1-2. (a) Why nao tufala wea just marit shud trustim Jehovah? (Sams 37:3, 4) (b) Wanem nao bae iumi storyim lo disfala article?

WASWE, distaem iu engage witim samwan, or iu just marit? Sapos olsem, iutufala bae luk forward for spendem laef blo iutufala tugeta. Bat iumi savve olketa wea marit savve feisim samfala hard taem, and tu, iutufala mas mekem samfala important disison wea bae mekem iutufala hapi or nomoa lo future. Sapos iutufala trustim Jehovah and followim advaes blo hem, datwan bae helpem iutufala for mekem olketa wise disison, garem gudfala marit, and for hapi. Sapos iutufala no duim olsem, iutufala savve kasem olketa problem wea bae spoelem marit blo iutufala.​—Readim Sams 37:3, 4.

² Disfala article hem for olketa wea just marit, bat hem storyim tu olketa hard samting wea evriwan wea marit maet feisim. Disfala article bae storyim wanem iumi bae lanem from example blo olketa faithful man and woman lo Bible. Olketa Bible example hia bae helpem iumi for luksavve lo olketa samting for duim wea bae mekem iumi garem gudfala laef and gudfala marit. Bae iumi storyim tu example blo samfala hasband and waef distaem.

3-4. Wanem nao samfala hard samting wea tufala wea just marit feisim?

³ Maet samfala relative or fren encouragem tufala wea just marit for duim sem samting olsem olketa narawan. Olsem example, maet parents or olketa nara relative talem tufala for mas garem pikinini. Or olketa fren and olketa lo famili maet encouragem tufala for wakem haos and for garem olketa naes samting.

⁴ Samfala wea just marit mekem olketa disison wea kosim tufala for garem bigfala kaon. From datwan, maet tufala mas duim staka waka for kasem selen for peim bak kaon. From tufala busy lo waka, maet tufala no garem inaf taem for duim study seleva, famili worship, and preaching waka, or maet tufala start for misstim olketa meeting. From tufala no duim staka spiritual samting tufala savve misstim chance for duim samfala gud samting insaed organization blo Jehovah.

5. Wanem nao iumi savve lanem from example blo Klaus and Marisa?

⁵ Man wea busy for kasem staka material samting no savve hapi. Tingim example blo Klaus and Marisa. * Taem tufala just marit, tufala evriwan waka full taem for kasem selen and staka material samting. Bat tufala no satisfae lo laef blo tufala. Klaus sei: “Mifala garem staka material samting, bat mifala no duim staka samting for Jehovah. Mitufala busy tumas and mifala stress tu.” Sapos iu just marit and iufala busy for kasem olketa material samting, maet iufala luksavve datwan no mekem iufala hapi and satisfae. Sapos olsem, no discourage. Bae iumi storyim example blo samfala wea savve helpem iufala for changem samfala samting lo laef blo iufala. Firstaem, bae iumi storyim wanem olketa hasband savve lanem from example blo King Jehoshaphat.

6. Hao nao King Jehoshaphat deal witim wanfala big problem wea followim advaes lo Provebs 3:5, 6?

⁶ Sapos iu wanfala hasband, waswe, iu savve wari bikos iu garem staka responsibility? Sapos olsem, example blo King Jehoshaphat savve helpem iu. From Jehoshaphat hem king, hem mas lukaftarem and protectim full nation! Hao nao hem deal witim datfala big responsibility? Jehoshaphat duim staka samting for protectim datfala nation. Olsem example, hem mek sure wall blo olketa taon blo Judah hem strong, and hem garem big army blo 1,160,000 soldia. (Mektu Kronikols 17:12-19) Gogo, wanfala big problem kamap for Jehoshaphat. Wanfala big army blo olketa Ammonite, Moabite, and olketa man blo Seir kam for faetem hem, and datwan mekem famili blo hem and olketa pipol barava fraet. (Mektu Kronikols 20:1, 2) Wanem nao Jehoshaphat duim? Hem askem Jehovah for helpem and strongim hem, wea followim  advaes lo Provebs 3:5, 6. (Readim.) Lo Mektu Kronikols 20:5-12, iumi savve readim prea blo Jehoshaphat wea showimaot hem barava trustim Jehovah. Wanem nao Jehovah duim for ansarem prea blo Jehoshaphat?

7. Wanem nao Jehovah duim for ansarem prea blo Jehoshaphat?

⁷ Jehovah sendem Jahaziel, wanfala Levite, for story witim Jehoshaphat. Jehovah sei: “Yufala mas redi an weit nomoa. Bae yufala save lukim dat mi [Jehovah] mi winim olketa.” (Mektu Kronikols 20:13-17) Maet Jehoshaphat tingse for standap nomoa lo taem blo faet hem no mek sense! Bat datfala instruction hem kam from Jehovah, no olketa man. So Jehoshaphat barava trustim God and followim instruction hia. Taem hem and army blo hem go for feisim olketa enemy, hem sei olketa soldia mas standap bihaen lo olketa man for singsing wea no holem eni weapon. Jehovah keepim promis blo hem for winim olketa enemy blo Jehoshaphat.​—Mektu Kronikols 20:18-23.

8. Wanem nao olketa hasband savve lanem from example blo Jehoshaphat?

⁸ Olketa hasband savve lanem gud samting from example blo Jehoshaphat. Iu garem responsibility for lukaftarem famili blo iu, so iu waka hard for protectim and provaedem wanem olketa needim. Taem iu feisim olketa problem, maet iu tingse iuseleva savve deal witim olketa problem hia. Hem gud for prea lo Jehovah for helpem iu, and no depend lo iuseleva. And tu, prea witim waef blo iu. Studyim Bible and olketa pablikeson wea kam from organization blo God for kasem direction from Jehovah, and then followim datfala direction. Taem iu mekem disison followim wanem Bible talem, maet samfala no agree and sei datfala disison hem karangge. Maet olketa sei best wei for lukaftarem famili hem for garem staka selen and olketa material samting. Bat tingim example blo Jehoshaphat wea trustim Jehovah and duim samting wea showimaot datwan. Jehovah helpem datfala faithful man, and bae hem helpem iu tu. (Sams 37:28; Heb. 13:5) Wanem nao nara samting wea olketa wea marit savve duim mekem olketa hapi?

9. Wanem nao iumi savve abaotem profet Isaiah and waef blo hem?

⁹ Main samting lo laef blo Isaiah and waef blo hem, hem for worshipim Jehovah. Isaiah hem wanfala profet, and maet waef blo hem tu savve profesi bikos Bible sei hem wanfala profet. (Isa. 8:1-4, NW) Isaiah and waef blo hem duim staka waka for Jehovah. Tufala hia barava gud example for olketa wea marit distaem!

10. Taem tufala wea marit studyim olketa Bible profesi, hao nao datwan savve helpem tufala for laek duim staka samting for Jehovah?

¹⁰ Olketa wea marit savve followim example blo Isaiah and waef blo hem taem olketa duim staka samting for Jehovah. Tufala savve strongim trust wea olketa garem lo Jehovah taem olketa studyim Bible tugeta and lukim hao olketa profesi evritaem kamap tru. * (Titus 1:2) Tufala savve ting raonem olketa samting wea tufala duim wea join witim olketa profesi. Olsem example, from tufala duim preaching waka, datwan join witim profesi blo Jesus abaotem hao olketa disaepol bae talemaot gud nius lo evri ples lo earth bifor end hem kam. (Matt. 24:14) Taem tufala studyim  gud olketa Bible profesi and lukim olketa profesi kamap tru distaem, datwan bae helpem tufala for laek duim staka samting for Jehovah.

11. Nomata laef blo Priscilla and Aquila change, wanem nao tufala duim, and why nao olsem?

¹¹ Olketa hasband and waef wea young savve lane from example blo Priscilla and Aquila, wanfala hasband and waef wea Jew. Firstaem tufala stap lo Rome and lo there nao tufala herem gud nius abaotem Jesus and kamap Christian. Masbi tufala hapi lo laef blo tufala, bat seknomoa laef hem change. Emperor Claudius talem evri Jew for mas lusim Rome. Datwan minim Aquila and Priscilla mas muv go lo nara taon, stap lo difren haos, and startim moa bisnis blo tufala for wakem tent. Waswe, olketa samting hia stopem tufala for duim staka samting for sapotim Kingdom? Taem Aquila and Priscilla lo Corinth, tufala sapotim kongregeson, and waka witim aposol Paul for strongim olketa brata and sista lo there. Gogo tufala muv lo olketa nara taon wea needim help for duim preaching waka. (Acts 18:18-21; Rome 16:3-5) From tufala laek duim staka samting for sapotim Kingdom, masbi tufala busy and hapi!

12. Why nao tufala wea marit shud markem olketa spiritual goal?

¹² Olketa wea marit savve followim example blo Priscilla and Aquila and duim staka samting for sapotim Kingdom. Hem gud for tufala wea bae marit, for storyim goal blo tufala bifor tufala marit. Taem tufala disaedem olketa samting tugeta and waka hard for kasem olketa goal blo tufala, bae olketa lukim hao Jehovah barava helpem tufala. (Eklesiastes 4:9, 12) Tingim experience blo Russell and Elizabeth. Russell sei, “Taem mifala fren yet, mifala storyim olketa spiritual goal blo mifala.” Elizabeth sei tu: “Mitufala storyim firstaem olketa goal blo mifala for mek sure eni samting mifala disaedem bihaen bae no affectim olketa spiritual goal wea mifala markem finis.” Gogo datwan mekem Russell and Elizabeth for garem chance for muv go lo Micronesia for help lo preaching waka lo there.

13. Olsem Sams 28:7 storyim, olketa wea trustim Jehovah bae kasem wanem gud samting?

 ¹³ Olsem Russell and Elizabeth, staka hasband and waef disaed for busy lo preaching and teaching waka, and no busy lo staka nara samting. Taem tufala wea marit markem olketa goal for busy lo waka for sapotim Kingdom and waka hard for kasem olketa goal hia, bae tufala kasem staka blessing. From Jehovah lukaftarem tufala bae tufala barava trustim hem, and bae tufala garem hapi laef.​—Readim Sams 28:7.

14. Wanem nao Peter and waef blo hem duim wea showimaot tufala trustim promis wea stap lo Matthew 6:25, 31-34?

¹⁴ Olketa wea marit savve lanem gud samting tu from example blo aposol Peter and waef blo hem. Samting olsem naenfala month bihaen Peter meetim Jesus, hem mekem wanfala important disison for lusim fishing bisnis blo hem. Peter duim disfala waka for sapotim famili blo hem, so taem Jesus askem Peter for followim hem, Peter mas tingim hao datfala disison bae affectim famili blo hem. (Luke 5:1-11) Peter disaed for go and preach witim Jesus. Datwan hem gudfala disison! And luk olsem waef blo Peter hapi lo disison blo Peter. Bible storyim hao bihaen Jesus resurrect, waef blo Peter travel witim hem samfala taem. (1 Cor. 9:5) From waef blo Peter showimaot gudfala example, Peter fit for givim kaonsel lo olketa nara Christian hasband and waef. (1 Pet. 3:1-7) Iumi sure Peter and waef blo hem trustim promis blo Jehovah for lukaftarem olketa wea duim staka samting for sapotim Kingdom.​—Readim Matthew 6:25, 31-34.

15. Wanem nao iumi lanem from experience blo Tiago and Esther?

¹⁵ Wanem nao savve helpem tufala wea marit for tu-thri year finis for laek duim samfala samting moa lo ministry? Hem gud for readim olketa experience blo olketa nara hasband and waef. Olsem example, tufala savve readim olketa article wea kamap samfala taem lo Wastaoa bifor wea garem title “Olketa Barava Willing for Go.” Olketa article hia helpem Tiago and Esther from Brazil for laek muv go lo nara ples wea needim help lo preaching waka. Tiago sei: “Taem mitufala read abaotem hao Jehovah helpem olketa brata and sista wea muv go lo nara ples, mifala tu laek duim sem samting for Jehovah and lukim hao Jehovah bae helpem mifala.” Gogo tufala muv go lo Paraguay, and from 2014 kam kasem distaem tufala preach lo olketa pipol wea story lo Portuguese languis. Esther sei: “Wanfala scripture wea mifala laekem tumas hem Ephesus 3:20. Wanem scripture hia storyim happen lo mitufala staka taem.” Lo datfala scripture, Paul sei Jehovah savve duim samting for iumi winim wanem iumi askem or tingim, and hem tru bikos iumi lukim Jehovah duim datwan staka taem!

16. Olketa hasband and waef wea young savve kasem advaes abaotem olketa spiritual goal from hu?

¹⁶ Olketa mature brata and sista savve kamap gudfala example for olketa hasband and waef wea young. Samfala lo olketa duim full-taem ministry for staka year. Bae hem gud for olketa young wan hia askem advaes blo olketa sapos olketa laek for duim moa samting for Jehovah. Taem iufala duim olsem datwan showimaot iufala trustim Jehovah. (Provebs 22:17, 19) Olketa elder tu savve helpem olketa hasband and waef wea young for markem and kasem olketa spiritual goal.

17. Wanem nao happen lo Klaus and Marisa, and wanem nao iumi lanem from experience blo tufala?

¹⁷ Maet iumi garem plan for duim moa samting  for Jehovah, bat hem no happen olsem hao iumi tingim. Tingim wanem happen lo Klaus and Marisa, wea iumi storyim lo start blo article. Bihaen tufala marit for thrifala year, tufala lusim hom for go duim construction waka lo Finland branch. Tufala tingse bae tufala stap longtaem lo there, bat tufala faendaot tufala savve stap for six month nomoa. Datwan mekem tufala sorre. Bat no longtaem bihaen tufala garem chance for duim wanfala course for lanem Arabic languis. Distaem tufala duim assignment lo wanfala kantri wea pipol story lo Arabic languis and tufala hapi tumas. Marisa sei: “From mifala no plan for duim diswan, mi mas trustim Jehovah and no fraet for traem niu samting. Lo disfala niu assignment, mifala lukim hao Jehovah evritaem helpem mifala lo olketa wei wea mifala no expectim. Disfala experience mekem mi for barava trustim Jehovah.” Disfala example showimaot sapos iumi trustim Jehovah bae hem evritaem helpem iumi.

18. Wanem nao olketa hasband and waef savve duim for showimaot olketa trustim Jehovah?

¹⁸ Marit hem olsem present from Jehovah. (Matt. 19:5, 6) Hem laekem olketa wea marit for hapi. (Provebs 5:18) Hem gud for hasband and waef wea young for ting raonem olketa goal lo laef blo olketa. Hem gud for ting raonem sapos iutufala savve duim moa samting for showimaot iufala tinghae lo evri samting wea Jehovah givim lo iufala. Prea lo Jehovah abaotem datwan. Lukaotem eni Bible principle wea savve helpem iufala for mekem olketa gudfala disison, then duim samting followim datwan. Olketa hasband and waef wea duim olsem savve sure olketa bae garem gudfala laef and hapi from olketa duim staka samting for Jehovah!