samting, and wanem pipol duim lo hem no stret. Olketa wea kotem hem no followim law from olketa kwiktaem kotem hem lo naet. (Luke 22:54; John 18:24) Olketa wea judgem Jesus no laek savve lo tru samting abaotem hem, bat olketa “lukaotem eni pruv for sei Jesus hem fit for dae.” Bat olketa no faendem eni pruv, so hae priest trae forcem Jesus for talem samting wea mekem hem for luk olsem hem guilty. Wanem hae priest duim hem barava againstim law. (Matt. 26:59; Mark 14:55-64) Then bihaen Jesus laef bak, olketa nogud judge hia givim “staka silver coin” lo olketa soldia wea gaedem cave, for talem laea story  abaotem why body blo Jesus no stap lo cave.—Matt. 28:11-15.

14. Wanem nao profesi sei abaotem dae blo Messiah?

¹⁴ Wanem nao Bible talem abaotem Jesus? Staka Jew no expectim Messiah for mas dae nomata profesi sei: ‘Hem wiling fo dae long sem wei wea olketa nogud man dae. Hem tekem ples blong staka pipol wea sin, an hem askem mi fo fogivim olketa.’ (Aesaea 53:12) So olketa Jew no garem reason for feel nogud taem Jesus dae olsem criminal.

15. Wanem nao samfala accusim Olketa Jehovah’s Witness lo hem?

¹⁵ Hao nao tingting blo pipol distaem? Pipol duim sem samting lo Olketa Jehovah’s Witness olsem olketa duim lo Jesus. Olketa accusim iumi lo samting wea iumi no duim and sei iumi guilty. Tingim samfala example. Between 1930 and 1950, staka kot case kamap lo America abaotem raet blo olketa Witness for worshipim God. Samfala judge barava againstim olketa Witness. Lo Quebec, Canada, gavman and olketa bigman blo religion trae for stopem preaching waka. Olketa putim staka brata and sista lo prison from olketa preach abaotem Kingdom blo God. Taem Nazi gavman rulim Germany, olketa killim dae staka young brata from olketa faithful lo God. Nomata distaem, lo Russia olketa kotem and putim staka brata and sista lo prison from olketa storyim Bible lo narawan, and sei Olketa Jehovah’s Witness “extremist.” And tu, olketa banim New World Translation of the Holy Scriptures lo Russian languis. Olketa sei hem wanfala “extremist buk” from hem iusim datfala nem Jehovah.

16. Olsem 1 John 4:1 storyim, why nao hem important for no bilivim olketa laea story abaotem pipol blo Jehovah?

¹⁶ Wanem nao olketa wea interest lo truth need for duim? Luksavve lo olketa tru samting. Lo Sermon lo Maunten Jesus sei pipol bae ‘talem enikaen nogud samting wea no tru’ abaotem olketa wea lisin lo hem. (Matt. 5:11) Satan nao bihaenem olketa laea hia, and hem iusim olketa wea againstim Olketa Jehovah’s Witness for spredim olketa laea story. (Rev. 12:9, 10) No lisin lo olketa laea hia or letem datwan for mekem iufala fraet or spoelem faith blo iufala.—Readim 1 John 4:1.

17. Hao nao samfala wea lukim samting wea olketa aposol duim maet feel abaotem datwan?

¹⁷ Judas, wanfala aposol blo Jesus givim hem go lo olketa enemy. Peter, nara aposol blo Jesus denyim hem thrifala taem. Lo evening bifor hem dae evri aposol lusim hem. (Matt. 26:14-16, 47, 56, 75) Jesus no sapraes lo datwan bikos hem talem finis olketa samting hia bae happen. (John 6:64; 13:21, 26, 38; 16:32) Samfala wea lukim wanem hem happen lo Jesus maet sei, ‘Sapos olketa aposol savve duim olsem, mi no laek for kamap disaepol blo Jesus!’

18. Olketa wanem profesi abaotem Jesus nao kamap tru taem hem klosap for dae?

¹⁸ Wanem nao Bible talem abaotem Jesus? Tu-thri handred year bifor Messiah kam, Bible profesi sei wanfala man bae kasem 30 silver selen from hem givim Jesus lo olketa enemy. (Sekaraea 11:12, 13) Nara Bible profesi sei man hia bae gudfala fren blo Jesus. (Sams 41:9) Zechariah profesi tu hao taem man for lukaftarem  sheepsheep hem dae ‘bae olketa sipsip go olobaot.’ (Sekaraea 13:7) From olketa profesi hia abaotem Messiah kamap tru, olketa wea lukim olketa samting hia happen lo Jesus shud no rejectim hem, bat datwan shud strongim faith blo olketa.

19. Wanem nao pipol wea hambol luksavve lo hem?

¹⁹ Hao nao tingting blo pipol distaem? Samfala wea garem responsibility lo organization blo Jehovah lusim truth and kamap apostate, then olketa trae for mekem olketa narawan for duim sem samting. Olketa talem olketa laea story abaotem Olketa Jehovah’s Witness lo niuspepa, radio, TV, and Internet. Nomata olsem, pipol wea hambol no bilivim olketa laea hia and luksavve Bible storyim finis olketa samting olsem bae happen.—Matt. 24:24; 2 Pet. 2:18-22.

20. Wanem nao savve helpem iumi for no bilivim olketa laea story blo olketa apostate? (2 Timothy 4:4, 5)

²⁰ Wanem nao iumi need for duim? Iumi savve strongim faith blo iumi taem iumi gohed for studyim Bible, prea olowe, and busy for duim preaching waka. (Readim 2 Timothy 4:4, 5.) Taem iumi duim olsem, iumi bae no fraet taem pipol talem olketa laea story abaotem iumi. (Aesaea 28:16) From iumi tinghae lo Bible and iumi lovem Jehovah and olketa brata and sista, iumi bae no bilivim olketa laea story blo olketa apostate.

21. Wanem nao iumi laek for duim nomata staka pipol rejectim wanem Bible talem?

²¹ Lo first century staka rejectim Jesus, bat staka narawan kamap disaepol blo hem. Wanfala hem bigman blo Sanhedrin, and “plande priest tu” kamap disaepol. (Acts 6:7; Matt. 27:57-60; Mark 15:43) Distaem tu Olketa Jehovah’s Witness no letem eni samting for spoelem faith blo olketa. Olketa luksavve lo olketa tru teaching and followim datwan. Bible sei: “Olketa wea tinghae lo law blo iu bae kasem peace and no eni samting bae spoelem faith blo olketa.”—Ps. 119:165, NW.