1-2. Hao nao iumi savve followim advaes wea stap lo Provebs 4:25? Storyim example.

TINGIM olketa example hia. Wanfala olo Christian sista hem ting go bak lo olketa gudfala taem bifor. Bat nomata laef blo hem hard tumas distaem, hem gohed for duim wanem hem fit for duim for Jehovah. (1 Cor. 15:58) Evriday, hem tingim taem wea hem and famili blo hem, and olketa fren blo hem bae stap tugeta lo paradaes. Nara sista hem remember hao narawan lo kongregeson mekem hem feel nogud, bat hem chus for no gohed feel nogud lo datfala sista. (Col. 3:13) Wanfala brata savve rememberim olketa mistek wea hem bin duim bifor, bat hem traem best for tingim nomoa wanem hem need for duim for hem gohed faithful lo Jehovah distaem.—Sams 51:10.

² Wanem nao semsem lo story blo thrifala Christian hia. Olketa evriwan rememberim olketa samting wea bin happen lo olketa bifor, bat olketa no tingim datwan evritaem. Winim wei for duim datwan, olketa gohed for luk stret lo future.—Readim Provebs 4:25.

3. Why nao iumi need for luk stret go lo future?

³ Why nao hem important for luk stret go lo future? Olsem wanfala man wea hard for wakabaot followim wanfala stret laen sapos hem gohed for luk bak, iumi bae hard for muv ahed lo service blo iumi for Jehovah sapos iumi evritaem ting go bak lo olketa samting wea bin happen lo laef blo iumi bifor.—Luke 9:62.

4. Wanem nao bae iumi storyim lo disfala article?

⁴ Lo disfala article, bae iumi story raonem thrifala trap wea savve mekem iumi for tingim tumas olketa samting wea bin happen lo iumi bifor. Olketa samting hia nao: (1) wei for tingim hao laef lo bifor hem winim distaem, (2) for gohed feel nogud, and (3) wei for feel guilty tumas. Lo each situation hia,  iumi bae lukim hao olketa Bible principle savve helpem iumi for no tingim tumas olketa samting wea happen bifor, bat for tingim nomoa future.—Phil. 3:13.

5. Wanem trap nao Eklesiastes 7:10 warnim iumi abaotem?

⁵ Readim Eklesiastes 7:10. Lukim hao lo disfala verse, hem no sei dat hem rong for ask: “Why nao laef lo bifor hem gud?” Olketa gudfala memory hem wanfala present from Jehovah. Bat, datfala verse hem sei: “Hemi no waes fo yu ask olsem, ‘?Waswe nao, evrisamting long bifoa kam hemi barava gud tumas winim distaem?’ So datfala trap nao hem wei wea man savve comparem samting wea happen lo bifor witim samting wea happen distaem and for sei distaem hem worse winim bifor. Lo nara Bible transleison hem sei: “No ask olsem, ‘Why nao olketa samting lo bifor hem gud winim distaem?’ Datwan hem wanfala karangge kwestin.”

6. Why nao hem no wise for gohed tingim hao laef blo iumi lo bifor hem gud winim distaem? Storyim example.

⁶ Why nao hem no wise for evritaem tingim hao laef lo bifor hem gud winim distaem? Datwan savve mekem iumi for tingim nomoa olketa gud samting lo bifor. Or datwan mekem iumi for ting smol lo olketa hard samting wea iumi bin feisim. Tingim example blo olketa Israelite lo bifor. Taem olketa lusim Egypt, olketa kwiktaem for forgetim hao laef lo there hem barava hard, bat olketa tingim nomoa gudfala kaikai wea olketa bin enjoyim. Olketa sei: “Long Ijip, mifala kaikaim staka fis olsem wea mifala laekem! Evritaem mifala save kaikaim kiukamba, an melen, an salat, an anian, an galik.” (Nambas 11:5) Bat waswe, olketa kaikai hia hem free nomoa? Nomoa. Olketa slave so olketa mas barava waka hard, and olketa lo Egypt barava treatim olketa nogud. (Eksodas 1:13, 14; 3:6-9) Nomata olsem, olketa forgetim nomoa olketa hard samting hia. And olketa laekem nao datfala laef lo bifor. Olketa chus for tingim nomoa gudfala taem lo bifor winim wei for tingim olketa gud samting wea  Jehovah duim for olketa. Jehovah no hapi lo kaen wei olsem.—Nambas 11:10.

7. Wanem nao helpem wanfala sista for stap klia lo disfala trap for tingim tumas laef lo bifor?

⁷ Hao nao iumi savve stap klia lo wei for tingse laef lo bifor hem gud winim distaem? Tingim example blo wanfala sista wea start for serve lo Bethel lo Brooklyn lo 1945. Samfala year bihaen, hem maritim wanfala Bethelite, and tufala serve lo Bethel for staka year. Bat lo 1976, hasband blo hem sik. Taem hem savve hao klosap bae hem dae, hem givim mi samfala gud advaes wea bae helpem mi bihaen hem dae. Hem sei lo mi: “Iumi tufala enjoyim hapi marit. Staka pipol no kasem datwan.” Then hem encouragem mi olsem: “Luk long front, from reward bilong iu long there. No ting abaotem samting wea happen bifor—nomata olketa memory wea iu garem bae go ahed. Gogo sorre bilong iu bae katdaon. No kros or feel sorre for iuseleva. Feel hapi long olketa hapi and blessing hia. . . . Olketa memory olsem present wea God givim long iumi. Go ahed for busy—trae for iusim laef bilong iu for duim samting for nara pipol. Diswan bae helpem iu for faendem hapi long living.” Waswe, iu agree hao diswan hem gudfala advaes?

8. Wanem gud samting nao sista blo iumi kasem from hem no tingting tumas abaotem laef lo bifor?

⁸ Sista blo iumi hem followim datfala advaes. Hem gohed for servem Jehovah go kasem taem hem dae, taem hem 92 years old. Samfala year bifor hem dae, hem sei olsem: “Taem mi ting bak long 63 year insaed long full-taem service bilong Jehovah, mi fit for sei mi garem laef wea mi satisfae long hem.” Why nao olsem? Hem sei: “Samting wea barava mekem iumi satisfae long laef nao hem hope wea iumi garem for stap witim olketa spiritual brata and sista bilong iumi long paradaes and servem Nambawan Creator bilong iumi datfala only tru God, Jehovah, for olowe.” * Datwan hem nambawan example blo wei for luk stret go lo future!

9. Olsem Levitikas 19:18 storyim, wanem taem nao maet iumi faendem hem hard for lusim wei wea iumi feel nogud?

⁹ Readim Levitikas 19:18. Staka taem maet iumi faendem hem hard for lusim wei wea iumi feel nogud taem samwan treatim iumi nogud, especially sapos wanfala brata or sista, klos fren, or relative nao duim datwan. Olsem example, wanfala sista accusim nara sista bikos hem tingse hem stealim selen blo hem. Bihaen datfala sista wea accusim hem kam sei sorre lo hem, bat datfala sista wea olketa sei hem steal hem gohed feel nogud lo wanem hem happen. Waswe, enitaem iu feel olsem tu? Nomata situation blo iumi maet hem difren from tufala hia, staka taem iumi evriwan savve feel nogud and tingse bae hard for iumi lusim wei wea iumi feel nogud.

10. Wanem nao savve helpem iumi taem iumi feel nogud?

¹⁰ Wanem nao savve helpem iumi taem iumi feel nogud? Wanfala samting, hem for tingim hao Jehovah hem lukim evri samting. Hem savve gud lo evri samting wea iumi go thru lo hem, insaed diswan hem taem samwan treatim iumi nogud. (Heb. 4:13) Hem feel nogud taem iumi safa. (Aesaea 63:9) And hem promis dat gogo bae hem finisim olketa nogud samting wea iumi kasem from samwan treatim iumi nogud.—Rev. 21:3, 4.

11. Wanem gud samting nao iumi bae kasem taem iumi lusim wei wea iumi feel nogud?

¹¹ Tingim tu, sapos iumi lusim wei for feel nogud bae iumi kasem gud samting. Gogo datfala sista wea olketa sei hem steal hem luksavve lo datwan, so hem lusim nao wei for feel nogud. Hem luksavve dat taem iumi forgivim narawan, Jehovah bae forgivim iumi. (Matt. 6:14) Hem no ting smol or mek excuse lo wanem sista blo hem duim, bat hem chus for lusim wei wea hem feel nogud. Gud samting wea kamaot from datwan nao sista blo iumi hem hapi and hem fit for gohed busy moa lo service blo hem for Jehovah.

12. Wanem nao iumi lanem from 1 John 3:19, 20?

¹² Readim 1 John 3:19, 20. Iumi evriwan savve feel guilty samfala taem. Olsem example, samfala olketa feel guilty bikos lo samting wea olketa duim bifor olketa lanem truth. Samfala, feel guilty bikos lo sin wea olketa duim bihaen olketa baptaes. Staka nao savve feel olsem. (Rome 3:23) Iumi laek for duim wanem hem stret bat “iumi evriwan savve sin staka taem.” (Jas. 3:2; Rome 7:21-23) Nomata iumi no laekem disfala wei for feel guilty, bat datwan savve helpem iumi. Why nao olsem? Bikos wei for feel guilty hem savve muvim iumi for stretem gogo blo iumi, and bae mekem iumi for disaed strong for no duim moa olketa sem mistek.—Heb. 12:12, 13.

13. Why nao iumi need for againstim wei for feel guilty tumas?

¹³ Bat samfala taem iumi savve feel guilty tumas, and iumi savve gohed feel guilty nomata iumi repent and Jehovah forgivim iumi finis. Kaen wei for feel guilty olsem savve spoelem iumi. (Sams 31:10; 38:3, 4) Lo wanem wei? Tingim example blo wanfala sista wea stragol witim wei for feel guilty lo olketa sin wea hem duim bifor. Hem sei: “For wat nomoa mi waka hard for Jehovah, nomata mi waka hard bae mi no laef nomoa.” Staka lo iumi savve garem sem feeling olsem datfala sista. Hem barava important for iumi againstim disfala trap for feel guilty tumas. Tingim, Satan hapi tumas sapos iumi givap, nomata Jehovah hem no givap for helpem iumi!—Comparem witim 2 Corinth 2:5-7, 11.

14. Hao nao iumi savve sure hao Jehovah hem no givap for gohed helpem iumi?

 ¹⁴ Nomata olsem iumi maet ting, ‘Hao nao mi savve sure dat Jehovah hem no givap for helpem mi?’ Sapos iu askem datkaen kwestin, hem showimaot Jehovah savve forgivim iu. Lo wanfala Wastaoa bifor, hem sei: “Iumi maet foldaon lo samfala nogud wei wea iumi bin garem lo bifor and wea iumi faendem hem hard for lusim. . . . No feel nogud lo datwan. No tingse iu duim sin wea hard for Jehovah forgivim. Datwan nao tingting wea Satan laekem iumi for garem. Taem iu feel nogud lo samting wea iu duim, datwan pruvim iu no go farawe tumas from Jehovah. No givap for prea and hambol for barava askem Hem for forgivim iu and mekem iu klin and helpem iu. Wanfala smol pikinini savve evritaem go lo dadi blo hem for askem help nomata hem duim sem mistek staka taem. Iumi tu savve gohed for askem Jehovah for helpem iumi nomata iumi foldaon lo olketa sem mistek staka taem, hem bae helpem iumi bikos hem kaen tumas lo iumi.” *

15-16. Hao nao samfala feel taem olketa luksavve hao Jehovah hem no givap for helpem olketa?

¹⁵ Staka lo olketa pipol blo Jehovah kasem comfort taem olketa luksavve hao Jehovah hem no givap for helpem olketa. Olsem example, lo samfala year wea go pas, wanfala brata kasem encouragement from wanfala experience lo olketa article “Bible Changem Laef Bilong Pipol.” Lo datfala article, wanfala sista storyim hao bikos lo olketa nogud samting wea bin happen lo laef blo hem, datwan mekem hem for no bilivim hao Jehovah lovem hem. Sista hia stragol witim datfala feeling nomata staka year bihaen hem baptaes. Bat, taem hem ting raonem datfala ransom, datwan mekem hem changem hao hem ting lo hemseleva. *

¹⁶ Hao nao datfala experience hem affectim datfala brata? Hem raet olsem: “Taem mi young, mi faet witim wei for addict lo pornography. No longtaem go nomoa, mi foldaon lo sem problem moa. Mi askem help blo olketa elder, and mi traem best for winim datfala problem. Olketa elder talem mi hao God hem  garem love and hem showimaot mercy. Nomata olsem, samfala taem mi feel iusles, and tingse maet Jehovah hem hard for lovem mi. Wei for readim experience blo datfala sista hem barava helpem mi. Distaem mi luksavve hao wei for tingse God no fit for forgivim mi, hem olsem mi sei sakrifaes blo Son hem no fit for kavarem olketa sin blo mi. Mi keepim datfala article mekem enitaem wea mi start for feel iusles and feel olsem Jehovah no lovem mi, mi savve readim datfala article and ting raonem.”

17. Hao nao Paul stap klia from disfala trap for barava guilty tumas?

¹⁷ Olketa experience olsem hem remindim iumi lo aposol Paul. Bifor hem kamap wanfala Christian, hem duim samfala serious sin tu. Paul rememberim wanem hem duim, bat hem no evritaem ting abaotem datwan. (1 Tim. 1:12-15) Hem ting lo datfala ransom olsem wanfala present wea Jehovah givim lo hem. (Gal. 2:20) Paul stap klia lo disfala trap blo wei for barava guilty and hem tingim nomoa for barava duim best blo hem for Jehovah.

18. Wanem nao iumi lanem lo disfala article?

¹⁸ Wanem nao iumi lanem from wei for ting raonem olketa trap wea iumi storyim lo disfala article? (1) Olketa gudfala memory hem wanfala blessing from Jehovah; bat nomata laef blo iumi bifor maet hem gud winim distaem, future blo iumi lo niu world bae hem gud go moa. (2) Olketa narawan maet mekem iumi feel nogud bat taem iumi chus for forgivim olketa, iumi bae fit for muv ahed lo service blo iumi for Jehovah. (3) Wei for guilty tumas savve stopem iumi for hapi taem iumi servem Jehovah. So, olsem Paul, iumi need for bilivim dat Jehovah hem forgivim iumi.

19. Hao nao iumi savve dat lo niu world bae iumi no tingim moa olketa samting lo bifor wea mekem iumi regret?

¹⁹ Iumi garem hope for laef olowe. And lo niu world, iumi bae no tingim moa olketa samting lo bifor wea mekem iumi regret. Bible sei abaotem datfala taem: “Evrisamting wea hemi hapen bifoa, bae pipol i fogetem finis nao.” (Aesaea 65:17) So tingim diswan: Samfala lo iumi wea duim service for Jehovah iumi kamap olo nao, bat lo niu world, iumi bae kamap young moa. (Job 33:25) So iumi disaed strong for no tingim olketa samting lo bifor. Bat, iumi luk lo future and tingim olketa samting wea bae kam!