1. Wanem nao maet iumi wari abaotem?

WASWE, iumi warim olketa samting wea bae happen lo future, olsem taem God finisim false religion, taem Gog blo Magog attakim pipol blo God, and taem Armageddon kam? Maet iumi tingse bae iumi no garem strongfala faith taem olketa hard samting hia happen. Sapos iumi warim datwan, disfala article bae helpem iumi bikos hem bae storyim toktok blo Jesus lo olketa disaepol blo hem, wea stap lo theme text. Hem sei: “Iufala no wari. Showimaot faith.” (John 14:1) So iumi needim strongfala faith for deal witim olketa hard samting wea bae happen.

2. Wanem nao iumi savve duim for strongim faith blo iumi, and wanem nao bae iumi storyim lo disfala article?

² Sapos iumi savve wanem for duim taem iumi deal witim olketa test wea kasem iumi distaem and ting raonem datwan, iumi bae luksavve hao for strongim faith blo iumi. Taem iumi winim each test, datwan bae strongim faith blo iumi for deal witim olketa test wea bae kamap lo future. Lo disfala article, bae iumi storyim fofala hard samting wea olketa disaepol blo Jesus feisim, wea showimaot olketa need for strongim go moa faith blo olketa. Then, bae iumi storyim tu wanem iumi savve duim sapos iumi feisim semkaen hard samting distaem, and diswan bae redyim iumi for olketa test wea bae kamap lo future.

3. Wanem nao toktok blo Jesus lo Matthew 6:30, 33 helpem iumi for luksavve?

³ Dadi bae laek for provaedem kaikai, kaleko, and ples for famili stap lo hem. Bat maet datwan no isi lo disfala taem wea evri samting hem hard. Olsem example, samfala brata  and sista lusim waka blo olketa, and olketa no savve faendem nara waka. Or maet olketa faendem waka bat no acceptim bikos hem no fitim olketa Christian. Sapos datwan kasem iumi, bae iumi needim strongfala faith lo Jehovah for provaedem wanem famili blo iumi needim. Jesus storyim datwan for olketa disaepol blo hem lo Sermon lo Maunten. (Readim Matthew 6:30, 33.) Taem iumi trustim Jehovah for lukaftarem iumi, datwan bae helpem iumi for tingim wanem iumi fit for duim for sapotim Kingdom. And taem iumi luksavve Jehovah provaedem olketa material samting wea iumi needim, iumi bae luksavve hem lovem iumi and datwan bae strongim faith blo iumi.

4-5. Wanem nao helpem famili blo Miguel taem olketa wari abaotem wanem olketa needim?

⁴ Tingim hao Jehovah lukaftarem wanfala famili lo Venezuela wea barava wari from olketa no garem wanem olketa needim. Firstaem, famili blo Miguel garem inaf selen from olketa ownim farm blo olketa seleva. Then samfala raskol kam witim gun and ranem olketa from property blo olketa. Miguel sei: “Distaem mifala wakem garden lo wanfala smol area wea samwan letem mifala for iusim. Evriday mi askem Jehovah for provaedem need blo mifala for datfala day.” Laef blo disfala famili hem hard tumas, bat olketa garem faith lo Jehovah for provaedem wanem olketa needim. Olketa evritaem attendim meeting and duim preaching waka. Main samting lo laef blo olketa hem for sapotim Kingdom, so Jehovah provaedem wanem olketa needim.

⁵ Miguel and waef blo hem, Yurai, tinghae lo wanem Jehovah duim for lukaftarem olketa. Jehovah iusim olketa brata and sista for provaedem samfala samting wea olketa needim, and helpem Miguel for faendem waka. Jehovah iusim tu branch office for provaedem samfala samting wea olketa needim. From Jehovah barava lukaftarem olketa, datwan strongim faith blo full famili. First dota blo tufala, Yoselin, tingim wanfala taem wea Jehovah helpem famili blo olketa and sei: “Mi lukim hao Jehovah helpem mifala, and datwan barava encouragem mi. Mi tingim Jehovah hem fren blo mi, and mi sure hem bae evritaem helpem mi.” Hem sei tu: “Olketa hard taem wea kasem mifala hem redyim mifala for deal witim olketa hardfala test lo future.”

6. Hao nao iu savve strongim faith blo iu taem iu kasem hard taem saed lo selen?

⁶ Waswe, distaem iu lusim waka blo iu or iu stragol for kasem inaf selen? Sapos olsem, datwan no isi. Bat maet iu savve iusim disfala taem for strongim faith blo iu. Hem gud for readim wanem Jesus talem lo Matthew 6:25-34 and ting raonem datwan. Tingim tu example blo olketa brata and sista wea busy lo waka blo Jehovah and hem provaedem wanem olketa needim. (1 Cor. 15:58) Datwan bae helpem iu for garem strongfala faith lo Jehovah for lukaftarem iu, olsem hem duim for olketa narawan. Jehovah savve lo wanem iu needim, and bae hem provaedem datwan. Taem iu luksavve Jehovah hem evritaem lukaftarem iu, datwan bae strongim faith blo iu mekem iu  fit for deal witim olketa hardfala test lo future.​—Habakuk 3:17, 18.

7. Olsem Matthew 8:23-26 storyim, hao nao wanfala big wind testim faith blo olketa disaepol?

⁷ Taem Jesus and olketa disaepol lo sea, bigfala wind kasem olketa. Jesus iusim samting wea happen for helpem olketa disaepol for luksavve olketa need for strongim faith blo olketa. (Readim Matthew 8:23-26.) Datfala strong wind mekem sea for kam insaed lo boat, bat Jesus gohed sleep. Olketa disaepol fraet and wekapem hem for askem hem for sevem olketa. Jesus kaonselem olketa and sei: “Hao nao iufala fraet? Faith bilong iufala hem smol nomoa.” Olketa disaepol shud luksavve Jehovah bae protectim Jesus and olketa wea stap witim hem. Wanem nao iumi savve lanem from disfala story? Strongfala faith savve helpem iumi for deal witim eni hard taem wea kasem iumi.

8-9. Wanem hard taem nao kasem Anel, and wanem nao helpem hem for deal witim datwan?

⁸ Tingim Anel, wanfala singol sista lo Puerto Rico wea deal witim wanfala barava hard taem. Datwan happen lo 2017 taem Cyclone Maria distroem haos blo Anel, and then hem lusim waka blo hem tu. Anel sei. “Olketa samting hia mekem mi wikdaon, bat from mi gohed prea lo Jehovah, datwan helpem mi for barava trustim hem and no wari tumas.”

⁹ Anel sei from hem willing for obey, datwan tu helpem hem for deal witim hard taem wea kasem hem. Hem sei: “From mi followim direction wea kam from organization blo Jehovah datwan helpem mi for no wari tumas. Mi lukim hao Jehovah iusim olketa brata and sista for encouragem mi and givim olketa samting wea mi needim.” Hem sei moa: “Jehovah givim mi olketa samting winim wanem mi askem, and datwan barava strongim faith blo mi.”

10. Wanem nao iu savve duim taem iu feisim hard taem?

¹⁰ Waswe, distaem iu tu feisim hard taem? Maet natural disaster kasem ples blo iu. Or maet iu feisim difren kaen hard taem, olsem wanfala big sik wea mekem iu discourage from iu no savve hao for deal witim. Olketa hard taem wea kasem iu savve mekem iu wari. Nomata olsem, gohed for trustim Jehovah. Prea lo Jehovah for helpem iu, and tingim olketa samting wea Jehovah duim finis for helpem iu. Datwan bae strongim faith blo iu. (Sams 77:11, 12) Iu savve sure Jehovah bae gohed lukaftarem iu.

11. Why nao iumi shud followim direction wea iumi kasem from olketa wea Jehovah markem for leadim iumi?

¹¹ Wanem moa savve helpem iumi for deal witim olketa hard taem? Olsem Anel talem, hem important for followim direction wea iumi kasem from olketa wea Jehovah and Jesus markem for leadim iumi. Maet iumi kasem samfala direction wea iumi tingse hem no mek sense. Bat Jehovah bae blessim iumi taem iumi willing for obey. Olketa story lo Bible and experience blo olketa wea faithful for worshipim  Jehovah showimaot taem man obey datwan savve sevem laef. (Eksodas 14:1-4; Mektu Kronikols 20:17) Hem gud for ting raonem olketa example olsem. Datwan bae helpem iumi for willing for followim eni direction wea kam from organization blo Jehovah, nomata distaem or lo future. (Heb. 13:17) Sapos iumi trustim and obeyim olketa wea leadim iumi, bae iumi no fraet lo datfala big trabol wea klosap for kam.​—Provebs 3:25.

12. Hao nao strongfala faith bae helpem iumi for deal witim samting wea no followim justice, olsem Luke 18:1-8 storyim?

¹² Jesus savve bae hem no isi for olketa disaepol deal witim olketa samting wea no followim justice. Jesus iusim datfala tokpiksa lo Bible buk blo Luke for helpem olketa. Jesus storyim widow woman wea gohed askem wanfala judge for helpem hem from hem sure gogo datfala judge bae duim datwan. Jesus comparem datfala judge wea no raeteous witim Jehovah wea followim justice. Hem sei: “Sapos datfala judge savve duim stret samting, God bae barava duim stret samting for olketa wea hem chusim and wea singaot long hem evritaem for helpem olketa.” (Readim Luke 18:1-8.) Then Jesus sei: “Taem Son bilong man hem kam, waswe, pipol long earth bae garem diskaen faith?” Taem iumi deal witim olketa samting wea no followim justice, iumi need for garem strongfala faith olsem datfala widow. Strongfala faith bae mekem iumi patient and weit lo Jehovah for helpem iumi. And iumi need for sure Jehovah bae ansarem olketa prea blo iumi. Samfala taem, Jehovah ansarem olketa prea lo wei wea iumi no expectim.

13. Taem famili blo Vero ranawe from vilij blo olketa, hao nao prea helpem olketa?

¹³ Tingim wanem hem happen lo Vero, wea stap lo wanfala vilij lo Democratic Republic of the Congo. Vero, hasband blo hem wea no Witness, and 15 year old gele blo tufala mas ranawe bikos staka soldia attakim vilij blo olketa. Taem olketa kasem wanfala road blok, olketa soldia stopem olketa and sei for killim olketa dae. Vero start for krae, so dota blo hem prea big for comfortim mami blo hem, and hem gohed talem nem blo Jehovah lo prea blo hem. Bihaen hem prea finis, komanda blo olketa soldia askem datfala gele, “Hu nao teachim iu for prea olsem?” Hem sei, “Mami blo mi teachim mi hao for followim example prea wea stap lo Matthew 6:9-13.” Komanda sei, “Iu and parents blo iu savve go, and mi hope Jehovah, God blo iufala, bae protectim iufala!”

14. Wanem nao maet testim faith blo iumi, and wanem nao bae helpem iumi for deal witim datwan?

¹⁴ Olketa experience olsem showimaot hao hem important for prea. Bat hao sapos Jehovah no ansarem prea blo iumi lo hao iumi laekem, or hem no ansarem kwiktaem? Iumi laek followim example blo widow lo tokpiksa blo Jesus for gohed prea, and trustim God for lukaftarem iumi and ansarem prea blo  iumi. Gohed askem Jehovah for holy spirit for helpem iumi. (Phil. 4:13) Tingim, klosap nao Jehovah bae stretem evri nogud samting wea iumi kasem, and bae iumi no tingim moa. From Jehovah helpem iumi for deal witim olketa hard samting distaem, datwan bae strongim iumi for feisim olketa hard samting lo future.​—1 Pet. 1:6, 7.

15. Olsem Matthew 17:19, 20 storyim, why nao Jesus sei olketa disaepol needim faith?

¹⁵ Jesus teachim olketa disaepol hao faith bae helpem olketa for gohed strong taem olketa kasem test. (Readim Matthew 17:19, 20.) Wantaem, olketa disaepol no savve raosem wanfala demon, nomata olketa duim datwan lo narataem. Jesus sei reason why olketa no savve duim datwan hem bikos olketa needim faith. Hem sei sapos olketa garem faith bae olketa savve winim olketa hard taem wea olsem maunten. Distaem, maet iumi tu kasem test wea mekem iumi laek givap.

16. Taem hasband blo Geydi dae, hao nao faith helpem Geydi for deal witim datwan?

¹⁶ Tingim bigfala test wea kasem Geydi, wanfala sista lo Guatemala. Taem Geydi and hasband blo hem, Edi, go bak lo haos from meeting, olketa criminal killim Edi dae. Hao nao faith blo Geydi helpem hem for gohed nomata datfala barava nogud samting happen? Geydi sei: “Mi prea lo Jehovah and talem hem hao mi sorre tumas, and datwan helpem mi for garem peace. Jehovah iusim famili and olketa brata and sista lo kongregeson for helpem and comfortim mi. Mi faendem hem gud for gohed busy lo waka blo Jehovah, bikos datwan helpem mi for no sorre tumas. Disfala big test helpem mi for luksavve nomata wanem test bae kamap lo future, Jehovah, Jesus, and olketa brata and sista bae helpem mi for deal witim datwan.”

17. Wanem nao bae helpem iumi for deal witim bigfala test?

¹⁷ Maet iu tu deal witim wanfala big test distaem. Waswe, samwan iu lovem hem dae? Iu savve strongim faith blo iu taem iu readim olketa story lo Bible abaotem olketa wea laef bak from dae. Waswe, iu barava sorre from samwan insaed famili disfellowship? Hem gud for duim study wea bae mekem iu sure hao hem stret for Jehovah disciplinem olketa wea no repent. Nomata wanem hard taem iu kasem, datwan hem chance for iu strongim faith blo iu. Storyim evri feeling blo iu lo Jehovah. No stap seleva, bat spendem taem witim olketa brata and sista. (Provebs 18:1) Duim olketa spiritual samting nomata maet hem no isi bikos datwan bae helpem iu for gohed faithful. (Sams 126:5, 6) So gohed for go lo olketa meeting, duim preaching waka, and readim Bible. And gohed for tingim olketa nambawan blessing wea Jehovah promisim for iumi lo future. Taem iu lukim hao Jehovah helpem iumi distaem, datwan bae barava strongim faith blo iumi.

18. Sapos iumi luksavve faith blo iumi no strong, wanem nao iumi savve duim?

¹⁸ Sapos hard samting wea kasem iumi bifor or distaem mekem iumi luksavve faith blo iumi no strong, no discourage. Datwan chance for iumi strongim faith blo iumi. Duim sem samting wea olketa aposol duim and askem Jehovah for “strongim go moa faith bilong [iumi].” (Luke 17:5) Ting raonem tu olketa example wea iumi storyim lo disfala article. Olsem Miguel and Yurai, tingim olketa samting wea Jehovah duim finis for helpem iumi. Prea strong lo Jehovah taem iumi kasem hard taem, olsem dota blo Vero and Anel. And olsem Geydi, luksavve hao Jehovah iusim famili and olketa fren for givim help wea iumi needim. Taem iumi feisim hard taem acceptim help from Jehovah, bikos datwan bae mekem iumi sure hem bae helpem iumi for deal witim eni hard samting wea iumi feisim lo future.

19. Wanem nao Jesus sure lo hem, and wanem nao iumi savve sure lo hem?

¹⁹ Nomata Jesus talem olketa disaepol for showimaot faith, hem sure witim help blo Jehovah olketa bae garem strongfala faith for deal witim eni hard samting wea bae kamap. (John 14:1; 16:33) Jesus sei tu wanfala big crowd bae winim bigfala trabol from olketa garem strongfala faith. (Rev. 7:9, 14) Witim help blo Jehovah, bae iumi tu insaed lo datfala big crowd sapos iumi duim evri samting wea iumi fit for duim distaem for strongim faith blo iumi!​—Heb. 10:39.