1. Jehovah encouragem iumi for duim wanem?

JEHOVAH showimaot strong love. (Hos. 6:6, NW) Hem laekem iumi for duim datwan tu. Jehovah iusim Micah for encouragem iumi “for showimaot strongfala love.” (Mic. 6:8, footnote, NW) Bat bifor iumi savve duim datwan, iumi need for minim wanem nao strongfala love.

2. Wanem nao strongfala love hem minim?

² Toktok wea iumi transleitim olsem “strongfala love” hem kamap 230 taem lo English New World Translation of the Holy Scriptures. Wanem nao strongfala love hem minim? Sapos iumi garem datkaen love for samwan, datwan minim iumi lovem hem tumas and iumi bae gohed lovem hem and faithful lo hem. God nao best example for showimaot strongfala love lo olketa man. Olketa man tu savve showimaot datkaen love lo each other. Lo disfala article bae iumi storyim hao Jehovah showimaot strongfala love for olketa man. And lo next article bae iumi storyim hao olketa wea worshipim Jehovah savve followim example blo hem for showimaot strongfala love lo each other.

3. Wanem nao Jehovah talem lo Moses abaotem hemseleva?

³ No longtaem bihaen olketa Israelite lusim Egypt, Jehovah storyim nem and samfala wei blo hem lo Moses. Jehovah sei:  “Mi [Jehovah] nao mi God. Oltaem mi save sore long pipol, an mi kaen tumas long olketa. Mi no save kros kuiktaem, an oltaem mi gohed fo lavem pipol blong mi an tinghevi tumas [“showimaot barava strongfala love,” NW] long olketa. . . . Mi save fogivim olketa sapos olketa duim olketa ravis samting, o agensim mi, o mekem enikaen sin.” (Eksodas 34:6, 7) Disfala toktok helpem Moses for minim samfala samting abaotem strongfala love blo Jehovah. Wanem nao datwan?

4-5. (a) Jehovah sei hem garem wanem kaen fasin? (b) Wanem nao tufala kwestin wea iumi bae storyim?

⁴ Jehovah sei hem showimaot “barava” strongfala love. Datfala toktok “barava strongfala love” kamap sevenfala taem nomoa lo Bible. (Num. 14:18; Neh. 9:17; Ps. 86:15; 103:8; Joel 2:13; Jonah 4:2, NW) Jehovah nomoa showimaot “barava strongfala love” and no olketa man. And Jehovah storyim hao hem showimaot strongfala love, so masbi datfala fasin hem important tumas lo hem. * Dastawe King David sei: “God, wei blong yu fo lavem pipol olowe, hemi barava gudfala tumas. Mifala faendem sefples long yu.” (Sams 36:5, 7) Waswe, iumi tinghae lo strongfala love blo God, olsem David?

⁵ Bae iumi storyim ansa lo tufala kwestin for helpem iumi minim go moa strongfala love: Jehovah showimaot strongfala love lo hu? And wanem gud samting nao olketa kasem from datwan?

6. Jehovah showimaot strongfala love lo hu?

⁶ Hu nao Jehovah showimaot strongfala love lo olketa? Hem showimaot diskaen love lo olketa pipol nomoa. Bible showimaot hem garem strongfala love for olketa wea fren gud witim hem. Hem no showimaot diskaen love lo evriwan. God garem nambawan plan for olketa fren blo hem, wea datwan showimaot hem faithful lo olketa and lovem olketa.

7. Hao nao Jehovah showimaot hem lovem evri pipol?

⁷ Jehovah showimaot love lo evri pipol. Jesus sei lo Nicodemus: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”—John 3:1, 16; Matt. 5:44, 45.

8-9. (a) Why nao Jehovah garem strongfala love for olketa wea worshipim hem? (b) Wanem nao bae iumi storyim distaem?

⁸ Olsem iumi storyim finis, Jehovah garem strongfala love for olketa wea worshipim hem. Iumi luksavve lo diswan from samting  wea King David and profet Daniel talem. Olsem example, David sei: “Plis gohed for showimaot strongfala love lo pipol wea savve lo iu.” Hem sei tu: “Jehovah showimaot strongfala love lo olketa wea fraet lo hem for olowe.” And Daniel sei: “Jehovah, datfala tru God, hem showimaot strongfala love lo olketa wea lovem hem and followim law blo hem.” (Ps. 36:10; 103:17; Dan. 9:4, NW) Olketa toktok hia showimaot Jehovah garem strongfala love for olketa wea worshipim hem bikos olketa savve lo hem, fraet lo hem, lovem hem, and obeyim olketa law blo hem. Hem showimaot diskaen love lo olketa wea worshipim hem nomoa.

⁹ Nomata taem iumi no worshipim Jehovah yet hem lovem iumi finis. (Sams 104:14-15) Bat from iumi worshipim hem distaem, hem showimaot tu strongfala love lo iumi. Jehovah sei lo olketa wea worshipim hem: “Strongfala love blo mi for iufala bae no savve finis.” (Isa. 54:10, NW) From David experiencem datkaen love hem sei, “Jehovah bae lukaftarem gud olketa wea faithful lo hem.” (Ps. 4:3, NW) Datwan mekem iumi for laek duim wanem? Wanfala man wea raetem psalm sei: “Man wea wise bae lukim and ting raonem olketa samting hia wea Jehovah duim wea showimaot strongfala love blo hem.” (Ps. 107:43, NW) So distaem iumi bae storyim thrifala blessing wea iumi kasem bikos Jehovah showimaot strongfala love lo iumi.

10. From iumi savve Jehovah bae gohed for lovem iumi, hao nao datwan helpem iumi? (Sams 31:7)

¹⁰ Strongfala love blo God hem stap for olowe. Disfala toktok strongfala love blo God kamap 26 taem lo Psalm 136 (NW). Lo verse 1 hem sei: “Talem thankiu lo Jehovah bikos hem duim gudfala samting. Strongfala love blo hem stap for olowe.” (Ps. 136:1, NW) Start lo verse 2 go kasem 26 hem garem tu disfala toktok “strongfala love blo hem stap for olowe.” Olketa verse hia helpem iumi for tinghae lo staka samting Jehovah duim wea showimaot hem garem strongfala love for iumi wea no savve finis. From disfala toktok “strongfala love blo hem stap for olowe” stap staka taem lo disfala Psalm,datwan helpem iumi for  luksavve love blo God for pipol blo hem no savve change. Iumi hapi for savve Jehovah bae gohed for lovem iumi for olowe, especially taem iumi kasem hard taem. Gud samting iumi kasem: From iumi savve Jehovah bae gohed for lovem iumi, datwan strongim iumi for deal witim eni hard taem and helpem iumi for gohed worshipim hem.—Readim Sams 31:7.

11. Olsem Sams 86:5 storyim, wanem nao mekem Jehovah for forgive?

¹¹ From God garem strongfala love hem bae forgivim iumi. Taem Jehovah luksavve samwan wea duim sin hem repent and lusim nogud wei blo hem, Jehovah forgivim hem. David sei olsem abaotem Jehovah: “Hemi no save panisim yumi fitim olketa sin blong yumi, an hemi no save sensimbaek olketa nogud wei blong yumi.” (Sams 103:8-11) David experiencem hao sin mekem hem guilty and for sorre tumas. Bat hem savve tu Jehovah hem “willing for forgive.” Wanem nao mekem Jehovah for forgive? Ansa stap lo Sams 86:5 (Readim.) Lo datfala prea, David sei taem samwan wea sin askem Jehovah for forgivim hem, Jehovah duim datwan bikos hem garem strongfala love for hem.

12-13. Sapos iumi gohed guilty and wikdaon bikos lo sin wea iumi duim bifor, wanem nao savve helpem iumi?

¹² Hem stret for sorre from iumi duim sin, bikos datwan savve helpem iumi for ask for forgiveness and for changem wei blo iumi. Bat samfala wea repent finis gohed guilty bikos lo olketa sin wea olketa duim bifor. Olketa tingse Jehovah hard for forgivim olketa nomata olketa askem hem for forgivim olketa and stop for duim olketa nogud samting. Sapos iu feel olsem, samting wea savve helpem iu hem for savve Jehovah forgivim iu bikos hem garem strongfala love for iu.

¹³ Gud samting iumi kasem: Nomata iumi duim sin bifor, from iumi repent iumi savve garem gudfala konsens and gohed hapi for worshipim Jehovah. Diswan bikos ‘blood blo Jesus hem mekem iumi klin from evri sin blo iumi.’ (1 John 1:7) Sapos iumi wikdaon bikos lo eni sin wea iumi duim bifor, hem gud for tingim Jehovah laekem tumas for forgivim iumi sapos iumi repent. Lukim wanem David talem abaotem hao strongfala love blo  God mekem Hem for forgivim iumi. David sei: “Lav [“strongfala love,” NW] blong hem fo olketa wea i gohed fo tinghae long hem, hemi bikfala tumas, hemi bikfala moa winim disfala wol. Hemi gohed fo tekem go farawe olketa sin blong yumi, olsem ples wea san hemi kamap hemi farawe from ples wea san hemi godaon.” (Sams. 103:11, 12) Jehovah willing for “fogivim olketa sin blong yufala.”—Aesaea 55:7.

14. Wanem nao David talem abaotem hao iumi kasem protection from strongfala love blo God?

¹⁴ From God garem strongfala love iumi kasem protection. David sei lo Jehovah: “Yu nao ples blong mi fo haed long hem, an yu gohed fo gadem mi from olketa trabol. . . . Olketa wea i trastem [Jehovah], bae hemi gohed fo lukaftarem olketa bikos hemi lavem olketa tumas.” (Sams 32:7, 10) Lo bifor, pipol trustim olketa wall blo taon for gaedem and protectim olketa from enemy. Strongfala love blo Jehovah hem olsem datfala wall and iumi sure hem bae protectim iumi from eni samting wea savve spoelem faith blo iumi. From Jehovah garem strongfala love for iumi hem leadim iumi kam lo hem tu.—Jer. 31:3, NW.

15. Why nao David and Moses comparem strongfala love blo Jehovah witim wanfala sef ples?

¹⁵ David story moa abaotem hao pipol blo God kasem protection. Hem sei abaotem Jehovah: “Yu lavem mi tumas. Yu nao yu sefples blong mi.” David sei tu: “Hem showimaot strongfala love lo mi. Hem sef ples blo mi and hem gohed sevem mi. Hem olsem shield blo mi and hem keepim mi sef.” (Sams 59:17; Ps. 144:2, NW) Why nao David comparem strongfala love blo Jehovah witim wanfala sef ples? From iumi worshipim Jehovah, iumi sure nomata wea iumi stap lo earth, Jehovah bae protectim iumi from eni samting wea savve spoelem faith blo iumi. Psalm 91 storyim tu hao God protectim iumi. Hem sei: “Yu nao yu God blong mi wea mi trastem. Yu nao yu lukaftarem mi, an yu gadem mi.” (Sams 91:1-3, 9, 14) Moses tu storyim hao Jehovah hem olsem wanfala sef ples. (Ps. 90:1, footnote, NW) And tu, no longtaem bifor Moses hem dae, hem sei: “Yufala save stap sef long God hu hemi stap olowe. Oltaem nomoa, hemi gohed fo holem yufala long han blong hem.” (Diutronomi 33:27) Wanem nao disfala toktok “holem yufala long han blong hem” showimaot abaotem Jehovah?

16. Hao nao Jehovah helpem iumi? (Psalm 136:23, NW)

¹⁶ From iumi savve Jehovah hem sef ples blo iumi datwan strongim iumi. Bat maet iumi faendem hard for deal witim laef samfala taem. Hao nao bae Jehovah helpem iumi lo taem olsem? (Readim Psalm 136:23 *) Jehovah bae ‘holem iumi lo hand blo hem’ olsem Moses storyim, for helpem iumi getap taem iumi foldaon. (Sams 28:9; 94:18) Gud samting iumi kasem: Iumi savve Jehovah laek for protectim iumi and diswan helpem iumi lo tufala wei. First wan, nomata wea iumi stap Jehovah hem olsem sef ples blo iumi. Mek-tu, iumi sure Jehovah lovem iumi tumas.

17. Why nao iumi sure God showimaot strongfala love lo iumi?

¹⁷ Olsem iumi storyim finis, taem iumi kasem hard taem iumi sure Jehovah bae helpem iumi for gohed faithful lo hem. (2 Cor. 4:7-9) Profet Jeremiah sei: “Jehovah showimaot strongfala love lo iumi dastawe iumi sev, bikos mercy blo hem no savve finis.” (Lam. 3:22, NW) Iumi sure Jehovah garem strongfala love for iumi bikos Bible sei: “[Jehovah]  gohed fo lukaftarem olketa hu i trastem hem bikos hemi tinghevi [“showimaot strongfala love,” NW] long olketa olowe.”—Readim Sams 33:18-22.

18-19. (a) Wanem nao hem gud for iumi tingim? (b) Wanem nao bae iumi storyim lo next article?

¹⁸ Hem gud for tingim diswan. Jehovah lovem iumi finis bifor iumi worshipim hem, and then taem iumi worshipim Jehovah hem showimaot tu strongfala love for iumi. From datwan, iumi kasem protection from Jehovah, hem gohed for lovem iumi, and hem duim evri samting wea hem promisim. Hem laekem iumi for fren witim hem for olowe! (Sams 46:1, 2, 7) So nomata wanem hard samting kasem iumi, Jehovah bae strongim iumi for gohed faithful.

¹⁹ Iumi lanem hao Jehovah showimaot strongfala love lo olketa wea worshipim hem. Hem laekem iumi tu for showimaot strongfala love lo each other. Hao nao iumi savve duim datwan? Lo next article bae iumi storyim datfala important subject.