1, 2. (a) Wanem tingting nao samfala garem abaotem wei wea wanfala organization talem olketa wanem for duim? (b) Wanem nao bae iumi storyim long disfala study?

WASWE, God hem garem wanfala organization? Samfala pipol sei: “Man no needim wanfala organization for talem hem wanem for duim. Samting wea important nao hem for man seleva fren gud witim God.” Waswe, kaen tingting olsem hem stret?

² Long disfala study, bae iumi storyim hao evri samting wea Jehovah duim hem organize gud, and wei wea hem organizem pipol bilong hem. Bae iumi storyim tu wanem iumi mas duim taem iumi kasem direction from organization bilong Jehovah. (1 Cor. 14:33, 40) Long first century, pipol bilong Jehovah followim direction wea olketa kasem insaed long olketa Holy Raeting, and diswan mekem olketa preachim gud nius long staka ples. Iumi distaem tu followim wanem Bible talem. And iumi obeyim olketa instruction wea iumi kasem from organization bilong God. From datwan, iumi preachim gud nius evriwea long world. And tu, iumi keepim kongregeson klin, iumi garem peace, and iumi wan mind.

3. Wanem nao pruvim long iu Jehovah hem God wea organize gud?

³ Taem iumi lukim olketa samting wea Jehovah wakem, iumi  luksavve hem God wea organize gud. Bible sei: “Hem iusim wisdom bilong hem for wakem disfala earth. Hem iusim wei for luksavve for wakem skae.” (Prov. 3:19) Iumi savve lelebet nomoa abaotem olketa samting wea Jehovah wakem. Hem olsem iumi “herem lelebet samting nomoa abaotem hem.” (Job 26:14) Nomata olsem, lelebet savve wea iumi garem abaotem universe showimaot Jehovah hem barava organize gud. (Ps. 8:3, 4) Staka million star wea muv long space olketa no olobaot. And tingim hao olketa planet insaed solar system bilong iumi muv raonem sun. Wei wea olketa samting hia organize hem showimaot Jehovah barava organizem gud gogo bilong olketa. Taem iumi tingim wei wea Jehovah savve tumas for wakem olketa samting long heven and long earth, iumi laek for praisem hem, worshipim hem, and gohed faithful long hem.—Ps. 136:1, 5-9.

4. Wanem nao olketa important kwestin wea olketa scientist no savve ansarem, and why nao olsem?

⁴ Olketa scientist studyim creation and wakem staka samting followim design bilong olketa samting hia, and iumi kasem staka gud samting from diswan. Bat olketa scientist no savve ansarem staka important kwestin. Olsem example, olketa scientist no barava savve hao nao disfala universe hem start? Or why nao olketa man, animal, and olketa plant stap long earth? And staka pipol no savve why nao iumi olketa man laek for laef olowe? (Eccl. 3:11) Wanfala reason why pipol no kasem ansa for olketa kwestin hia hem bikos olketa scientist and nara pipol sei no eni God stap and olketa sei evolution hem tru teaching. Bat God hem talem iumi ansa bilong olketa kwestin hia insaed Bible.

5. Hao nao olketa man followim olketa law wea Jehovah putim for olketa samting wea hem wakem?

⁵ Jehovah putim staka law for olketa samting wea hem wakem for olketa followim. Olketa law hia no savve change. Olketa electrician, plumber, engineer, pilot, doctor, and olketa narawan tu followim olketa law hia taem olketa duim waka bilong olketa. Olsem example, heart bilong iumi evriwan hem stap long sem ples long body bilong iumi, so doctor hem savve wea nao heart bilong sikman hem stap. And iumi evriwan savve sapos man hem no followim law bilong gravity and hem jamp from wanfala hae ples, bae hem foldaon and maet hem dae tu.

6. Hao nao iumi savve Jehovah laekem pipol bilong hem for organize gud?

⁶ Jehovah barava organizem gud disfala universe. So hem laekem pipol wea worshipim hem for organize gud tu. Jehovah givim kam Bible for teachim iumi stretfala wei for worshipim hem. Taem iumi followim wanem Bible talem and followim direction wea kam from organization bilong hem, bae iumi hapi and garem gudfala laef.

7. Wanem nao showimaot Bible hem buk wea organize gud?

⁷ Samfala savveman sei Bible hem wanfala buk wea olketa man nomoa wakem from samfala buk bilong olketa Jew, and samfala buk bilong olketa Christian. Bat Bible hem buk wea God organizem gud bikos hem nao disaedem hu nao bae raetem olketa buk hia, wanem taem bae olketa raetem, and wanem samting nao bae olketa raet abaotem. Dastawe, evri buk wea stap insaed Bible savve helpem iumi for minim message bilong God. Start long Genesis go kasem Revelation, Bible sei wanfala “pikinini” bae kam wea bae mekem full earth kamap paradaes moa. And iumi savve datfala “pikinini” hem Christ Jesus, and Kingdom wea hem rulim bae pruvim Jehovah nao hem garem raet for rulim evriwan long universe.—Readim Genesis 3:15; Matthew 6:10; Revelation 11:15.

8. Wanem nao olketa samting wea olketa Israelite organize gud long hem?

 ⁸ Olketa Israelite followim Law wea God givim long olketa and olketa organize gud. Olsem example, olketa organizem samfala woman for ‘duim waka front long tabernacle.’ (Ex. 38:8) And tu, olketa Israelite mas organize gud taem olketa muv long nara ples and tekem tabernacle witim olketa. Bihaen, King David organizem olketa Levite and olketa priest saed long waka bilong olketa long temple. (1 Chron. 23:1-6; 24:1-3) Taem olketa Israelite obeyim Jehovah, hem blessim olketa. Olketa organize gud, olketa stap sef, and olketa garem wan mind.—Deut. 11:26, 27; 28:1-14.

9. Wanem nao showimaot olketa kongregeson long first century organize gud?

⁹ Olketa kongregeson long first century tu organize gud. Wanfala governing body tu hem stap, wea hem wanfala smol grup bilong olketa brata wea givim direction long olketa kongregeson hia. Firstaem, olketa aposol nao insaed long disfala grup. (Acts 6:1-6) Bihaen, olketa nara elder tu insaed long datfala grup. (Acts 15:6) Spirit bilong Jehovah leadim olketa member bilong datfala governing body and samfala wea waka witim olketa for raetem olketa leta wea garem kaonsel and instruction for olketa kongregeson. (1 Tim. 3:1-13; Titus 1:5-9) Wanem gud samting nao olketa kongregeson kasem taem olketa followim direction wea olketa kasem from governing body?

10. Wanem gud samting nao olketa kongregeson long first century kasem taem olketa followim instruction bilong governing body? (Lukim piksa long start bilong study.)

¹⁰ Readim Acts 16:4, 5. Long first century, samfala brata visitim olketa kongregeson and “storyim . . . samting wea olketa aposol and elder long Jerusalem [wea hem nao datfala governing body] disaedem for evriwan mas followim.” Olketa kongregeson followim olketa instruction hia and “gohed for kamap strong, and evriday plande pipol moa olketa biliv.” Hao nao iumi savve followim example bilong olketa Christian long first century insaed long organization bilong Jehovah distaem?

11. Wanem nao olketa elder and ministerial servant shud duim taem olketa kasem direction from organization bilong God?

¹¹ Olketa member bilong Branch Komiti or Kantri Komiti, olketa circuit overseer, and olketa elder mas obeyim direction wea olketa kasem from organization bilong God. Bible sei iumi evriwan nao mas obeyim olketa wea leadim iumi. (Deut. 30:16; Heb. 13:7, 17) Olketa wea faithful long Jehovah no bighed for againstim or komplen abaotem eni direction wea olketa kasem. Iumi no laek for olsem Diotrephes wea nating respectim olketa brata wea lead. (Readim 3 John 9, 10.) Taem iumi followim direction wea iumi kasem, datwan helpem kongregeson for garem peace and wan mind. So hem gud for iumi tingim diswan: ‘Waswe, example bilong mi hem helpem olketa brata and sista for faithful long Jehovah? Waswe, mi kwiktaem for followim direction wea mi kasem from organization bilong God?’

12. Hao nao olketa elder and ministerial servant kasem appointment long kongregeson?

¹² No longtaem go nomoa, Governing Body changem wei for appointim olketa elder and ministerial servant insaed long kongregeson. Long article “Kwestin From Reader” insaed long Wastaoa bilong November 15, 2014, hem sei long first century, governing body markem olketa traveling overseer for appointim olketa elder and ministerial servant. So start long September 2014, olketa circuit overseer start for duim datwan. Taem olketa elder recommendim wanfala brata for kamap elder or ministerial servant, circuit overseer bae trae for savve gud long datfala  brata and famili bilong hem. Olsem example, hem savve waka witim datfala brata long ministry. (1 Tim. 3:4, 5) Then circuit overseer story witim olketa elder and olketa lukluk moa long Bible for lukim sapos brata wea olketa recommendim for elder or ministerial servant hem kasem olketa mark wea Bible storyim.—1 Tim. 3:1-10, 12, 13; 1 Pet. 5:1-3.

13. Wanem nao iumi savve duim for showimaot iumi followim direction wea iumi kasem from olketa elder?

¹³ Direction wea iumi kasem from olketa elder hem kam from Bible bikos olketa laek for protectim and lukaftarem gud kongregeson. Olketa instruction hia hem for helpem iumi so iumi mas followim wanem olketa talem. (1 Tim. 6:3) Long first century, samfala insaed long olketa kongregeson ‘laef bilong olketa hem olobaot.’ Olketa “no waka bat olketa poke nose long samting wea hem no bisnis bilong olketa.” Olketa elder trae for stretem olketa, bat olketa les for changem wei bilong olketa. Paul talem olketa long kongregeson wanem for duim long eniwan wea garem kaen wei olsem. Hem sei: “Iufala mas lukluk gud long hem and stap klia long hem.” Olketa mas no associate witim hem, bat long semtaem olketa mas no ting long hem olsem enemy. (2 Thess. 3:11-15) Olketa elder distaem bae helpem tu eniwan wea no laek for followim olketa standard bilong God. Olsem example, man wea frenim samwan wea no worshipim Jehovah. (1 Cor. 7:39) Sapos hem no laek for changem wei bilong hem, olketa elder savve givim wanfala tok long kongregeson for explainim hao diswan savve spoelem nem bilong kongregeson. Sapos olketa elder long kongregeson bilong iu givim wanfala tok olsem, wanem nao bae iu duim? Sapos iu savve hu nao olketa elder story abaotem, iu shud followim datfala direction for no associate witim hem. Maet datwan helpem hem for luksavve wanem hem duim savve spoelem hemseleva and mekem Jehovah no hapi, and maet diswan bae mekem hem changem wei bilong hem. ^[1]

14. Wanem nao iumi savve duim for keepim kongregeson hem klin?

¹⁴ Bible talem wanem iumi evriwan shud duim mekem iumi keepim kongregeson hem klin. Tingim samting wea happen long Corinth. Paul lovem olketa brata and sista long there from hem helpem staka long olketa for savve long truth. (1 Cor. 1:1, 2) So tingim feeling bilong Paul taem hem faendaot olketa elder long there letem wanfala Christian wea durong for gohed stap insaed long kongregeson. Paul talem olketa elder for “givim disfala man go long Satan,” wea hem nao for disfellowshipim hem from kongregeson. (1 Cor. 5:1, 5-7, 12) Distaem, maet olketa elder disaed for disfellowshipim samwan wea duim bigfala sin and hem no laek for repent. Sapos datwan happen, waswe, bae iumi deal witim datwan wea disfellowship followim wanem Bible talem? Sapos iumi duim olsem, datwan bae helpem kongregeson for klin. And maet iumi helpem datwan wea duim rong samting for luksavve hem mas repent and askem Jehovah for forgivim hem.

15. Wanem nao iumi savve duim mekem iumi garem peace insaed long kongregeson?

¹⁵ Kongregeson long Corinth hem garem nara problem tu. Samfala brata tekem olketa nara brata long kot. Paul sei long olketa: “Iufala letem nomoa brata for spoelem and ravem iufala.” (1 Cor. 6:1-8) Distaem, maet samwan long kongregeson mekem bisnis agreement witim nara brata, bat gogo bisnis hia brekdaon and hem lusim evri selen bilong hem. Or maet wanfala brata sei nara brata konim hem so hem tekem brata hia long kot. Taem samting olsem happen, diswan savve kosim problem insaed kongregeson. And tu, datwan savve mekem pipol tok  spoelem Jehovah and pipol bilong hem. Bible sei iumi mas stretem problem witim olketa brata bilong iumi, nomata iumi lusim selen bilong iumi. ^[2] Jesus lanem iumi wanem iumi savve duim for stretem olketa bigfala problem and raoa. (Readim Matthew 5:23, 24; 18:15-17.) Taem iumi duim datwan, iumi bae garem peace and wan mind insaed long kongregeson.

16. Wanem nao mekem pipol bilong God for garem wan mind?

¹⁶ Bible sei: “Hem gud and naes tumas for olketa brata garem wan mind!” (Ps. 133:1) Taem olketa Israelite obeyim Jehovah, olketa organize gud and garem wan mind. God sei olsem abaotem pipol bilong hem: “Bae mi mekem olketa wan mind, olsem olketa sheepsheep insaed fence.” (Mic. 2:12) Jehovah hem sei tu pipol bilong hem bae lanem truth long Bible and bae olketa wan mind for worshipim hem. Hem sei: “Mi bae lanem olketa tu for savve gud long wanfala niu languis wea klin, mekem olketa savve prea long Jehovah and waka tugeta for worshipim hem.” (Zeph. 3:9) Iumi barava tinghae long wei wea iumi garem wan mind for worshipim Jehovah!

17. Wanem nao olketa elder shud duim taem samwan duim bigfala sin?

¹⁷ Sapos samwan duim bigfala sin, olketa elder showimaot love taem olketa kwiktaem for stretem hem. Olketa savve Jehovah laekem olketa for protectim kongregeson from eni nogud samting and for kongregeson klin and garem wan mind. (Prov. 15:3) Paul barava lovem olketa brata bilong hem long Corinth dastawe hem raetem firstfala leta bilong hem long olketa for stretem olketa taem olketa duim samting wea no stret. Iumi savve olketa elder long there kwiktaem followim datfala kaonsel, bikos tu-thri month bihaen Paul raetem mek-tu leta long olketa and praisem olketa. Sapos wanfala brata “start for go rong bat hem no luksavve long datwan,” olketa elder shud kaen long hem taem olketa stretem hem.—Gal. 6:1.

18. (a) Wanem gud samting nao olketa kongregeson long first century kasem taem olketa followim olketa Holy Raeting? (b) Wanem nao bae iumi storyim long nextfala study?

¹⁸ Taem olketa Christian long first century followim olketa Holy Raeting, kongregeson hem klin, olketa stap gud tugeta, and olketa garem wan mind. (1 Cor. 1:10; Eph. 4:11-13; 1 Pet. 3:8) From datwan, olketa brata and sista hia talemaot gud nius evriwea long earth. (Col. 1:23) Distaem tu pipol bilong Jehovah wan mind and organize gud, and olketa talemaot gud nius evriwea long world. Nextfala study bae storyim samfala pruv wea showimaot pipol bilong Jehovah barava laek for praisem hem and olketa barava tinghae long Bible.—Ps. 71:15, 16.