Waswe, Jehovah Kamap Sef Ples Bilong Iu?
“Jehovah sevem olketa wakaman bilong hem. Olketa wea mekem Jehovah kamap sef ples bilong olketa, bae olketa no guilty.”—PS. 34:22.
SONG: 49, 65
1. From iumi evriwan sin, hao nao feeling bilong staka pipol wea faithful long God?
APOSOL Paul sei: “Mi ia, mi iusles man nomoa!” (Rome 7:24) Staka pipol wea faithful long God distaem savve feel sorre and wikdaon olsem Paul tu. Why nao olsem? From iumi evriwan sin and hard for iumi evritaem duim samting wea mekem Jehovah hapi. Datwan savve mekem iumi feel sorre. So samfala Christian wea duim serious sin savve feel olsem hem hard for Jehovah forgivim olketa.
2. (a) Hao nao Psalm 34:22 showimaot olketa wea worshipim Jehovah no need for feel guilty tumas? (b) Wanem nao bae iumi lanem long disfala study? (Lukim box “ Hem Leson or Hem Piksarem Samting?”)
2 Bible sei sapos Jehovah kamap sef ples bilong iumi, bae iumi no feel guilty tumas. (Readim Psalm 34:22.) Hao nao Jehovah savve kamap sef ples bilong iumi? Wanem nao iumi mas duim mekem Jehovah showim mercy and forgivim iumi? Iumi bae kasem ansa taem iumi story raonem arrangement bilong Jehovah for olketa Israelite garem olketa taon for stap sef. Olketa Israelite followim datfala arrangement from olketa stap anda long Law bilong Moses, wea hem change long Pentecost 33 C.E. Nomata olsem, datfala Law hem from Jehovah. So arrangement hia bae helpem iumi for luksavve long tingting bilong Jehovah abaotem sin, olketa wea duim sin, and olketa wea repent. Firstaem, bae iumi storyim why olketa Israelite garem olketa taon olsem and hao datfala arrangement hem waka.
“CHUSIM OLKETA TAON FOR STAP SEF”
3. Wanem nao olketa Israelite mas duim long man wea min for killim dae narawan?
3 Wei for killim dae man, hem serious samting long Jehovah. Sapos wanfala Israelite min for killim dae narawan, klos relative bilong man wea dae nao bae “pei bak” for laef bilong hem. Datfala klos relative mas killim dae datfala man. (Num. 35:19) Diswan hem for changem bak laef bilong man wea innocent. Sapos olketa no kwiktaem killim dae datfala man wea guilty, bae datfala Promis Land no klin or no holy. Jehovah sei: “Iufala mas no mekem ples wea iufala stap for no klin bikos blood [bilong man wea olketa killim dae] savve mekem ples for no holy.”—Num. 35:33, 34.
4. Hao nao olketa Israelite deal witim man wea no min for killim dae samwan?
4 Bat, hao nao olketa Israelite deal witim man wea no min for killim dae samwan? Nomata hem wanfala accident, hem still guilty bikos hem killim dae man wea innocent. (Gen. 9:5) Bat Jehovah sei olketa Israelite shud showim mercy long hem, and letem datfala man ranawe go long wanfala long sixfala taon for stap sef. Taem hem stap insaed datfala taon, hem bae sef. Bat hem mas stap long there go kasem taem hae priest hem dae.—Num. 35:15, 28.
5. Hao nao arrangement for garem taon for stap sef helpem iumi for minim gud wei bilong Jehovah?
5 Jehovah nao mekem arrangement for olketa Israelite garem olketa taon for stap sef, and no olketa man. Jehovah sei long Joshua: “Talem olketa Israelite for ‘chusim olketa taon for stap sef.’” Jehovah nao markem olketa taon hia for “kamap olketa taon wea holy.” (Josh. 20:1, 2, 7, 8) From Jehovah nao disaedem diswan, hem helpem iumi for minim mercy bilong hem. And diswan teachim iumi hao for mekem Jehovah kamap sef ples bilong iumi.
“HEM MAS GO STORY LONG OLKETA ELDER ABAOTEM SAMTING WEA HAPPEN”
6, 7. (a) Storyim wanem olketa elder duim for deal witim man wea no min for killim dae narawan. (Lukim piksa long start bilong study.) (b) Why nao hem important for datfala man story witim olketa elder?
6 Sapos wanfala Israelite no min for killim dae samwan, hem mas ran go long wanfala taon for stap sef and “hem mas go story long olketa elder abaotem samting wea happen” long front gate bilong datfala taon. Olketa elder long there mas kaen long hem. (Josh. 20:4) Then bihaen, olketa mas sendem hem go bak long taon wea hem killim dae datfala man, mekem olketa elder long there judgem hem. (Readim Numbers 35:24, 25.) Sapos olketa elder hia faendaot datwan hem wanfala accident, then olketa bae sendem hem go bak long datfala taon for stap sef.
7 Why nao datfala man wea ran go long datfala taon mas story witim olketa elder? Olketa elder garem waka for mek sure nation bilong Israel hem klin and mas helpem tu datfala man for kasem mercy bilong Jehovah. Wanfala savveman sei sapos datfala man no go story witim olketa elder, olketa maet killim hem dae. And tu, from hem no obeyim samting God talem, dae bilong hem bae stap long hand bilong hemseleva. Datfala man wea no min for killim dae narawan mas askem help and mas followim samting olketa talem mekem hem savve laef. Sapos hem no go stap long wanfala taon for stap sef, klos relative bilong man wea dae bae garem raet for killim hem dae.
8, 9. Why nao Christian wea duim serious sin mas story witim olketa elder?
Jas. 5:14-16) Mek-tu samting, olketa elder stap for helpem olketa wea repent for worshipim moa Jehovah long wei wea hem acceptim and for no duim sem mistek moa. (Gal. 6:1; Heb. 12:11) Mek-thri samting, diswan hem waka bilong olketa elder and olketa kasem training long hao for encouragem and helpem olketa wea repent for deal witim sorre and guilty feeling wea olketa garem. Jehovah sei olketa elder hia olsem “wanfala ples for haed from bigfala rain.” (Isa. 32:1, 2, ftn.) Disfala arrangement hem wanfala wei wea Jehovah showim mercy long iumi.
8 Sapos wanfala Christian distaem duim wanfala serious sin, hem need for go story witim olketa elder mekem olketa savve helpem hem for fren bak witim Jehovah. Why nao diswan hem barava important? First samting, Jehovah nao markem olketa elder for judgem case bilong olketa wea duim serious sin, olsem Bible talem. (9 Staka wea worshipim Jehovah distaem feel hapi bihaen olketa story witim olketa elder and kasem help from olketa. Olsem example, wanfala brata wea nem bilong hem Daniel duim wanfala serious sin, bat hem no kwiktaem go story witim olketa elder. Hem sei: “From tu-thri month go pas finis, mi tingse olketa elder bae hard for duim eniting for helpem mi nao. Bat mi evritaem fraet nogud eniwan bae faendaot long sin wea mi duim, and taem mi prea long Jehovah mi mas sei sorre long start bilong prea bilong mi.” Gogo, hem askem olketa elder for helpem hem. Taem hem ting go bak, hem sei: “Hem tru, mi barava fraet for go story witim olketa. Bat bihaen, mi feel olsem olketa aotem bigfala hevi wea mi karem. Distaem mi feel free for prea long Jehovah.” Hem garem klin konsens and hem kamap ministerial servant.
“HEM MAS RAN GO LONG WANFALA LONG OLKETA TAON HIA”
10. For kasem forgiveness, man wea no min for killim dae narawan mas duim wanem?
10 For kasem forgiveness, datfala man wea no min for killim dae narawan mas kwiktaem ran go long wanfala taon for stap sef. (Readim Joshua 20:4.) For hem no dae, hem mas ran go kwiktaem long datfala taon and hem mas no go aot from there. Datwan hem big samting for datfala man duim. Hem mas lusim waka bilong hem, naes haos bilong hem, and hem no free for muv raon long olketa nara ples go kasem taem hae priest hem dae. * (Num. 35:25) Nomata olsem, hem mas duim datwan nao, bikos sapos enitaem hem lusim datfala taon bae datwan showimaot hem no tinghae long laef bilong man wea hem killim dae, and laef bilong hemseleva bae stap long danger.
11. Hao nao Christian wea repent savve showimaot hem tinghae long mercy bilong God?
11 Distaem tu, man wea sin and repent mas duim samting for God forgivim hem. Hem mas stop for duim olketa sin. Diswan minim tu hem mas stap klia long eni samting wea bae lead go long wei for duim olketa serious sin. Aposol Paul story abaotem olketa Christian long Corinth wea repent. Hem sei: “From sorre bilong iufala hem fitim wanem God hem laekem, iufala barava traem best bilong iufala. Iufala duim samting for pruvim iufala no rong. Iufala feel nogud taem samting hem no stret. Iufala fraet long God. Iufala laekem tumas for repent. Iufala strong for duim samting. Iufala stretem rong samting wea happen.” (2 Cor. 7:10, 11) So sapos iumi waka hard for no duim sin, datwan showimaot iumi barava feel sorre long samting iumi duim, and iumi no laek mekius long mercy bilong Jehovah.
12. Wanem nao maet wanfala Christian need for lusim mekem hem gohed kasem mercy bilong Jehovah?
12 Wanem nao maet wanfala Christian need for lusim mekem hem gohed kasem mercy bilong Jehovah? Hem mas lusim eni samting wea maet leadim hem for duim sin moa, nomata datwan hem samting wea hem barava laekem. (Matt. 18:8, 9) Olsem example, sapos olketa fren bilong iu savve mekem iu for duim olketa samting wea Jehovah no laekem, waswe, bae iu stop for associate witim olketa? Sapos iu no savve kontrolem wei wea iu drinkim alcohol, waswe, iu willing for stap klia long eni samting wea maet mekem iu drink tumas? Sapos iu stragol for kontrolem feeling for laek durong, waswe, bae iu stap klia long olketa movie, website, or nara samting wea maet mekem iu for garem rong tingting? Tingim diswan, sapos iu traem best for obeyim olketa law bilong Jehovah, iu no hard waka nating. Taem iumi tingse Jehovah lusim iumi, bae iumi barava feel nogud. Bat taem iumi luksavve long ‘love bilong Jehovah wea stap for olowe,’ datwan mekem iumi barava hapi.—Isa. 54:7, 8.
“OLKETA TAON HIA HEM SEF PLES FOR IUFALA”
13. Storyim why man wea ran kam long taon for stap sef hem fit for stap hapi and feel sef.
13 Taem datfala man ran kam insaed datfala taon, hem sef nao. Jehovah sei: “Olketa taon hia hem sef ples for iufala.” (Josh. 20:2, 3) Jehovah sei wantaem nomoa bae olketa judgem datfala case. And tu, man for pei bak mas no go insaed datfala taon for killim dae datfala man. Taem datfala man gohed stap insaed datfala taon, Jehovah bae protectim hem. Datfala taon no olsem prison. Datfala man no need for fraet, hem savve waka, helpem olketa narawan, and gohed for worshipim Jehovah. Hem savve hapi and satisfae!
Trustim wei wea Jehovah forgive (Paragraf 14-16 storyim diswan)
14. Wanem nao Christian wea repent hem fit for trustim?
14 Samfala wea worshipim Jehovah wea duim serious sin gohed feel guilty nomata olketa repent finis. Samfala tingse Jehovah bae no forgetim samting wea olketa duim. Sapos iu ting olsem, plis trustim hao taem Jehovah forgivim iu, hem bae no tingim moa, so iu no need for feel guilty olowe. Diswan nao Psalm 103:8-12.
samting wea happen long Daniel wea iumi bin storyim. Bihaen olketa elder deal witim hem and helpem hem for garem klin konsens, hem sei: “Mi feel free and mi no feel guilty nao. Taem Jehovah forgivim datfala sin, hem finis nao. Jehovah hem sei hem bae aotem olketa hevi and putim farawe from iu. And bae iu no tingim olketa moa.” Taem man ran go stap insaed taon for stap sef, hem no need for fraetem datfala man for pei bak. Long sem wei tu, bihaen Jehovah forgivim sin bilong iumi, iumi no need for fraet and tingse bae hem judgem iumi moa for datfala sin.—Readim15, 16. From Jesus hem Hae Priest and hem givim ransom, hao nao datwan mekem iu sure God savve showimaot mercy long iu?
15 Iumi distaem barava fit for trustim mercy bilong Jehovah winim olketa Israelite bifor. Bihaen Paul sei hem feel “iusles” from hem nating obeyim Jehovah evribit, hem sei: “Mi thankiu long God wea hem sevem mi bikos long samting wea Lord bilong iumi Christ Jesus hem duim!” (Rome 7:25) Wanem nao hem minim? Nomata Paul duim nogud samting bifor and hem repent. Hem mas gohed faet againstim feeling for laek duim nogud samting. Bat hem trustim Jehovah for forgivim hem thru long Jesus. From Jesus givim ransom, iumi distaem savve garem klin konsens and peace long mind bilong iumi. (Heb. 9:13, 14) From Jesus hem Hae Priest, “hem savve barava sevem tu olketa wea prea long God long nem bilong hem. Hem savve sevem olketa bikos hem stap olowe for hem savve askem God for helpem olketa.” (Heb. 7:24, 25) Wei wea olketa Israelite bifor garem Hae Priest hem mekem olketa sure Jehovah bae forgivim sin bilong olketa. So from Jesus hem Hae Priest bilong iumi, iumi barava sure “hem showimaot mercy long iumi and kaen long iumi taem iumi needim help.”—Heb. 4:15, 16.
16 So for Jehovah kamap sef ples bilong iumi, iumi need for showimaot faith long sakrifaes bilong Jesus. Hem tru, ransom hem for helpem evriwan, bat tingim, datwan hem for iuseleva tu. (Gal. 2:20, 21) Garem faith hao datfala ransom mekem iu kasem forgiveness from Jehovah. And tu, hem givim iu hope for laef olowe. Sakrifaes bilong Jesus hem wanfala present bilong Jehovah for iu!
17. Why nao iu laekem Jehovah for kamap sef ples bilong iu?
17 Olketa taon for stap sef helpem iumi for minim gud mercy bilong Jehovah. Disfala arrangement from God teachim iumi hao laef hem holy. And tu, iumi lanem wei wea olketa elder savve helpem iumi and wanem iumi need for duim for showimaot iumi barava repent. And iumi lanem why iumi barava sure Jehovah forgivim iumi. Wanem nao iu duim for Jehovah kamap sef ples bilong iu? No eni nara wei for iumi stap sef, Jehovah nomoa hem sef ples bilong iumi! (Ps. 91:1, 2) Long next study, bae iumi storyim hao datfala arrangement bilong olketa taon for stap sef helpem iumi for followim nambawan example bilong Jehovah for showimaot justice and mercy.
^ par. 10 Samfala buk bilong olketa Jew story abaotem wei wea olketa klos famili member bilong datfala man savve go stap witim hem long taon for stap sef.