LO TAEM blo Bible, wanfala steward (wakaman) hem samwan wea lukaftarem haos or property blo nara man. Lo Hebrew and Greek languis, datfala toktok “steward” samfala taem hem minim wanfala overseer or samwan wea lukaftarem evriting lo haos.

Taem Joseph, son blo Jacob hem slave lo Egypt, hem kamap wanfala steward wea lukaftarem evri samting lo haos blo boss blo hem. Datwan minim boss blo hem lo Egypt “putum evrisamting wea hemi onam long han blong Josef.” (Jenesis 39:2-6) Bihaen, taem Joseph kamap wanfala bigman lo Egypt, hem tu markem wanfala steward for lukaftarem haos blo hem.—Jenesis 44:4.

Lo taem blo Jesus, olketa wea ownim land savve stap lo city wea farawe from olketa farm blo olketa. So olketa savve markem olketa steward for lukaftarem olketa wakaman wea duim waka evriday lo olketa farm hia.

Hu nao savve qualify for kamap wanfala steward? Lo first-century, wanfala man lo Rome wea savve raet wea nem blo hem Columella sei, wanfala slave wea olketa markem for kamap overseer, or kamap steward, hem shud “samwan wea bin duim datfala waka bifor.” Hem mas wanfala man wea “lukaftarem gud waka, hem no lesy and hem no raf.” Hem sei tu: “Winim evri nara samting, hem mas no tingse hem savve lo evri samting, and hem mas evritaem laek for lanem moa samting.”

Bible iusim disfala example blo wanfala steward for explainim samfala waka insaed Christian kongregeson. Olsem example, aposol Peter encouragem olketa Christian for iusim savve wea God givim olketa for duim samting for helpem narawan olsem wanfala steward or wakaman blo God.—1 Pet. 4:10.

Jesus seleva iusim example blo wanfala steward or wakaman lo datfala story wea stap lo Luke 16:1-8. And tu, taem Jesus storyim wanfala profesi abaotem olketa saen wea showimaot taem wea hem bae King, Jesus talem olketa disaepol blo hem dat hem bae markem datfala “wakaman wea faithful and wise,” or datfala “faithful wakaman [or steward].” Main waka blo datfala wakaman hem for evritaem provaedem olketa spiritual kaikai for olketa follower blo Jesus lo taem blo end. (Matt. 24:45-47; Luke 12:42) Iumi barava hapi bikos iumi tu kasem olketa pablikeson wea datfala faithful wakaman preparem and pipol evriwea lo world savve kasem datwan.