1. Wat nao staka lo iumi stragol for duim?

 HAO enitaem iu markem wanfala spiritual goal bat iu no kasem? b If olsem, ino iuseleva. For example, Philip laek for impruvim quality lo prea blo hem and haomas taem hem prea, bat hem stragol for faendem taem for duim datwan. Erika garem goal for arrive early lo olketa meeting for field service, nomata olsem, hem gohed for arrive leit. Tomáš traem staka taem for readim full Bible. Hem sei: “Mi barava no enjoy for readim Bible. Thrifala taem mi traem, bat each taem mi kasem nomoa Leviticus, then mi stop nao.”

2. Why nao iumi shud no feel discourage sapos iumi no kasem spiritual goal blo iumi?

² If iu garem goal wea iu no kasem yet, no feel discourage. For kasem wanfala goal hem needim taem and hard waka. Wei wea iu laek kasem goal blo iu showimaot iu tinghae lo frenship blo iu witim Jehovah and laek for givim hem best blo iu. Jehovah tinghae lo wei wea iu traem best. Hem no expectim iu for duim moa samting winim wanem iu fit for duim. (Ps. 103:14; Mic. 6:8) So goal blo iu shud fitim situation blo  iu. If olsem, hao nao for iu kasem goal blo iu? Bae iumi storyim samfala idea.

3. Why nao hem important for garem feeling for barava laek kasem goal blo iumi?

³ Hem important for man garem feeling for barava laek kasem spiritual goal blo hem. Datwan nao savve muvim man for duim best blo hem. Feeling for laek kasem goal hem olsem wind wea muvim wanfala sailing boat for go kasem destination blo hem. Sapos wind gohed for blow, man lo datfala boat bae kasem destination blo hem. And if wind hem strong, maet hem kasem ples kwiktaem. Olsem tu, if iumi barava laek for kasem goal blo iumi, bae iumi duim samting for kasem datwan. Brata David from El Salvador sei: “Taem iu barava laek kasem goal blo iu, bae iu waka hard go moa and no letem eni samting stopem iu for kasem datwan.” So wat nao iu savve duim for strongim feeling for laek kasem goal blo iu?

4. Wat nao iumi savve prea abaotem? (Philippi 2:13) (Lukim tu piksa.)

⁴ Prea for strongim feeling for barava laek kasem goal. Jehovah iusim holy spirit for helpem iumi garem feeling for laek kasem goal. (Readim Philippi 2:13.) Samfala taem iumi markem goal bikos iumi savve hem nao wat iumi shud duim, and datwan hem gud. Bat maet iumi no really laek for kasem datfala goal. Hem nao situation blo Sista Norina lo Uganda. Hem markem goal for garem Bible study, bat hem no really laek duim datwan bikos hem tingse hem no savve teach gud. Wat nao helpem hem? Hem sei: “Mi askem Jehovah evriday for helpem mi strongim feeling for laek garem Bible study. Then mi followim prea blo mi and traem best for kamap gud lo wei for teach. Bihaen tu-thri month, mi start for barava laek for conductim Bible study. Lo sem year, mi startim tufala Bible study.”

5. Wat nao iumi savve ting raonem for mekem iumi barava laek kasem goal blo iumi?

⁵ Ting raonem wanem Jehovah duim for iu finis. (Ps. 143:5) Aposol Paul ting raonem hao Jehovah barava kaen lo hem, and datwan muvim hem for waka hard for Jehovah. (1 Cor. 15:9, 10; 1 Tim. 1:12-14) Lo sem wei tu, taem iu gohed ting raonem wanem Jehovah duim for iu, bae datwan strongim go moa feeling for laek kasem goal blo iu. (Ps. 116:12) Tingim samting wea helpem wanfala sista lo Honduras for kasem goal blo hem for kamap regular pioneer. Hem sei: “Mi ting raonem evri samting wea Jehovah duim for mi wea showimaot hem lovem mi. Hem letem mi joinim pipol blo hem. Hem protectim mi and kea for mi. Taem mi ting raonem olketa samting hia, datwan strongim love blo mi for hem and mekem mi for barava laek pioneer.”

6. Wat moa samfala samting wea savve helpem iumi for barava laek kasem goal blo iumi?

 ⁶ Tingim gud samting wea bae kamap taem iu kasem goal blo iu. Tingim samting wea helpem Erika for kasem goal blo hem for no leit lo meeting for field service. Hem sei: “Mi luksavve mi misstim staka gud samting taem mi leit. If mi arrive early bae mi savve welkamim olketa brata and sista and spendem taem witim olketa. And tu, mi bae lisin lo olketa gud idea wea bae helpem mi for enjoyim and kamap gud lo ministry.” Erika tingim gud samting wea hem bae kasem from wei for no leit, and hem kasem goal blo hem. Wanem nao samfala gud samting wea iu savve tingim? Sapos goal blo iu hem for readim Bible or prea, ting abaotem hao datwan bae strongim frenship blo iu witim Jehovah. (Ps. 145:18, 19) Sapos goal blo iu hem for impruvim wanfala wei blo iu, tingim hao datwan bae helpem iu for fren gud witim olketa narawan. (Col. 3:14) Hao sapos iu mekem wanfala list lo olketa reason why iu laek for kasem goal blo iu? Evritaem chekim list hia. Tomáš wea iumi storyim finis, hem sei: “Taem mi tingim olketa reason for kasem goal blo mi, bae mi no kwiktaem for givap.”

7. Wat nao helpem Julio and waef blo hem for kasem goal blo tufala?

⁷ Spendem taem witim olketa wea bae encouragem iu for kasem goal. (Prov. 13:20) Tingim samting wea helpem Julio and waef blo hem for kasem goal blo tufala for duim moa samting lo ministry. Julio sei: “Mifala chusim olketa frens wea encouragem mitufala and wea mifala savve story tugeta abaotem goal blo mitufala. Staka lo olketa kasem finis olketa sem goal olsem, so olketa savve givim samfala gud idea. Olketa frens hia savve chekim tu sapos plan blo mitufala gohed gud and olketa savve encouragem mitufala taem mitufala needim.”

8. Wat nao savve happen sapos iumi trae hard for kasem goal blo iumi only lo taem wea iumi feel laek for duim? (Lukim tu piksa.)

⁸ Samfala day iumi savve feel wikdaon for kasem goal blo iumi. Waswe, datwan minim hard for iumi kasem goal blo iumi nao? Nomoa. Tingim disfala example: Wind savve strong for pushim sailing boat for kasem destination blo hem. Bat samfala day wind maet no strong, or maet nomoa wind nao. Waswe, datwan minim boat hia no savve muv nao? Nomoa. For example, samfala sailing boat garem engine, and samfala iusim padol. So man savve iusim diswan for go kasem destination blo hem. Feeling blo iumi for laek kasem goal hem olsem datfala wind, samfala day maet hem no strong. And samfala day iumi no feel laek for duim nao. So if iumi followim feeling blo iumi nomoa, maet bae hard for iumi kasem nao. Bat olsem datfala man lo  boat, iumi tu savve waka hard for kasem goal blo iumi nomata maet iumi no feel laek for duim datwan. Diswan maet minim iumi need for forcem iumiseleva, bat gud samting bae kamaot from datwan. Bifor iumi storyim wanem iumi savve duim, bae iumi storyim firstaem wanfala kwestin wea maet kamap.

9. Waswe, hem rong for gohed trae for kasem wanfala goal nomata iu no feel laek for duim datwan? Explainim.

⁹ Jehovah laekem iumi for hapi and willing for servem hem. (Ps. 100:2; 2 Cor. 9:7) So hao, iumi shud waka hard for kasem spiritual goal blo iumi nomata iumi no feel laek duim datwan? Tingim example blo aposol Paul. Hem sei: “Mi whipim body bilong mi and bossim olsem slave.” (1 Cor. 9:25-27, study note blo verse 27 lo English) Paul forcem hemseleva for duim samting wea stret nomata maet hem no feel laek for duim datwan. Hao, Jehovah hapi lo waka wea Paul duim? Ia! And Jehovah blessim evri hard waka blo hem.​—2 Tim. 4:7, 8.

10. Wat nao gud samting iumi kasem taem iumi waka hard for kasem goal nomata iumi no feel laek for duim?

¹⁰ Jehovah hapi tu for lukim iumi waka hard for kasem goal blo iumi nomata iumi no feel laek for duim datwan. Hem hapi bikos hem savve maet iumi no lovem datfala waka bat hem savve iumi duim datwan bikos iumi lovem hem. Jehovah blessim Paul, and hem bae blessim tu wei wea iumi waka hard. (Ps. 126:5) And taem iumi kasem blessing blo Jehovah, maet datwan mekem iumi for barava laek kasem goal blo iumi. Sista Lucyna from Poland sei: “Samfala taem mi no laek go lo field service, especially taem mi taed. Nomata olsem, hapi wea mi kasem bihaen mi go hem barava spesol gift.” Distaem bae iumi lukim wanem iumi savve duim if iumi wikdaon for kasem goal blo iumi.

11. Hao nao Jehovah savve helpem iumi for gohed kontrolem iumiseleva?

¹¹ Prea for garem wei for kontrolem seleva. Taem iumi savve hao for kontrolem iumiseleva bae iumi kontrolem feeling and wat iumi duim. Disfala toktok savve minim for kontrolem iumiseleva for no duim nogud samting. Bat, hem minim tu for iumi kontrolem iumiseleva for duim gud samting, especially if wat iumi bae duim hem no isi or iumi no laek duim. Remember, disfala fasin hem wanfala frut blo holy spirit, so askem Jehovah for holy spirit for helpem iu garem disfala important wei. (Luke 11:13; Gal. 5:22, 23) David, wea iumi storyim finis, sei prea helpem hem for no misstim wei for study seleva. Hem sei: “Mi askem Jehovah for helpem mi for kontrolem miseleva. From hem helpem mi, mi startim gud schedule for study seleva and no misstim datwan.”

12. Hao nao principle lo Eklesiastes 11:4 helpem iumi kasem olketa spiritual goal?

¹² No weit for raet taem. Distaem hem hard for faendem raet taem for duim samting. If iumi weit nomoa, bae iumi no savve kasem goal blo iumi. (Readim Eklesiastes 11:4, SIPB.) Wanfala brata wea nem blo hem Dayniel sei: “No eni raet taem hem stap. So best wei, hem for start nomoa for duim samting.” Brata Paul from Uganda storyim nara reason why iumi shud no delay. Hem sei: “Taem iumi start for duim samting nomata situation blo iumi no mas gud, iumi givim chance lo Jehovah for blessim iumi.”​—Mal. 3:10.

13. Why nao hem gud for start witim olketa smol goal firstaem?

¹³ Start smol. Maet iumi feel wikdaon for kasem goal bikos maet hem luk olsem hem hard tumas. If iu ting olsem, hao sapos iu divaedem goal blo iu lo olketa smol part? If iu  garem goal for impruvim wanfala wei blo iu, hao sapos firstaem iu isisi showimaot datfala wei? If iu garem goal for readim full Bible, hao sapos firstaem iu read for lelebet taem nomoa? Tomáš, wea iumi storyim finis hem stragol for kasem goal for readim full Bible insaed wan year. Hem sei: “Mi luksavve hao schedule blo mi for read hem no fitim mi. So mi disaed for start moa, bat mi changem hao mi duim, mi disaed for readim tu-thru verse evriday and ting raonem. Taem mi duim olsem mi start for barava enjoyim.” Taem Tomáš’ enjoy for read, hem start for laek read for longtaem. Gogo, hem readim full Bible. c

14. Wat nao samfala samting wea savve disturbim iumi for kasem goal?

¹⁴ Maet samting kamap wea disturbim goal blo iumi nomata iumi barava laek kasem goal or iumi forcem iumiseleva for duim datwan. For example, maet samting iumi no expectim hem tekem taem wea iumi markem for kasem goal blo iumi. (Eccl. 9:11) Maet iumi kasem hard taem wea mekem iumi feel discourage and wikdaon. (Prov. 24:10) From iumi no perfect, maet datwan tu mekem iumi duim samting wea no helpem iumi for kasem goal blo iumi. (Rome 7:23) Or maet iumi just feel taed. (Matt. 26:43) Wat nao savve helpem iumi for winim samting wea disturbim iumi for kasem goal blo iumi?

15. If iumi no kasem goal blo iumi, waswe, datwan minim iumi fail nao? Explainim. (Sams 145:14, SIPB)

¹⁵ Tingim hao nomata iu no kasem goal samfala taem datwan no minim iu fail nao. Bible sei iumi savve feisim problem staka taem. Nomata olsem, Bible sei tu bae iumi kasem goal blo iumi, especially witim help blo Jehovah. (Readim Sams 145:14, SIPB.) Brata Philip, wea iumi storyim finis sei: “Mi no ting abaotem haomas taem mi fail. Bat evritaem  mi tingim wanem mi duim for kasem datfala goal.” David wea iumi storyim finis sei: “Mi no laek tingim olketa samting wea disturbim goal blo mi olsem samting wea blokem mi, bat mi tingim olsem chance for showim Jehovah mi lovem hem.” Tru nao, taem iu no givap iu pruvim lo Jehovah iu laek for mekem hem hapi. Jehovah barava hapi for lukim iu waka hard for kasem goal blo iu!

16. Wat nao iumi savve lanem from samting wea disturbim goal blo iumi?

¹⁶ Lane from samting wea disturbim goal blo iu. Ting raonem wat nao mekem iu no kasem goal blo iu, then ask olsem, ‘Wat nao mi need for changem mekem diswan no happen moa?’ (Prov. 27:12) Samfala taem, samting wea happen showimaot dat goal wea iumi markem maet no fitim. If datwan hem situation blo iu, hem gud for ting raonem goal blo iu and lukim sapos hem still fitim iu. d Jehovah bae no ting iu fail, if iu no savve kasem goal wea iu markem wea no fitim iu.​—2 Cor. 8:12.

17. Why nao iumi shud tingim olketa goal wea iumi kasem finis?

¹⁷ Tingim olketa goal wea iu kasem finis. Bible sei “God hem raeteous so hard for hem forgetim waka wea iufala duim.” (Heb. 6:10) So iumi tu shud no forgetim wanem iumi duim finis. Ting raonem olketa goal wea iu kasem finis, olsem wei for fren witim Jehovah, story lo olketa narawan abaotem hem, or baptism blo iu. Iu bin kasem olketa goal hia finis, so bae iu savve gohed and no givap for kasem goal blo iu distaem tu.​—Phil. 3:16.

18. Wat nao iumi shud tingim taem iumi waka hard for kasem goal blo iumi? (Lukim tu piksa.)

¹⁸ Olsem man lo boat wea hapi for arrive lo destination blo hem, iu savve kasem goal blo iu witim help blo Jehovah. Bat tingim, staka wea go lo boat enjoyim tu datfala gogo. Olsem tu, taem iu gohed waka hard for kasem spiritual goal blo iu, no forget for enjoy for lukim hao Jehovah helpem and blessim iu taem iu no givap for kasem datwan. (2 Cor. 4:7) If iu no givap, bae iu kasem staka blessing moa.​—Gal. 6:9.