1-2. Wanem nao samfala gud reason for showimaot strongfala love lo each other?

IUMI garem olketa gudfala reason for showimaot strongfala love lo each other. Proverbs storyim samfala reason. First wan: “No lusim wei fo lavem pipol [“garem strongfala love,” NW] an kaen long olketa olowe. . . . Sapos yu duim olsem, bae God hemi hapi long yu, an pipol tu bae hapi long yu.” Mek-tu: “Yu kaen long man, [“showimaot strongfala love,” NW] bae hemi kaen long yu.” Mek-thri: “Man falom wei fo lav an wei fo kaen, hemi kasem gudfala laef.”​—Provebs 3:3, 4; 11:17; 21:21.

² So first reason for showimaot strongfala love hem bikos God bae hapi lo iumi. Mek-tu reason, taem iumi duim datwan iumi bae kasem gud samting. Olsem example, from iumi showimaot strongfala love lo each other iumi garem olketa gudfala fren. Mek-thri reason, bae iumi kasem staka blessing lo future and laef olowe. So iumi garem staka gudfala reason for obeyim toktok blo Jehovah wea sei: “Showimaot strongfala love and mercy lo each other.”​—Zech. 7:9, NW.

3. Olketa wanem kwestin nao bae iumi storyim lo disfala article?

³ Lo disfala article iumi bae ansarem fofala kwestin. Hu nao iumi shud showimaot strongfala love lo olketa? Wanem nao  iumi lanem from example blo Naomi, Ruth, and Boaz? Hao nao iumi savve showimaot strongfala love? And olketa wea showimaot strongfala love bae kasem olketa wanem blessing?

4. Hao nao iumi savve followim wei blo Jehovah for showimaot strongfala love? (Mark 10:29, 30)

⁴ Lo last article hem helpem iumi for minim Jehovah showimaot strongfala love lo olketa wea lovem and worshipim hem, wea minim hem gohed lovem and faithful lo olketa. (Dan. 9:4, NW) Iumi laek for “followim wei bilong [God].” (Eph. 5:1) So iumi laek for showimaot strongfala love lo olketa spiritual brata and sista blo iumi, wea minim iumi bae gohed lovem and faithful lo olketa.​—Readim Mark 10:29, 30.

5-6. Storyim example blo samwan wea showimaot faithful fasin.

⁵ Sapos iumi minim gud wanem nao strongfala love, datwan bae helpem iumi for showimaot datfala fasin lo olketa brata and sista. For minim go moa disfala fasin, bae iumi comparem strongfala love witim faithful fasin. Tingim wanfala example.

 ⁶ Samwan hem waka for wanfala company and hem faithful for waka lo there for staka year. Nomata hem no meetim owner blo datfala company and hem no agree witim evri rul blo company, hem faithful for waka lo there bikos hem needim selen. And hem bae gohed waka lo there go kasem taem hem retire, or taem hem faendem difren waka.

7-8. (a) Why nao iumi laek for showimaot strongfala love? (b) Wanem nao bae iumi lanem from Bible buk blo Ruth?

⁷ Man wea iumi storyim lo  paragraf 6 hem faithful for waka bikos hem needim selen. Bat iumi showimaot strongfala love lo narawan, no bikos iumi bae kasem eni samting, bat from iumi lovem and faithful lo each other. Lo taem blo Bible, David hem showimaot gudfala example lo diswan. David garem strongfala love for fren blo hem Jonathan, nomata Dadi blo Jonathan laek killim hem dae. And nomata staka year bihaen Jonathan dae, David showimaot strongfala love lo son blo Jonathan, Mephibosheth.​—Fas Samuel 20:9, 14, 15; Mektu Samuel 4:4; 8:15; 9:1, 6, 7.

⁸ Iumi savve lanem staka samting abaotem hao for showimaot strongfala love from Bible buk blo Ruth. Wanem nao iumi savve lanem abaotem strongfala love from example blo Naomi, Ruth, and Boaz? Hao nao iumi savve followim example blo olketa? *

9. Why nao Naomi tingse Jehovah les lo hem?

⁹ Lo Bible buk blo Ruth, iumi read abaotem Naomi, dota-in-law blo hem Ruth, and Boaz, man wea lovem God. Boaz hem relative blo hasband blo Naomi. From bigfala hangere kasem Israel, Naomi, hasband blo hem, and tufala son blo tufala go stap lo Moab. Taem olketa lo there, hasband blo hem dae. Tufala son marit, bat then, tufala dae tu. (Rut 1:3-5; 2:1) Olketa nogud samting hia mekem Naomi for sorre tumas. From datwan, hem tingse Jehovah les lo hem. Naomi storyim feeling blo hem olsem: “[Jehovah] hemi no luk long mi nao” and “[Jehovah] hu hemi garem evri paoa, hemi mekem mi sore fogud.” Naomi sei tu: “Hemi letem bikfala trabol fo kasem mi.”​—Rut 1:12, 13, 20, 21.

10. Wanem nao Jehovah duim bihaen Naomi storyim feeling blo hem?

 ¹⁰ Taem Naomi tok olsem, wanem nao Jehovah duim? Jehovah no lusim Naomi bat hem kaen lo Naomi. Jehovah luksavve “hard taem savve mekem man wea wise for duim karangge samting.” (Eccl. 7:7, NW) So Naomi needim help for luksavve Jehovah no lusim hem. Wanem nao God duim for helpem hem? (Fas Samuel 2:8) Hem iusim Ruth for showimaot strongfala love lo Naomi. Ruth laek for helpem Naomi for no discourage and for luksavve Jehovah still lovem hem. Wanem nao iumi lanem from example blo Ruth?

11. Why nao olketa brata and sista gohed for helpem olketa narawan wea sorre or discourage?

¹¹ Strongfala love bae mekem iumi for helpem olketa narawan wea sorre or discourage. Olsem Ruth helpem Naomi, olketa brata and sista distaem gohed helpem olketa narawan insaed kongregeson wea sorre or discourage. Olketa brata and sista lovem olketa, and laek for duim eni samting for helpem olketa. (Provebs 12:25; 24:10) Aposol Paul encouragem iumi for helpem olketa taem hem sei: “Comfortim olketa wea sorre, helpem olketa wea wik, and patient long evriwan.”—1 Thess. 5:14.

12. Wanem nao best wei for helpem brata or sista wea sorre?

¹² Staka taem best wei for helpem brata or sista wea sorre hem for lisin lo hem and for talem hem iumi lovem hem. Jehovah tinghae lo wanem iumi duim for helpem olketa sheepsheep blo hem. (Sams 41:1) Provebs 19:17 sei: “Taem yu kaen long puaman, [Jehovah] hemi garem kaon long yu. Hem nao bae sensimbaek gudfala long yu.”

13. Wanem nao Ruth and Orpah duim taem Naomi talem tufala for go bak? Hao nao Ruth showimaot hem garem strongfala love for Naomi? (Lukim piksa lo front page.)

¹³ Iumi savve lanem nara samting abaotem strongfala love from wanem hem happen lo Naomi bihaen hasband and tufala son blo hem dae. Naomi disaed for go bak lo Judah taem hem savve “[Jehovah] hemi helpem olketa pipol blong hem, wea hemi givim plande kaikai long olketa moa.” (Rut 1:6, 7) Tufala dota-in-law blo Naomi disaed for go witim hem. Bat taem olketa wakabaot followim road, thrifala taem nao Naomi talem tufala for go bak lo Moab. Wanem nao tufala duim? Bible sei: “Opa hemi kisim hem fo gudbae long hem an hemi gobaek nao. Bat Rut hemi no lusim hem.” (Rut 1:8-14) Orpah followim wanem Naomi talem and hem go bak lo Moab. Nomata Naomi letem Ruth for go bak, from Ruth lovem hem, Ruth laek for stap witim hem. (Rut 1:16, 17) No eniwan forcem Ruth for duim datwan. Hem laek for stap witim Naomi bikos hem garem strongfala love for Naomi. Wanem nao iumi lanem from example blo Ruth?

14. (a) Wanem nao staka brata and sista duim distaem? (b) Olsem Hebrew 13:16 storyim, wanem nao iumi savve duim for narawan?

 ¹⁴ Strongfala love bae mekem iumi for laek duim samting for helpem narawan. Distaem, staka brata and sista showimaot strongfala love lo olketa narawan lo organization, nomata olketa no meetim samfala. Olsem example, taem olketa herem wanfala natural disaster happen, olketa laek duim samting for helpem olketa brata and sista. And taem samwan insaed kongregeson kasem hard taem saed lo selen, olketa no hol bak for faendemaot wanem nao brata hia needim and kwiktaem duim samting for helpem hem. Olsem olketa Christian lo Macedonia, olketa laek duim samting for helpem olketa nara brata and sista. Olketa willing for sharem olketa samting wea olketa garem, nomata maet hem “winim wanem olketa garem.” (2 Cor. 8:3) Masbi Jehovah hapi tumas for lukim olketa showimaot strongfala love olsem!​—Readim Hebrew 13:16.

15-16. Waswe, Ruth givap for helpem Naomi?

¹⁵ Iumi savve lanem staka gud samting taem iumi ting raonem story blo Ruth and Naomi. Bae iumi storyim thrifala samting wea iumi savve lanem.

¹⁶ No givap for helpem samwan. Taem Ruth sei hem bae go bak lo Judah witim Naomi, firstaem Naomi trae for stopem Ruth. Bat Ruth no givap for helpem Naomi. Wanem nao happen bihaen? “Taem Neomi hemi lukim dat tingting blong Rut hemi strong tumas fo go wetem hem, hemi no tokstrong long hem moa.”​—Rut 1:15-18.

17. Why nao iumi no laek givap for helpem narawan?

¹⁷ Wanem iumi lanem: Iumi need for patient witim olketa wea sorre, and iumi shud no givap for helpem olketa. Firstaem, maet wanfala sista wea needim help no acceptim help blo iumi. * Bat, iumi bae no givap for helpem hem bikos iumi garem strongfala love for hem. (Gal. 6:2) Iumi hope gogo bae hem acceptim help and comfort from iumi.

18. Wanem nao Naomi talem wea mas mekem Ruth for feel nogud?

¹⁸ No feel nogud sapos samwan no tinghae. Taem Naomi and Ruth arrive lo Bethlehem, Naomi meetim samfala wea hem savve lo olketa bifor. Hem sei lo olketa: “Taem mi lusim ples ya, mi garem plande samting. Bat distaem, [Jehovah] tekem mi kambaek, mi no garem enisamting nao.” (Rut 1:21) Masbi Ruth hem feel nogud taem hem herem Naomi talem datfala toktok! Ruth duim staka samting for helpem Naomi. Hem krae witim Naomi, comfortim hem, and wakabaot witim hem for staka day. Nomata olsem, Naomi sei: “Mi no garem enisamting nao.” Naomi talem samting wea showimaot hem no tinghae lo wanem Ruth duim, nomata Ruth standap saed lo hem. Datwan mas mekem Ruth feel nogud tumas! Nomata olsem, hem no lusim Naomi.

19. Wanem nao savve helpem iumi for no givap for helpem samwan wea discourage?

¹⁹ Wanem iumi lanem: Nomata iumi duim staka samting finis for helpem maet wanfala sista wea discourage, maet hem talem samting wea mekem iumi sorre. Bat iumi no laek for tingse hem no tinghae lo wanem iumi duim. Iumi gohed for helpem sista blo iumi, and askem Jehovah for helpem iumi luksavve lo hao for comfortim hem.​—Provebs 17:17.

20. Wanem nao helpem Ruth for no givap?

 ²⁰ Givim encouragement lo samwan wea needim. Ruth showimaot strongfala love lo Naomi, bat Ruth tu needim encouragement. Jehovah iusim Boaz for encouragem hem. Boaz sei lo Ruth: “Letem [Jehovah] hu hemi God blong mifala, hemi givim olketa gudfala samting long yu fo olketa samting ya wea yu bin duim. An letem hemi lukaftarem yu gudfala bikos yu bin kam long saet blong hem.” Olketa naesfala toktok hia barava comfortim Ruth. Ruth sei lo Boaz: “Yu gohed fo toktok gudfala nomoa long mi, an yu mekem tingting blong mi fo kamap gudfala.” (Rut 2:12, 13) Boaz encouragem Ruth lo taem hem needim, and datwan helpem Ruth for gohed and no givap.

21. Olsem Aesaea 32:1, 2 storyim, wanem nao olketa elder savve duim?

²¹ Wanem iumi lanem: Olketa wea showimaot strongfala love lo narawan, samfala taem olketa tu needim encouragement. Boaz praisem Ruth from hem lukim Ruth kaen lo Naomi. Distaem tu, olketa elder praisem olketa brata and sista wea kaen and helpem olketa narawan lo kongregeson. Taem olketa elder duim datwan, hem bae helpem olketa brata and sista hia for gohed and no givap.​—Readim Aesaea 32:1, 2.

22-23. Wanem nao showimaot Naomi changem tingting blo hem, and why nao hem duim datwan? (Psalm 136:23, 26, NW)

²² From Boaz tingim Ruth and Naomi, hem letem tufala for tekem kaikai from garden blo hem. (Rut 2:14-18) Wanem nao Naomi talem abaotem Boaz? Hem sei: “Letem [Jehovah] hemi blesim hem. Oltaem, [Jehovah] hemi gohed fo kipim promis blong hem wea hemi mekem wetem olketa pipol blong hem hu i laef yet, an olketa hu i dae finis. (Rut 2:20a) Diswan showimaot tingting blo Naomi hem barava change! Firstaem hem sorre and sei:  “[Jehovah] hemi no luk long mi nao.” Bat bihaen hem hapi and sei: “[Jehovah] hemi gohed fo kipim promis blong hem.” Why nao Naomi changem tingting blo hem?

²³ Naomi start for luksavve Jehovah no lusim hem. Hem luksavve Jehovah iusim Ruth for helpem hem for kasem bak hom blo hem. (Rut 1:16) And Naomi lukim tu hao Jehovah iusim Boaz for provaedem kaikai for hem and Ruth. (Rut 2:19, 20b) Hem just minim nao hao Jehovah stap witim hem lo evri samting wea hem deal witim! (Readim Psalm 136:23, 26. *) Naomi mas barava tinghae lo Ruth and Boaz from olketa helpem hem! Masbi tufala hapi for lukim Naomi hapi and strong moa for worshipim Jehovah.

24. Why nao iumi laek for gohed showimaot strongfala love for olketa brata and sista?

²⁴ Wanem nao iumi lanem abaotem strongfala love from Bible buk blo Ruth? Strongfala love bae mekem iumi for helpem olketa brata and sista wea sorre or discourage. Strongfala love bae mekem iumi for laek duim samting for helpem narawan. Olketa elder need for praisem olketa brata and sista wea showimaot strongfala love lo olketa narawan lo kongregeson. Taem iumi lukim olketa wea sorre or discourage olketa hapi moa and strong for worshipim Jehovah, datwan mekem iumi hapi. (Acts 20:35) Bat wanem nao main reason for gohed showimaot strongfala love? Bikos iumi laek for mekem Jehovah hapi and followim example blo hem from hem nao showimaot strongfala love for iumi.​—Eksodas 34:6; Ps. 33:22, NW.