“OLKETA Pablisa Long Britain—Iufala Wekap!!” Diswan hem title bilong wanfala article insaed long Informant, * bilong December 1937, for London. Hem encouragem olketa brata and sista long Britain. Wanfala subheding sei: “No Eni Bigfala Increase Insaed Tenfala Year.” Long front page bilong datfala Informant hem garem report abaotem waka wea olketa duim start long 1928 go kasem 1937 for showimaot datwan.

Why nao Kingdom waka hem no grow long Britain long datfala taem? Luk olsem olketa kongregeson gohed nomoa for followim hao olketa brata and sista long bifor duim samting. Nara samting tu, branch office sei olketa savve sapotim 200 pioneer nomoa. Olketa hia no pioneer long eni kongregeson bat branch sendem olketa for go pioneer long olketa isolated grup. So branch office talem olketa brata and sista wea laek for pioneer olketa no needim nao olketa pioneer long Britain, and hem encouragem olketa for go long olketa nara kantri long Europe. So staka long Britain go for pioneer long France nomata olketa no savve long French languis.

Datfala Informant bilong 1937 encouragem olketa for kasem wanfala goal long 1938, wea hem nao: Wan million hour! Olketa savve kasem datfala goal sapos olketa pablisa duim 15 hour evri month long ministry and olketa regular pioneer duim 110 hour. Datfala Informant hem encouragem olketa kongregeson for markem samfala day long week wea olketa savve duim ministry for faevfala hour. And hem encouragem olketa for duim return visit and for duim evening witnessing tu.

Staka hapi tumas taem olketa herem diswan. Hilda Padgett * sei: “Staka long mifala wea laek for duim moa samting hapi tumas taem mifala herem disfala direction wea kam from hedquarter.” Sista Wallis sei: “Arrangement for markem samfala day long week for duim faevfala hour long ministry hem nambawan! Man savve kasem bigfala hapi taem hem duim waka bilong Lord for full day. . . . Waswe, mifala taed? Ia, mifala taed, bat waswe, mifala hapi? Barava nao!” Wanfala young man, Stephen Miller, hem tu luksavve disfala waka hem barava important, and hem no laek for misstim chance for duim disfala waka! Hem tingim taem wea olketa savve iusim baesikol for go preach for full day. Then long olketa evening olketa savve pleim olketa Bible tok for pipol herem. Olketa savve march witim olketa saen wea olketa raetem samfala toktok long hem and olketa givimaot olketa magasin long street.

Datfala Informant hem talem tu disfala invitation: “Iumi needim 1,000 pioneer.” Organization hem garem niu arrangement saed long wei for divaedem territory, so olketa pioneer no preach seleva bat preach witim olketa kongregeson and sapotim and strongim olketa. Joyce Ellis sei: “Staka brata and sista luksavve olketa shud pioneer.” Hem sei: “Nomata mi 13 year long datfala taem, mi laekem tumas for  pioneer.” Long July 1940 taem hem 15 year, hem start for pioneer. Taem hasband bilong Joyce, Peter Ellis, herem datfala encouragement for duim moa samting, hem start for plan for duim pioneer waka. Long June 1940, taem hem 17 year, hem kasem assignment for pioneer long Scarborough, and hem raedem baesikol for 105 kilometer for kasem datfala ples.

Cyril and Kitty Johnson sakrifaesim staka samting mekem tufala pioneer. Tufala salem haos and samfala samting wea olketa ownim mekem tufala savve iusim datfala selen for sapotim pioneer waka bilong tufala. Cyril finis from waka bilong hem, and wanfala month bihaen tufala pioneer nao. Cyril sei: “Mitufala savve hem nao waka wea mitufala laek for duim. Mitufala barava hapi for duim datwan.”

From namba bilong olketa pioneer kamap big, olketa brata tingim olketa difren wei for sapotim olketa. Long 1938, Jim Carr, wea waka olsem zone servant (wea distaem olketa kolem circuit overseer), hem followim direction from olketa brata for encouragem olketa pioneer for rentim haos tugeta. Taem olketa duim datwan olketa savve waka tugeta and hem katem daon kost tu. Long Sheffield, olketa pioneer rentim wanfala big haos, and wanfala brata nao lukaftarem evri samting. Kongregeson helpem olketa saed long selen and givim furniture for olketa. Jim sei: “Evriwan nao sapotim datfala arrangement.” Tenfala pioneer nao stap long datfala haos, and olketa followim gudfala spiritual schedule. “Olketa pioneer duim text evri morning taem olketa kaikai tugeta” and then “olketa go preaching witim kongregeson bilong olketa long olketa difren part long taon.”

Long 1938, olketa kasem nao goal wea datfala Informant encouragem evriwan for kasem, wea hem nao wan million hour. Report long datfala year showimaot, olketa kasem bigfala increase long evri samting wea olketa duim saed long ministry. Insaed faevfala year, namba bilong olketa pablisa long Britain hem kamap barava big. Wei wea pipol bilong Jehovah duim moa samting long Kingdom waka, datwan strongim olketa for deal witim olketa hard taem wea olketa feisim long World War II.

Distaem wea Armageddon hem barava klosap, namba bilong olketa pioneer long Britain hem kamap big go moa. Long tenfala year wea go pas, namba bilong olketa pioneer hem gohed for kamap big, and long October 2015, Britain garem 13,224 pioneer. Olketa pioneer hia luksavve full-taem service nao hem best waka for duim long laef.