1-2. (a) Olsem Ephesus 6:16 storyim, why nao iumi needim “datfala big shield wea hem nao faith”? (b) Olketa wanem kwestin nao bae iumi storyim?

WASWE, iu garem faith wea olsem big shield? (Readim Ephesus 6:16.) Yes, iu garem datwan. Olsem wanfala big shield wea protectim klosap full body, faith blo iu hem protectim iu from olketa samting wea no klin, raf fasin, and evriting lo world wea no followim standard blo Jehovah.

² Nomata olsem, iumi stap lo “olketa last day,” and faith blo iumi bae gohed for kasem test. (2 Tim. 3:1) Hao nao iu savve chekim shield blo iu for mek sure hem strong? And hao nao iu savve gohed holem strong datfala shield? Iumi bae storyim ansa for olketa kwestin hia.

3. Wanem nao olketa soldia savve duim lo shield blo olketa, and why nao olsem?

³ Lo taem blo Bible, samfala shield blo olketa soldia olketa kavarem lo leather. Olketa soldia savve oilim shield blo olketa for keepim gud datfala leather and for mekem olketa part wea hem iron for no rasta. Sapos wanfala soldia lukim eni samting spoelem shield blo hem, hem mas mek sure hem repairim mekem hem evritaem redi for faet. Hao nao diswan semsem witim faith blo iumi?

4. Why nao iu mas chekim gud shield blo iu, and hao nao iu savve duim datwan?

⁴ Olsem olketa soldia lo bifor, iu mas evritaem chekim and lukaftarem gud faith blo iu, mekem iu savve evritaem redi for faet. From iumi olketa Christian, iumi lo wanfala spiritual faet, and iumi faet againstim olketa enemy blo iumi, wea  insaed diswan hem olketa demon. (Eph. 6:10-12) No eni narawan savve lukaftarem shield blo iu. Hao nao iu savve sure dat iu redi for feisim olketa test? First samting, iu mas prea for God helpem iu. Then, iu need for iusim Bible for helpem iu for lukluk gud lo iuseleva olsem hao God luk lo iu. (Heb. 4:12) Bible sei: “Trastem [Jehovah] long ful haat blong yu. Yu no dipen nomoa long save blong yu seleva.” (Provebs 3:5, 6) Tingim datfala scripture and then ting raonem samfala disison wea iu just mekem. Olsem example, waswe, enitaem iu feisim wanfala big problem saed lo selen? Waswe, iu tingim promis blo Jehovah wea stap lo Hebrew 13:5 wea sei: “Bae mi nating lusim iu”? Waswe, datfala promis hem mekem iu trustim hao Jehovah bae helpem iu? Sapos olsem, datwan showimaot iu gohed for keepim gud datfala shield wea hem nao faith blo iu.

5. Taem iu chekim faith blo iu, wanem nao maet bae iu luksavve lo hem?

⁵ Taem iu chekim gud faith blo iu, maet iu bae sapraes lo wanem iu lukim. Iu maet lukim hao iu garem olketa wik point wea iu no luksavve lo hem bifor. Olsem example, iu maet luksavve hao wei for wari tumas, olketa laea story, and wei for discourage hem spoelem faith blo iu. Sapos datwan hem happen lo iu, hao nao iu savve protectim faith blo iu for no eni samting spoelem go moa?

6. Wanem nao samfala example lo stret wei for wari?

⁶ Samfala wei for wari hem stret. Olsem example, hem stret for iumi wari abaotem wanem for duim for mekem Jehovah and Jesus hapi. (1 Cor. 7:32) Sapos iumi duim wanfala serious sin, iumi wari abaotem hao for iumi fren gud moa witim Jehovah. (Sams 38:18) Iumi wari tu abaotem wei for mekem marit partner hapi, and for provaedem wanem famili needim, and olketa brata and sista tu.—1 Cor. 7:33; 2 Cor. 11:28.

7. Olsem Provebs 29:25 storyim, why nao iumi no need for fraetem olketa man?

⁷ Lo narasaed, wei for wari tumas savve spoelem faith blo iumi. Olsem example, iumi maet wari evritaem abaotem wei for garem inaf kaikai and kaleko. (Matt. 6:31, 32) For katem daon datfala wari, iumi maet tingim nomoa for kasem olketa material samting. Gogo iumi maet start for garem wei for lovem tumas selen. Sapos iumi letem datwan for happen, faith blo iumi lo Jehovah bae kamap wik and datwan bae spoelem spiritual saed blo iumi. (Mark 4:19; 1 Tim. 6:10) Or iumi maet garem narakaen wei for wari tumas, hem nao for warim tumas hao pipol ting lo iumi. Iumi maet fraetem wei wea olketa man tok spoelem or persecutim iumi, winim wei for fraetem Jehovah. For protectim iumi from datfala danger, iumi mas barava askem Jehovah for givim iumi faith and wei for no fraet mekem iumi savve feisim olketa challenge olsem.—Readim Provebs 29:25; Luke 17:5.

8. Wanem nao iumi shud duim taem iumi herem olketa laea story?

⁸ Satan wea hem “dadi bilong wei for laea,” hem iusim pipol wea hem kontrolem for spredim olketa laea story abaotem Jehovah and olketa brata and sista blo iumi. (John 8:44) Olsem example, olketa apostate pablisim olketa laea story and rong information abaotem organization blo Jehovah, thru lo olketa website, television and olketa narakaen media. Olketa laea hia hem wanfala lo “olketa arrow bilong Satan wea laet long fire.” (Eph. 6:16) Wanem nao iumi shud duim sapos samwan kam storyim olketa laea story lo iumi olsem? Iumi no lisin lo datwan! Why nao olsem? Bikos  iumi garem faith lo Jehovah and iumi trustim olketa brata blo iumi. For tok stret, iumi barava stap klia from olketa apostate. Iumi no letem eniwan or eni samting for mekem iumi argue witim olketa, nomata sapos iumi just laek for savve lo wanem olketa talem.

9. Hao nao wei for discourage savve affectim iumi?

⁹ Wei for discourage savve mekem faith blo iumi wikdaon. Iumi hard for ranawe from olketa problem blo iumiseleva. And tu, hem bae no wise for iumi duim datwan. And samfala taem iumi bae feel discourage tu. Bat iumi mas no letem olketa problem hia for affectim tumas tingting blo iumi. Sapos iumi duim olsem, maet iumi bae no tingim nao nambawan hope wea Jehovah givim lo iumi. (Rev. 21:3, 4) Feeling for discourage savve mekem iumi no strong and for laek givap. (Provebs 24:10) Bat iumi shud no letem datwan for happen lo iumi.

10. Wanem nao iu lanem from leta wea wanfala sista hem raetem?

¹⁰ Tingim wanfala sista lo United States, hem gohed for keepim faith blo hem strong nomata hem lukaftarem hasband blo hem wea barava sik. Hem raetem wanfala leta lo world hedquarter blo Jehovah’s Witness and hem sei: “Samting wea kasem mifala hem mekem mifala stress tumas and discourage samfala taem, bat hope blo mifala hem strong. Mi barava tinghae lo evri information wea mifala kasem wea encouragem and strongim faith blo mifala. Olketa encouragement and advaes hia mifala barava needim. Hem helpem mifala for gohed servem Jehovah and for no givap lo olketa test wea Satan iusim for trae mekem mifala wikdaon.” Wanem disfala sista talem helpem iumi for luksavve iumi savve winim wei for discourage! Lo wanem wei? Taem iumi ting lo olketa hard taem olsem hem test from Satan. Trustim hao Jehovah bae comfortim iu. And gohed for tinghae lo olketa spiritual kaikai wea hem provaedem.

11. For savve sapos faith blo iumi hem strong, olketa wanem kwestin nao iumi shud askem iumiseleva?

¹¹ Waswe, iu lukim hao iu need for repairim wanfala part lo shield blo iu? Lo olketa month wea go pas, waswe, iu winim wei for no wari tumas? Waswe, iu stap klia lo wei for lisin and argue witim olketa apostate abaotem wei  wea olketa spredim olketa laea story? And waswe, iu fit for deal witim wei for discourage? Sapos olsem, iu garem strong faith. Bat iumi mas careful bikos Satan garem tu olketa nara weapon wea hem trae iusim for againstim iumi. Bae iumi storyim wanfala lo olketa.

12. Lo wanem wei nao olketa material samting savve affectim iumi?

¹² Olketa material samting savve mekem iumi go difren and for no lukaftarem gud shield blo iumi. Aposol Paul sei: “Sapos wanfala soldia laek for mekem komanda bilong hem hapi bae hem no busy long eni nara waka for kasem selen.” (2 Tim. 2:4) So olketa stopem olketa soldia lo Rome for duim eni waka for selen. Wanem nao maet happen sapos wanfala soldia no followim datwan?

13. Why nao hem no fitim for wanfala soldia busy lo eni nara waka for kasem selen?

¹³ Tingim disfala story. Wanfala grup blo olketa soldia spendem taem lo morning for train witim sword blo olketa, bat wanfala soldia no stap. Hem lo taon and hem gohed for redyim stoa blo hem for salem kaikai. Lo datfala evening, olketa soldia spendem taem for chekim olketa samting for werem for faet and sharpenem sword blo olketa. Bat datfala soldia wea ownim stoa gohed busy for preparem kaikai for salem lo next day. Bat, lo next morning, olketa enemy attakim olketa lo taem wea olketa no expectim. Which soldia nao redi for faet and komanda bae hapi lo hem? And which soldia nao iu laekem for hem standap saed lo iu, wanfala wea redi for faet or narawan wea busy lo olketa nara samting?

14. From iumi soldia blo Christ, wanem nao barava important lo iumi?

¹⁴ Olsem wanfala gud soldia, iumi bae no letem eni samting disturbim iumi from main goal blo iumi, wea hem nao for mekem tufala Komanda blo iumi, Jehovah and Jesus, for hapi lo iumi. Iumi ting lo datwan olsem hem barava important winim eni samting wea iumi savve kasem from world blo Satan. Iumi mek sure iumi iusim taem and strong wea iumi garem for servem Jehovah, and for gohed keepim gud shield blo iumi and olketa nara samting wea iumi iusim for faet lo spiritual wei.

15. Wanem warning nao Paul givim iumi, and why nao olsem?

 ¹⁵ Iumi mas evritaem careful! Why nao olsem? Aposol Paul warnim iumi dat “olketa wea laekem tumas for rich” bae gogo olketa “lusim nao olketa trufala teaching.” (1 Tim. 6:9, 10) Datfala toktok for “lusim” hem minim iumi shud no letem wei for laek kasem olketa samting wea iumi no needim for mekem iumi go difren. From datwan, bae iumi letem heart blo iumi “laekem samting wea spoelem” iumi. Winim wei for letem olketa feeling olsem for grow insaed heart blo iumi, iumi mas ting lo olketa samting hia olsem weapon wea savve spoelem iumi.

16. Datfala story wea stap lo Mark 10:17-22 shud muvim iumi for tingim olketa wanem kwestin?

¹⁶ Iumi maet garem selen for baem staka material samting. Waswe, hem rong for baem olketa samting wea iumi laekem bat iumi no barava needim? Maet nomoa. Bat tingim olketa kwestin hia: Nomata sapos iumi fit for baem wanfala samting, waswe iumi garem taem and strong for iusim and lukaftarem datwan? And waswe, iumi start for laekem tumas olketa samting wea iumi garem finis? Hao nao wei for laekem tumas olketa material samting bae mekem iumi olsem datfala young man wea rejectim invitation blo Jesus for duim moa samting lo waka blo God? (Readim Mark 10: 17-22.) Hem barava gud for iumi garem simpol laef and spendem taem and strong wea iumi garem for duim wanem God laekem!

17. Wanem nao iumi shud no forgetim?

¹⁷ Iumi mas no forget dat iumi insaed wanfala war and iumi mas redi evriday for faet. (Rev. 12:17) Olketa brata and sista blo iumi hard for karem datfala shield for iumi. Iumiseleva nao mas gohed for holem strong datfala shield.

18. Why nao olketa soldia lo bifor mas holem strong shield blo olketa?

¹⁸ Lo bifor, pipol tinghae lo soldia wea no fraet lo taem blo faet. Bat hem bae barava feel shame sapos hem kam bak from war bat hem lusim shield blo hem. Tacitus, wea raetem history blo Rome, hem sei: “Hem wanfala shameful samting for wanfala soldia lusim shield blo hem.” Datwan hem wanfala reason why olketa soldia mas mek sure olketa holem strong shield blo olketa.

19. Hao nao iumi savve gohed hol strong lo shield wea hem nao faith blo iumi?

¹⁹ Iumi gohed for holem strong datfala shield wea hem nao faith blo iumi taem iumi evritaem attendim olketa Christian meeting, and taem iumi story lo olketa narawan abaotem nem blo Jehovah and kingdom blo hem. (Heb. 10:23-25) And tu, iumi readim Bible evriday and prea lo Jehovah for helpem iumi followim wanem iumi lanem insaed Bible. (2 Tim. 3:16, 17) Then, no eni weapon wea Satan iusim for againstim iumi savve spoelem iumi for olowe. (Aesaea 54:17) Datfala “big shield wea hem nao faith” blo iumi bae protectim iumi. Iumi bae stand strong tugeta witim olketa brata and sista. And evriday iumi savve win lo disfala faet wea iumi insaed, and important samting nao, iumi bae garem datfala privilege for stap lo saed blo Jesus taem hem win lo datfala war againstim Satan and olketa wea followim hem.—Rev. 17:14; 20:10.