1-2. Saed lo olketa prea blo iumi, wat nao maet iumi tingim?

 WASWE, enitaem iu ting: ‘Hao, Jehovah ansarem olketa prea blo mi tu?’ Sapos olsem, hem no iuseleva nao ting olsem. Staka brata and sista talem tu sem samting, especially taem olketa feisim hard taem. Taem iumi safa from wanfala hard taem, maet iumi faendem hem lelebet hard for luksavve hao Jehovah ansarem prea blo iumi.

² Distaem bae iumi storyim why iumi sure Jehovah savve ansarem prea blo olketa wea worshipim hem. (1 John 5:15) And tu, bae iumi storyim tufala kwestin hia: Why nao maet samfala taem hem luk olsem Jehovah no ansarem prea blo iumi? Wat nao samfala wei wea Jehovah savve ansarem prea distaem?

3. Why nao Jehovah laekem iumi for prea lo hem?

³ Bible talem iumi hao Jehovah barava lovem iumi and iumi barava spesol lo hem. (Hag. 2:7; 1 John 4:10) Dastawe hem invaetem iumi for prea lo hem and askem hem for help. (1 Pet. 5:6, 7) Hem laek helpem iumi for gohed fren klos witim hem and for deal witim olketa hard taem wea iumi feisim.

4. Hao nao iumi savve Jehovah ansarem prea blo olketa wea worshipim hem? (Lukim tu piksa.)

⁴ Lo Bible, staka taem iumi read abaotem hao Jehovah ansarem prea blo olketa wea worshipim hem. Waswe, iu tingim eni example? Wanfala example hem King David. Hem feisim staka dangerous enemy lo laef blo hem, and staka taem  hem prea lo Jehovah for helpem hem. Wantaem hem prea olsem: “Lod [Jehovah], bikos wei blong yu hemi stret fogud, an oltaem yu kipim promis blong yu fo mifala, plis yu herem kam prea blong mi.” (Sams 143:1, SIPB) Jehovah ansarem prea blo David and sevem hem. (1 Sam. 19:10, 18-20; 2 Sam. 5:17-25) Dastawe David fit for sei: “[Jehovah] redi nomoa fo helpem eniwan hu hemi kol go long hem.” Iumi tu savve sure lo datwan.​—Sams 145:18, SIPB.

5. Waswe, Jehovah evritaem ansarem prea blo olketa wea worshipim hem lo bifor lo wei wea olketa expectim? Storyim example. (Lukim tu piksa.)

⁵ Jehovah maet no ansarem prea blo iumi lo wei wea iumi expectim. Datwan nao samting wea happen lo aposol Paul. Hem askem God for finisim wanfala problem wea olsem “wanfala nila wea stap long body” blo hem. Thrifala taem nao Paul prea abaotem datwan lo God. Waswe, Jehovah ansarem olketa prea hia? Yes, bat no lo wei wea Paul expectim. Jehovah no finisim datfala problem, bat hem givim paoa wea Paul needim for gohed faithful for worshipim Hem.​—2 Cor. 12:7-10.

6. Why nao maet samfala taem, hem luk olsem Jehovah no ansarem olketa prea blo iumi?

⁶ Samfala taem, maet iumi tu kasem ansa for olketa prea blo iumi wea difren from wat iumi expectim. Nomata olsem, iumi sure Jehovah savve lo best wei for helpem iumi. Hem savve duim tu samting wea ‘barava winim wanem iumi askem or tingim.’ (Eph. 3:20) So, hao hem ansarem olketa prea blo iumi hem savve kam lo taem or lo wei wea iumi no expectim.

7. Why nao maet iumi need for changem wanem iumi prea for hem? Storyim example.

⁷ Taem iumi start for luksavve lo will blo Jehovah for iumi, maet iumi need for changem wanem iumi prea for hem. Tingim example blo Martin Poetzinger. No longtaem bihaen Brata Poetzinger marit, olketa putim hem lo wanfala Nazi concentration camp. Firstaem hem askem Jehovah for mekem hem free from datfala concentration camp mekem hem savve lukaftarem waef blo hem and for preach moa. Bat bihaen tufala week, hem start for luksavve Jehovah bae no mekem hem kamap free. So hem changem prea blo hem and sei: “Jehovah, plis showim mi wanem iu laekem mi for duim.” Then hem start for ting abaotem hard taem wea olketa nara brata insaed datfala camp deal witim. Staka lo olketa tu barava wari abaotem waef  and pikinini blo olketa. Then Brata Poetzinger prea olsem: “Jehovah, thankiu for niu assignment blo mi. Helpem mi for strongim and encouragem olketa brata blo mi.” So for next naenfala year, hem nao wanem hem duim lo olketa concentration camp!

8. Wanem important samting nao iumi mas tingim taem iumi prea?

⁸ Iumi mas tingim hao Jehovah garem plan and hem bae fulfillim lo taem wea hem markem. Insaed datfala plan, hem bae finisim for olowe evri nogud samting wea kosim iumi for safa distaem, olsem natural disaster, sik, and dae. Jehovah bae iusim Kingdom blo hem for mekem plan blo hem kamap tru. (Dan. 2:44; Rev. 21:3, 4) Bat, go kasem datfala taem, Jehovah letem Satan for gohed rulim world. b (John 12:31; Rev. 12:9) If Jehovah stretem evri problem lo world distaem, then maet bae hem luk olsem rul blo Satan hem gud nomoa. So nomata iumi mas weit for Jehovah fulfillim samfala promis blo hem, datwan no minim bae hem no helpem iumi. Distaem bae iumi storyim samfala samting wea Jehovah duim for helpem iumi.

9. Hao nao Jehovah savve helpem iumi taem iumi need for mekem disison? Storyim example.

⁹ Hem givim iumi wisdom. Jehovah promis for givim wisdom wea iumi needim for mekem olketa gud disison. Iumi barava needim wisdom from Jehovah especially taem iumi bae mekem disison wea bae affectim full laef blo iumi, olsem for disaed for stap singol or for marit. (Jas. 1:5) Tingim experience blo Maria, wanfala singol sista. c Hem regular pioneer taem hem meetim wanfala brata. Hem sei: “Taem mitufala start for savve gud lo each other, feeling blo mitufala for each other hem start for strong tu. Mi savve mi mas disaed. Mi prea staka taem abaotem datwan. Mi needim help blo Jehovah, bat mi savve hem bae no mekem disison for mi.” Maria lukim hao Jehovah ansarem olketa prea blo hem and givim hem wisdom. Hao nao Jehovah helpem hem? Taem hem duim research lo olketa pablikeson blo iumi, hem lukim olketa article wea helpem hem for faendem ansa for olketa kwestin blo hem. Hem lisin tu lo advaes from faithful mami blo hem. Advaes hia helpem hem for ting raonem olketa feeling blo hem. So datwan helpem hem for mekem gudfala disison.

10. Olsem Philippi 4:13 storyim, wat nao Jehovah duim for helpem olketa wea worshipim hem? Storyim example. (Lukim tu piksa.)

¹⁰ Hem givim iumi paoa for no givap taem iumi feisim hard taem. Olsem hem duim for aposol Paul, Jehovah bae givim iumi paoa  for deal witim olketa hard taem wea iumi feisim. (Readim Philippi 4:13.) Tingim hao Jehovah helpem Benjamin, wanfala brata wea deal witim samfala situation wea no isi. For klosap full young laef blo Benjamin, hem and famili blo hem stap lo olketa refugee camp lo Africa. Benjamin sei: “Mi gohed prea lo Jehovah for givim paoa lo mi for duim wanem hem hapi lo hem. Jehovah ansarem olketa prea blo mi taem hem helpem mi for garem peace lo mind, no fraet for preach, and givim mi olketa pablikeson wea strongim mi lo spiritual wei.” Hem sei tu: “Taem mi readim experience blo olketa brata and sista and lanem hao Jehovah helpem olketa for deal witim olketa hard taem, datwan helpem mi for disaed strong for gohed faithful lo Jehovah.”

11-12. Hao nao Jehovah iusim olketa brata and sista for ansarem olketa prea blo iumi? (Lukim tu piksa.)

¹¹ Hem iusim olketa brata and sista. Lo naet bifor Jesus sakrifaesim laef blo hem, hem prea strong lo Jehovah. Hem begim Jehovah for no letem pipol for tingse hem man wea againstim God and for olketa judgem hem bikos lo datwan. Jehovah no duim datwan, bat hem sendem wanfala angel for strongim hem. (Luke 22:42, 43) Jehovah maet helpem iumi tu taem hem iusim wanfala brata or sista for ringim or visitim iumi for encouragem iumi. Iumi evriwan savve lukaotem chance for talem “gud toktok” lo olketa brata and sista.​—Provebs 12:25, SIPB.

¹² Tingim experience blo sista Miriam. Tu-thri week bihaen hasband blo hem dae, Miriam stap seleva lo haos, hem sorre tumas, and depress. Hem no savve stop krae and hem need for story lo samwan. Hem sei: “Mi no garem strong nao for ringim eniwan, so mi prea lo Jehovah. Taem mi gohed krae and prea, phone blo mi ring. Wanfala elder wea hem gud fren blo mifala nao ring kam.” Datfala elder and waef blo hem comfortim Miriam. Miriam sure Jehovah iusim disfala brata for ringim hem.

13. Storyim example lo hao Jehovah savve iusim olketa wea no worshipim hem for ansarem olketa prea blo iumi.

¹³ Hem maet iusim pipol wea no worshipim hem. (Prov. 21:1) Samfala taem Jehovah iusim pipol wea no worshipim hem for ansarem  prea blo olketa wea worshipim hem. For example, hem iusim King Artaxerxes for letem Nehemiah go bak lo Jerusalem, mekem hem savve help for buildim bak datfala city. (Neh. 2:3-6) Distaem tu, Jehovah savve iusim olketa wea no worshipim hem for helpem iumi taem iumi barava needim help.

14. Hao nao experience blo Soo Hing encouragem iu? (Lukim tu piksa.)

¹⁴ Wanfala sista wea nem blo hem Soo Hing luksavve hao Jehovah iusim doctor blo hem for helpem hem. Son blo hem garem samfala sik wea affectim mind blo hem. Taem datfala son kasem big accident, hem and hasband haf tu resign from waka for lukaftarem hem. From datwan, olketa kasem hard taem saed lo selen. Soo Hing feel olsem wanfala elastic raba wea olketa pullim gogo hem kasem last namba nao. Hem storyim evriting lo heart blo hem lo Jehovah, and askem Jehovah for helpem hem. Datfala doctor blo hem faendem wei for helpem hem and famili blo hem. From datwan, olketa kasem help from gavman and garem ples for stap. Bihaen, Soo Hing sei: “Mifala lukim hao Jehovah helpem mifala. Tru nao, Hem ‘ansarem olketa prea blong mifala.’”​—Sams 65:2, SIPB.

15. Wat nao helpem wanfala sista for luksavve lo hao Jehovah ansarem olketa prea blo hem?

¹⁵ Staka taem Jehovah no ansarem olketa prea blo iumi lo spesol wei. Bat olketa ansa wea iumi kasem hem barava wat iumi needim for gohed faithful lo Jehovah. So trae for luksavve lo hao Jehovah ansarem olketa prea blo iu. Wanfala sista wea nem blo hem Yoko tingse Jehovah no ansarem olketa prea blo hem, bat then hem keepim record lo olketa samting wea hem askem lo Jehovah. Then gogo, hem luk bak moa lo notebuk blo hem and hem luksavve hao Jehovah ansarem staka prea blo hem, nomata samfala prea wea hem forgetim tu. So hem gud for samfala taem iumi need for stop and ting raonem hao Jehovah ansarem olketa prea blo iumi.​—Ps. 66:19, 20.

16. Hao nao iumi savve showimaot faith taem iumi prea lo Jehovah for wanfala samting? (Hebrews 11:6)

¹⁶ Iumi showimaot faith taem iumi prea lo Jehovah, and tu, taem iumi acceptim eni wei wea hem ansarem prea blo iumi. (Readim Hebrew 11:6.) Tingim example blo Mike and waef blo hem, Chrissy. Tufala garem goal for waka lo Bethel. Mike sei: “Mitufala apply  staka taem and gohed prea abaotem datfala goal, bat olketa no invaetem mifala for waka lo Bethel.” Mike and Chrissy sure hao Jehovah savve lo best wei wea hem savve iusim tufala lo waka blo hem. Tufala gohed duim best blo tufala and gohed regular pioneer lo ples wea garem need, and help tu lo olketa construction project. Distaem tufala duim traveling waka. Mike sei: “Jehovah no evritaem ansarem olketa prea blo mifala lo wei wea mifala expectim, bat hem ansarem olketa prea hia lo wei wea hem gud winim wanem mifala expectim.”

17-18. Olsem Sams 86:6, 7 (SIPB) storyim, wat nao iumi savve sure lo hem?

¹⁷ Readim Sams 86:6, 7 (SIPB). David sure hao Jehovah herem and ansarem olketa prea blo hem. Iumi tu savve sure hao Jehovah bae duim sem samting for iumi. Olketa example wea iumi storyim lo disfala article mekem iumi sure hao Jehovah savve givim wisdom and paoa wea iumi needim for deal witim olketa hard taem wea iumi feisim. Hem maet iusim olketa brata and sista, or even iusim olketa wea no worshipim hem for helpem iumi lo samfala wei.

¹⁸ Nomata maet Jehovah no evritaem ansarem olketa prea blo iumi lo wei wea iumi expectim, iumi savve hem bae ansarem olketa prea blo iumi. Hem bae provaedem wanem iumi needim and lo taem wea iumi barava needim. So gohed prea lo Jehovah and garem faith hao hem bae lukaftarem iumi distaem, and lo niu world, hem bae “givim lo evri samting wea laef, evri samting wea olketa laekem.”​—Ps. 145:16.