Change for Fitim Niu Kongregeson Bilong Iu
ALLEN, * muv go long niu kongregeson wea stap winim 1,400 kilometer from hom bilong hem. Hem sei, “Mi lelebet fraet taem mi muv kam long hia. Mi no savve sapos bae mi garem olketa niu fren or olketa bae acceptim mi.”
Sapos iu muv go long difren kongregeson, maet iu tu feel fraet lelebet. Wanem nao savve helpem iu for change fitim datfala kongregeson? Wanem nao bae iu duim sapos olketa change hia hem hard lelebet winim wanem iu tingim? Sapos iu stap long kongregeson for longtaem finis, wanem nao iu savve duim for helpem olketa niu wan wea just kam?
WANEM NAO SAVVE HELPEM IU FOR CHANGE AND GOHED GUD?
Tingim disfala example: Tree wea olketa aotem and plantim long nara ples, bae wik and no luk fresh. Taem olketa aotem datfala tree, maet olketa katem olketa rut mekem hem isi for karem go long nara ples. Bat taem olketa plantim tree hia, olketa niu rut bae start for grow moa. Taem iu muv long niu kongregeson, maet iu no feel hapi and wikdaon lelebet. Taem iu stap long old kongregeson bilong iu, iu garem olketa strongfala rut, olsem staka klos fren and iu getius for duim olketa spiritual samting followim schedule bilong iu. Bat distaem iu need for garem olketa niu rut mekem iu savve gohed gud insaed niu kongregeson. Wanem nao bae helpem iu? Hem important for followim olketa Bible principle. Iumi bae storyim samfala principle hia.
Man wea readim Bible evriday “bae kamap olsem tree wea olketa plantim klosap long wata, wea garem frut long season bilong hem and wea leaf bilong hem no savve dae, and bae hem win long evri samting wea hem duim.”—Ps. 1:1-3.
Olsem tree wea evritaem needim wata for grow gud, iumi tu mas evritaem kasem strong from toktok bilong God mekem iumi gohed gud. Dastawe, iumi mas readim Bible evriday and evritaem attendim meeting. Gohed for duim famili worship and duim study seleva. Duim olketa spiritual samting wea iu bin duim bifor mekem iu gohed fren gud witim Jehovah.
“Man wea strongim olketa narawan bae kasem strong tu.”—Prov. 11:25.
Iu bae kamap strong and iu savve kwiktaem change sapos iu evritaem duim ministry. Kevin, wanfala elder sei: “Samting wea helpem mi and waef bilong mi, hem nao for auxiliary pioneer no longtaem bihaen mitufala joinim wanfala niu kongregeson. Mitufala kwiktaem savve long olketa brata and sista, olketa pioneer, and territory bilong kongregeson.” Roger, wea muv go long wanfala ples wea winim 1,600 kilometer from ples wea hem stap bifor, hem sei: “Best samting for helpem iu getius long niu kongregeson, hem for evritaem share long preaching waka. And tu, iu savve talem olketa elder iu willing for duim eni samting, maet for klinim Kingdom Hall, volunteer long eni part long meeting, or iu savve tekem samfala long car for go long meeting. Taem olketa brata and sista lukim iu willing for help, olketa bae laek for fren witim iu.”
‘Iufala mas lovem narawan.’—2 Cor. 6:13.
Showimaot love long staka difren brata and sista. Bihaen Melissa and famili muv go long wanfala niu kongregeson, olketa traem best for garem olketa niufala fren. Hem sei: “Mifala savve storystory long Kingdom Hall bifor and bihaen meeting. Datwan givim mifala chance for savve gud long olketa narawan and no just for sei hello nomoa.” Wei for duim
olsem helpem datfala famili for kwiktaem savve long nem bilong narawan. And tu, olketa showimaot love taem olketa invaetem narawan long haos, and datwan strongim wei wea olketa fren gud tugeta. Melissa sei tu: “Mifala tekem phone namba bilong each other mekem mifala ringim each other and savve duim olketa spiritual samting tugeta or olketa nara samting.”Sapos hem hard for iu story witim narawan, iu savve duim samfala samting for helpem iu for winim datfala feeling. Olsem example, trae for smile nomata iu fraet. Taem iu smile, olketa narawan bae laek story witim iu. Olsem Bible talem, “hapi feis savve mekem heart feel gud.” (Prov. 15:30, ftn.) Rachel sei: “Mi man for shame.” Nomata olsem, hem muv go stap long ples wea farawe from hom bilong hem. Hem sei tu: “Samfala taem mi forcem miseleva for story witim olketa brata and sista long niu kongregeson. Mi luk for eniwan wea sidaon seleva long Kingdom Hall, wea no story witim eniwan. Maet hem man for shame olsem mi tu.” Hao sapos iu markem goal for story witim eniwan wea iu no savve long hem, bifor or bihaen meeting?
Maet, insaed first tu-thri week, iu barava hapi for meetim olketa didifren wan. Bat gogo, datfala feeling start for lus nao. Taem olsem, maet iu need for gohed duim best for faendem samfala niu fren moa.
Tree wea olketa aotem and plantim long nara ples, bae no luk fresh. Bat bihaen olketa plantim moa, olketa niu rut bae start for grow
HEM TEK TAEM FOR MEKEM OLKETA CHANGE
Samfala tree tek longtaem for olketa grow long niu ples. Long sem wei tu, no evriwan savve change kwiktaem for fitim niu kongregeson. Sapos iu bin muv for lelebet longtaem finis and iu stragol yet for change, wei for followim olketa Bible principle hia bae helpem iu:
“Iumi mas gohed for duim gudfala samting, bikos long taem wea God markem, bae iumi kasem gud samting sapos iumi no givap.”—Gal. 6:9.
Samfala taem wei for change no happen kwiktaem, so iu need for patient. Olsem example, staka missionary wea go skul long Gilead, mas stap long assignment long difren kantri for staka year bifor olketa savve go bak for holiday long hom. Datwan helpem olketa for fren gud witim olketa brata and sista and change fitim culture long datfala ples.
Alejandro, hem muv staka taem finis, so hem savve hao hem no isi for change fitim niu ples. Hem sei: “Bihaen lastfala taem wea mitufala muv, waef bilong mi sei, ‘Evri fren bilong mi stap kam long kongregeson wea iumi lusim finis!’” Then hem remindim waef bilong hem hao lastaem tufala muv, hem talem sem toktok tu. And insaed tufala year wea tufala stap long datfala kongregeson, waef bilong hem bin traem best for savve long staka and kamap gudfala fren bilong olketa.
“No sei, ‘Why nao olketa day bifor moabeta winim distaem?’ Bikos hem no wise for iu ask olsem.”—Eccl. 7:10.
No comparem niu kongregeson witim datwan wea iu joinim bifor. Olsem example, olketa brata and sista long niu kongregeson maet garem olketa difren wei from olketa wea stap long old kongregeson bilong iu. Long sem wei wea iu laekem olketa for tingim gud saed bilong iu, iu tu mas duim sem samting long olketa. Samfala niu wan sapraes for savve taem olketa muv kam olketa askem olketa seleva disfala kwestin, ‘Waswe, mi really lovem evri brata and sista bilong mi’?—1 Pet. 2:17.
“Gohed for ask and iufala bae kasem samting wea iufala ask for hem.”—
Gohed for prea for askem help. David, wea elder sei, “No trae for deal witim datwan seleva. Jehovah fit for helpem iumi for duim staka samting. So prea abaotem datwan!” Rachel, wea iumi storyim finis, talem sem samting tu. Hem sei, “Sapos mi and hasband no feel klos long kongregeson, mitufala savve prea long Jehovah and sei, ‘Plis helpem mitufala for savve sapos mitufala duim samting wea mekem hem hard for olketa narawan fren witim mitufala.’ Bihaen datwan, mitufala traem best for spendem moa taem witim olketa brata and sista.”
Iufala dadi and mami, sapos pikinini bilong iufala no getius long datfala niu kongregeson, hem gud for prea tugeta abaotem datwan. Helpem olketa for garem olketa niu fren and arrangem taem for olketa associate tugeta witim olketa narawan wea bae encouragem olketa.
KAEN LONG OLKETA WEA JUST MUV KAM
Wanem nao iu savve duim for helpem olketa niu wan wea just muv kam long kongregeson? Taem iu first meetim olketa, traem best for fren gud witim olketa. For duim datwan, trae for tingim wanem nao iu laekem olketa narawan for duim sapos iu nao just kam, then duim datwan for olketa. (Matt. 7:12) Waswe, iu savve invaetem olketa niu wan for joinim famili worship or lukluk long JW Broadcasting tugeta? Waswe, iu savve invaetem olketa for waka witim iu long ministry? Bae olketa no forgetim kaenfala fasin bilong iu sapos iu invaetem olketa for kam kaikai. Wanem moa samfala samting wea iu savve duim for helpem olketa niu wan?
Carlos sei, “Taem mifala arrive long niu kongregeson, wanfala sista raetem nem bilong olketa stoa wea salem olketa samting wea cheap lelebet. Datwan barava helpem mifala.” Olketa wea kam from nara kantri maet needim help for savve wanem kaen kaleko for werem long ples wea hot, cold, or long taem bilong rain. Iu savve helpem olketa tu long ministry taem iu story abaotem history bilong datfala ples or explainim wanem pipol long datfala ples bilivim.
BLESSING FROM IU TRAEM BEST FOR CHANGE
Allen, wea iumi storyim finis, hem stap long datfala kongregeson for winim wanfala year, hem sei: “Firstaem mi mas barava waka hard for savve long olketa brata and sista. Bat distaem, mifala olsem famili nao and mi barava hapi.” Allen luksavve nomata hem muv hem nating lusim eni fren bilong hem. Bat really hem kasem staka niu fren winim bifor, and luk olsem olketa bae fren for olowe.
^ par. 2 Mifala changem samfala nem.