STUDY ARTICLE 45
Hao Jehovah Helpem Iumi for Duim Ministry blo Iumi
“Bae olketa savegud dat wanfala tru profet nao hemi stap wetem olketa.”—ESIKIEL 2:5, SIPB.
SONG 67 “Talemaot Toktok Bilong God”
ARTICLE BAE STORYIM a
1. Wat nao iumi expectim, and wat nao iumi sure lo hem?
IUMI expectim samfala pipol bae againstim iumi taem iumi duim preaching waka and luk olsem datwan bae worse go moa. (Daniel 11:44, SIPB; 2 Tim. 3:12; Rev. 16:21) Nomata olsem, iumi savve sure Jehovah bae helpem iumi. Why nao iumi sure lo datwan? Bikos Jehovah evritaem helpem pipol blo hem for duim assignment blo olketa, nomata samfala taem hem no isi. For example, bae iumi storyim samfala samting wea happen lo profet Ezekiel taem hem preach lo olketa Jew wea stap lo Babylon.
2. Wat kaen pipol nao Jehovah sei Ezekiel preach lo olketa, and wat nao bae iumi storyim lo disfala article? (Esikiel 2:3-6, SIPB)
2 Wat kaen pipol nao Ezekiel preach lo olketa? Jehovah sei olketa “bikhed,” “nating tinghae,” and “barava againstim” hem. Olketa olsem scorpion and nila grass bikos olketa laek spoelem Ezekiel. Dastawe staka taem Jehovah talem Ezekiel for “no fraetem olketa”! (Readim Esikiel 2:3-6, SIPB.) Ezekiel fit for duim assignment blo hem for preach bikos (1) Jehovah sendem hem, (2) holy spirit blo God helpem hem, and (3) toktok blo God strongim hem. Hao nao thrifala samting hia helpem Ezekiel? And hao nao olketa samting hia helpem iumi distaem?
JEHOVAH SENDEM EZEKIEL
3. Wat nao samfala toktok wea strongim Ezekiel, and why nao Ezekiel savve sure Jehovah bae helpem hem?
3 Jehovah sei lo Ezekiel: “Bae mi sendem yu.” (Esikiel 2:3, 4, SIPB) Masbi datfala toktok strongim Ezekiel. Why nao olsem? Bikos hem mas tingim hao Jehovah talem semkaen toktok taem hem chusim Moses and Isaiah for kamap profet blo Hem. (Eksodas 3:10; Aesaea 6:8, SIPB) Ezekiel savve tu hao Jehovah helpem tufala profet hia for duim samfala assignment wea no isi. So taem Jehovah talem Ezekiel: “Bae mi sendem yu,” datfala profet garem gudfala reason for trustim Jehovah bae helpem hem. Nara samting tu, lo Bible buk blo Ezekiel, iumi lukim disfala toktok: “[Jehovah] hemi talemaot Mesij blong hem long mi.” (Esikiel 3:16, SIPB) And datfala toktok kamap staka taem lo buk blo Ezekiel. (Esikiel 6:1, SIPB) So masbi Ezekiel hem barava sure Jehovah nao sendem hem. And tu, from Ezekiel hem son blo wanfala priest, masbi dadi blo hem teachim hem hao Jehovah talem olketa profet blo Hem bifor, Hem bae helpem olketa. Bible showimaot Jehovah talem Isaac, Jacob and Jeremiah, hao hem ‘stap witim’ olketa.—Gen. 26:24; 28:15; Jeremaea 1:8, SIPB.
4. Wat nao Jehovah talem wea mas strongim Ezekiel?
4 Waswe, bae olketa Israelite lisin lo Ezekiel taem hem preach lo olketa? Jehovah sei: “Olketa pipol blong Israel i les fo lisin long yu, bikos olketa les tu fo lisin long mi.” (Esikiel 3:7, SIPB) Taem pipol hia les for lisin lo Ezekiel datwan showimaot olketa les for lisin lo Jehovah. Datfala toktok helpem Ezekiel for luksavve hao nomata pipol les for lisin lo hem, datwan no minim hem no duim gud assignment blo hem. Jehovah talem Ezekiel tu hao taem judgment wea hem talemaot hem happen, pipol bae “save dat wanfala tru profet bin stap kam long midol long olketa.” (Esikiel 2:5; 33:33, SIPB) Disfala toktok mas barava strongim Ezekiel for gohed duim ministry blo hem.
DISTAEM JEHOVAH SENDEM IUMI
Olsem Ezekiel, samfala maet les for herem message blo iumi and againstim iumi, bat iumi savve Jehovah hem stap witim iumi (Lukim paragraf 5-6)
5. Olsem Aesaea 44:8 (SIPB) storyim, wat nao savve strongim iumi?
5 From iumi savve Jehovah chusim iumi for duim preaching waka, datwan strongim iumi tu. Hem nambawan privilege for Jehovah kolem iumi ‘olketa witness’ blo hem! (Aesaea 43:10, SIPB) Olsem Jehovah talem Ezekiel for “no fraetem” pipol, Jehovah talem iumi tu for “no fraet.” Why nao iumi shud no fraetem olketa wea againstim iumi? Olsem Ezekiel, Jehovah nao sendem iumi and bae hem helpem iumi.—Readim Aesaea 44:8, SIPB.
6. (a) Hao nao iumi savve Jehovah bae helpem iumi for deal witim olketa hard taem? (b) Wat nao savve encouragem iumi?
6 Jehovah promis for helpem iumi. For example, just bifor Jehovah sei: ‘Yufala nao witnes blong mi,’ hem sei: ‘Taem trabol hemi kasem yufala olsem yufala gotru long dipsi, bae mi stap wetem yufala. An taem yufala garem hadtaem olsem yufala gotru long riva wea ran bikfala, bae hemi no save draonem yufala. Taem trabol hemi kasem yufala olsem yufala gotru long faea, bae hemi no save bonem yufala.’ (Aesaea 43:2, SIPB) Taem iumi preach lo pipol, samfala taem iumi feisim olketa hard taem wea olsem fire and river wea flood. Nomata olsem, Jehovah bae helpem iumi for gohed preach. (Aesaea 41:13, SIPB) Olsem lo taem blo Ezekiel, staka pipol les lo message blo iumi. Iumi luksavve datwan no minim iumi no duim gud ministry blo iumi. Jehovah hapi from iumi faithful for gohed preach, and datwan encouragem iumi. Aposol Paul sei: “God bae blessim waka bilong man wanwan.” (1 Cor. 3:8; 4:1, 2) Wanfala sista wea pioneer for longtaem sei: “Mi barava hapi for savve hao Jehovah bae blessim hard waka blo iumi.”
HOLY SPIRIT BLO GOD HELPEM EZEKIEL
Ezekiel lukim vision abaotem chariot blo Jehovah, wea mekem hem sure Jehovah bae helpem hem for duim gud ministry blo hem (Lukim paragraf 7)
7. Hao nao Ezekiel mas feel evritaem hem tingim vision wea hem lukim? (Lukim piksa lo front page.)
7 Lo wanfala vision Ezekiel lukim hao holy spirit blo God garem bigfala paoa. Hem lukim holy spirit helpem olketa angel and muvim olketa big wheel blo wanfala chariot lo heven. (Esikiel 1:20, 21, SIPB) Wat nao Ezekiel duim taem hem lukim datwan? Hem seke tumas and hem sei: “Mi leidaon long daon nao wetem fes blong mi long graon.” (Esikiel 1:28, SIPB) Masbi evritaem hem tingim datfala spesol vision datwan mekem hem sure holy spirit blo God bae helpem hem for gohed duim ministry blo hem.
8-9. (a) Wat nao happen lo Ezekiel taem Jehovah komandim hem for “stanap”? (b) Wat moa Jehovah duim for strongim Ezekiel for preach lo olketa wea les for lisin lo hem?
8 Jehovah komandim Ezekiel: “Stanap. Mi wande tok wetem yu.” Datfala komand and holy spirit blo God strongim Ezekiel for getap from graon. Ezekiel sei: “[Jehovah] hemi putum paoa blong hem insaet long mi an hemi mekem mi stanap.” (Esikiel 2:1, 2, SIPB) Lo full ministry blo Ezekiel God iusim holy spirit for helpem hem. (Esikiel 3:22; 8:1; 33:22; 37:1; 40:1, SIPB) Datfala holy spirit strongim Ezekiel for duim assignment wea God givim hem for preach lo olketa wea ‘les for lisin’ lo hem. (Esikiel 3:7, SIPB) Jehovah talem Ezekiel: “Mi mekem yu fo kamap barava strong moa long tingting winim olketa. Bae mi mekem yu fo kamap strong fogud olsem ston wea hemi had fogud, an bae yu winim olketa nomoa. Nomata olketa i pipol hu i barava agensim mi olowe nao, bat yu mas no fraetem olketa.” (Esikiel 3:8, 9, SIPB) Hem olsem Jehovah sei lo Ezekiel: ‘No letem olketa wea les for lisin lo iu for mekem iu discourage. Bae mi helpem iu.’
9 Bihaen datwan, holy spirit tekem Ezekiel go lo territory blo hem for preach. Ezekiel sei: “[Jehovah] hemi tasim mi long bikfala paoa blong hem.” Hem tekem wan week for Ezekiel ting raonem and minim gud message wea hem mas talemaot lo olketa. (Esikiel 3:14, 15, SIPB) Then Jehovah leadim Ezekiel go lo wanfala valley and hem ‘putum paoa [“holy spirit”] blong hem insaet long hem.’ (Esikiel 3:23, 24, SIPB) Datwan mekem Ezekiel redi for preach.
HOLY SPIRIT BLO GOD HELPEM IUMI
Olsem Ezekiel, wat nao helpem iumi for gohed duim ministry blo iumi? (Lukim paragraf 10)
10. Wat nao iumi needim for helpem iumi for duim preaching waka, and why nao olsem?
10 Wat nao iumi needim for helpem iumi for duim preaching waka? Tingim samting wea happen lo Ezekiel. Bifor hem start for preach, God givim holy spirit lo hem for strongim hem. Iumi tu needim holy spirit blo God for helpem iumi for duim preaching waka. Why nao olsem? Bikos Satan faetem iumi mekem iumi stop for duim preaching waka. (Rev. 12:17) Maet iumi tingse from Satan hem strong tumas, iumi no savve winim hem. Bat taem iumi gohed for preach, datwan showimaot iumi winim hem! (Rev. 12:9-11) Hao nao olsem? Evritaem iumi preach, iumi showimaot iumi no fraetem Satan, so iumi winim hem nao. So iumi luksavve iumi fit for gohed preach nomata olketa enemy againstim iumi, bikos holy spirit blo God helpem iumi and Jehovah hapi lo iumi.—Matt. 5:10-12; 1 Pet. 4:14.
11. Hao nao holy spirit savve helpem iumi, and wat nao iumi savve duim for kasem?
11 Wat nao iumi lanem taem iumi ting abaotem hao Jehovah mekem Ezekiel for kamap strong fogud olsem ston? Iumi lanem hao holy spirit savve helpem iumi for deal witim eni hard taem wea maet iumi feisim lo ministry. (2 Cor. 4:7-9) So wat nao iumi savve duim for kasem holy spirit blo God? Iumi need for prea lo Jehovah evritaem, and iumi sure hem bae herem olketa prea blo iumi. Jesus sei lo olketa disaepol: “Gohed for ask, . . . gohed for lukaotem, . . gohed for noknok.” Then, Jehovah bae “givim holy spirit long olketa wea askem hem.”—Luke 11:9, 13; Acts 1:14; 2:4.
TOKTOK BLO GOD STRONGIM EZEKIEL
12. Olsem Esikiel 2:9–3:3 (SIPB) storyim, wea nao datfala scroll kam from, and wat nao hem storyim?
12 God iusim holy spirit for strongim Ezekiel and hem iusim tu toktok blo hem. Lo wanfala vision, Ezekiel lukim hand wea holem wanfala scroll. (Readim Esikiel 2:9–3:3, SIPB.) Scroll hia kam from wea, wat nao hem storyim, and hao nao hem strongim Ezekiel? Datfala scroll hem kam from God. Luk olsem Jehovah iusim angel for givim scroll hia lo Ezekiel, wea hem wanfala lo fofala angel wea Ezekiel lukim lo nara vision. (Esikiel 1:8; 10:7-8, 20, SIPB) Datfala scroll storyim wanfala judgment message blo God wea Ezekiel mas talemaot lo olketa bighed Jew. (Esikiel 2:7, SIPB) Datfala message stap lo front and bihaen lo datfala scroll.
13. Wat nao Jehovah talem Ezekiel for duim lo datfala scroll, and why nao hem swit?
13 Jehovah talem Ezekiel for kaikaim datfala scroll “mekem [hem] fulap.” Ezekiel obey and kaikaim datfala full scroll. Wat nao diswan hem minim? Ezekiel need for minim gud message wea hem bae talemaot. Hem mas barava bilivim datfala message mekem hem no fraet for talemaot. Then wanfala sapraesing samting hem happen. Ezekiel sei datfala scroll hem “suit fogud olsem hani.” (Esikiel 3:3, SIPB) Hao nao olsem? Bikos for Ezekiel, hem wanfala naes privilege for representim Jehovah. (Sams 19:8-11, SIPB) Hem tinghae lo hao Jehovah chusim hem for kamap profet.
14. Wat nao helpem Ezekiel for redi for duim assignment blo hem?
14 Bihaen datwan Jehovah sei lo Ezekiel: “Ting raonem gud and lisin lo evri toktok wea mi talem lo iu.” (Ezek. 3:10) Jehovah talem Ezekiel for memorizem toktok insaed lo scroll and for ting raonem. Datwan barava strongim faith blo Ezekiel. And tu, datwan mekem hem redi for talemaot datfala strong judgment message lo olketa Jew. (Esikiel 3:11, SIPB) Taem Ezekiel minim gud and barava bilivim datfala message, hem redi for duim datfala assignment.—Sams 19:14, SIPB.
TOKTOK BLO GOD STRONGIM IUMI
15. For iumi gohed duim ministry, wat nao iumi need for “ting raonem gud”?
15 Olsem Ezekiel, for iumi gohed duim ministry blo iumi, iumi needim toktok blo God for strongim iumi. Iumi need for “ting raonem gud” evri toktok wea Jehovah talem lo iumi. Distaem Jehovah iusim Bible for story lo iumi. Wat nao iumi savve duim mekem toktok blo God affectim tingting and feeling blo iumi, and mekem iumi laek for duim samting?
16. Wat nao iumi mas duim for garem strong faith and for minim gud Bible?
16 Taem iumi kaikai, datwan savve strongim body blo iumi. Lo sem wei tu, taem iumi studyim Bible and ting raonem, datwan strongim faith blo iumi. Olsem Ezekiel kaikaim datfala scroll, Jehovah laekem iumi for kaikaim toktok blo hem “mekem [iumi] fulap,” or for minim gud datwan. For iumi duim olsem, first samting, iumi mas prea for redyim heart blo iumi for minim tingting blo God. Then iumi readim samting from Bible, and then iumi tek taem for ting raonem wanem iumi readim. Taem iumi duim olsem, bae iumi minim gud toktok blo God and datwan bae strongim faith blo iumi.
17. Why nao hem important for ting raonem wanem iumi readim lo Bible?
17 Why nao hem important for readim Bible and ting raonem? Datwan bae strongim iumi for preachim Kingdom message distaem and redi for talemaot wanfala strong judgment message wea maet iumi bae preachim lo future. And tu, taem iumi ting raonem olketa gudfala wei blo Jehovah, iumi bae fren gud witim hem. Datwan bae mekem iumi kasem wanfala naes samting, wea hem nao peace and for satisfae.—Sams 119:103, SIPB.
IUMI LAEK FOR GOHED DUIM MINISTRY
18. Wat nao bae pipol lo territory luksavve lo hem?
18 Ezekiel hem wanfala profet. Nomata iumi no profet, iumi laek for gohed talemaot message blo Jehovah wea hem stap lo Bible go kasem taem Jehovah sei for iumi stop for preach. So taem Jehovah judgem pipol lo territory, olketa bae no garem reason for sei olketa no kasem eni warning or God no tingim olketa. (Esikiel 3:19; 18:23, SIPB) Bat olketa bae luksavve message wea iumi talemaot hem kam from God.
19. Wat nao bae strongim iumi for gohed duim ministry blo iumi?
19 Wat nao bae strongim iumi for gohed duim ministry blo iumi? Thrifala sem samting wea strongim Ezekiel. Iumi gohed for preach bikos iumi savve Jehovah nao sendem iumi, holy spirit blo God hem helpem iumi, and toktok blo God hem strongim iumi. Witim help blo Jehovah, iumi laek for gohed duim ministry blo iumi “go kasem taem world hem finis.”—Matt. 24:13.
SONG 65 Waka Hard!
a Lo disfala article, iumi bae storyim thrifala samting wea helpem Ezekiel, profet blo Jehovah, for duim assignment blo hem for preach. Taem iumi storyim hao Jehovah helpem Ezekiel, datwan bae mekem iumi for sure Jehovah bae helpem iumi tu for gohed duim ministry blo iumi.