1-3. Wanem nao maet mekem Euodia and Syntyche for raoa, and wanem nao iumi savve duim for no garem problem olsem? (Lukim piksa long start bilong study.)

PIPOL bilong Jehovah barava tinghae long Bible bikos olketa savve hem buk wea kam from God. Olketa advaes wea stap long Bible savve helpem iumi for stap klia long olketa problem and savve stretem iumi taem iumi duim samting wea no stret. So waswe, iumi followim wanem Bible talem? Tingim Euodia and Syntyche, tufala anointed Christian long first century. Bible sei tufala woman hia raoa bat Bible no talem wanem nao tufala raoa abaotem. Tingim sapos diswan nao samting wea maet happen long tufala.

² Maet Euodia invaetem samfala brata and sista for go kaikai long haos bilong hem. Bat hem no invaetem Syntyche. Bihaen, taem Syntyche herem evriwan enjoyim datfala hapitaem, hem feel nogud tumas. Maet hem ting olsem: ‘Lelebet tu ia! Mi tingse mitufala Euodia best fren bat hem nating invaetem mi!’ Syntyche tingse Euodia les long hem and hem no laek story witim  hem nao. So Syntyche invaetem sem pipol for go kaikai long haos bilong hem bat hem no invaetem Euodia! Maet samting wea tufala sista hia duim mekem olketa narawan long kongregeson feel nogud tu. Aposol Paul encouragem tufala for stretem datfala problem. Bible no talem wanem nao happen bihaen, bat maet tufala followim kaonsel bilong aposol Paul and gohed hapi for duim waka bilong Jehovah.—Phil. 4:2, 3.

³ Maet samfala taem iumi tu garem problem witim wanfala brata or sista long kongregeson. Bat sapos iumi followim wanem Bible talem, iumi savve stretem kaen problem olsem, and maet bae iumi no garem problem olsem tu. And sapos iumi obeyim wanem Bible talem, iumi showimaot iumi barava tinghae long disfala buk wea kam from Jehovah.—Ps. 27:11.

4, 5. Wanem advaes insaed Bible nao savve helpem iumi for kontrolem feeling bilong iumi?

⁴ Samfala taem hem no isi for kontrolem feeling bilong iumi. Maet iumi sorre or kros taem samwan hem tok spoelem iumi or treatim iumi nogud bikos long culture bilong iumi, skin kala bilong iumi, or lukluk bilong iumi. And maet iumi barava feel nogud tumas sapos wanfala brata or sista duim olsem long iumi. Wanem advaes insaed Bible nao savve helpem iumi?

⁵ Jehovah hem savve wanem savve happen sapos man no kontrolem feeling bilong hem. Taem iumi kros maet iumi talem or duim samting wea mekem iumi sorre bihaen. Long Bible, Jehovah talem iumi for kontrolem kros bilong iumi. Hem sei: “No kwiktaem for feel nogud long narawan.” Iumi savve misstim staka problem sapos iumi followim datfala advaes! (Readim Proverbs 16:32; Ecclesiastes 7:9.) Bible talem iumi tu for forgivim olketa narawan. Jesus sei sapos iumi no forgivim olketa narawan, Jehovah bae no forgivim iumi tu. (Matt. 6:14, 15) Waswe, iu faendem hem hard for patient and for forgivim olketa narawan?

6. Wanem nao maet happen sapos iumi no kontrolem feeling bilong iumi?

⁶ Sapos iumi no kontrolem feeling bilong iumi, maet iumi gohed kros long samwan and maet gogo iumi heitim hem nao. Or maet samting wea iumi talem or duim hem mekem samfala insaed kongregeson tu for heitim hem. Nomata iumi trae for haedem wei wea iumi kros or heitim narawan, bae gogo olketa narawan luksavve long datwan. Maet gogo olketa brata and sista no laek fren gud witim iumi. (Prov. 26:24-26) Olketa elder bae iusim Bible for trae helpem iumi for no kros and for no heitim narawan, bat for forgivim olketa narawan. (Lev. 19:17, 18; Rome 3:11-18) Taem olketa elder givim kaonsel from Bible, waswe, bae iumi followim datwan?

7, 8. (a) Hao nao Jehovah leadim pipol bilong hem? (b) Wanem nao samfala instruction long Bible wea savve helpem iumi, and why nao iumi shud followim?

⁷ Jehovah nao leadim and teachim olketa wea insaed long organization bilong hem long earth. Hao nao hem duim datwan? Hem markem Christ for hem “hed bilong kongregeson,” and Christ markem “datfala wakaman wea faithful and wise” for teachim and leadim pipol bilong God. (Matt. 24:45-47; Eph. 5:23) Olsem governing body long first century, datfala wakaman barava tinghae long Bible bikos hem kam from God. (Readim 1 Thessalonica 2:13.) Wanem nao samfala instruction long Bible wea savve helpem iumi?

 ⁸ Bible encouragem iumi for evritaem go long olketa meeting. (Heb. 10:24, 25) Hem talem iumi evriwan for bilivim olketa sem teaching insaed Bible. (1 Cor. 1:10) Bible sei tu for Kingdom hem first samting long laef bilong iumi. (Matt. 6:33) Iumi kasem instruction from Bible for preach long haos tu haos, long olketa pablik ples, and long eni ples wea iumi meetim pipol. (Matt. 28:19, 20; Acts 5:42; 17:17; 20:20) Bible garem instruction for olketa elder savve followim for keepim kongregeson klin. (1 Cor. 5:1-5, 13; 1 Tim. 5:19-21) And Bible sei iumi mas klin long body, garem klinfala tingting, and garem gudfala wei.—2 Cor. 7:1.

9. Hu nao Jesus iusim for helpem iumi savve long olketa tru teaching insaed Bible?

⁹ Samfala maet tingse olketa no needim eniwan for helpem olketa for minim Bible. Bat start long 1919, Jesus iusim “datfala wakaman wea faithful and wise” for helpem pipol bilong God for savve long olketa tru teaching insaed Bible and followim olketa teaching hia. Taem iumi obeyim wanem Bible talem, iumi keepim kongregeson klin, iumi garem peace and wan mind. Tingim diswan, ‘Waswe, bae mi faithful long Jesus and followim direction wea kam from datfala wakaman wea faithful?’

10. Wanem nao iumi lanem abaotem organization bilong Jehovah long heven from Bible buk Ezekiel?

¹⁰ Bible helpem iumi for luksavve olketa angel long heven barava organize gud tu. Olsem example, profet Ezekiel lukim wanfala vision wea Jehovah raed antap long wanfala chariot wea savve kwiktaem tane and changem gogo bilong hem followim tingting bilong Jehovah. (Ezek. 1:4-28) Datfala chariot hem piksarem organization bilong Jehovah long heven wea kwiktaem duim wanem Jehovah laekem. Datwan affectim organization bilong hem long earth tu. Tingim staka change wea gohed insaed organization bilong Jehovah long tenfala year wea go pas. Iumi mas evritaem tingim Jehovah nao bihaenem olketa change hia. Klosap nao Christ and olketa angel bae finisim disfala nogud world. Bihaen datwan, no eniwan bae spoelem nem bilong Jehovah and raet wea hem garem for rul!

11, 12. Wanem nao olketa samting wea organization bilong Jehovah duim long olketa last day distaem?

¹¹ Tingim olketa samting wea organization bilong Jehovah duim long olketa last day distaem. Construction. Staka handred brata and sista waka hard for buildim niufala hedquarter bilong Olketa Jehovah’s Witness long Warwick, New York, U.S.A. Staka thousand brata and sista raonem world volunteer for buildim olketa Kingdom Hall and olketa branch office. Datfala Worldwide Design/Construction Department nao hem lukaftarem waka hia. Iumi barava tinghae long staka volunteer wea waka hard long construction! And  pipol bilong Jehovah evriwea willing for givim contribution for wakem olketa building hia. Jehovah blessim pipol bilong hem wea hambol and faithful for sapotim waka bilong hem.—Luke 21:1-4.

¹² Education. Jehovah laekem tumas for teachim pipol bilong hem. (Isa. 2:2, 3) Tingim olketa difren skul wea iumi garem. Iumi garem Pioneer Service Skul, Skul for Olketa Kingdom Evangelizer, Gilead Skul, Skul for Olketa Niu Bethelite, Skul for Olketa Circuit Overseer and Waef, Skul for Olketa Elder, Kingdom Ministry Skul, and Skul for Olketa Branch Komiti Member and Waef. And long jw.org website bilong iumi, hem garem Bible and olketa nara pablikeson wea stap long staka handred languis. Long datfala website hem garem tu spesol sekson for olketa pikinini and olketa famili, and nara sekson hem storyim nius. Waswe, iu showim jw.org long pipol wea iu meetim long ministry and iu iusim long famili worship?

13. From iumi savve wanem Jehovah laekem, wanem nao iumi mas duim?

¹³ Hem nambawan privilege for iumi insaed organization bilong Jehovah and for garem stretfala savve! From iumi savve wanem God laekem iumi for duim, iumi mas obeyim hem and duim stret samting. And nomata staka pipol laek for duim nogud samting, iumi mas followim example bilong Jehovah for “heitim nogud samting.” (Ps. 97:10) Iumi mas no olsem pipol wea sei “gud samting hem nogud and nogud samting hem gud.” (Isa. 5:20) Iumi laek for mekem Jehovah hapi, so iumi mas klin long body, garem klinfala tingting and gudfala wei. (1 Cor. 6:9-11) Wanem Jehovah talem iumi long Bible hem for helpem iumi. Iumi lovem hem and laek for faithful long hem. Dastawe, iumi laek for obeyim hem taem iumi stap long haos, long kongregeson, long waka ples, long skul, or long eni ples. (Prov. 15:3) Tingim samfala samting moa wea iumi savve duim wea showimaot iumi faithful long God.

14. Wanem nao dadi and mami shud duim for showimaot olketa faithful long Jehovah?

¹⁴ Trainim pikinini. Bible hem garem advaes for olketa dadi and mami long hao for trainim olketa pikinini. Olketa Christian mas careful nogud tingting bilong pipol long world affectim olketa. (Eph. 2:2) Olsem example, long samfala ples olketa dadi savve ting olsem: ‘Long ples bilong mifala, hem waka bilong mami nao for teachim pikinini.’ Bat Bible sei dadi nao mas teachim pikinini abaotem Jehovah. (Eph. 6:4) Olketa dadi and mami wea lovem Jehovah bae laekem pikinini bilong olketa for followim example bilong profet Samuel wea fren gud witim Jehovah taem hem smol boy nomoa.—1 Sam. 3:19.

15. Hao nao iumi showimaot iumi faithful long Jehovah taem iumi disaedem olketa important samting?

¹⁵ Mekem olketa disison. Bifor iumi disaedem olketa important samting long laef, iumi laek for savve long tingting bilong Jehovah abaotem datwan mekem iumi savve faithful long hem. Bible and organization bilong Jehovah savve helpem iumi. Olsem example, samfala dadi and mami wea muv go long nara kantri savve sendem baby bilong olketa go bak long olketa relative long hom. Olketa duim diswan mekem olketa savve gohed waka for selen. Hem tru, hem samting wea tufala seleva mas disaedem, bat tufala shud tingim diswan: ‘Waswe, bae Jehovah hapi long disfala disison?’ (Readim Rome 14:12.) Hem gud for tingim firstaem wanem Bible talem bifor iumi disaedem  olketa important samting abaotem famili bilong iumi and abaotem waka bilong iumi. Iumi needim Jehovah for helpem iumi long laef bilong iumi.—Jer. 10:23.

16. Wanem disison nao wanfala mami mas mekem taem baby bilong hem born, and wanem nao helpem hem for mekem stretfala disison?

¹⁶ Wanfala hasband and waef muv and stap long nara kantri. Then tufala garem wanfala baby boy and tufala plan for sendem hem go bak long hom for stap witim olketa grani bilong hem. Bat long datfala taem tu, wanfala Jehovah’s Witness start for studyim Bible witim woman hia. Woman hia lanem hao hem nao mas trainim pikinini bilong hem abaotem Jehovah. (Ps. 127:3; Prov. 22:6) Hem prea long Jehovah for helpem hem duim wanem Bible talem. (Ps. 62:7, 8) And tu, hem storyim diswan long sista wea study witim hem, and olketa narawan long kongregeson. Nomata olketa fren and relative gohed talem hem for sendem baby go bak long olketa grani, hem luksavve datwan hem no stretfala samting for duim. Taem hasband lukim olketa brata and sista barava helpem waef bilong hem and baby bilong tufala, hem tinghae tumas long datwan and start for studyim Bible and attendim olketa meeting witim famili bilong hem. Masbi datfala woman hapi fogud taem hem luksavve Jehovah ansarem prea bilong hem!

17. Taem iumi studyim Bible witim samwan, wanem direction nao iumi shud followim?

¹⁷ Followim direction. Sapos iumi faithful long God, bae iumi followim direction wea iumi kasem from organization bilong hem. Olsem example, tingim wanem iumi mas duim no longtaem bihaen iumi start for studyim datfala buk Wanem Nao Really Samting wea Bible Teachim? witim samwan. Iumi kasem instruction for helpem student for savve long samfala samting moa abaotem organization bilong Jehovah. Iumi savve iusim tu-thri minute bihaen each study for duim datwan. Iumi savve showim hem datfala video Wanem Nao Olketa Duim Long Wanfala Kingdom Hall? and storyim datfala brochure Hu Nao Duim Wanem Jehovah Laekem Distaem? Bihaen iumi finisim Wanem Bible Teachim buk witim Bible study, iumi savve studyim buk “Gohed Kasem Gud Samting From Love Bilong God” for helpem hem for garem strongfala faith. (Col. 2:7) Nomata hem baptaes taem iumi gohed for study witim hem, iumi mas finisim disfala mek-tu buk witim hem. Waswe, iu followim disfala direction wea iumi kasem from organization bilong Jehovah?

18, 19. Wanem nao samfala reason why iumi shud thankiu long Jehovah?

¹⁸ Staka reason stap for iumi thankiu long Jehovah! Wanfala main samting wea hem duim for iumi nao hem “mekem iumi laef and savve wakabaot and duim samting.” (Acts 17:27, 28) And tu, hem givim iumi Bible. Olsem olketa Christian long Thessalonica, iumi barava tinghae long disfala present bikos hem message wea kam from God.—1 Thess. 2:13.

¹⁹ Bible hem helpem iumi for fren gud witim Jehovah, and Jehovah savve fren gud witim iumi tu. (Jas. 4:8) Iumi hapi tumas bikos Dadi bilong iumi long heven hem invaetem iumi for kam insaed long organization bilong hem! Iumi garem sem tingting olsem man wea raetem psalm wea sei: “Talem thankiu long Jehovah bikos hem gud. Love bilong hem stap for olowe.” (Ps. 136:1) Long evri verse bilong Psalm 136, hem garem disfala toktok “love bilong hem stap for olowe.” Tru nao, sapos iumi faithful long Jehovah and followim direction wea kam from organization bilong hem, bae hem givim iumi laef olowe and bae hem lovem iumi for olowe!