Kaen—Fasin wea Showaot Long Toktok and Wanem Man Duim
TAEM samwan hem kaen long iumi datwan savve encouragem and comfortim iumi! Iumi hapi taem iumi luksavve samwan hem tingim iumi. From iumi tinghae long wei wea narawan kaen long iumi, hao nao iumi tu savve garem disfala naes wei for kaen?
Man wea kaen hem barava tingim narawan, and hem showimaot datwan long wanem hem talem and duim for helpem narawan. Wei for kaen hem showaot long samting wea man duim, and hem no samting for talem nomoa bat hem mas kam from heart. Sapos iumi garem love and wei for tingim feeling bilong narawan, datwan bae muvim iumi for showimaot trufala wei for kaen. Bat important samting nao, wei for kaen hem wei bilong holy spirit wea Bible encouragem evri Christian for showimaot. (Gal. 5:22, 23) Iumi mas garem disfala wei for kaen, so iumi bae storyim hao Jehovah and Son bilong hem showimaot disfala wei and hao iumi savve followim example bilong tufala.
JEHOVAH KAEN LONG IUMI EVRIWAN
Jehovah kaen and tingim evriwan. Hem kaen long pipol wea “no savve sei thankiu and nogud pipol” tu. (Luke 6:35) Olsem example, Jehovah “mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.” (Matt. 5:45) So nomata pipol wea no bilivim Jehovah hem Creator, olketa tu kasem gud samting from wanem hem creatim and olketa savve hapi.
Jehovah showimaot nambawan example taem hem kaen long Adam and Eve. No longtaem bihaen Adam and Eve sin, tufala somapem leaf bilong fig tree, mekem tufala werem. Bat, Jehovah luksavve tufala needim gud kaleko mekem tufala fit for stap aotsaed long garden bilong Eden bikos datfala graon hem garem olketa rope nila and nila grass. So Jehovah showimaot hem kaen long tufala taem hem mekem kaleko for tufala from skin bilong animal.—Jenesis 3:7, 17, 18, 21.
Hem tru, Jehovah kaen long “pipol wea gud and pipol wea nogud” bat hem kaen tumas long olketa wea faithful for worshipim hem. Olsem example, long taem bilong profet Zechariah, wanfala angel wari and feel nogud taem hem lukim olketa stop for buildim bak temple long Jerusalem. Jehovah lisin long tingting bilong datfala angel and Hem talem kaenfala toktok for encouragem hem. (Sekaraea 1:12, 13) Jehovah duim sem samting tu long profet Elijah. Wantaem datfala profet hem barava feel sorre and hem askem Jehovah for killim hem dae nomoa. Jehovah tingim feeling bilong Elijah and Hem sendem wanfala angel for strongim hem. God encouragem Elijah hao hem no stap seleva. Bihaen Elijah herem kaenfala toktok hia and kasem help wea hem needim, hem strong for gohed duim assignment bilong hem. (Mektu Kings 19:1-18) So waswe long olketa wea worshipim God, hu nao main wan wea showimaot hem followim nambawan example bilong Jehovah long wei for kaen?
JESUS HEM MAN WEA KAEN TUMAS
Taem Jesus duim ministry bilong hem long earth, pipol luksavve hem man wea kaen and tingim narawan. Hem no savve tok raf and no bossim pipol. From hem tingim pipol, hem sei: “Kam long mi, iufala wea waka hard and wea karem hevi samting, mekem mi savve strongim iufala. . . . Bae hem no hard for iufala waka witim mi.” (Matt. 11:28-30) From Jesus kaen tumas, pipol barava laek for followim hem. From Jesus “barava sorre tumas” long pipol, hem feedim olketa, healim olketa wea sik, and hem teachim olketa “plande samting” abaotem Dadi bilong hem.—Mark 6:34; Matt. 14:14; 15:32-38.
Wei wea Jesus deal witim pipol and minim feeling bilong olketa showimaot hem barava kaen tumas. Nomata samting pipol askem hem for duim for olketa maet hem no isi, Jesus hapi for helpem olketa wea kam lukaotem hem. (Luke 9:10, 11) Olsem example, taem datfala woman wea garem sik wea mekem hem no klin hem tasim kaleko bilong Jesus, Jesus no tok strong long hem. (Levitikas 15:25-28) From Jesus sorre long datfala woman wea sik for 12 year, hem sei long hem: “Dota bilong mi, faith bilong iu mekem iu gud bak. Iu go and no wari moa, bikos sik hia hem finis nao.” (Mark 5:25-34) Datwan hem nambawan wei for showimaot wei for kaen!
MAN WEA KAEN HEM DUIM GUD SAMTING FOR NARAWAN
Olketa example hia showimaot trufala wei for kaen hem showaot long wanem man duim. Long tokpiksa abaotem datfala gud Samaritan, Jesus storyim hao hem important for duim samting for narawan. Nomata olketa Samaritan and olketa Jew heitim each other, datfala Samaritan long tokpiksa hia feel sorre long datfala man wea olketa man for steal killim hem, and leavim hem for dae long saed road. Wei for kaen muvim datfala Samaritan for duim samting. Hem bandagem garekil bilong man hia and tekem hem long wanfala resthaos. And givim selen long owner bilong datfala resthaos for lukaftarem datfala man wea garekil and hem willing for pei for eni nara samting for datfala man.—Luke 10:29-37.
Staka taem wei for kaen hem showaot long wanem man duim, bat hem savve showaot tu long toktok wea man talem wea encouragem narawan. Olsem Bible sei: “Haat hemi wari, man hemi hevi, bat gud toktok save liftimap tingting blong hem.” (Provebs 12:25) Sapos hem wei bilong iumi for kaen and for duim gud samting for narawan, toktok wea iumi talem bae evritaem encouragem and strongim olketa narawan. * Olketa kaenfala toktok wea iumi talem bae showimaot iumi tingim olketa. Taem olketa kasem encouragement olsem, datwan bae helpem olketa for deal witim olketa hard taem wea olketa kasem.—Provebs 16:24.
GOHED KAEN LONG NARAWAN
From God wakem man for garem wei bilong hem, iumi evriwan fit for showimaot disfala nambawan wei for kaen. (Jenesis 1:27) Olsem example, Julius, wanfala bigman long army bilong Rome, tekem aposol Paul olsem prisoner for go kot long Rome. Hem “barava kaen long Paul, hem letem hem for go lukim olketa fren bilong hem and olketa lukaftarem hem” long datfala taon long Sidon. (Acts 27:3) And wantaem, pipol long Malta tu “kaen tumas” long Paul and olketa narawan taem ship hem rek. Olketa wakem fire tu for olketa. (Acts 28:1, 2) Olketa hia barava duim gud samting, nomata olsem, wei for kaen hem no samting wea iumi duim wanfala taem nomoa.
For mekem God hapi, iumi mas mekem disfala wei for kaen hem kamap wei bilong iumi. Dastawe Jehovah talem iumi for mekem wei for kaen kamap olsem kaleko wea iumi werem. (Col. 3:12; ftn.) Bat staka taem, hem no isi for showimaot disfala wei bilong God for kaen. Why nao olsem? Iumi savve hol bak for showimaot wei for kaen bikos iumi maet man for shame, iumi ting daonem iumiseleva, kasem hard taem, or from iumi still garem wei for selfish samfala taem. Nomata olsem, iumi savve win sapos iumi depend long holy spirit and followim wei bilong Jehovah for kaen.—1 Cor. 2:12.
Waswe, iumi savve tingim samfala samting wea iumi savve duim for showimaot wei for kaen? Hem gud for tingim olketa kwestin hia: ‘Waswe, mi man wea lisin and minim feeling bilong narawan? Waswe, mi man wea redi for helpem olketa narawan? Waswe, enitaem mi kaen long samwan wea hem no famili member or best fren bilong mi?’ Then iumi savve markem samfala goal for savve gud long olketa narawan, especially olketa long kongregeson. Sapos iumi duim olsem, iumi bae fit for help taem olketa needim iumi. And tu, iumi shud kaen long narawan long sem wei wea iumi laekem olketa for kaen long iumi. (Matt. 7:12) Jehovah bae blessim iumi sapos iumi askem hem for helpem iumi for traem best bilong iumi for kaen long narawan.—Luke 11:13.
PIPOL LAEKEM MAN WEA KAEN
Taem aposol Paul storyim olketa samting wea showimaot hem wakaman bilong God, hem storyim tu wei wea hem “kaen long pipol.” (2 Cor. 6:3-6) Pipol laekem Paul bikos hem interest long olketa, and hem showimaot datwan long kaenfala toktok and wanem hem duim. (Acts 28:30, 31) Long sem wei tu, pipol bae interest for savve long truth sapos iumi kaen long olketa. Sapos iumi kaen long evriwan, bae datwan helpem olketa wea againstim iumi for no kros or raf long iumi. (Rome 12:20) Gogo, maet olketa tu bae interest long message long Bible.
Long Paradaes, iumi sure staka wea resurrect bae hapi tumas from olketa narawan barava kaen tumas long olketa. Maet diswan hem firstaem for olketa lukim kaen samting olsem. From olketa barava hapi, datwan muvim olketa tu for kaen long olketa narawan. And sapos eniwan no kaen and no laek helpem narawan, bae hem no fit for stap insaed Paradaes. Bat olketa wea God hapi long olketa bae kasem laef olowe, olketa bae lovem and kaen long olketa narawan. (Sams 37:9-11) Long datfala taem, pipol evriwea long earth bae stap sef and hapi for olowe! Bat bifor datwan hem happen, hao nao iumi savve kasem gud samting distaem from wei for kaen?
MAN WEA KAEN HEM KASEM GUD SAMTING
Bible sei: “Yu kaen long man, bae hemi kaen long yu.” (Provebs 11:17) Pipol savve laekem tumas man wea hem kaen, and olketa bae kaen long hem tu. Jesus sei: “Samting wea iufala duim long narawan, sem samting nao olketa bae duim long iufala.” (Luke 6:38) Dastawe, man wea hem kaen hem isi for garem olketa gudfala fren.
Aposol Paul encouragem olketa Christian long Ephesus for ‘kaen long narawan and sorre long olketa. Olketa mas willing for forgivim narawan.’ (Eph. 4:32) Kongregeson savve barava kasem gud samting sapos evriwan kaen and willing for helpem each other. Taem evriwan long kongregeson duim olsem, bae olketa no talem toktok wea no kaen, no tok spoelem narawan, or tok daonem narawan. Winim wei for talem laea toktok abaotem narawan, olketa traem best for talem toktok wea bae helpem narawan. (Provebs 12:18) Taem olketa duim olsem, kongregeson bae strong and hapi for worshipim Jehovah.
Tru nao, wei for kaen hem showaot long toktok and wanem man duim. Taem iumi kaen, iumi showimaot iumi followim wei bilong Jehovah, God bilong iumi wea kaen tumas. (Eph. 5:1) Taem iumi duim olsem, iumi strongim kongregeson and helpem olketa narawan for kam worshipim Jehovah. Iumi laekem olketa narawan for ting long iumi olsem man for kaen!
^ par. 13 Iumi bae storyim nara wei bilong holy spirit wea hem nao for duim gudfala samting long nara article wea bae kamap bihaen.