1. Hao nao iumi savve kasem comfort taem iumi feel olsem no eniwan stap for helpem iumi, or taem iumi feel olsem olketa problem blo iumi hem tumas nao? (Sams 118:5-7)

WASWE, enitaem iu feel olsem no eniwan stap for helpem iu taem iu deal witim wanfala challenge? Staka nao olketa feel olsem, nomata olketa faithful servant blo Jehovah tu. (Fas Kings 19:14) Sapos diswan hem happen lo iu, tingim promis blo Jehovah wea sei: “Bae mi nating lusim iu.” So iumi garem faith and iumi savve sei: “Jehovah nao hem helpem mi. Bae mi no fraet.” (Heb. 13:5, 6) Aposol Paul raetem olketa toktok hia lo olketa brata and sista lo Judea lo samting olsem 61 C.E. Olketa toktok wea hem talem hem olsem tu toktok wea stap lo Sams 118:5-7.—Readim.

2. Wanem nao bae iumi storyim lo disfala article, and why nao olsem?

² Olsem man wea raetem psalm, Paul savve Jehovah nao man wea bae helpem hem bikos hem bin duim diswan for staka taem finis. Olsem example, for samting olsem tufala year bifor hem raetem leta blo hem for olketa Hebrew, Paul hem go lo wanfala dangerous gogo lo bigfala raf sea. (Acts 27:4, 15, 20) Lo datfala trip and bifor datwan, Jehovah showimaot hao hem barava helpem Paul lo olketa didifren wei. Iumi bae storyim thrifala lo olketa wei hia. Jehovah provaedem help thru lo Jesus and olketa angel, pipol wea garem paoa, and olketa brata and sista. Wei for story raonem samting wea happen lo Paul bae strongim wei wea iumi trustim olketa promis blo God hao hem bae ansarem olketa prea blo iumi taem iumi ask for help.

3. Wanem nao maet Paul hem ting raonem, and why nao olsem?

³ Paul hem needim help. Lo samting olsem 56 C.E., wanfala full grup pullim hem kamaot from temple lo Jerusalem and trae for killim hem dae. Lo next day, taem olketa tekem kam Paul lo Sanhedrin, olketa enemy blo hem klosap killim hem dae nao. (Acts 21:30-32; 22:30; 23:6-10) Lo datfala taem, Paul maet ting, ‘Waswe, bae mi savve fit for gohed winim disfala hard taem?’

4. Hao nao Jehovah iusim Jesus for helpem Paul?

⁴ Wanem help nao Paul kasem? Lo datfala naet bihaen olketa arrestim Paul, “Lord” Jesus, standap saed lo hem and sei: “Iu no fraet! Iu talem finis long evriwan long Jerusalem olketa samting abaotem mi, and iu mas talem pipol abaotem mi long Rome tu.” (Acts 23:11) Datfala encouragement hem kam lo barava taem! Jesus praisem Paul for waka wea hem bin duim lo Jerusalem. And hem promisim Paul hao hem bae stap sef go kasem taem hem arrive lo Rome, and lo there hem bae gohed for duim waka blo hem tu. Masbi datfala encouragement wea Paul kasem, helpem hem for feel sef olsem wanfala pikinini hem feel sef taem dadi blo hem karem hem.

5. Hao nao Jehovah helpem Paul thru lo wanfala angel? (Lukim piksa lo kava.)

⁵ Wanem moa olketa nara challenge wea Paul feisim? Bihaen samting olsem tufala year wea evri samting happen lo Jerusalem, Paul hem go insaed ship for go lo Italy, taem datfala ship hem feisim wanfala strong raf sea olketa crew and passenger tingse bae olketa dae nao. Paul hem nating fraet. Why? Hem talem olketa insaed lo ship: “Last naet, God wea mi worshipim hem sendem wanfala angel kam long mi. Hem sei, ‘Iu no fraet Paul. Iu bae kasem Rome and bae iu lukim King. God bae sevem evriwan insaed disfala ship.’” Jehovah iusim wanfala angel for talem moa sem promis wea hem bin talem Paul finis thru lo Jesus. Tru nao, gogo Paul hem kasem Rome.—Acts 27:20-25; 28:16.

6. Wanem promis nao Jesus talem wea savve strongim iumi, and why nao olsem?

⁶ Wanem help nao iumi kasem? Olsem Jesus sapotim Paul, Jesus bae sapotim iumi tu. Olsem example, Jesus promis olsem lo olketa wea followim hem: “Bae mi stap witim iufala go kasem taem wea world hem finis.” (Matt. 28:20) Toktok blo Jesus hem strongim iumi. Why? Bikos samfala taem iumi faendem hem hard for deal witim wanfala situation. Olsem example, taem samwan wea iumi lovem hem dae, iumi deal witim datfala pain no  for samfala day nomoa bat maet for samfala year. Olketa narawan mas deal witim wei wea olketa kamap olo. And olketa narawan, samfala taem olketa faendem hem hard for deal witim feeling wea kamap from depression. Nomata olsem, iumi kasem strong for iumi savve gohed bikos iumi savve Jesus hem stap witim iumi evriday, nomata lo olketa barava hard taem wea iumi feisim lo laef.—Matt. 11:28-30.

7. Olsem Revelation 14:6 storyim, hao nao Jehovah helpem iumi distaem?

⁷ Bible hem promisim iumi dat Jehovah hem iusim olketa angel blo hem for helpem iumi. (Heb. 1:7, 14) Olsem example, olketa angel sapotim and gaedem iumi taem iumi talemaot disfala “gud nius abaotem Kingdom” lo pipol blo “evri kantri, tribe, and languis.”—Matt. 24:13, 14; readim Revelation 14:6.

8. Hao nao Jehovah iusim wanfala bigman lo army for protectim Paul?

⁸ Wanem help nao Paul kasem? Lo 56 C.E., Jesus promisim Paul dat hem bae kasem Rome. Bat, samfala Jew lo Jerusalem plan for weit for killim Paul dae. Taem Claudius Lysias wea hem wanfala komanda blo army blo Rome herem datwan, hem helpem Paul. Kwiktaem nomoa, Claudius sendem Paul go lo Caesarea. Hem iusim staka army for protectim Paul for olketa go lo wanfala road wea hem samting olsem 105 kilometer from Jerusalem. Lo Caesarea, Felix wea hem nao governor, hem givim order for olketa putim Paul lo “haos bilong Herod and gaedem hem gud.” So hem hard nao for olketa wea laek for killim hem for kasem hem.—Acts 23:12-35.

9. Hao nao Governor Festus helpem Paul?

⁹ Tufala year bihaen, Paul hem still stap lo prison lo Caesarea. Festus hem nao kamap governor changem Felix. Olketa Jew barava askem Festus for letem Paul for kam lo Jerusalem for olketa judgem hem lo there, bat Festus hem no letem datwan. Maet bikos Festus hem savve finis lo plan blo olketa Jew wea “olketa bae weitim hem long road for killim hem dae.”—Acts 24:27–25:5.

10. Wanem nao Governor Festus duim taem Paul askem hem for olketa judgem case blo hem lo Rome?

¹⁰ Bihaen, kot case blo Paul hem kamap lo Caesarea. From Festus laekem olketa “Jew for hapi long hem,” hem askem Paul: “Hao, iu laek for go long kot long Jerusalem? Mi bae stap long there taem olketa judgem iu long kot.” Paul savve sapos hem go lo Jerusalem, maet bae olketa killim hem dae, and hem savve tu wanem hem mas duim for sevem laef blo hem, hem mas kasem Rome and duim ministry blo hem lo there. So hem sei: “Mi laekem King long Rome nao for judgem case bilong mi!” Bihaen hem story witim olketa counselor blo hem, Festus talem Paul: “From iu laekem King long Rome for judgem case bilong iu, bae iu mas go long hem nao.” Disison blo Festus hem sevem laef blo Paul from olketa enemy blo hem. Gogo, Paul hem stap lo Rome farawe from olketa Jew wea laek for killim hem dae.—Acts 25:6-12.

11. Wanem promis nao Aesaea talem wea maet Paul hem tingim?

¹¹ Taem Paul weit for startim gogo blo hem for Italy, hem maet tingim warning wea profet Isaiah talem for olketa wea againstim Jehovah, wea hem sei: “Yufala . . . mekem olketa plan blong yufala, bat bae hemi no save hapen, bikos God hemi stap wetem mifala.” (Aesaea 8:10) Paul savve God bae helpem hem, and diswan hem mas barava strongim hem for feisim olketa hard taem wea bae kamap.

12. Hao nao Julius treatim Paul, and wanem nao maet datwan mekem Paul luksavve lo hem?

 ¹² Lo 58 C.E., Paul hem startim gogo blo hem for Italy. From hem wanfala prisoner, wanfala army officer blo Rome wea nem blo Julius nao lukaftarem hem. Julius hem garem paoa for mekem laef blo Paul hem isi or for mekem hem hard. Bat hao nao Julius iusim paoa wea hem garem? Lo next day, taem olketa stop lo wanfala ples, “Julius hem barava kaen long Paul, hem letem hem for go lukim olketa fren blo hem.” Bihaen, Julius sevem tu laef blo Paul. Hao nao hem duim datwan? Olketa soldia laek for killim evri prisoner wea insaed lo ship, bat Julius stopem olketa for duim datwan. Why nao olsem? Hem disaed strong for sevem Paul. Maet Paul luksavve Jehovah nao hem iusim datfala officer wea kaen for helpem hem and protectim hem.—Acts 27:1-3, 42-44.

13. Hao nao maet Jehovah iusim pipol wea garem paoa?

¹³ Wanem help nao iumi kasem? Taem wanfala samting hem join witim plan blo Jehovah, maet bae hem iusim holy spirit blo hem for mekem pipol blo hem wea garem paoa for duim samting followim wanem hem laekem. King Solomon hem sei: “Olsem [Jehovah] hemi mekem riva ran long ples hemi laekem, hemi save kontrolem tingting blong lida.” (Provebs 21:1) Wanem nao datfala toktok hem minim? Olketa man savve dig and tanem wata for go lo wanfala direction followim plan blo olketa. Olsem tu, Jehovah savve iusim holy spirit blo hem for changem tingting blo olketa ruler for duim samting for fulfillim plan blo hem. Lo taem olsem, pipol wea garem paoa mekem olketa disison wea helpem pipol blo God.—Comparem Esra 7:21, 25, 26.

14. Olsem Acts 12:5 storyim, hu nao iumi savve prea for olketa?

¹⁴ Wanem nao iumi savve duim? Iumi savve “prea for olketa king and olketa bigman” taem olketa bae mekem eni disison wea bae affectim laef blo iumi and ministry blo iumi. (1 Tim. 2:1, 2; Nehemaea 1:11) Olsem olketa Christian lo first century, iumi tu prea lo God for olketa brata and sista blo iumi wea olketa stap lo prison. (Readim Acts 12:5; Heb. 13:3) And tu, iumi savve prea for olketa prison gard wea olketa lukaftarem olketa brata and sista blo iumi. Iumi savve barava askem Jehovah for muvim olketa for duim sem samting olsem Julius and for treatim gud olketa brata and sista lo prison and kaen lo olketa.—Acts 27:3.

15-16. Hao nao Jehovah iusim Aristarchus and Luke for helpem Paul?

¹⁵ Wanem help nao Paul kasem? Lo gogo blo hem for Rome, staka taem nao Jehovah helpem hem thru lo olketa brata and sista. Bae iumi storyim samfala example.

¹⁶ Tufala faithful fren blo Paul, Aristarchus and Luke, disaed for go witim Paul lo Rome. * Nomata luk olsem tufala no kasem eni promis from Jesus hao hem bae protectim tufala for travel go kasem Rome, tufala willing for putim laef blo tufala lo danger for go witim Paul. Gogo lo taem blo datfala raf sea nao tufala just savve hao tufala bae sef. Dastawe, taem Aristarchus and Luke kam insaed ship lo Caesarea, masbi Paul barava prea strong lo Jehovah and thankiu lo Jehovah from hem iusim tufala brata hia wea no fraet for helpem hem.—Acts 27:1, 2, 20-25.

17. Hao nao Jehovah iusim olketa brata for helpem Paul?

¹⁷ Lo gogo blo Paul, staka taem nao olketa brata helpem Paul. Olsem example, taem olketa kasem port lo city blo Sidon, Julius letem Paul “for go lukim olketa fren bilong hem and olketa lukaftarem hem.” And bihaen, lo city blo Puteoli, Paul and olketa fren blo hem “meetim samfala brata long there wea laekem tumas for [olketa] stap witim olketa for wanfala full week.” Taem olketa brata hia lukaftarem Paul and olketa fren blo hem, olketa mas barava hapi from wei wea Paul sharem olketa experience wea strongim olketa. (Comparem witim Acts 15:2, 3.) Bihaen olketa strongim each other, Paul and olketa fren blo hem gohed moa lo datfala gogo.—Acts 27:3; 28:13, 14.

18. Wanem nao encouragem Paul and muvim hem for thankiu lo God?

¹⁸ Taem Paul wakabaot go for kasem Rome, hem mas ting abaotem samting wea hem raetem thrifala year wea go pas for kongregeson lo datfala city, wea hem sei: “For staka year nao mi laek for kasem iufala.” (Rome 15:23)  Bat Paul hem no expectim, hao hem bae kasem lo there olsem prisoner. Masbi hem barava hapi taem hem lukim olketa brata lo Rome olketa weitim hem lo road for welkamim hem! “Taem Paul lukim olketa, diswan barava strongim hem and hem thankiu long God.” (Acts 28:15) Lukim hao Paul thankiu lo God taem hem lukim olketa brata blo hem. Why nao olsem? Bikos Paul hem luksavve moa hao Jehovah hem iusim olketa brata for helpem hem.

19. Olsem 1 Peter 4:10 storyim, hao nao maet Jehovah iusim iumi for helpem olketa narawan wea needim help?

¹⁹ Wanem nao iumi savve duim? Waswe, iu savve lo eniwan lo kongregeson blo iu wea safa bikos hem maet sik or hem feisim olketa nara challenge lo laef? Or maet samwan wea olketa lovem hem dae. Sapos iumi savve samwan hem needim help, iumi savve askem Jehovah for helpem iumi for talem or duim samting for showimaot iumi kaen and lovem olketa. Maet toktok blo iumi or samting wea iumi duim hem wanem brata or sista blo iumi hem needim. (Readim 1 Peter 4:10.) * Taem iumi helpem olketa, datwan maet helpem olketa for trustim moa hao datfala promis blo Jehovah wea sei: “Bae mi nating lusim iu” hem for olketa. Datwan bae mekem iu for barava hapi.

20. Why nao iumi fit for sei: “Jehovah nao hem helpem mi?”

²⁰ Olsem Paul and olketa fren blo hem, iumi tu savve feisim olketa problem lo laef. Bat lo olketa taem olsem, iumi savve hao iumi no fraet bikos Jehovah hem stap witim iumi. Hem givim iumi help wea iumi needim thru lo Jesus and olketa angel. And tu, sapos samting join witim plan blo hem, Jehovah bae iusim olketa pipol wea garem paoa for helpem iumi. And staka lo iumi experiencem hao Jehovah hem iusim holy spirit blo hem for muvim heart blo olketa servant blo hem for helpem olketa brata and sista. So, olsem Paul, iumi fit for barava sure and sei: “Jehovah nao hem helpem mi. Bae mi no fraet. No eniwan savve spoelem mi.”—Heb. 13:6.