1, 2. (a) Wanem prize nao olketa wea worshipim God luk forward for kasem? (b) Wanem nao savve helpem iumi for gohed luk forward for kasem datfala prize? (Lukim piksa long start bilong study.)

OLKETA anointed Christian garem nambawan hope. Aposol Paul sei disfala hope hem “prize for laef long heven wea God givim.” (Phil. 3:14) Olketa luk forward for rul long heven witim Jesus Christ insaed Kingdom and waka witim hem for helpem pipol for kamap perfect. (Rev. 20:6) Datwan barava nambawan hope! Olketa nara sheep luk forward for kasem difren prize. Olketa hope for stap olowe long Paradaes earth and diswan mekem olketa barava hapi!—2 Pet. 3:13.

² Paul laekem olketa nara anointed Christian for gohed faithful and kasem datfala prize. Hem sei: “Tingim evritaem olketa samting long heven.” (Col. 3:2) Diswan minim olketa mas evritaem tingim nambawan hope for go long heven. (Col. 1:4, 5) Wei for ting raonem blessing wea Jehovah bae givim savve  helpem iumi evriwan for gohed luk forward for kasem datfala prize, nomata long heven or long earth.—1 Cor. 9:24.

3. Olketa wanem warning nao Paul talem for olketa Christian?

³ Paul warnim tu olketa Christian abaotem olketa samting wea savve stopem olketa for kasem datfala prize. Olsem example, hem raet long olketa long Colossae bikos samfala laea Christian tingse olketa savve mekem God hapi taem olketa followim Law bilong Moses winim wei for showimaot faith long Christ. (Col. 2:16-18) Paul storyim olketa samting wea savve stopem man for no kasem datfala prize wea iumi distaem tu mas deal witim. Hem explainim hao for rejectim feeling for laek durong, and wanem iumi savve duim taem iumi garem problem witim olketa brata and sista, or insaed famili bilong iumi. Advaes bilong Paul savve helpem iumi distaem. So iumi bae storyim samfala warning wea hem raetem for olketa long Colossae.

4. Why nao feeling for laek durong savve stopem iumi for kasem datfala prize?

⁴ Bihaen Paul storyim datfala nambawan hope, hem sei: “So killim dae feeling bilong iufala for laek durong, for duim samting wea no klin, for ova tumas for laekem sex, for laekem tumas for duim nogud samting, and for greedy.” (Col. 3:5) Feeling for laek durong savve barava strong and mekem iumi lusim Jehovah and hope bilong iumi for future. Wanfala brata wea durong bat bihaen hem kam bak long kongregeson, hem sei, “Datfala feeling for laek durong kamap strong tumas, and mi no stopem datwan, gogo hem tu leit.”

5. Hao nao iumi savve protectim iumiseleva taem samfala samting kamap?

⁵ Iumi need for barava careful taem samting kamap wea maet mekem iumi no obeyim olketa standard bilong Jehovah. Olsem example, tufala wea laek marit mas careful long olketa samting olsem, wei for tasim each other, kiss, and for stap seleva tugeta. (Prov. 22:3) Olketa narataem wea wanfala Christian need for keakea, hem taem wea hem go long nara ples for duim bisnis or taem hem waka witim samwan wea hem opposite sex. (Prov. 2:10-12, 16) Wanem nao iu savve duim for protectim iuseleva? Showimaot klia iu wanfala Jehovah’s Witness. Showimaot respect and no plei raon witim feeling bilong narawan bikos diswan savve mekem iu kasem trabol. Iumi mas careful tu taem iumi feel sorre or lonely, bikos taem olsem iumi maet laekem samwan for lovem iumi. Sapos disfala feeling kamap strong tumas maet gogo hem mekem iumi acceptim eniwan nomoa. Datwan barava danger samting. Sapos enitaem iu feel olsem, depend long Jehovah and olketa brata and sista for helpem iu and no letem datwan stopem iu for kasem datfala prize.—Readim Psalm 34:18; Proverbs 13:20.

6. Wanem nao iumi shud tingim taem iumi chusim olketa movie, music, or buk?

⁶ For killim dae feeling for laek durong, iumi mas rejectim movie, music, or buk wea storyim wei for durong. Diswan mekem iumi tingim Sodom and Gomorrah. (Jude 7) Olketa wea wakem olketa movie, music, or buk mekem wei for durong luk olsem normal samting nomoa wea no savve spoelem man. Iumi mas evritaem careful and no just acceptim olketa samting olsem. Taem iumi laek for lukim olketa movie, lisin long music, or readim buk, iumi need for chus gud nogud datwan stopem iumi for kasem prize for laef olowe.—Prov. 4:23.

7. Wanem nao samfala problem wea savve kamap long kongregeson?

⁷ Wei wea iumi stap insaed Christian kongregeson hem wanfala blessing. Iumi studyim Bible long olketa meeting and iumi lovem and sapotim each other. Diswan helpem iumi luk forward for kasem datfala prize. Bat samfala taem wei for no minim each other savve mekem problem kamap midolwan olketa brata and sista. Sapos iumi no stretem olketa problem hia, datwan bae mekem wei for feel nogud kamap.—Readim 1 Peter 3:8, 9.

8, 9. (a) Olketa wanem fasin nao savve helpem iumi for kasem datfala prize? (b) Wanem nao savve helpem iumi for gohed garem peace taem wanfala Christian mekem iumi feel nogud?

⁸ Iumi no laek letem wei for feel nogud stopem iumi for kasem datfala prize. Paul talem olketa Christian wanem for duim taem hem sei: “From God chusim iufala and iufala holy and hem lovem iufala, showimaot love, sorre long pipol, kaen long olketa, hambol, no raf, and patient. Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala. Nara samting moa, showimaot love, bikos datwan nao hem barava mekem pipol for wan mind.”—Col. 3:12-14.

⁹ Wei for kaen and showimaot love savve helpem iumi for forgivim narawan. Sapos iumi feel nogud long samting wea narawan talem or duim, tingim bak taem wea iumiseleva talem and duim samting wea no kaen long narawan. Iumi tinghae tumas long wei wea olketa brata and sista kaen and showimaot love taem olketa forgivim iumi. (Readim Ecclesiastes 7:21, 22.) Iumi hapi from Christ kaen long iumi and helpem iumi for garem wan mind. (Col. 3:15) Iumi evriwan lovem sem God, preachim sem message, and garem olketa sem problem. Sapos iumi kaen, lovem and forgivim each other, kongregeson bae wan mind and iumi savve gohed luk forward for kasem datfala prize.

10, 11. (a) Why nao wei for jealous hem nogud? (b) Hao nao iumi savve mek sure wei for jealous no stopem iumi for kasem datfala prize?

¹⁰ Bible showimaot wei for jealous savve stopem iumi for kasem datfala prize. Olsem example, Cain jealous long Abel and killim hem dae. Korah, Dathan, and Abiram jealous long Moses and againstim hem. King Saul tu jealous long David and trae for killim hem. Samting wea Bible talem hem barava tru: “Wei for barava jealous tumas and laek raoa olowe hem mekem evri samting olobaot and hem mekem pipol duim enikaen nogud samting.”—Jas. 3:16.

¹¹ Sapos iumi waka hard for kaen and showimaot love, bae iumi no jealous. Bible sei: “Man wea garem love hem patient and kaen. Hem no savve jealous.” (1 Cor. 13:4) For mek sure iumi no garem wei for jealous, iumi shud garem sem tingting olsem Jehovah. Iumi need for ting long olketa brata and sista olsem part long wanfala body, wea hem nao kongregeson. Bible sei: “Sapos wanfala part kasem praise, evri nara part hapi tu.” (1 Cor. 12:16-18, 26) Sapos wanfala brata kasem blessing, iumi no jealous bat iumi hapi witim hem. Tingim gudfala example bilong Jonathan, son bilong King Saul. Jonathan no jealous taem Jehovah chusim David for kamap king. Bat hem encouragem and sapotim David. (1 Sam. 23:16-18) Waswe, bae iumi kaen and showimaot love olsem Jonathan?

12. Wanem advaes from Bible nao savve helpem famili for kasem datfala prize?

¹² Taem famili followim olketa Bible principle, olketa bae garem peace, hapi and bae kasem datfala prize. Paul givim disfala advaes for olketa famili: “Iufala olketa waef mas stap anda long hasband bilong iufala, bikos datwan hem stret samting for olketa wea followim Lord for duim. Iufala olketa hasband mas gohed lovem waef bilong iufala and no barava kros long olketa. Iufala olketa pikinini mas evritaem obeyim dadi and mami bilong iufala, bikos diswan hem mekem Lord for barava hapi. Iufala olketa dadi mas no mekem olketa pikinini bilong iufala for kros, nogud nao olketa wikdaon.” (Col. 3:18-21) Tru nao, taem famili followim datfala advaes wea Paul raetem bae hem barava helpem hasband, waef, and olketa pikinini.

13. Hao nao Christian sista savve helpem hasband for laek worshipim Jehovah?

¹³ Maet iu wanfala sista wea hasband no worshipim Jehovah. Wanem nao bae iu duim sapos iu tingse hem no treatim iu gud? Waswe sapos iu kros and argue, bae datwan helpem iu for stretem datfala problem? Nomata sapos iu win for mekem hem followim tingting bilong iu, waswe, bae datwan mekem hem laek worshipim  Jehovah? Ating nomoa. Bat sapos iu respectim hem from hem hed bilong famili, iu bae helpem famili for garem peace and datwan bae givim praise long Jehovah. Gudfala example bilong iu maet mekem hasband for laek worshipim Jehovah, and iutufala evriwan savve kasem datfala prize.—Readim 1 Peter 3:1, 2.

14. Wanem nao Christian hasband savve duim sapos waef no respectim hem?

¹⁴ Maet iu wanfala brata wea waef no worshipim Jehovah. Wanem nao iu savve duim sapos iu tingse waef no respectim iu? Sapos iu shoutim hem for showimaot hu nao boss, waswe, bae hem respectim iu? Barava nomoa nao. God expectim iu for showimaot love olsem Jesus. (Eph. 5:23) Jesus wea hed bilong kongregeson hem evritaem patient and showimaot love. (Luke 9:46-48) Sapos iu followim example bilong Jesus, gogo maet waef bilong iu bae laek for worshipim Jehovah.

15. Hao nao Christian hasband savve showimaot hem lovem waef bilong hem?

¹⁵ Jehovah talem olketa hasband, “Gohed lovem waef bilong iufala and no barava kros long olketa.” (Col. 3:19) Hasband wea garem love bae showimaot respect taem hem willing for lisin long tingting bilong waef and showimaot hem tinghae long wanem hem talem. (1 Pet. 3:7) Nomata sapos hasband no evritaem duim wanem waef laekem, wei for lisin long waef savve helpem hem for mekem olketa gudfala disison. (Prov. 15:22) Hasband wea showimaot love bae no forcem waef for respectim hem. Bat bae hem trae for duim olketa samting wea bae mekem waef laek respectim hem. Taem hasband lovem waef and pikinini, olketa bae hapi for worshipim Jehovah tugeta and kasem datfala prize for laef olowe.

16, 17. Iufala young wan, wanem nao savve helpem iu for no feel nogud long parents bilong iu?

¹⁶ Maet iu wanfala teenager and iu tingse parents bilong iu nating minim iu or olketa strict tumas. Maet diswan mekem iu feel nogud and iu tingse iu no laek worshipim Jehovah nao. Bat sapos iu lusim Jehovah, bae iu faendemaot no eniwan long world lovem iu olsem parents bilong iu and olketa long kongregeson.

¹⁷ Tingim, sapos parents no disciplinem iu, hao nao bae iu savve sapos olketa really lovem iu? (Heb. 12:8) Bat, from olketa no perfect maet wei wea olketa disciplinem iu nao mekem iu feel nogud. No ting long wei wea olketa duim datwan, bat trae for tingim why olketa duim datwan. No kros and kwiktaem duim samting. Bible sei: “Man wea no kwiktaem for toktok hem garem gudfala tingting, and man wea garem wei for luksavve hem no kwiktaem for kros.” (Prov. 17:27) Markem goal for kamap wanfala mature Christian wea willing for acceptim kaonsel and lane from datwan, and no wari abaotem hao olketa kaonselem iu. (Prov. 1:8) Hem wanfala blessing for garem parents wea lovem Jehovah. Olketa laek helpem iu for kasem datfala prize for laef olowe.

18. Why nao iu barava laek for kasem datfala prize?

¹⁸ Nomata iumi garem hope for stap long heven or long paradaes earth, iumi evriwan luk forward for wanfala nambawan future. Hope bilong iumi hem tru wan bikos Creator nao promisim diswan. Hem sei: “Earth bae fulap witim savve bilong Jehovah.” (Isa. 11:9) Klosap nao Jehovah bae teachim evriwan long earth. Datwan hem wanfala prize wea iumi barava laek waka hard for kasem. So evritaem tingim wanem Jehovah promisim, and no letem eni samting stopem iu for kasem datfala prize.