STUDY ARTICLE 46
Hao Jehovah Helpem Iumi for No Givap and Gohed Hapi
“Jehovah hem patient for weit for showim kaen fasin lo iufala, and hem bae getap for showim mercy lo iufala.”—ISA. 30:18.
SONG 3 Jehovah Givim Strong, Hope, and Wei for No Fraet
ARTICLE BAE STORYIM a
1-2. (a) Olketa wanem kwestin nao bae iumi storyim? (b) Wat nao showimaot Jehovah barava laek for helpem iumi?
JEHOVAH savve helpem iumi for deal witim olketa hard taem and for gohed hapi taem iumi worshipim hem. Hao nao hem helpem iumi? And wanem gud samting nao iumi kasem from datwan? Bae iumi storyim ansa blo olketa kwestin hia lo disfala article. Bat bifor iumi storyim datwan, bae iumi ansarem disfala kwestin: Waswe, Jehovah barava laek for helpem iumi?
2 Toktok blo aposol Paul lo leta blo hem for olketa Hebrew Christian savve helpem iumi for kasem ansa. Paul sei: “Jehovah nao hem helpem mi. Bae mi no fraet. No eniwan savve spoelem mi.” (Heb. 13:6) Wanfala Bible dictionary sei lo disfala verse datfala word “helpem” hem minim samwan wea ran for helpem narawan wea singaot for help. Tingim, Jehovah bae hariap for sevem samwan wea barava needim help. Diswan mekem iumi luksavve Jehovah stanbae and barava willing for helpem iumi. Iumi sure from Jehovah helpem iumi, bae iumi no givap and gohed hapi nomata iumi kasem hard taem.
3. Wat nao thrifala samting wea Jehovah duim for helpem iumi no givap and gohed hapi nomata iumi kasem hard taem?
3 Wat nao Jehovah duim for helpem iumi for no givap and gohed hapi nomata iumi kasem hard taem? Bible buk Isaiah bae helpem iumi for kasem ansa bikos staka profesi wea Isaiah raetem, hem fitim pipol blo Jehovah distaem. And tu, staka taem wea Isaiah story abaotem Jehovah hem iusim toktok wea isi for iumi minim. Wanfala example hem Isaiah chapter 30. Lo datfala chapter, Isaiah storyim hao Jehovah helpem iumi wea worshipim hem (1) from hem lisin gud and ansarem olketa prea blo iumi, (2) from hem teachim iumi, and (3) from iumi kasem olketa blessing from hem distaem and lo future tu. Distaem bae iumi story raonem thrifala samting hia.
JEHOVAH LISIN LO IUMI
4. (a) Wat nao Jehovah talem abaotem olketa Jew lo taem blo Isaiah, and wat nao happen lo olketa? (b) Wanem hope nao olketa Jew wea faithful garem? (Isaiah 30:18, 19)
4 Lo Isaiah chapter 30 verse 1, Jehovah sei olketa Jew olsem “olketa son wea bighed” and olketa “gohed nomoa for duim sin.” Lo verse 9 Jehovah sei olketa “bighed pipol, . . . wea no willing for followim law blo Jehovah.” (Isa. 30:1, 9) From olketa les for obeyim Jehovah, Isaiah sei Jehovah bae letem olketa for kasem trabol. (Isa. 30:5, 17; Jer. 25:8-11) And datwan happen taem olketa lo Babylon tekem olketa Jew go lo Babylon olsem prisoner. Bat samfala Jew hia faithful lo Jehovah and Isaiah storyim message wea givim olketa hope. Hem sei wanday Jehovah bae helpem olketa for go bak moa lo Jerusalem. (Readim Isaiah 30:18, 19.) And hem nao wanem Jehovah duim taem hem mekem olketa free from Babylon. Bat datwan no happen stretawe. Taem Isaiah sei “Jehovah hem patient for weit for showim kaen fasin lo iufala,” datwan showim samfala year bae go pas bifor Jehovah sevem olketa. Olketa Israelite stap lo Babylon for 70 year bifor samfala lo olketa savve go bak lo Jerusalem. (Isa. 10:21; Jer. 29:10) Olketa Israelite barava sorre taem olketa stap olsem prisoner lo Babylon, bat taem olketa go bak lo hom land blo olketa, olketa hapi tumas.
5. Wanem encouragement nao iumi kasem from Isaiah 30:19?
5 Distaem iumi savve kasem encouragement from toktok blo Isaiah. Hem sei: “Hem bae barava kaen lo iu taem iu krae lo hem for help.” (Isa. 30:19) Isaiah helpem iumi for luksavve hao Jehovah bae lisin gud taem iumi askem hem for help and bae stretawe ansarem olketa prea blo iumi. Isaiah sei: “Hem bae ansarem iu lo semtaem wea hem herem.” Olketa toktok hia mekem iumi sure hao Jehovah barava laek for helpem olketa wea askem hem for help. From iumi savve lo datwan, bae iumi no givap nomata iumi kasem hard taem.
6. Hao nao toktok blo Isaiah showimaot Jehovah lisin gud lo prea blo each wan lo iumi?
6 Wanem moa iumi savve lanem from Isaiah 30:19? Jehovah lisin gud lo prea blo each wan lo iumi. Hao nao iumi savve lo datwan? Lo first part blo Isaiah chapter 30, Jehovah story lo evri Jew. Bat lo verse 19 hem story for each wan lo olketa. Isaiah sei: “Iu bae no krae moa,” “hem bae barava kaen lo iu,” and “hem bae ansarem iu.” Wanfala dadi wea lovem olketa pikinini blo hem bae no comparem pikinini wea discourage witim brata or sista blo hem wea strong. Olsem tu, Jehovah lovem each wan lo iumi and lisin gud lo evri prea blo iumi.—Sams 116:1, SIPB; Isa. 57:15.
Wat nao Isaiah minim taem hem sei: “No letem [Jehovah] rest”? (Lukim paragraf 7)
7. Hao nao Isaiah and Jesus showimaot hem important for gohed prea abaotem wanem iumi needim?
7 Taem iumi prea lo God and talem hem hard samting wea kasem iumi, maet firstaem Jehovah givim iumi strong for deal witim datwan. Bat if datfala hard taem hem no finis kwiktaem, maet iumi need for gohed askem Jehovah for strongim iumi for no givap. Hem laekem iumi for duim datwan, and toktok blo Isaiah showimaot datwan. Hem sei: “No letem [Jehovah] rest.” (Isa. 62:7) Datwan minim iumi shud gohed prea lo Jehovah, olsem iumi no letem hem for rest. Disfala toktok blo Isaiah mekem iumi tingim tokpiksa blo Jesus abaotem prea lo Luke 11:8-10, 13. Jesus encouragem iumi for “no shame for gohed askem samting” and for “gohed for ask” for holy spirit. Iumi savve askem Jehovah tu for teachim iumi, for iumi mekem olketa gud disison.
JEHOVAH TEACHIM IUMI
8. Hao nao toktok lo Isaiah 30:20, 21 hem kamap tru lo bifor?
8 Readim Isaiah 30:20, 21. Taem army blo Babylon camp raonem Jerusalem for wan and haf year, hard taem wea olketa Jew kasem hem kamap normal, olsem bred and wata. Bat lo verse 20 and 21, Jehovah promisim olketa Jew if olketa repent and changem wei blo olketa, bae hem sevem olketa. Isaiah sei Jehovah hem “Nambawan Teacher” blo olketa and sei Jehovah bae teachim olketa for worshipim hem lo stretfala wei. Datwan kamap tru taem olketa Jew kamap free from Babylon. Jehovah, Nambawan Teacher blo olketa, givim instruction lo olketa and datwan helpem olketa for worshipim hem moa lo stretfala wei. Iumi hapi Jehovah hem Nambawan Teacher blo iumi distaem.
9. Wat nao wanfala samting Jehovah iusim for teachim iumi distaem?
9 Lo datfala verse Isaiah storyim iumi olsem olketa student blo Jehovah and hem iusim tufala samting for teachim iumi. Isaiah helpem iumi for minim first samting taem hem sei: “Iufala bae lukim Nambawan Teacher blo iufala lo eye blo iufala.” Lo disfala tokpiksa, olketa student lukim Teacher standap lo front and hem redi for teachim olketa. Distaem, iumi garem privilege for Jehovah teachim iumi. Hao nao hem duim datwan? Hem iusim organization blo hem for givim iumi olketa kliafala instruction wea savve helpem iumi, and iumi barava tinghae lo datwan. Iumi kasem olketa instruction from organization lo olketa meeting, convention, olketa pablikeson blo iumi, JW Broadcasting®, and lo staka nara wei. Datwan helpem iumi for no givap and gohed hapi nomata iumi feisim olketa hard taem.
10. Hao nao iumi herem “voice blo God bihaen lo [iumi]”?
10 Isaiah storyim mek-tu samting wea Jehovah iusim for teachim iumi. Hem sei: “Ear blo iu bae herem wanfala voice bihaen lo iu.” Lo tokpiksa hia, Jehovah hem Teacher wea wakabaot bihaen olketa student blo hem, and hem teachim olketa stretfala wei for followim. So hao nao iumi herem voice blo God bihaen lo iumi distaem? Hem iusim Bible wea olketa raetem longtaem go finis. Taem iumi readim Bible, hem olsem iumi herem voice blo God bihaen lo iumi.—Isa. 51:4.
11. Wat nao iumi need for duim mekem iumi no givap and gohed hapi, and why nao olsem?
11 Wanem nao iumi savve duim for kasem gud samting from olketa instruction wea iumi kasem from organization and Bible? Isaiah storyim tufala samting for ansarem disfala kwestin. First samting, “diswan nao road.” And mek-tu samting, “wakabaot followim.” (Isa. 30:21) Toktok hia showimaot hem no inaf for savve nomoa lo “road,” bat iumi need for “wakabaot followim.” Distaem, iumi lanem wanem Jehovah laekem bikos organization blo Jehovah helpem iumi for minim Bible. And iumi lanem tu hao for followim wanem iumi lanem. For iumi gohed hapi lo worship blo iumi for Jehovah, iumi need for duim tufala samting hia. Then iumi savve sure iumi bae kasem blessing from Jehovah.
IUMI KASEM BLESSING FROM JEHOVAH
12. Olsem Isaiah 30:23-26 storyim, wanem nao olketa blessing wea olketa Jew kasem from Jehovah?
12 Readim Isaiah 30:23-26. Hao nao disfala profesi kamap tru for olketa Jew wea go bak lo Israel bihaen olketa free from Babylon? Olketa kasem staka blessing lo physical and lo spiritual wei. Jehovah givim staka kaikai for pipol blo hem. Bat main samting, hem givim olketa staka spiritual kaikai wea helpem olketa for worshipim hem moa lo stretfala wei. Olketa spiritual blessing wea olketa kasem lo datfala taem hem winim eni nara taem. Olsem verse 26 storyim, Jehovah mekem laet hem braet, wea minim hem helpem olketa for savve gud lo toktok blo hem. (Isa. 60:2) Olketa blessing hia helpem olketa Jew for gohed hapi for worshipim hem “bikos heart blo olketa hem feel gud.”—Isa. 65:14.
13. Hao nao datfala profesi abaotem tru worship hem kamap tru distaem?
13 Waswe, datfala profesi abaotem tru worship hem kamap tru distaem tu? Yes! Hao nao olsem? Start lo 1919 C.E., staka million pipol kamap free from Bigfala Babylon, wea hem nao evri false religion lo world. Olketa insaed wanfala spiritual paradaes wea winim datfala Promis Land wea olketa Israelite stap lo hem bifor. (Isa. 51:3; 66:8) Wat nao datfala spiritual paradaes?
14. Wat nao datfala spiritual paradaes, and hu nao stap insaed? (Lukim Mining blo Wanfala Toktok.)
14 Start lo 1919 C.E., olketa anointed wan stap insaed lo wanfala spiritual paradaes. b Gogo, “olketa nara sheepsheep,” wea garem hope for stap lo earth tu stap insaed lo datfala spiritual paradaes and kasem staka blessing from Jehovah.—John 10:16; Isa. 25:6; 65:13.
15. Wea nao datfala spiritual paradaes hem stap?
15 Wea nao datfala spiritual paradaes hem stap? From pipol blo Jehovah stap evriwea lo world, datfala spiritual paradaes hem stap evriwea lo world tu. So distaem, nomata wea nao iumi stap lo world, taem iumi strong for sapotim tru worship, iumi insaed datfala spiritual paradaes nao.
Wat nao each wan lo iumi savve duim for mekem iumi evriwan stap gud insaed lo spiritual paradaes? (Lukim paragraf 16-17)
16. Hao nao iumi savve gohed tinghae lo olketa brata and sista wea stap insaed lo spiritual paradaes?
16 For iumi gohed stap lo spiritual paradaes, wanfala samting iumi mas duim, hem for tinghae lo olketa brata and sista insaed kongregeson. Iumi need for tingim gud saed blo olketa and no evritaem tingim wik point blo olketa. (John 17:20, 21) Why nao hem important for duim datwan? Tingim disfala example. Sapos iumi go lo wanfala naes forest or park, bae iumi lukim staka difren kaen tree. Olsem tu, Isaiah comparem olketa wea stap insaed lo spiritual paradaes witim olketa tree. (Isa. 44:4; 61:3) Iumi need for gohed tingim hao datfala “forest” hem luk naes, and no tingim nomoa samfala samting wea iumi no laekem abaotem olketa “tree” hia. Iumi no laekem wik point blo iumi or wik point blo olketa narawan for spoelem hao iumi wan mind for worshipim Jehovah witim evri brata and sista.
17. Wat nao each wan lo iumi savve duim for helpem kongregeson gohed garem wan mind?
17 Wat nao each wan lo iumi savve duim for helpem kongregeson gohed garem wan mind? Hem nao for iumi stap gud witim narawan. (Matt. 5:9; Rome 12:18) Evritaem iumi stretem problem witim wanfala brata or sista, datwan mekem kongregeson gohed for wan mind. Hem gud for tingim hao Jehovah leadim kam each wan wea stap insaed lo spiritual paradaes for worshipim hem. (John 6:44) Masbi Jehovah barava hapi taem hem lukim iumi waka hard for stap gud and gohed wan mind witim olketa brata and sista wea hem leadim kam.—Isa. 26:3; Hagae 2:7, SIPB.
18. Wat nao iumi shud gohed ting raonem, and why nao olsem?
18 Wat nao iumi savve duim for iumi kasem gud samting from olketa blessing wea Jehovah givim lo iumi? Iumi need for ting raonem wanem iumi studyim lo Bible and olketa pablikeson blo iumi. Datwan bae mekem iumi for garem olketa gudfala wei wea savve helpem iumi for “lovem olketa narawan” lo kongregeson. (Rome 12:10) Taem iumi ting raonem olketa blessing wea iumi kasem from Jehovah, datwan bae mekem iumi fren gud witim hem. And taem iumi ting raonem olketa blessing wea bae iumi kasem lo future, datwan bae strongim hope blo iumi. Evri samting hia bae mekem iumi hapi for gohed worshipim Jehovah distaem.
IUMI NO LAEK GIVAP
19. (a) Olsem Isaiah 30:18 storyim, wat nao iumi sure Jehovah bae duim? (b) Wat nao bae helpem iumi for no givap and gohed hapi lo worship blo iumi?
19 Taem Jehovah finisim disfala nogud world, Isaiah sei hem olsem hem “getap” for sevem iumi. (Isa. 30:18) Iumi sure Jehovah hem “God blo justice” and hem bae finisim world blo Satan. (Isa. 25:9) Iumi patient for weit witim Jehovah for datfala day wea hem bae sevem iumi. Bat distaem iumi gohed and no givap for prea lo Jehovah, studyim Bible and followim wanem iumi lanem, and ting raonem evri blessing wea iumi kasem. Taem iumi duim olketa samting hia, Jehovah bae helpem iumi for no givap and gohed hapi lo worship blo iumi.
SONG 142 Hol Strong Long Hope Bilong Iumi
a Disfala article bae storyim thrifala samting wea Jehovah duim for helpem iumi for no givap and gohed hapi nomata iumi kasem hard taem. Isaiah chapter 30 bae helpem iumi for ting raonem thrifala samting hia. Taem iumi storyim disfala chapter, bae iumi tingim hao hem important for prea lo Jehovah, studyim Bible, and ting raonem olketa blessing wea iumi kasem distaem and wea bae iumi kasem lo future.
b MINING BLO WANFALA TOKTOK: Iumi insaed lo “spiritual paradaes” taem iumi wan mind for worshipim Jehovah. Jehovah teachim iumi olketa tru samting wea helpem iumi for worshipim hem lo stretfala wei, and iumi garem staka waka for duim for preachim gud nius abaotem Kingdom blo God. Iumi fren gud witim Jehovah, and iumi stap gud witim olketa brata and sista wea lovem iumi and helpem iumi for no givap and gohed hapi nomata iumi feisim olketa hard taem. Iumi go insaed datfala spiritual paradaes taem iumi start for worshipim Jehovah lo stretfala wei and taem iumi duim best for followim example blo hem.