Long evening bifor Jesus dae, hem givim kaonsel long olketa aposol for no trae for kamap bigman insaed kongregeson. Hem sei: “Olketa king rul ovarem olketa kantri, and pipol givim spesol nem long olketa wea garem paoa ovarem olketa. Iufala mas no olsem.”—Luke 22:25, 26.

Hu nao olketa wea garem spesol nem wea Jesus story abaotem? Samfala coin and raeting bilong bifor, showimaot hem kastom bilong olketa long Greece and Rome for mekhae long samfala man and ruler long wei for givim olketa disfala spesol nem Euergetes. Olketa kasem disfala spesol nem bikos olketa duim samfala gud samting for helpem pipol bilong olketa.

Staka king bifor olketa kasem datfala spesol nem. Samfala long olketa hem olketa ruler long Egypt olsem Ptolemy III Euergetes (c. 247-222 B.C.E.) and Ptolemy VIII Euergetes II (c. 147-117 B.C.E.). Olketa ruler long Rome olsem Julius Caesar (48-44 B.C.E.) and Augustus (31 B.C.E.–14 C.E.) tu garem datfala title, and King Herod, wea hem king bilong Judea. Herod maet kasem datfala spesol nem from hem orderim kam wheat from nara ples for feedim pipol bilong hem long taem bilong hangre and hem provaedem kaleko for poor pipol.

Wanfala savveman long Germany, Adolf Deissmann, storyim hao staka pipol nao savve kasem datfala spesol nem. Hem sei: “Hem nating hard nomoa for faendem staka handred samting wea garem disfala spesol nem long hem wea pipol raetem bifor.”

So, wanem nao Jesus minim taem hem sei long olketa disaepol: “Iufala mas no olsem”? Waswe, Jesus talem olketa for no tingim and no helpem pipol? Nomoa. Jesus showimaot wei for kaen shud muvim man for duim gudfala samting for narawan.

Long taem bilong Jesus, olketa rich man laekem pipol for tinghae long olketa, so olketa organizem olketa show and game long olketa stadium, wakem olketa park and temple, and givim selen for sapotim olketa nara kaen samting olsem. Reason olketa duim olsem hem from olketa laekem pipol for praisem olketa, for garem bignem, and for switim pipol for votem olketa. Wanfala buk sei: “Nomata samfala taem olketa duim diswan bikos olketa really laek for helpem pipol, staka taem olketa duim olsem for saed long politik from olketa tingim olketa seleva nomoa.” Datkaen wei for mekhae long seleva and tingim seleva nao Jesus talem olketa disaepol for stap klia long hem.

Samfala year bihaen, aposol Paul mekhae long sem point for kaen long narawan bikos iumi laek duim gud samting for olketa. Hem raet olsem long olketa Christian long Corinth: “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.”—2 Cor. 9:7.