1, 2. Taem iumi gohed for grow long spiritual wei, wanem nao iumi lane for duim? Storyim example.

TINGIM, samwan givim present long wanfala smol pikinini. Dadi and mami bilong pikinini hia tok olsem long hem: “Talem thankiu.” So hem talem thankiu bikos olketa talem hem for duim datwan. Bat taem hem start for big, hem start for luksavve why dadi and mami teachim hem for sei thankiu taem olketa narawan kaen long hem. Gogo, hemseleva bae ting for talem thankiu, bikos datwan kamap wei bilong hem nao.

² Long sem wei, taem iumi start for lanem truth, iumi lane abaotem why hem important for obeyim olketa main teaching wea Jehovah laekem iumi for followim. Bat taem iumi gohed for grow long spiritual wei, iumi lanem staka samting moa abaotem tingting bilong Jehovah. Olsem example, samting wea hem laekem and no laekem, and hao hem ting long olketa samting. Taem iumi letem tingting bilong Jehovah for affectim olketa disison and wanem iumi duim, datwan showimaot iumi mekem tingting bilong iumi for kamap olsem tingting bilong hem.

3. Why nao hem no isi for mekem tingting bilong iumi for kamap olsem tingting bilong Jehovah?

 ³ Iumi savve enjoyim wei for lane abaotem tingting bilong Jehovah, bat staka taem hem no isi for garem sem tingting olsem hem bikos iumi no perfect. Olsem example, maet hem no isi for minim tingting bilong Jehovah abaotem olketa fasin wea no klin, material samting, preaching waka, wei for iusim blood long rong wei, or eni nara samting. Wanem nao iumi savve duim? Hao nao iumi savve gohed trae for mekem tingting bilong iumi kamap olsem tingting bilong Jehovah? And hao nao diswan savve affectim wanem iumi duim distaem and long future?

4. Wanem nao iumi mas duim for changem tingting bilong iumi?

⁴ Readim Rome 12:2. Aposol Paul storyim hao for garem sem tingting olsem Jehovah. Study bifor diswan helpem iumi for “no gohed followim wei bilong pipol long disfala world.” Diswan minim iumi mas rejectim olketa idea and tingting bilong disfala world. Bat Paul storyim tu hao iumi need for ‘changem tingting bilong iumi.’ Diswan minim iumi mas studyim Bible, traem best for minim tingting bilong God, ting raonem, and changem tingting bilong iumi for kamap olsem tingting bilong hem.

5. Explainim why wei for read hem difren from wei for study.

⁵ Study hem no minim for just readim information or andalaenem ansa bilong olketa kwestin nomoa. Taem iumi study, iumi ting raonem wanem nao datfala information teachim iumi abaotem Jehovah, olketa wei bilong hem, and tingting bilong hem. Iumi traem best tu for minim why God talem iumi for duim wanfala samting and why hem stopem iumi for duim samfala samting. And tu, iumi ting raonem hao for changem laef and tingting bilong iumi for fitim samting wea iumi lanem. Nomata maet iumi hard for ting raonem evri samting hia taem iumi study, hem important for spendem haf long taem wea iumi iusim for study for ting raonem wanem iumi readim.—Sams 119:97; 1 Tim. 4:15.

6. Wanem nao iumi savve kasem taem iumi ting raonem hao Jehovah ting long samting?

⁶ Taem iumi evritaem studyim Bible, wanfala barava interesting samting savve happen. Hem nao, bae iumi savve pruvim seleva and bilivim hao tingting bilong Jehovah hem barava perfect. Bae iumi start for ting long samting olsem hao hem ting long datwan, and bae iumi agree long tingting bilong hem. Iumi ‘changem tingting’ bilong iumi, and iumi start for garem niu wei for ting long samting. Gogo, iumi mekem tingting bilong iumi for kamap olsem tingting bilong Jehovah.

7, 8. (a) Wanem nao tingting bilong Jehovah abaotem olketa material samting? (Lukim olketa piksa long start bilong study.) (b) Sapos iumi garem tingting bilong Jehovah abaotem material samting, wanem nao bae barava important long iumi?

⁷ Tingting bilong iumi affectim hao iumi feel abaotem olketa samting and wanem iumi duim tu. (Mark 7:21-23; Jas. 2:17) For iumi minim klia disfala point, iumi bae storyim samfala example. Olsem example, olketa Gospel storyim klia tingting bilong Jehovah abaotem olketa material samting. Olsem example, God chusim Joseph and Mary for lukaftarem Son bilong hem nomata tufala no garem staka material samting. (Levitikas 12:8; Luke 2:24) Taem Jesus born, Mary mekem hem leidaon “insaed samting for putim kaikai bilong olketa animal bikos resthaos hem fulap finis and no eni ples moa for olketa stap.” (Luke 2:7) Sapos Jehovah laekem, hem isi nomoa for mek sure Son bilong hem born long wanfala gud haos. Bat samting wea important long Jehovah, hem nao for Jesus growap insaed famili wea tinghae long olketa spiritual samting.

 ⁸ Disfala story abaotem taem wea Jesus born, teachim iumi abaotem tingting bilong Jehovah saed long olketa material samting. Samfala parents laekem tumas pikinini bilong olketa for garem staka material samting, nomata datwan bae spoelem wei wea pikinini fren witim Jehovah. Bat olsem iumi lanem, samting wea barava important long Jehovah nao hem wei for fren witim hem. Waswe, tingting bilong iu semsem olsem Jehovah? Samting wea iu duim showimaot wanem?—Readim Hebrew 13:5.

9, 10. Wanem nao showimaot iumi garem sem tingting olsem Jehovah abaotem wei for mekem narawan stambol?

⁹ Nara example, hem nao tingting bilong God abaotem wei for mekem man stambol. Jesus sei: “Man wea mekem wanfala disaepol for lusim faith bilong hem [or stambol], bae hem barava worse winim sapos olketa taengem wanfala big ston raonem nek bilong hem and torowem long sea.” (Mark 9:42) Disfala toktok showimaot klia hao wei for mekem narawan stambol hem barava serious samting! From Jesus barava followim wei bilong Dadi bilong hem, iumi sure Jehovah tu barava feel nogud taem man hem no kea sapos samting wea hem duim mekem narawan wea followim Jesus for stambol.—John 14:9.

¹⁰ Waswe, iumi garem sem tingting olsem Jehovah and Jesus? Waswe, iumi mekem tingting bilong iumi for kamap olsem tingting bilong tufala? Samting wea iumi duim showimaot wanem? Olsem example, waswe sapos iumi laek werem wanfala kaen kaleko or lukluk wea maet mekem samfala long kongregeson for feel nogud, or mekem samwan garem feeling for laek duim sex? Waswe, love bilong iumi for olketa brata and sista bae mekem iumi for no chusim datkaen stael?—1 Tim. 2:9, 10.

11, 12. Hao nao wei for heitim samting wea Jehovah heitim and wei for kontrolem iumiseleva savve protectim iumi?

¹¹ Mek-thri example: Jehovah heitim olketa wei wea no stret. (Aesaea 61:8) Jehovah savve samfala taem hem hard for iumi duim samting wea stret bikos iumi no perfect. Bat hem laekem iumi for garem sem tingting olsem hem and heitim olketa rabis wei. (Readim Sams 97:10.) Taem iumi ting raonem why Jehovah heitim olketa nogud samting, datwan bae helpem iumi for mekem tingting bilong iumi for kamap olsem tingting bilong hem. And datwan bae strongim iumi for stap klia long samting wea hem heitim.

¹² Wei for lane for garem tingting bilong Jehovah for heitim samting wea no stret bae helpem iumi for luksavve long samfala samting wea rong nomata Bible no really storyim datwan. Olsem example, lap dancing hem wanfala nogud wei wea kamap big distaem. Samfala pipol maet sei datwan hem no barava rong, bikos hem no semsem olsem wei for duim sex witim samwan. * Bat waswe, kaen wei olsem hem semsem witim tingting bilong God wea heitim evri nogud wei? Taem iumi traem best for kontrolem iumiseleva and heitim samting wea Jehovah heitim, iumi bae stap klia long wei for duim eni nogud samting.—Rome 12:9.

13. Why nao iumi shud ting raonem hao Jehovah ting long wanfala samting distaem mekem iumi savve mekem wise disison long future?

¹³ Taem iumi study, hem gud for iumi ting raonem hao Jehovah ting long wanfala samting, bikos datwan savve helpem iumi for mekem olketa wise disison long future. Then, nomata eni samting happen wea iumi need for mekem disison kwiktaem, iumi bae redi and  savve wanem for duim. (Provebs 22:3) Bae iumi storyim samfala example insaed Bible.

14. Wanem nao iumi lanem from wei wea Joseph rejectim waef bilong Potiphar?

¹⁴ Wei wea Joseph kwiktaem for rejectim waef bilong Potiphar showimaot Joseph mas ting raonem finis hao Jehovah ting long wei for faithful long marit partner. (Readim Jenesis 39:8, 9.) Wei wea Joseph talem waef bilong Potiphar hao diswan hem wanfala sin againstim God, showimaot Joseph mekem tingting bilong hem kamap olsem tingting bilong God. Waswe long iumi? Wanem nao bae iu duim sapos wanfala wakfren start for talem or duim samting wea showimaot hem interest long iu? Or hao sapos samwan sendem wanfala text message wea storyim sex or wanfala nogud piksa long mobile bilong iu? * Hem isi for iumi gohed faithful long Jehovah sapos iumi lanem and acceptim finis tingting bilong hem long olketa samting hia and iumi disaedem finis wanem iumi bae duim.

15. Hao nao iumi savve gohed faithful long Jehovah olsem thrifala Hebrew?

¹⁵ Tingim example bilong thrifala Hebrew, Shadrach, Meshach, and Abednego. Wei wea olketa no laek for worshipim image wea King Nebuchadnezzar wakem long gold and wanem olketa talem long datfala king showimaot olketa ting raonem finis wanem olketa bae duim for gohed faithful long Jehovah. (Eksodas 20:4, 5; Daniel 3:4-6, 12, 16-18) Sapos boss bilong iu askem iu for contributem selen for wanfala celebration wea join witim false religion, wanem nao bae iu duim? Winim wei for just weit for taem wea kaen situation olsem kamap, hem gud for iumi ting raonem distaem wanem nao tingting bilong Jehovah abaotem datwan? Then, taem iumi duim olsem hem bae isi for duim and talem stret samting olsem thrifala Hebrew duim.

16. Hao nao wei for minim gud tingting bilong Jehovah bae helpem iumi for redi for eni medical emergency?

¹⁶ Wei for ting raonem firstaem why iumi need for gohed faithful long Jehovah savve helpem iumi tu taem iumi mas deal witim eni medical emergency. Tru nao, iumi disaed strong finis for no acceptim full blood transfusion or eni fofala part bilong blood. Bat maet samfala taem olketa doctor laek duim samfala samting wea join witim blood wea each Christian need for mekem disison bilong hemseleva. Taem olsem, hem important for tingim  olketa Bible principle wea storyim tingting bilong Jehovah. (Acts 15:28, 29) Tru nao, gudfala taem for ting raonem olketa samting olsem, hem no long hospital or long taem wea iumi sik big and mas disaed kwiktaem. Distaem nao hem gud for iumi duim research, raetem wanfala medical directive card wea storyim wanem iumi laekem, and story witim doctor. *

17-19. Why nao hem important for lane distaem for garem tingting bilong Jehovah? Storyim example.

¹⁷ Tingim wei wea Jesus kwiktaem for ansarem tingting bilong Peter wea no stret taem Peter sei: “Lord, iu no tok olsem.” Luk olsem, Jesus mas spendem staka taem for ting raonem wanem God laekem hem for duim and olketa profesi abaotem laef bilong hem long earth and wei wea hem bae dae. Diswan strongim hem for gohed faithful long Jehovah and givim laef bilong hem olsem wanfala sakrifaes for iumi evriwan.—Readim Matthew 16:21-23.

¹⁸ Distaem tu God laekem iumi for fren gud witim hem and duim best bilong iumi for preachim gud nius. (Matt. 6:33; 28:19, 20; Jas. 4:8) Samfala pipol maet trae for encouragem iumi for no duim datwan, olsem Peter duim long Jesus. Olsem example, hao sapos boss bilong iu laek for givim iu waka wea bae mekem iu garem staka selen winim distaem, bat bae hem tekem taem bilong iu wea iu iusim for duim olketa spiritual samting? Or waswe sapos iu long skul and iu garem chance for kasem moa education long nara ples wea farawe from hom. Sapos kaen samting olsem happen, waswe, bae iu prea, duim research, story witim famili, or olketa elder bifor iu mekem disison? Distaem nao hem gud for iu lane hao for garem tingting bilong Jehovah abaotem olketa samting and mekem tingting bilong iu for kamap olsem tingting bilong hem. Then sapos kaen samting olsem kasem iu, maet hem bae nating hard nomoa for iu rejectim. Bae iu savve long stret samting for duim bikos iu disaed finis for duim wanem Jehovah laekem.

¹⁹ Maet iu savve tingim samfala situation wea maet seknomoa kamap. Hem tru, iumi no savve redi for evri situation olsem. Bat taem iumi study seleva, ting raonem tingting bilong Jehovah, datwan bae helpem iumi for rememberim wanem iumi lanem and bae iumi savve iusim datwan for helpem iumi for mekem olketa wise disison taem eni samting happen. So hem important for tingim hao Jehovah ting long olketa samting and mekem tingting bilong iumi for kamap olsem tingting bilong hem, and ting abaotem hao wei for garem tingting bilong God bae helpem iumi for mekem olketa wise disison distaem and long future.

20, 21. (a) Why nao iumi bae enjoyim freedom bilong iumi long niu world nomata freedom hia garem spialaen? (b) Hao nao iumi savve enjoyim laef distaem?

²⁰ Iumi evriwan luk forward for niu world. Staka long iumi hope for stap long Paradaes long earth for olowe. Anda long Kingdom bilong God, iumi bae free from evri wei for safa and pain wea iumi kasem distaem. And tu, long niu world iumi bae gohed garem freedom for chusim wanem iumiseleva laekem and enjoyim.

²¹ Hem tru, iumi bae no free evribit. Taem olketa wea hambol wea stap long niu world mas disaedem samting wea stret or no stret, olketa mas depend long law and tingting bilong Jehovah. Diswan bae mekem olketa barava hapi and garem peace. (Sams 37:11) Go kasem datfala taem, iumi savve hapi taem iumi gohed mekem tingting bilong iumi for kamap olsem tingting bilong Jehovah.