STUDY ARTICLE 18
SONG 1 Olketa Wei Bilong Jehovah
Trustim “Judge blo Full Earth” wea Showimaot Mercy!
“Iu nao Judge blo full earth. So hao, bae iu no duim stret samting?”—GEN. 18:25.
MAIN FOCUS
Disfala article bae helpem iumi for understandim gud hao Jehovah hem showimaot mercy and justice taem hem resurrectim pipol wea no raeteous.
1. Wat nao leson wea Jehovah teachim lo Abraham wea comfortim iumi?
WANFALA taem, God iusim wanfala angel for talem Abraham dat bae hem distroem Sodom and Gomorrah. Nomata Abraham garem strong faith lo God, hem lelebet wari and hem ask olsem: “Hao, . . . bae iu distroem olketa wea raeteous witim olketa wea wicked? . . . Iu nao Judge blo full earth. So hao, bae iu no duim stret samting?” Jehovah patient for teachim best fren blo hem Abraham wanfala leson wea savve helpem and comfortim iumi evriwan distaem. Leson hia nao: No enitaem God bae distroem raeteous pipol.—Gen. 18:23-33.
2. Wat nao mekem iumi savve sure dat judgment blo Jehovah hem raeteous and showim mercy?
2 Hao nao iumi savve sure dat judgment blo Jehovah hem raeteous and showim mercy? Bikos iumi savve “Jehovah lukim samting wea stap insaed lo heart” blo pipol. (1 Sam. 16:7) Tru samting nao, hem savve gud lo “wanem insaed heart blo evri man.” (1 Ki. 8:39; 1 Chron. 28:9) Diswan hem wanfala important truth wea barava spesol. Jehovah barava wise winim iumi, and staka taem iumi no barava minim reason why Jehovah mekem wanfala judgment. Dastawe, aposol Paul sei olsem abaotem Jehovah God: “Hem hard for iumi barava minim olketa judgment bilong God!”—Rome 11:33.
3-4. Olketa wanem kwestin nao maet iumi tingim samfala taem, and wat nao bae iumi storyim lo disfala article? (John 5:28, 29)
3 Nomata olsem, samfala taem maet iumi garem olketa sem kwestin olsem Abraham. Maet iumi wonder: ‘Waswe, olketa wea Jehovah judgem lo Sodom and Gomorrah bae resurrect lo future tu? Hao, eniwan lo olketa hem insaed lo datfala grup blo “pipol wea no raeteous” wea bae resurrect?’—Acts 24:15.
4 Distaem bae iumi reviewim understanding blo iumi abaotem resurrection. No longtaem go nomoa, wanfala change kamap lo hao iumi understandim teaching abaotem resurrection for pipol wea bae “kasem laef olowe” and resurrection for pipol wea bae “kasem judgment.” a (Readim John 5:28, 29.) Disfala niu understanding lead go lo samfala change moa wea bae iumi storyim lo disfala article and next article. Saed lo olketa raeteous judgment blo Jehovah, bae iumi storyim firstaem wat nao iumi no savve abaotem, and then bae iumi storyim wat iumi savve finis abaotem.
WAT IUMI NO SAVVE
5. Wat nao olketa pablikeson blo iumi bin storyim abaotem olketa wea distroe lo Sodom and Gomorrah?
5 Lo bifor, olketa pablikeson blo iumi storyim samfala kwestin abaotem wat hem happen lo pipol wea Jehovah judgem and sei olketa no raeteous. Iumi sei no eni resurrection hope stap for olketa wea Jehovah distroem, olsem olketa lo Sodom and Gomorrah. Bat bihaen mifala prea and duim deep research abaotem diswan, hem klia hao iumi no fit for sei olketa hia bae no resurrect. Why nao olsem?
6. Wat nao samfala story lo Bible abaotem judgment blo Jehovah lo pipol wea no raeteous, and wat nao iumi no savve abaotem?
6 Tingim olketa nara kwestin wea join witim diswan. Staka story lo Bible, storyim judgment blo Jehovah againstim pipol wea no raeteous, olsem evriwan wea dae lo Flood or sevenfala nation lo Promis Land wea Jehovah talem pipol blo hem for distroem, or 185,000 soldia blo Assyria wea wanfala angel blo Jehovah killim olketa dae insaed wanfala naet. (Gen. 7:23; Deut. 7:1-3; Isa. 37:36, 37) Lo each situation hia, hao, Bible storyim klia dat Jehovah judgem finis each wan lo olketa for dae for olowe, and no eni hope for olketa resurrect lo future? Nomoa, Bible no talem. Why nao iumi fit for sei olsem?
7. Wat nao iumi no savve abaotem pipol wea dae lo taem blo Flood or taem Israel tekovarem Canaan? (Lukim piksa.)
7 Iumi no savve lo hao Jehovah judgem each person, and iumi no savve tu if evriwan wea Jehovah killim dae garem chance for lane abaotem Hem and repent. Lo taem blo Flood, Bible sei Noah “preach abaotem samting wea raeteous.” (2 Pet. 2:5) Bat Bible no sei dat taem Noah buildim datfala big ark, lo semtaem hem trae for kasem each person lo earth for preach lo olketa bifor Flood hem kam. Datwan hem semsem tu witim olketa nation blo Canaan, iumi no savve if evri wicked pipol hia garem chance for lane abaotem Jehovah and changem wei blo olketa.
Noah and famili blo hem waka for buildim wanfala big ark. Iumi no savve if Noah organizem preaching campaign for kasem evri pipol lo earth during lo taem wea olketa buildim ark bifor Flood hem kam (Lukim paragraf 7)
8. Wat nao olketa samting wea iumi no savve lo hem abaotem pipol lo Sodom and Gomorrah?
8 Waswe lo pipol wea dae taem Jehovah distroem Sodom and Gomorrah? Lot wea hem wanfala raeteous man, hem stap witim olketa. Bat waswe, iumi savve tu if Lot preach lo evriwan lo olketa? Nomoa. Iumi savve olketa hia wicked, bat hao, olketa really savve lo wat hem stret and no stret? Tingim taem wanfala big grup blo olketa man laek for reipim olketa guest blo Lot. Bible sei olketa wea insaed datfala grup hem “start from smol boy go kasem old man.” (Gen. 19:4; 2 Pet. 2:7) Hao, iumi sure dat Jehovah God blo mercy, hem judgem finis each wan lo olketa for dae and no resurrect? Hem tru, Jehovah talem Abraham hao lo datfala taon, nomata tenfala raeteous man no stap insaed. (Gen. 18:32) So olketa no raeteous, and hem stret for Jehovah judgem olketa for wat olketa duim. Bat hao, iumi sure no eniwan lo olketa bae insaed lo datfala grup blo “pipol wea no raeteous” wea bae resurrect? Nomoa, iumi no sure lo datwan!
9. Lo situation blo Solomon, wat nao iumi no savve lo hem?
9 Bat Bible storyim tu, hao samfala pipol wea raeteous gogo olketa kamap no raeteous. Wanfala example hem King Solomon. Hem savve gud lo olketa teaching blo Jehovah and Jehovah barava blessim hem. Nomata olsem, gogo hem start for worshipim olketa false god. Jehovah barava feel nogud lo Solomon and wat Solomon duim hem affectim olketa Israelite for staka handred year bihaen. Hem tru, Bible sei taem Solomon dae hem “rest witim olketa grandadi blo hem” wea includim olketa faithful man olsem King David. (1 Ki. 11:5-9, 43; 2 Ki. 23:13) Bat hao, from olketa berem Solomon witim olketa grani blo hem datwan minim bae hem resurrect? Nomoa, Bible no talem datwan. Bat, samfala maet tingse Solomon bae resurrect bikos Bible sei: “Man wea dae, hem no guilty nao long olketa sin bilong hem.” (Rome 6:7) Hem tru, bat diswan no minim evriwan wea dae bae resurrect, bikos resurrection hem no samting wea evriwan wea dae garem raet for kasem. Resurrection hem present from loving God blo iumi. Hem bae givim lo olketa wea hem laekem for olketa garem chance for servem hem for olowe. (Job 14:13, 14; John 6:44) Hao, Solomon bae kasem datfala present tu? Iumi no savve, bat Jehovah nao savve. Bat iumi barava savve dat Jehovah bae duim wat hem stret.
WAT IUMI SAVVE
10. Hao nao Jehovah feel abaotem wei for distroem pipol? (Ezekiel 33:11) (Lukim tu piksa.)
10 Readim Ezekiel 33:11. Taem Jehovah judgem pipol, hem talem klia lo iumi feeling blo hem. Aposol Peter talem sem samting wea profet Ezekiel talem abaotem Jehovah. Peter sei: “Jehovah . . . hem no laekem eniwan for dae.” (2 Pet. 3:9) Datfala important truth helpem iumi for savve dat Jehovah no kwiktaem distroem man wantaem and for olowe. Hem garem bigfala mercy, and hem laek for showimaot mercy lo eni chance wea kamap.
Taem olketa wea no raeteous bae resurrect, staka difren pipol bae kasem chance for lane abaotem Jehovah (Lukim paragraf 10)
11. Hu nao bae no resurrect, and hao nao iumi savve lo datwan?
11 Wat nao iumi savve abaotem pipol wea Jehovah bae no resurrectim? Bible storyim tu-thri example nomoa lo diswan. b Samting wea Jesus talem showimaot Judas Iscariot bae no resurrect. (Mark 14:21; lukim tu John 17:12 and English study note.) Taem Judas againstim Jehovah God and Son blo hem, hem barava min for duim datwan. (Lukim Mark 3:29 and English study note.) And tu, Jesus sei dat samfala lo olketa religious leader wea againstim hem bae dae and no garem hope for resurrect. (Matt. 23:33; lukim John 19:11 and English study note, “the man.”) And aposol Paul talem warning hao olketa apostate wea no repent bae no resurrect.—Heb. 6:4-8; 10:29.
12. Wat nao iumi savve abaotem mercy blo Jehovah? Storyim example.
12 Bat, wat nao iumi savve abaotem mercy blo Jehovah? Hao nao hem showimaot dat “hem no laekem eniwan for dae”? Tingim mercy wea hem showim lo samfala wea duim serious sin. King David duim samfala barava serious sin, olsem adultery and murder. Nomata olsem, David hem repent, so Jehovah showimaot mercy and forgivim hem. (2 Sam. 12:1-13) King Manasseh hem barava wicked for klosap full laef blo hem. Nomata wat hem duim hem barava nogud tumas, Jehovah acceptim wei wea hem repent and Hem showimaot mercy and forgivim hem. (2 Chron. 33:9-16) Olketa example hia remindim iumi hao Jehovah evritaem showimaot mercy taem hem lukim reason for duim datwan. Hem bae resurrectim pipol olsem bikos olketa luksavve lo sin wea olketa duim and olketa repent.
13. (a) Why nao Jehovah showim mercy lo olketa blo Nineveh? (b) Wat nao Jesus sei abaotem olketa blo Nineveh?
13 Iumi savve tu lo mercy wea Jehovah showimaot lo olketa pipol blo Nineveh. God talem Jonah: “Mi lukim olketa wicked samting wea pipol hia duim hem tumas nao.” Bat taem olketa repent from sin blo olketa, Jehovah willing for forgivim olketa. Hao hem showimaot mercy hem winim Jonah. God mas remindim profet blo hem wea kros tumas, dat olketa blo Nineveh ‘no savve lo wat nao hem stret and wat nao hem no stret.’ (Jonah 1:1, 2; 3:10; 4:9-11) Bihaen, Jesus iusim story blo olketa lo Nineveh for teachim iumi abaotem justice and mercy blo Jehovah. Jesus sei ‘lo taem wea God judgem evriwan, pipol wea stap lo Nineveh bifor wea repent bae laef bak.’—Matt. 12:41.
14. Wat nao resurrection for “kasem judgment” hem minim for olketa blo Nineveh?
14 Jesus sei olketa blo Nineveh bae “laef bak” lo “taem wea God judgem evriwan.” Wat taem nao hem minim? Jesus story abaotem datfala resurrection for “kasem judgment” lo future. (John 5:29) Hem minim datfala Wan Thousand Year Rul blo hem, wea hem bae mekem “pipol wea raeteous and pipol wea no raeteous for laef bak.” (Acts 24:15) For olketa wea no raeteous, bae olketa resurrect for “kasem judgment.” Diswan minim Jehovah and Jesus bae lukluk gud lo wei blo pipol for lukim sapos olketa bae acceptim and obeyim wat olketa lanem. If samwan blo Nineveh wea resurrect hem rejectim pure worship, hem bae kasem judgment for dae. (Isa. 65:20) Bat for evriwan wea chus for gohed faithful for worshipim Jehovah, bae olketa kasem judgment for laef. Bae olketa garem chance for laef olowe!—Dan. 12:2.
15. (a) Why nao iumi no fit for sei olketa wea God distroem lo Sodom and Gomorrah bae no resurrect? (b) Wat nao toktok lo Jude 7 hem minim? (Lukim box “ Wat Nao Jude Hem Minim?”)
15 Taem Jesus story abaotem pipol blo Sodom and Gomorrah, hem sei lo “Judgment Day” olketa bae kasem judgment wea gud winim judgment blo pipol wea rejectim hem and teaching blo hem. (Matt. 10:14, 15, ftn; 11:23, 24; Luke 10:12) Wat nao hem minim? Hao, Jesus iusim diswan olsem tokpiksa nomoa for showim hao pipol lo taem blo hem olketa worse winim pipol lo Sodom and Gomorrah? Remember, taem Jesus sei olketa lo Nineveh bae “laef bak” lo Judgment Day, hem story abaotem really samting wea bae happen. Luk olsem Jesus tok stret nomoa. Taem hem story abaotem olketa lo Sodom and Gomorrah and olketa lo Nineveh, really hem storyim sem “Judgment Day.” Olsem olketa lo Nineveh, pipol lo Sodom and Gomorrah duim olketa nogud samting. Bat olketa lo Nineveh garem chance for repent. And tingim wat Jesus talem abaotem resurrection for “kasem judgment.” Datfala resurrection bae includim “olketa wea duim nogud samting.” (John 5:29) So luk olsem hope stap for pipol lo Sodom and Gomorrah. Maet samfala lo olketa bae resurrect, and iumi garem chance for teachim olketa abaotem Jehovah and Jesus Christ.
16. Hao nao Jehovah bae disaedem hu nao for hem resurrectim? (Jeremiah 17:10)
16 Readim Jeremiah 17:10. Disfala verse helpem iumi for tingim wat iumi savve abaotem finis: Jehovah hem evritaem “lukluk insaed lo heart, [hem] lukluk gud lo tingting wea stap deep insaed lo man.” During lo future resurrection, Jehovah bae evritaem ‘judgem each wan followim wei blo olketa.’ Jehovah bae givim strong judgment lo taem wea hem need for givim, bat lo taem wea hem fitim hem bae showimaot mercy. So iumi shud no conclude dat wanfala person bae no resurrect unless iumi savve and sure bikos Bible hem talem!
“JUDGE BLO FULL EARTH” BAE “DUIM STRET SAMTING”
17. Wat nao bae happen lo pipol wea dae?
17 Start from taem wea Adam and Eve joinim Satan and againstim Jehovah God, staka billion pipol dae. Dae hem “enemy” blo iumi, and hem kasem staka pipol! (1 Cor. 15:26) Wat nao bae happen lo evri pipol hia? Wanfala smol grup blo 144,000 wea hem olketa faithful follower blo Christ bae resurrect for kasem laef olowe lo heven. (Rev. 14:1) Staka faithful man and woman wea lovem Jehovah bae part lo datfala resurrection blo “pipol wea raeteous” and olketa bae laef olowe lo earth if olketa gohed for raeteous during lo Wan Thousand Year Rul blo Christ and lo datfala last test. (Dan. 12:13; Heb. 12:1) And tu, during lo datfala Wan Thousand Year Rul, “pipol wea no raeteous,” wea insaed diswan hem olketa wea “duim nogud samting,” bae garem chance for changem wei blo olketa for kamap faithful servant blo Jehovah. (Luke 23:42, 43) Bat, samfala pipol olketa wicked tumas and barava bighed againstim Jehovah and olketa plan blo hem, so hem disaed for no resurrectim olketa hia.—Luke 12:4, 5.
18-19. (a) Why nao iumi savve trustim olketa judgment blo Jehovah abaotem olketa wea dae? (Isaiah 55:8, 9) (b) Wat nao bae iumi storyim lo next article?
18 Hao, iumi garem eni gud reason for barava trustim evri judgment blo Jehovah? Yes! Abraham minim gud hao Jehovah nao datfala perfect, barava wise “Judge blo full earth” wea showim mercy. Hem trainim Son blo hem, and givim hem waka for judgem evriwan. (John 5:22) Dadi and Son, tufala evriwan savve lo wat nao stap insaed heart blo each wan lo iumi. (Matt. 9:4) Lo evri situation, tufala bae “duim stret samting”!
19 Iumi laek gohed trustim Jehovah and evri disison blo hem. Iumi luksavve iumi no qualify for judge, bat Jehovah nao hem best judge! (Readim Isaiah 55:8, 9.) So iumi trustim and leavim evri wei for judge lo Jehovah and Son blo hem, wea hem perfect King wea barava followim wei blo Dadi blo hem for showimaot justice and mercy. (Isa. 11:3, 4) Bat, waswe lo olketa judgment blo God wea bae kamap lo datfala big trabol? Wat nao iumi no savve abaotem? And wat nao iumi savve lo hem finis? Lo next article, bae iumi storyim ansa for olketa kwestin hia.
SONG 57 Preach Long Evri Difren Kaen Man
b For savve moa abaotem Adam, Eve, and Cain, lukim Wastaoa, January 1, 2013, page 12, ftn.