1-2. Olsem 1 Peter 4:7, 8 storyim, wanem nao bae helpem iumi for deal witim olketa hard taem?

TAEM iumi gogo for kasem end blo “olketa last day,” maet iumi bae feisim olketa barava hard taem. (2 Tim. 3:1) Olsem example, bihaen wanfala election campaign lo wanfala kantri lo west Africa, bigfala faet kamap and pipol attakim each other. For winim sixfala month, olketa brata and sista blo iumi no free for go aot bikos faet hem gohed. Wanem nao helpem olketa for deal witim disfala hard taem? Samfala go stap lo haos blo olketa brata lo area wea sef. Wanfala brata sei: “Lo olketa taem olsem, mi tinghae tumas lo wei wea mi garem olketa fren, mifala evriwan savve encouragem each other.”

² Taem “datfala big trabol” hem start, iumi bae tinghae lo wei for garem olketa gudfala fren wea lovem iumi. (Rev. 7:14) So hem barava important for duim samting for strongim hao iumi fren gud tugeta distaem. (Readim 1 Peter 4:7, 8.) Iumi savve lanem staka samting from story blo Jeremiah, wea olketa fren blo hem gohed for helpem hem no longtaem bifor Jerusalem distroe. * Hao nao iumi savve followim example blo Jeremiah?

3. (a) Wanem nao maet mekem Jeremiah for no laek fren witim olketa narawan? (b) Wanem nao Jeremiah savve storyim lo secretary blo hem Baruch, and wanem nao kamaot from datwan?

³ For samting olsem 40 years, Jeremiah stap midolwan pipol wea no faithful, insaed diswan hem olketa neiba and maet  samfala relative from hom blo hem lo Anathoth. (Jeremaea 11:21; 12:6) Nomata olsem, datwan no stopem Jeremiah for fren witim olketa narawan. Hem savve storyim feeling blo hem lo faithful secretary blo hem Baruch, and from hem raetem datwan, iumi tu savve lo feeling blo hem. (Jeremaea 8:21; 9:1; 20:14-18; 45:1) Tingim, taem Jeremiah gohed story and Baruch gohed for raetem toktok blo hem, datwan mas barava strongim love and respect wea tufala garem for each other.—Jeremaea 20:1, 2; 26:7-11.

4. Wanem nao Jehovah askem Jeremiah for duim, and hao nao datfala assignment strongim wei wea Jeremiah and Baruch fren tugeta?

⁴ For staka year, Jeremiah no fraet for warnim olketa Israelite abaotem samting wea bae happen lo Jerusalem. (Jeremaea 25:3) Lo nara taem moa wea Jehovah warnim olketa pipol for repent, hem askem Jeremiah for raetem datfala warning lo wanfala scroll. (Jeremaea 36:1-4) Taem Jeremiah and Baruch waka klos tugeta for duim disfala assignment wea God givim, wea maet gohed for samfala month, masbi wei wea tufala story tugeta hem strongim faith blo tufala.

5. Wanem nao showimaot Baruch hem gud fren blo Jeremiah?

⁵ Taem olketa finis for raetem datfala scroll, Jeremiah mas depend lo fren blo hem Baruch for talemaot datfala message. (Jeremaea 36:5, 6) Baruch no fraet for duim datfala assignment nomata hem danger tumas. Tingim hao Jeremiah mas barava tinghae lo Baruch taem Baruch go lo temple and readim datfala scroll. (Jeremaea 36:8-10) Taem olketa prince lo Judah herem wanem Baruch duim, olketa komandim hem for readim big datfala scroll lo olketa! (Jeremaea 36:14, 15) Olketa prince hia disaed for storyim lo King Jehoiakim samting wea Jeremiah talem. From olketa tingim tufala, olketa sei:  “Yutufala Jeremaea, yutufala mas ranawe an go haed. An yutufala mas no letem eniwan save long ples wea yutufala stap.” (Jeremaea 36:16-19) Datwan hem gud advaes!

6. Wanem nao Jeremiah and Baruch duim taem pipol againstim tufala?

⁶ King Jehoiakim kros fogud taem hem herem olketa toktok wea Jeremiah raetem insaed datfala scroll, so hem bonem datfala scroll and talem olketa for arrestim Jeremiah and Baruch. Nomata olsem, Jeremiah nating fraet. Hem tekem nara scroll, givim lo Baruch, and taem Jeremiah gohed story, Baruch raetem evri toktok wea hem bin raetem lo first scroll wea King Jehoiakim bonem.—Jeremaea 36:26-28, 32.

7. Wanem nao maet happen taem Jeremiah and Baruch waka tugeta?

⁷ Taem pipol go thru lo wanfala hard taem tugeta, datwan savve mekem olketa kamap klos fren. So tingim go taem Jeremiah and Baruch waka tugeta for raetem bak datfala scroll wea King Jehoiakim distroem, masbi tufala barava tinghae lo olketa gudfala wei blo each other. Hao nao example blo tufala hia savve helpem iumi?

8. Wanem nao maet stopem iumi for fren gud witim olketa narawan, and why nao iumi mas no givap?

⁸ Maet iumi no savve feel free for story lo olketa narawan, bikos maet samwan bin mekem iumi feel nogud. (Provebs 18:19, 24) Or maet iumi feel iumi no garem inaf taem and strong for mek fren witim olketa narawan. Nomata olsem, iumi shud no givap. Sapos iumi laekem olketa brata blo iumi for sapotim iumi lo olketa hard taem, then iumi mas lane for trustim olketa lo wei for talemaot tingting and feeling blo iumi lo olketa distaem. Datwan hem wanfala important samting wea helpem iumi for kamap olketa tru fren.—1 Pet. 1:22.

9. (a) Hao nao Jesus showimaot hem trustim olketa fren blo hem? (b) Hao nao wei for feel free for story savve strongim wei wea iu fren witim olketa narawan? Storyim example.

⁹ Jesus showimaot hem trustim olketa fren blo hem taem hem feel free for story witim olketa. (John 15:15) Iumi followim example blo Jesus taem iumi storyim hapi, olketa wari, and feel nogud blo iumi. Taem iu lisin gud lo narawan, maet datwan helpem iu for luksavve dat samfala tingting, feeling, and goal blo iutufala hem semsem. Tingim example blo Cindy wanfala sista wea 29 years. Hem fren gud witim wanfala pioneer sista wea nem blo hem Marie-Louise wea 67 years old. Cindy and Marie-Louise waka tugeta evri Thursday morning lo ministry, and tufala feel free for storyim olketa didifren  subject. Cindy sei, “Mi enjoyim wei for storyim olketa important samting witim olketa fren blo mi bikos diswan helpem mi for savve gud lo olketa and minim olketa tu.” Wei for fren savve kamap strong sapos iumi feel free for story lo each other. Olsem Cindy, sapos iu nao feel free for story witim olketa narawan, datwan bae strongim wei wea iufala fren gud tugeta.—Provebs 27:9

10. Olsem Provebs 27:17 storyim, wanem nao savve kamaot from wei for waka tugeta witim olketa brata and sista?

¹⁰ Olsem Jeremiah and Baruch, taem iumi waka tugeta witim olketa brata and sista and lukim gudfala wei blo olketa, iumi savve lane from olketa and datwan mekem iumi kamap moa klos. (Readim Provebs 27:17.) Olsem example, hao nao iu feel taem iu waka witim fren blo iu lo ministry and hem no fraet for explainim biliv blo hem and talemaot hao hem barava trustim Jehovah and olketa plan blo hem? Bae iu barava laek for fren gud witim hem.

11-12. Storyim example abaotem hao wei for preach witim narawan savve strongim wei wea iumi fren gud tugeta.

¹¹ Tingim tufala experience wea showim hao wei for waka tugeta lo ministry savve helpem pipol for fren gud tugeta. Adeline, wanfala sista wea 23 years, hem askem fren blo hem Candice, for tufala preach tugeta lo wanfala territory wea olketa no savve duim staka taem. Hem sei, “Mitufala laek for duim moa samting, and for enjoyim go moa ministry. Mitufala evriwan needim encouragement for gohed duim best blo mitufala for Jehovah.” Wanem gud samting nao tufala kasem from wei wea tufala waka tugeta? Adeline sei, “Lo end blo each day, mitufala storyim hao mitufala feel, hao olketa story blo mitufala encouragem each other, and mitufala lukim hao Jehovah helpem mitufala lo ministry. Mitufala enjoyim olketa kaen story hia and datwan mekem mitufala barava savve gud lo each other.”

¹² Laïla and Marianne, tufala singol sista from France, go for preach for faevfala week lo Bangui, kapitol city blo Central African  Republic. Laïla ting go bak and sei: “Mitufala Marianne experiencem olketa hard taem, bat wei wea mitufala story gud tugeta and lovem each other, strongim wei wea mitufala fren gud tugeta. Taem mi lukim wei wea Marianne savve change for fitim datfala ples, wei wea hem lovem pipol, and hem strong for duim ministry, diswan mekem mi tinghae go moa lo hem.” Iu no need for go lo nara kantri for enjoyim olketa gud samting hia. Each taem iu go preach witim wanfala brata or sista, iu garem chance for savve gud moa lo olketa and strongim wei wea iu fren gud witim olketa.

13. Wanem challenge nao maet iumi feisim taem iumi waka klos witim olketa fren blo iumi?

¹³ Samfala taem, from iumi waka klos witim olketa fren blo iumi, bae iumi lukim gudfala wei blo olketa and wik point blo olketa tu. Wanem nao savve helpem iumi for deal witim disfala challenge? Tingim moa example blo Jeremiah. Wanem nao helpem hem for ting lo gud saed blo olketa narawan and forgivim mistek blo olketa?

14. Wanem nao Jeremiah lanem abaotem Jehovah, and hao nao datwan helpem hem?

¹⁴ Jeremiah nao raetem Bible buk wea garem nem blo hem, and luk olsem hem tu raetem 1 Kings and 2 Kings. Iumi sure, datfala assignment mekem hem barava luksavve Jehovah showimaot mercy lo olketa man wea no perfect. Olsem example, Jeremiah savve taem King Ahab repent, Jehovah sei Ahab bae dae firstaem and hem bae no lukim nao taem wea full famili blo hem dae. (Fas Kings 21:27-29) And tu, Jeremiah savve wanem Manasseh duim hem barava nogud go moa winim wanem Ahab duim. Nomata olsem, Jehovah forgivim Manasseh bikos hem repent. (Mektu Kings 21:16, 17; Mektu Kronikols 33:10-13) Luk olsem, olketa story hia helpem Jeremiah for followim wei blo God for patient and for showimaot mercy taem hem deal witim olketa gud fren blo hem.—Sams 103:8, 9.

15. Hao nao Jeremiah followim wei blo Jehovah for patient taem Baruch start for go difren?

¹⁵ Tingim hao Jeremiah deal witim Baruch taem hem start for go difren from assignment blo hem. Winim wei for kwiktaem givap lo fren blo hem, Jeremiah helpem Baruch taem hem talem hem kaonsel from Jehovah wea kaen bat wea tok stret tu. (Jeremaea 45:1-5) Wanem nao iumi savve lanem from datwan?

16. Olsem Provebs 17:9 storyim, wanem nao iumi need for duim for keepim wei wea iumi fren gud tugeta for gohed?

¹⁶ Tru samting nao, iumi no expectim olketa brata and sista blo iumi for perfect. Dastawe, taem iumi start for fren gud witim olketa narawan, iumi need for duim samting for keepim datwan. Sapos olketa fren blo iumi duim wanfala mistek, iumi maet need for givim kaonsel from Bible lo wei wea kaen bat tok stret. (Sams 141:5) Sapos olketa mekem iumi feel nogud, iumi need for forgivim olketa. Taem iumi forgivim olketa, iumi mas traem best for no storyim datwan moa bihaen. (Readim Provebs 17:9.) Iumi stap lo taem wea no isi, so hem barava important for ting lo gud saed blo olketa brata and sista blo iumi and no ting lo wik point blo olketa! Diswan bae strongim wei wea iumi fren gud tugeta, and hem important for duim datwan distaem bikos iumi needim diskaen wei for fren klos lo taem blo big trabol.

17. Wanem nao Jeremiah duim wea showimaot hem wanfala tru fren lo olketa taem blo trabol?

¹⁷ Profet Jeremiah showimaot hao hem wanfala tru fren lo olketa taem blo trabol. Olsem  example, bihaen Ebed-melech wea waka for king, aotem Jeremiah from datfala well wea fulap lo mud, Ebed-melech fraet nogud olketa prince killim hem. Taem Jeremiah herem datwan, hem no just kwaet nomoa and ting fren blo hem savve deal witim datwan seleva. Nomata Jeremiah lo prison, hem duim wanem hem fit for duim for encouragem Ebed-melech taem hem storyim promis blo Jehovah for hem.—Jeremaea 38:7-13; 39:15-18.

18. Olsem Provebs 17:17 storyim, wanem nao iumi savve duim taem fren blo iumi feisim hard taem?

¹⁸ Distaem olketa brata and sista blo iumi feisim olketa difren kaen hard taem. Olsem example, staka safa from olketa natural disaster and olketa nara nogud samting wea man kosim. Taem olketa samting olsem happen, maet iumi fit for invaetem olketa brata and sista hia for kam stap lo haos blo iumi. Or iumi maet help saed lo selen. Bat samting iumi evriwan savve duim hem nao for prea for olketa. Sapos iumi herem wanfala brata or sista hem wikdaon, maet iumi no savve wanem for talem or duim. Nomata olsem, iumi savve help. Olsem example, iumi savve spendem taem witim hem. Iumi savve lisin gud taem hem story. And iumi savve storyim fevaret scripture blo iumi witim hem. (Aesaea 50:4) Important samting nao hem for iu stap witim fren blo iu lo taem wea hem needim iu.—Readim Provebs 17:17.

19. Hao nao wei for strongim wei wea iumi fren gud distaem savve helpem iumi lo future?

¹⁹ Iumi mas disaed strong for duim samting for gohed strongim wei wea iumi fren gud witim olketa brata and sista blo iumi distaem. Why nao olsem? Bikos olketa enemy blo iumi bae talem olketa laea story and rong information for trae for mekem iumi divaed. Olketa bae trae for mekem iumi againstim each other. Bat olketa bae weistim taem blo olketa nomoa. Hard for olketa spoelem trufala love wea iumi garem for each other. No eni samting wea olketa duim savve spoelem wei wea iumi fren gud tugeta. Tru nao, nomata disfala world bae finis, wei wea iumi fren tugeta bae no finis bat bae stap for olowe!